Wan Kwestin

?Olsem wanem ol “narafala sipsip” oli kasem blesing naoia from wok blong Jisas Kraes olsem hae pris, we Hibrus 4:​15, 16 i tokbaot?

Nating se wok blong Jisas olsem Hae Pris i gat moa mining long olgeta we bambae oli stap wetem hem long heven, be ol Kristin we oli gat hop blong laef long wol ya, oli save kasem blesing naoia from ol wok blong Jisas olsem pris.

Stat long Adam, ol man oli kasem baden blong sin. Yumi bon wetem sin, olsem ol man Isrel. Blong plante yia, oli lukluk i go long ol hae pris mo ol narafala pris, we oli stap mekem sakrifaes from ol sin blong olgeta mo from ol sin blong ol man tu. Biaen, Jisas i kam wan pris “olsem pris ya Melkisedek bifo.” Afta we Jisas i laef bakegen long ded, hem i stanap long fored blong Jeova, blong givim praes blong sakrifaes blong laef blong hem we i stretgud olgeta.​—Ol Sam 110:​1, 4.

?Samting ya i minim wanem long yumi tede? Long leta we Pol i raetem long ol man Hibru, hem i tokbaot wok blong Jisas olsem Hae Pris. Long Hibrus 5:​1, yumi ridim se: “Oltaem God i stap jusumaot wan long ol man, nao i putumap hem, blong hem i mekem ol wok long fes blong hem long nem blong ol narafala man. Ol hae pris ya oli stap givim presen i go long God, mo oli stap kilim anamol blong mekem rod blong tekemaot ol sin blong ol man.” Ale, long vas 5 mo 6, Pol i soemaot se Jisas i kam wan hae pris, we i save karem blesing long yumi.

?Olsem wanem? Pol i raetem se: “Kraes i Pikinini blong God, be hem i lanem mining blong fasin ya blong obei, long ol samting we oli mekem hem i harem nogud long bodi blong hem. Nao from we bisnes ya i mekem hem i prapa man blong sevem man, hem i save sevem olgeta we oli obei long hem, i save holemgud olgeta, gogo i no save finis.” (Hibrus 5:8, 9) Fastaem, maet vas ya i mekem yumi tingbaot ol blesing we yumi save kasem long nyufala wol, taem olgeta we oli stap tru long God mo Jisas bambae oli no moa gat sin, mo bambae oli kasem laef we i no save finis. Hemia wan trufala hop, we i stanap long praes blong sakrifaes blong Jisas we i pemaot yumi, mo long wok blong hem olsem Hae Pris.

Be, yumi save kasem blesing naoia tu from wok blong hem olsem Hae Pris. Makem tok blong Hibrus 4:​15, 16: “Hae pris ya blong yumi, hem i no olsem sam narafala hae pris ya we taem yumi no gat paoa, nao yumi mekem sin, be oli no gat sore long yumi. Hae pris ya blong yumi, hem i gat sore, from we olgeta samting blong traem yumi oli traem hem finis. Hemia nomo i narafala, hem i no mekem sin. From samting ya, i gud yumi mekem tingting blong yumi i strong, nao yumi kam long fes blong God ya we i stap givhan long yumi long gladhat blong hem. Nao hem bambae i sore long yumi, mo long gladhat blong hem, hem bambae i givhan long yumi, stret long taem we yumi trabol.” ?Wetaem nao hem i “stret taem?” Taem we yumi nidim fasin sore mo gladhat blong hem. From we yumi sinman, yumi evriwan i mas harem se yumi nidim samting ya naoia.

Hibrus 4:​15, 16 i tokbaot se Jisas​—we naoia i pris long heven​—i bin laef olsem man bifo, taswe hem i save soem fasin sore. ?Sore long hu? Long yumi. ?Wetaem? Naoia. Taem Jisas i wan man, hem i kasem hadtaem mo trabol olsem ol man oli stap kasem. Samtaem, Jisas i hanggri mo i tosta. Mo nating se hem i stretgud olgeta, hem i kam taed. Samting ya i save leftemap tingting blong yumi. ?Olsem wanem? Jisas i harem i taed long bodi blong hem, taswe hem i savegud filing ya we i kamaot long yumi plante taem. Tingbaot tu, se Jisas i stap taem ol aposol blong hem oli raorao from fasin jelas. (Mak 9:​33-37; Luk 22:24) Yes, samtaem hem i bin harem nogud. ?Samting ya i mekem yumi trastem hem se hem i kasem save long yumi taem yumi harem nogud, mo taem tingting i foldaon? Yes, i tru tumas.

