Hem i Mekem Rod Blong Mesaea

WAN bigfala strap we oli wokem long skin blong buluk, i stret wetem kala blong skin blong hem, we san i bonem gud. Ol klos blong hem, oli wokem long hea blong kamel. Hem i rili luk olsem wan profet. Plante man oli kam long hem long Jodan reva. Long ples ya, man ya we ol man oli wantem luk hem, i no fraet nating blong talemaot se, hem i rere blong baptaesem olgeta man we oli tanem baksaed long ol sin blong olgeta.

!Ol man oli sapraes tumas! ?Hu ya man ya? ?From wanem hem i mekem samting ya?

Jisas Kraes i talem long saed blong man ya se: “?Yufala i go blong luk wanem? ?Wan profet, a? Yes, be mi mi talem long yufala, man ya i moa, i winim profet. . . . Long olgeta we i bon long wol ya, i no gat man we i hae moa, i winim Jon Baptaes.” (Matyu 11:​9-11) ?From wanem Jon i wan impoten man olsem? From we hem i mekem rod blong Mesaea.

Profet Tok i Talemaot Wok Blong Hem

Bitim 700 yia bifo we Jon i bon, Jeova i talemaot se bambae man ya i singaot long draeples se: “!Yufala i mekemrere rod blong Jeova! Yufala i stretem rod we bambae God blong yumi i wokbaot long hem blong krosem draeples.” (Aesea 40:3; Matyu 3:3) Samwe 400 yia bifo we Jon i bon, God ya we i Gat Olgeta Paoa, i talemaot se: “!Yufala i luk! Bambae mi sanem long yufala profet ya Elaeja, bifo long bigfala dei blong Jeova we i mekem ol man oli fraet.” (Malakae 4:5) Jon Baptaes i bon raonabaot sikis manis bifo Jisas. Samting ya i folem wan plan, i no olbaot nomo. Mo tu, samting ya i hapen long wan spesel fasin. Olsem pikinini ya Aesak we i bon folem promes blong God, Jon tu i bon tru long wan merikel, from we papa mama blong hem, Sekaraea mo Elisabet, tufala i olfala tumas blong karem pikinini.​—Luk 1:18.

Bifo we Elisabet i gat bel wetem Jon, enjel Gabriel i talemaot spesel mining blong laef blong hem, wok blong hem, mo fasin blong laef blong hem. Wetem sem paoa mo tingting we Elaeja i gat long taem bifo, bambae Jon i mekem ol man we oli no stap obei, oli lego rod we i go long ded. Mo bambae hem i mekem olgeta oli rere blong luksave Jisas olsem Mesaea. Stat long taem we Jon i bon, hem i wan Nasaraet, i min se ful laef blong hem i blong God nomo, mo hem i no mas dring waen no enikaen strong dring. Mo hem i stap kakae “lokis wetem eg blong sugabag blong bus.” (Mak 1:6; Namba 6:​2, 3; Luk 1:​13-17) Olsem Samuel, taem Jon i pikinini nomo, Hae God i jusumaot hem finis blong mekem nambawan wok blong hem.​—1 Samuel 1:​11, 24-28.

God i jusum nem blong Jon tu. Long lanwis Hibru, nem ya “Jon” i minim “Jeova i Soem Kaengud Fasin” no “Jeova i Mekem i Gud.”

Taem oli mekem sakomsaes long pikinini ya long namba eit dei, tabu speret blong God i pusum papa blong hem, Sekaraea, blong talem se: “Yu ya, smol pikinini blong mi, ol man bambae oli save singaot yu, se profet blong God ya we i Antap Tumas from we yu bambae yu go fastaem blong mekem rere ol rod blong Hae God. Yu bambae yu talemaot long ol man we God bambae i sevem olgeta, from we hem bambae i tekemaot ol sin blong olgeta. God blong yumi, hem i kaen tumas mo hem i gat sore long yumi, mo bambae hem i tekem wan man i aot long heven, i kamtru long yumi, we hem bambae i givim laet long yumi.” (Luk 1:​76-78) Pablik minista wok blong Jon i mas kam bigfala samting long laef blong hem. Ol narafala samting oli no impoten olsem wok ya. Taswe, Baebol i kavremap 30 yia long laef blong Jon long wan vas nomo, se: “Nao pikinini ya i gruap, mo tingting blong hem i kam strong long wok blong God. Mo oltaem, hem i stap long drae ples, i stap wet long taem we bambae hem i kamaot long open ples, long fes blong ol man Isrel.”​—Luk 1:80.

