“Ol Hapi Man Blong Presem God” Distrik Asembli Blong Ol Wetnes Blong Jeova

Tri nambawan dei we oli fulap long ol tijing blong Baebol, oli stap fored long yu. Ating bambae i gat wan asembli kolosap long ples blong yu. Yu mas stap, taem program i stat wetem myusek long Fraede long 9:40 long moning.

Long program blong Fraede moning, bambae i gat ol toktok blong talem welkam long ol man we oli kam. Mo tu, bambae i gat stampa tok blong asembli, hemia se, “Stap Olsem Wan Grup Blong Ol Hapi Man Blong Presem God Long Ful Wol.” Long aftenun, program bambae i tokbaot ol yangfala, ol papa mama mo edukesen. Wan tok we ol yangfala oli no mas mestem, hemia se “?Mi Mi Rere Blong Mared?” Ol papa mama oli mas lesingud long tok ya, “Ol Papa Mama We Oli Haremgud Long Ol Pikinini Blong Olgeta.” Program blong aftenun bambae i finis wetem tok ya, “Yusum Edukesen Blong Presem Jeova.” Ol save insaed long tok ya, bambae i givhan long ol yangfala blong gohedgud long skul.

Baptaes i stap long program blong Sarede moning, mo olgeta we oli kasem ol mak finis, bambae oli gat jans blong tekem baptaes. Long aftenun, bambae i gat wan haf we i talem stret olsem wanem Setan i yusum seks blong mekem ol man oli foldaon, stat long taem bifo i kam. Mo tu, bambae i gat wan tok we i gat paoa hemia, “Ronwe Long Ol Trap Blong Setan.” Program blong dei bambae i finis wetem impoten tok ya, “?From Wanem Ol Man Oli Nidim Save Long Saed Blong God?”

Long Sande moning, i gat tok ya, “Ol Hapi Man Blong Presem God Long Taem Blong En Blong Wol Ya,” we i gat ol defren haf blong hem. Bambae hem i tokbaot ol bigbigfala samting we bambae oli kamaot long wol, we oli stap stret fored blong yumi naoia. Bambae tok ya i makemgud se i impoten tumas blong go insaed long sefples kwik, bifo long stat blong “bigfala trabol” we Jisas Kraes i tokbaot long Matyu 24:21.

Program blong Sande moning bambae i finis wetem impoten drama ya, “Ona Long Ol Olfala We i Stret Blong Ona Long Olgeta.” Biaen, long aftenun, bambae i gat pablik tok ya, “!Presem King Blong Olwe!” Tok ya bambae i wan bigfala samting long asembli ya.

Mekemgud ol plan blong yu naoia blong stap long asembli ya. Blong save weples bambae i gat wan asembli we i kolosap long ples blong yu, yu save go long Haos Kingdom blong Ol Wetnes Blong Jeova.