Longfala Tingting—?From Wanem Plante Man Oli No Gat?

EMILIO i gat bitim 60 yia finis.a Hem i kam long Oahu, blong mekem wan samting we hem i harem sore tumas from​—blong berem pikinini boe blong hem, we i bigman finis. Emilio i stap wokbaot long saed blong wan hil long wan rod we i no gat tumas trak long hem, mo hem i stap storeyan wetem sam fren. Hem i sek long wan trak we i stap arier long ful spid, long rod we i go insaed long wan haos. Kolosap nomo trak ya i kilim hem. Emilio i no gat longfala tingting, ale hem i kam kros. Hem i singaot strong long man we i draevem trak, mo i kilim trak ya wetem han blong hem. Wan rao i kamaot. Ating man blong trak i pusum Emilio, ale hem i foldaon mo i kilim hed blong hem long simen. Sam dei biaen, Emilio i ded from kil we hem i kasem long hed blong hem. !Sore tumas we risal olsem i kamaot!

Yumi stap long wan wol we plante man oli no gat longfala tingting. Namba blong ol man we oli spid tumas long trak blong olgeta, i stap kam antap. Sam narafala oli ron kolosap tumas biaen long ol trak, we oli stap ron long spid we i stret long loa. Plante narafala bakegen, oli tanem i go long wan saed, afta long narasaed blong rod, blong traem bitim ol trak, from oli no wantem folem wan narafala trak. Long haos, ol memba blong famle oli faerap long kros mo kilkilim olgeta. Sam Kristin tu, oli save harem nogud bitim mak, long sam slak fasin no mastik blong ol brata blong olgeta long saed blong speret.

?From wanem i no gat plante man we oli gat longfala tingting? ?Samting ya i sem mak long taem bifo? ?From wanem i hadwok blong gat longfala tingting long taem blong yumi?

Sam We Oli No Gat Longfala Tingting

Baebol i tokbaot wan woman we i no wet blong save tingting blong hasban blong hem, bifo we hem i mekem wan bigfala disisen. Nem blong hem, Iv. Hem i no wet long Adam, maet from we hem i no gat longfala tingting. Ale, hem i kakae frut ya we i tabu blong kakae. (Jenesis 3:​1-6) ?Olsem wanem long man blong hem? Hem tu, maet hem i soemaot se hem i no gat longfala tingting. Hem i folem Iv mo i mekem sin, bifo we hem i askem Papa blong hem long heven, Jeova, blong halpem hem no blong soemaot rod long hem. Fasin griri blong tufala, we maet i joen wetem fasin blong no gat longfala tingting, i lidim tufala long sin we i karem nogud frut i kam long yumi evriwan. From tufala ya, yumi kasem ol fasin we oli pulum yumi blong mekem sin, wetem fasin blong mekem tingting i go antap tumas mo fasin blong no gat longfala tingting.​—Rom 5:12.

Kolosap 2,500 yia afta long sin blong faswan papa mama blong yumi, nesen ya we God i jusumaot, ol man Isrel, oli soemaot plante taem se oli sot bigwan long bilif, mo oli no gat longfala tingting tu. Jeova i mekem wan merikel blong mekem olgeta oli fri long wok blong slef long Ijip. Be kwiktaem biaen nomo, oli “fogetem ol samting ya we hem i mekem,” mo “oli no wet long tok blong hem.” (Ol Sam 106:​7-14) Bakegen mo bakegen, oli mekem ol bigfala sin from we oli no gat longfala tingting. Oli wokem wan pikinini buluk long gol mo oli wosipim samting ya; oli tok smosmol agensem Jeova from mana we hem i givim long olgeta blong kakae; mo plante blong olgeta oli rebel agensem man ya we Jeova i putumap blong talemaot ol tok blong hem, Moses. Tru ya, oli harem nogud mo oli kasem bigfala trabol from we oli no gat longfala tingting.

Faswan king blong Isrel, Sol, i spolem jans blong ol pikinini blong hem, blong kam king biaen long hem. ?From wanem? From we hem i no wet long profet Samuel, we i mas mekem wan sakrifaes long Jeova. Fasin blong fraet long ol man i mekem se Sol i gohed blong mekem sakrifaes, hem i no wet long Samuel. !Traem tingbaot filing blong Sol, taem Samuel i kamtru jes afta we hem i finis blong mekem sakrifaes ya! !Sipos hem i bin wet sam menet moa!​—1 Samuel 13:​6-14.