Wan Voes Long Draeples

Long namba 15 yia long rul blong Taebirias Sisa, taem Ponjes Paelet i stap hed gavman long Judia, Jon Baptaes i kamtru long draeples, wetem mesej ya we i mekem ol man oli sapraes: “Yufala i mas tanem tingting blong yufala from ol sin blong yufala, from we taem blong God i kam king blong ol man blong hem, hem i kam kolosap nao.” (Matyu 3:2; Mak 1:4; Luk 3:​1, 2) Hem i wekemap tingting blong olgeta man raonabaot long ples ya. Klia mesej ya i tajem hat blong ol man we oli wantem tumas blong gat wan trufala hop. Mo tu, tok ya blong Jon i traem ol man, blong luk sipos oli gat tingting daon, from we i talem se oli mas tanem tingting blong olgeta from ol sin blong olgeta, wetem ful hat blong olgeta. Fasin blong Jon blong talem tok we i kamaot stret long hat blong hem mo blong tok wetem bilif, i pulum plante man we oli gat gudhat, blong luksave hem olsem wan man we God i sanem.

Kwiktaem nomo, plante man oli save long Jon. I isi long ol man blong luksave hem olsem wan profet blong Jeova, from klos blong hem mo from fasin blong hem blong givim dip ona long God. (Mak 1:6) Ol pris mo Livaet tu, oli aot long Jerusalem oli kam, blong faenemaot wanem nao i stap pulum ol man. ?Tanem tingting long ol sin? ?From wanem, mo tanem tingting long wanem sin? ?Hu ya man ya? Oli wantem save. Jon i eksplenem se: “ ‘Mi ya mi no Mesaea.’ Nao oli askem long hem se: ‘?Oraet, be yu hu? ?Yu Elaeja?’ Be Jon i ansa se: ‘No, mi mi no hemia.’ ‘?Ale, yu hu? ?Yu profet ya we olgeta bifo oli bin talemaot?’ Be hem i talem se: ‘No.’ Nao oli askem se: ‘?Ale, be yu wanem man? Mifala i mas gat tok blong talem long olgeta ya we oli sanem mifala. ?Wanem tok blong yu blong talemaot yu?’ Nao Jon i ansa long olgeta, i talem se: ‘Mi mi man ya we profet Aesea i tokbaot longtaem finis, i se, “Wan man i stap singaot long drae ples, i se, Yufala i stretem rod blong Hae God.” ’ Nao ol man ya we ol Farisi oli sanem olgeta, oli askem kwestin long Jon bakegen, se, ‘?Sipos yu yu no Mesaea, mo yu no Elaeja, mo yu no profet ya we olgeta bifo oli bin talemaot, olsem wanem yu stap mekem baptaes?’ ”​—Jon 1:​20-25.

Tanem tingting from ol sin mo baptaes, hemia ol impoten samting we man i mas mekem, blong hem i naf blong go insaed long Kingdom. Taswe, Jon i ansa se: ‘Mi mi kam fastaem, mi stap baptaesem yufala long wora. Be hemia we i hae moa long mi, hem i stap kam. Mi olsem, mi no naf blong tekemaot strap blong sandel blong hem. Mo hem bambae i baptaesem yufala long tabu speret mo long faea. Hem i stap holem wan savel blong klinimaot ol skin blong wit. Hem i rere blong klinim ol wit blong hem. Bambae hem i tekem ol wit oli go long haos blong hem. Be skin blong wit bambae hem i bonem olgeta long faea.’ (Luk 3:​15-17; Ol Wok 1:5) Yes, bambae ol man we oli folem Mesaea oli kasem tabu speret, be ol enemi blong hem bambae oli go long faea blong lus blong olwe.

‘Olkaen Man’ Oli Kasem Woning

Tok blong Jon i pusum plante man Jyu we oli gat gudhat, blong talemaot ol sin we oli mekem agensem kontrak blong Loa. Oli soemaot long olgeta man se oli tanem tingting blong olgeta from ol sin ya, taem oli letem Jon i baptaesem olgeta long Jodan Reva. (Matyu 3:​5, 6) From samting ya, hat blong olgeta i stretgud blong bilif long Mesaea. Oli tosta tumas blong kasem ol stret save long saed blong ol samting we God i wantem se oli mekem, mo Jon i glad blong tijim olgeta olsem ol disaepol blong hem. Hem i tijim olgeta long saed blong stret rod blong prea tu.​—Luk 11:1.

Long saed blong man ya we i mekem rod blong Mesaea, aposol Jon i raetem se: ‘Hem i kam blong i wetnes long laet ya. Hem i talemaotgud laet ya long olkaen man, blong oli save bilif long laet ya from tok blong hem.’ (Jon 1:7) I gat olkaen man we oli stap kam blong harem Jon Baptaes, taem hem i stap “talemaot long olgeta man Isrel, se, ‘Yufala i mas tanem tingting blong yufala from ol sin blong yufala, yufala evriwan i mas baptaes.’ ” (Ol Wok 13:24) Hem i givim woning long ol man blong tekem takis, blong no stilim mane blong ol man. Hem i givim woning long ol soldia blong no spolem wan man, mo blong no talem sam gyaman tok agensem wan man. Mo hem i talem long ol Farisi mo Sadusi we oli gat flas tingting mo fasin tu fes, se: “Yufala i olsem snek, yufala i man blong ronwe nomo. ?Hu i talem long yufala, blong yufala i ronwe long God we hem i kros tumas, we bambae i jajem yufala i no longtaem? Sipos i tru we yufala i tanem tingting blong yufala from ol sin blong yufala, yufala i mas gat frut blong samting ya long laef blong yufala. Be i nogud yufala i flas, we yufala i stap taltalem long yufala se ‘Yumi ya laen blong Ebraham ya.’ Mi mi talem long yufala, God i save tekem ol ston ya, i save mekem olgeta oli kam laen blong Ebraham.”​—Matyu 3:​7-9; Luk 3:​7-14.