Taem tingting blong yu i foldaon, ?yu save mekem wanem? ?Pol i talem se yu mas wet nomo gogo, long nyufala wol, Hae Pris blong yu, Jisas, bambae i givhan long yu blong kam stretgud long tingting mo bodi? No gat. Pol i talem se: “Hem bambae i sore long yumi, mo long gladhat blong hem, hem bambae i givhan long yumi, stret long taem we yumi trabol.” Samting ya i minim naoia tu. Antap moa, taem Jisas i wan man, hem i kasem trabol mo hadtaem. “Olgeta samting blong traem yumi oli traem hem finis.” Taswe taem yumi fesem trabol olsem, hem i rere blong halpem yumi, from save we hem i gat long ol traem we yumi stap gotru long olgeta. ?Samting ya i no pulum yu i kam kolosap moa long hem?

Makem vas 16. Pol i talem se yumi​—hemia olgeta we tabu speret i makemaot mo ol narafala sipsip tu​—​yumi save harem se yumi fri blong kam kolosap long God mo toktok wetem hem. (Jon 10:16) Aposol ya i no minim se yumi save toktok olbaot long ol prea blong yumi, olsem tok kros, no ol tok we oli no soemaot respek. Be, tru long sakrifaes blong Jisas mo wok blong hem olsem Hae Pris, yumi save kam kolosap long God nating se yumi sinman.

Wan narafala rod we yumi save kasem blesing naoia from wok blong Hae Pris blong yumi, Jisas Kraes, hemia long saed blong ol sin mo ol mastik blong yumi. I tru, yumi no save ting se long taem blong yumi, Jisas bambae i givim olgeta blesing we oli kamaot from sakrifaes blong hem. Nating sipos hem i mekem olsem, be yumi no save gat laef we i no save finis yet. ?Yu tingbaot taem ya we Luk 5:​18-26 i tokbaot, long saed blong wan man we haf bodi blong hem i ded, mo oli bin slakem hem i kamdaon long bed blong hem tru long wan hol long ruf? Jisas i talem long hem se: “Fren, ol sin blong yu, mi mi tekemaot finis.” Samting ya i no minim se hem i tekemaot sam spesel sin we oli bin mekem haf bodi blong man ya i ded. Hem i minim enikaen sin we man ya i mekem. Mo maet hem i minim tu, se go kasem wan mak, hem i tekemaot fasin blong sin we man ya i bon wetem, we i mekem hem i kasem sik ya.

Tru long sakrifaes we Jisas i givim, hem i save karemaot sin blong man ya, olsem we nani blong Asasel i karemaot sin blong ol man Isrel long Dei blong Stretem ol Sin. (Levitikas 16:​7-10) Be, man ya we haf bodi blong hem i ded, biaen, hem i olsem wan sinman yet. Bambae hem i save sin bakegen, mo biaen hem i ded, olsem ol narafala sinman. (Rom 5:12; 6:23) Tok blong Jisas i no minim se man ya i kasem laef we i no save finis wantaem nomo. Long taem ya, man ya i kasem fasin fogif, be i no fulwan.

Nao tingbaot yumi. From we yumi sinman, yumi mekem mastik evri dei. (Jemes 3:2) ?Ale, yumi save mekem wanem? Long heven, yumi gat wan Hae Pris we i gat fasin sore. Tru long hem, yumi save kam kolosap long Jeova long prea. Yes, olsem Pol i raetem, yumi evriwan i save talemaot evri samting “long fes blong God ya we i stap givhan long yumi long gladhat blong hem. Nao hem bambae i sore long yumi, mo long gladhat blong hem, hem bambae i givhan long yumi, stret long taem we yumi trabol.” From samting ya, evriwan tede we oli blong ol narafala sipsip, oli rili kasem sam nambawan blesing. Mo oli kasem tu, wan tingting we i no jajem olgeta, from wok we Jisas i mekem olsem hae pris.

Olgeta Kristin we oli gat hop blong laef long wol, oli save lukluk i go long fyuja blong kasem ol blesing we oli bigfala moa, long nyufala wol we i kolosap. Long taem ya, Hae Pris blong yumi long heven, bambae i yusum fulwan sakrifaes blong hem blong givhan long yumi. Samting ya bambae i mekem se hem i fogivim ol man fulwan from sin. Bambae hem i givim moa blesing, taem hem i mekem ol man oli kam strong long saed blong bodi mo speret. Mo Jisas bambae i mekem se save blong ol man blong God long wol i kam bigwan moa, olsem ol pris long Isrel bifo, we wan bigfala wok blong olgeta i blong tijim ol man long Loa. (Levitikas 10:​8-11; Dutronome 24:8; 33:​8, 10) !Ale, yumi stap kasem blesing naoia from wok blong Jisas olsem pris, be plante moa blesing oli wet long yumi long fyuja tu!