!Sipos Iv i bin wet long Adam bitim we hem i kwik blong karem frut ya! !Sipos ol man Isrel oli bin tingbaot blong wet long advaes blong Jeova! Yes, maet longfala tingting i bin sevem olgeta mo yumi tu, from bigfala fasin blong harem nogud mo from trabol soa.

Stampa Blong Fasin Blong No Gat Longfala Tingting

Baebol i halpem yumi blong kasem save long wan bigfala samting we hem i stampa blong fasin blong no gat longfala tingting tede. Seken Timote japta 3 i eksplenem se long taem blong yumi naoia, ‘laef i strong tumas.’ Hem i talem se ol man ‘oli save tingbaot olgeta nomo, mo oli wantem mane tumas. Oli man blong tok flas, we tingting blong olgeta i go antap tumas, oli man blong lusum hed, mo oli wael olgeta. Oli no wantem ol fasin we i gud nomo, oli agens long hem.’ (Vas 2, 3) Fasin griri mo fasin blong tingbaot olgeta nomo, i stap long hat mo tingting blong plante man. Samting ya i mekem se i hadwok long evriwan, long ol trufala Kristin tu, blong soemaot longfala tingting. Yumi luk ol man blong wol we oli draev kwik tumas, mo we oli puspusum ol man long laen blong go long fored blong olgeta, no we oli sakem sam nogud tok long yumi. Ol samting ya, oli save traem longfala tingting blong yumi. Maet samting ya i save mekem yumi wantem folem fasin blong olgeta no givimbak long olgeta. Be sipos yumi mekem olsem, yumi daonem ol gudfala fasin blong yumi, mo yumi joen wetem olgeta blong folem fasin flas mo fasin blong tingbaot olgeta nomo.

Samtaem, rong fasin blong yumi blong jajem wan bisnes, i save mekem se yumi no soem longfala tingting. Waes King Solomon i eksplenem olsem wanem fasin blong jajem wan bisnes kwiktaem from tingting we i rong, i joen wetem fasin blong no gat longfala tingting, mo wetem fasin kros. Makem tok ya blong hem: “Man we tingting blong hem i longfala i moa gud, i bitim man we tingting blong hem i antap tumas. Yu no mas hareap blong kam kros long tingting blong yu, from we kros i stap long jes blong ol krangke man.” (Eklesiastis 7:​8, 9) I gud yumi tektaem blong luk olgeta saed blong wan bisnes mo kasem stret save long hem, bifo we yumi mekem wan samting. Nao biaen, ating bambae yumi soem moa se yumi kasem save long filing blong narafala, yumi gat kaen fasin mo longfala tingting. Long defren fasin, sipos yumi gat tingting we i flas, we yumi tingbaot yumi nomo, maet yumi save kam olsem we yumi neva wantem lesin long narafala, yumi no gat longfala tingting, mo yumi gat tingting we i konkon. Nao yumi kam olsem ol stronghed man Isrel we oli toktok smol oltaem, mo oli mekem Moses i harem nogud tumas.​—Namba 20:​2-5, 10.

Wan narafala samting we i mekem fasin blong no gat longfala tingting i kam antap, hemia se ol man long wol ya oli no gat hop long laef blong olgeta. Hemia i kamaot from we oli stap longwe long Jeova. Deved i tokbaot nid blong man blong putum hop blong hem long Jeova: “Oltaem mi mi putum tingting blong mi i stap long God nomo, nao mi . . . wet longtaem long hem, blong kasem ol samting we tingting blong mi i stap long hem.” (Ol Sam 62:5) Plante man we oli no save Jeova, oli no gat plante gudfala samting blong tingting strong long olgeta mo oli harem nogud. Taswe, oli traem kasem evri smosmol glad mo jans naoia bifo we oli ded. Olsem papa blong olgeta, Devel Setan, plante taem oli no kea nating sipos ol samting we oli mekem oli spolem narafala.​—Jon 8:44; 1 Jon 5:19.

Yumi no sapraes se, plante man tede oli no gat longfala tingting. I gat rabis wol ya we ol man blong hem oli stap tingbaot olgeta nomo, wetem god blong hem Setan, mo sin we i stap insaed long yumi. Olgeta samting ya, oli mekem i hadwok long evriwan, ol man we oli rili wantem mekem i stret tu, blong gat longfala tingting. Be, Baebol i talem long yumi blong ‘mekem tingting blong yumi i longfala,’ antap moa long saed blong taem we God bambae i mekem ol stampa tingting blong hem oli kamtru. (Jemes 5:8) ?From wanem longfala tingting i impoten tumas? ?Hem i save karem wanem blesing long yumi?