Olsem wan grup we i wok tugeta, ol lida blong skul long taem blong Jon, oli no wantem bilif long hem, mo oli talem wan gyaman tok se i gat wan devel we i stap long hem. Oli sakemaot stret rod we i save lidim olgeta i go long laef we i no save finis. Be, ol man blong tekem takis mo ol woman blong rod we oli bin mekem bigfala sin, oli bilif long tok blong Jon, nao oli tanem tingting blong olgeta from sin blong olgeta mo tekem baptaes. Long stret taem blong hem, oli bilif long Jisas Kraes olsem Mesaea.​—Matyu 21:​25-32; Luk 7:​31-33.

Hem i Soem Mesaea Long Ol Narafala

Long sikis manis​—stat kolosap long hot taem go kasem kolosap long koltaem blong 29 K.T.​—trufala wetnes blong God, Jon, i pulum tingting blong ol man Jyu i go long Mesaea we bambae i kam. Naoia i taem blong Mesaea King i kamtru. Ale, taem hem i kamtru, hem i kamdaon long wora blong Jodan tu, mo hem i askem Jon blong baptaesem hem. Fastaem, Jon i no wantem mekem, be biaen, hem i agri. Tingbaot glad blong hem, taem tabu speret i kamdaon long Jisas mo hem i harem voes blong Jeova, we i talemaot se hem i glad long Pikinini blong Hem.​—Matyu 3:​13-17; Mak 1:​9-11.

Jon i faswan blong luksave Jisas olsem Mesaea. Mo hem i soem Tabu Man ya long ol disaepol blong hem. Jon i talem se, “!Olgeta! Man ya, hem i olsem sipsip blong God, we hem bambae i tekemaot sin blong olgeta man long wol.” Hem i talem tu se, “Hemia man ya we mi stap tokbaot bifo, we mi talem se, ‘Mi mi kam fastaem, be wan i stap kam biaen long mi we hem i hae moa long mi, from we hem i stap taem mi mi no bon yet.’ Taem mi mi kam, mi no save we hemia man ya, be mi kam, mi stap mekem baptaes long wora, blong mi save soemaot man ya long ol man Isrel.”​—Jon 1:​29-37.

Jisas i gohed long minista wok blong hem. Mo long sem taem, Jon i gohed long wok blong hem blong sikis manis. Tufala wanwan i kasem save long wok we narawan i stap mekem. Jon i luk hem wan olsem fren blong man we bambae i mared, mo hem i glad blong luk Kraes i kam antap taem hem mo wok blong hem i stap godaon.​—Jon 3:​22-30.

Jisas i talemaot se Jon hem i man blong mekem rod blong hem, mo se Elaeja i poen i kam long hem. (Matyu 11:​12-15; 17:12) Wan taem, Jisas i talem se: “I kam kasem taem blong Jon Baptaes, i gat ol Loa blong Moses wetem ol tok blong ol Profet oli stap. Be naoia, biaen long Jon, i gat gud nyus ya i stap, se God i stap kam king blong ol man blong hem. Mo olgeta man oli stap traehad tumas blong kam we God i king blong olgeta.”​—Luk 16:16.

Stanap Strong Go Kasem Ded

Biaen, ol man oli holem Jon mo putum hem long kalabus, from we hem i no fraet blong talemaot trutok. Hem i no traem ronwe long wok blong hem, we hem i mas talemaot long klia ples sin blong King Herod. King ya i brekem loa blong God. Hem i stap wetem woman ya Herodias, we hem i woman blong brata blong hem. Jon i no fraet blong talemaot samting ya, blong traem mekem King Herod i tanem tingting blong hem long sin ya, mo kasem fasin fogif blong God.

!Jon i wan gudfala eksampel blong bilif mo lav! Hem i rere blong lego fasin fri we hem i gat, blong pruvum se hem i bilif fulwan long Jeova God, mo hem i gat lav long ol man raonabaot long hem. Afta we Jon i stap kalabus wan yia, oli katemaot hed blong hem, folem plan we Setan i pusum rabis woman ya Herodias blong mekem. Woman ya i stap “kros long Jon.” (Mak 6:​16-19; Matyu 14:​3-12) Be, man ya we i mekem rod blong Mesaea, i holemstrong long Jeova. I no longtaem, bambae hem i laef bakegen long ded. Mo bambae hem i haremgud blong laef long nyufala wol blong God, we stretfasin nomo i stap long hem.​—Jon 5:​28, 29; 2 Pita 3:13.