Wan Kwestin

?Tufala tok ya blong Baebol, “ol narafala sipsip” mo “bigfala hif blong man,” oli rili gat defren mining?

Yes, be tingting blong yumi i no mas trabol tumas from fasin blong yusum ol wod. Mo tu, yumi no mas harem nogud sipos wan man i mestem, i yusum wan long tufala tok ya long ples blong narawan.

Bighaf blong ol Kristin oli savegud ol vas we tufala tok ya i stap long olgeta. Wan long ol vas ya, hemia Jon 10:16. Long ples ya, Jisas i talem se: “Mi gat ol narafala sipsip bakegen tu blong mi we oli no blong yad ya. Bambae mi mas tekem olgeta ya tu oli kam. Olgeta ya bambae oli harem voes blong mi, nao bambae olgeta sipsip ya evriwan oli kam wan kampani nomo, we i gat wan man nomo blong lukaot long olgeta.” Narawan, “bigfala hif blong man,” i stap long Revelesen 7:9. Yumi ridim se: “Biaen long samting ya, mi mi luk bakegen, nao i gat wan bigfala hif blong man we i plante tumas, i no gat man i save kaontem olgeta. Ol man ya oli kamaot long olgeta kala mo long olgeta laen, mo long olgeta kantri, mo long olgeta lanwis. Olgeta oli werem waet klos, mo oli stap holem lif kokonas long han blong olgeta.”

Fastaem, i gud yumi tokbaot Jon 10:16. ?Hu ya ol sipsip? Yes, i gud blong tingbaot se, Jisas i tokbaot ol man blong hem evriwan, olsem ol sipsip. Long Luk 12:32, hem i kolem ol disaepol blong hem, we oli blong go long heven, se ‘smol kampani.’ ?Kampani blong wanem? Kampani blong ol sipsip. Ol “sipsip” blong ‘smol kampani,’ bambae oli haf blong Kingdom blong heven. Be, i gat sam narafala bakegen, olgeta we oli gat wan defren hop, we Jisas i tingbaot olgeta olsem ol sipsip.

Yumi save luk samting ya long Jon japta 10. Afta we Jisas i tokbaot ol sipsip ya we i minim ol aposol blong hem, we bambae hem i singaot olgeta blong go long heven, hem i ademap long vas 16 se: “Mi gat ol narafala sipsip bakegen tu blong mi we oli no blong yad ya. Bambae mi mas tekem olgeta ya tu oli kam.” Longtaem finis, ol Wetnes blong Jeova oli luksave se long vas ya, Jisas i stap tokbaot olgeta we oli gat hop blong laef long wol. Bifo long Kristin taem, plante man we oli stap tru long God, olsem Ebraham, Sera, Noa, mo Malakae, oli gat hop ya. Ale, i stret nomo we yumi save talem se, olgeta ya oli haf blong “ol narafala sipsip” we Jon 10:16 i tokbaot. Long Rul blong Wan Taosen Yia, ol wetnes ya we oli laef bifo long Kristin taem, bambae oli girap, oli laef bakegen. Mo long taem ya, bambae oli kasem save long saed blong Jisas Kraes mo akseptem hem. Nao bambae oli kam “ol narafala sipsip” blong Gudfala Man ya blong Lukaot long Sipsip.

Yumi save tu se, afta long taem we namba blong ol man blong go long heven i kasem fulmak blong hem, i gat plante milyan man we oli kam ol trufala Kristin. Olgeta ya tu, i stret blong yumi kolem olgeta se “ol narafala sipsip,” from we oli no haf blong ‘smol kampani.’ Be, ol narafala sipsip tede, oli tingbaot blong stap laef gogo wol ya i kam wan paradaes.

Ale, ?olsem wanem blong save hu nao “bigfala hif blong man” we Revelesen 7:9 i tokbaot? Traem luk vas 13, we i askem kwestin ya, ‘?Hu ya ol man ya? ?Mo weples oli kamaot long hem?’ Yumi faenem ansa long Revelesen 7:​14, se: ‘Hemia ol man ya we oli pastru long bigfala trabol.’ Olsem nao, “bigfala hif blong man,” hemia ol man we oli kamaot, no oli pastru, long bigfala trabol we bambae i kamaot long ful wol. Olsem vas 17 i talem, bambae Smol Sipsip i “lidim olgeta oli go dring long ol springwora ya we i save givim laef” long wol.

Be, i stret se ol man ya we bambae oli pastru long bigfala trabol we i kolosap nomo, oli mas wasem klos blong olgeta long blad blong Smol Sipsip, mo kam ol trufala man blong wosip, bifo we bigfala trabol ya i kamaot. I tru se Revelesen 7:9 i tokbaot bigfala hif blong ol man ya afta long bigfala trabol. Be yumi save talem se tok ya, “bigfala hif blong man,” i stret long olgeta we oli gat hop blong laef long wol, we naoia, oli stap mekem tabu wok blong Jeova long dei mo long naet, jes bifo we bigfala trabol i faerap, taem bambae ol nesen oli agensem ol gyaman skul.

Bigfala poen se, i gud yumi tingbaot se, tok ya “ol narafala sipsip,” i minim olgeta man blong God evriwan, we oli gat hop blong laef foreva long wol. Olgeta ya we oli olsem sipsip, we tede oli stap hivap olsem wan “bigfala hif blong man,” we oli gat hop blong laef tru long bigfala trabol we i kolosap nomo, olgeta ya tu oli haf blong “ol narafala sipsip.” Bighaf blong ol trufala Kristin we oli stap laef tede, oli memba blong “ol narafala sipsip,” mo tu, oli haf blong “bigfala hif blong man.”

I stret blong kasem savegud long mining blong tufala tok ya. Be, i gud blong talem bakegen se, tingting blong wan Kristin i no mas trabol tumas from ol tok, olsem we oli faet from ol tok. Pol i givim woning long saed blong samfala man we ‘tingting blong olgeta i antap tumas’ mo oli stap “rao long ol tok.” (1 Timote 6:4) Sipos wanwan long yumi i luksave mining we i defren long tufala tok ya, hemia i gud. Be, long tingting no fasin blong yumi, yumi no mas agensem narafala, we maet i no yusum tufala tok ya long fasin we i stretgud.