Longfala Tingting​—?From Wanem Hem i Impoten?

“Olgeta we oli jes stanap mo wet, oli gat jans blong mekem wok tu.” Hemia ol tok blong wan Engglisman we i raetem ol naes vas, nem blong hem John Milton. Hem i raetem ol tok ya kolosap tri handred yia bifo finis, long wan vas we nem blong hem se, “Long Saed Blong Fasin Blaen Blong Hem.” Long stat blong vas ya, hem i talemaot olsem wanem tingting blong hem i foldaon mo hem i wari, from we hem i no save mekem wok blong God fulwan. Hem i kam blaen, afta we hem i gat 40 yia blong hem. Be, olsem laswan laen blong vas we i stap antap i soemaot, hem i luksave we wan man i save wosipim God tru long fasin blong stanap strong wetem longfala tingting agensem ol hadtaem we hem i kasem, mo tru long fasin blong holem kwaet tingting mo lukaot ol jans blong mekem wok blong God. Milton i luksave se fasin blong gat longfala tingting mo trastem God, hem i impoten tumas.

Bighaf blong yumi i save lukluk klia nomo wetem ae blong yumi. Be yumi no naf blong kasem ol mak we oli hae tumas, mo samting ya i save mekem se yumi kam kros mo yumi wari. ?Olsem wanem yumi save kasem longfala tingting mo mekem i wok long laef blong yumi?

Sam Eksampel We Oli Leftemap Tingting

Baebol i givim sam gudfala eksampel long yumi, long saed blong longfala tingting. Longfala tingting blong Jeova i mekem se plante milyan man oli gat jans blong kasem laef we i no save finis. (2 Pita 3:​9, 15) Jisas i soemaot long fasin we i stretgud olgeta, semfala nambawan longfala tingting we Papa blong hem i soem. Hem i singaotem yumi long kaen fasin, blong tekem yok blong hem, mo “faenem we tingting blong [yumi] i gat spel.” (Matyu 11:​28-30) Sipos yumi tingting dip long eksampel blong Jeova mo Jisas, samting ya i save halpem yumi blong gat moa longfala tingting.

Wan man we i gat plante risen blong kam kros, harem nogud, mo wantem givimbak, hemia Josef, pikinini blong Jekob. Ol brata blong hem oli mekem i no stret nating long hem. Oli mekem plan blong kilim hem i ded. Be biaen, oli folem wan narafala tingting blong salem hem olsem wan slef. Long Ijip, nating se Josef i wok strong mo i holemstrong long wok blong Potifa, be ol man oli jajem hem rong mo oli putum hem long kalabus. Hem i gat longfala tingting mo i stanap strong tru long olgeta trabol we hem i kasem. Ating hem i kasem save se ol traem ya oli save givhan blong mekem ol stampa tingting blong Jeova oli kamtru. (Jenesis 45:5) Ale, Josef i mekem bilif blong hem i kam strong, mo hem i putum hop blong hem i stap long Jeova. Mo tu, hem i wokem tingtingdaon mo fasin blong kasem save long filing blong narafala. From samting ya, Josef i save gat longfala tingting tru long ol bigfala traem.

Wan narafala impoten samting we i givhan long yumi, hemia tabu speret blong Jeova. Wan eksampel: Maet yumi stap kam kros kwik mo yumi stap stikim narafala oltaem wetem ol tok blong yumi. Ale, yumi save prea blong askem Jeova blong givim tabu speret, blong halpem yumi blong kasem ol gudfala fasin we oli olsem frut blong speret ya. Yumi save tingting dip long ol wanwan fasin ya, olsem longfala tingting mo fasin blong bos long tingting. Samting ya bambae i halpem yumi blong luksave olsem wanem oli joen bigwan wetem fasin blong wet.​—Galesia 5:​22, 23.

Ol Blesing Blong Longfala Tingting

Longfala tingting i save karem plante blesing i kam long yumi. Hem i mekem ol gudfala fasin blong yumi oli kam strong moa, mo hem i blokem yumi blong yumi no kwik blong mekem ol krangke samting. ?Hu i no bin mekem sam mastik we biaen oli harem nogud from? Maet yumi kwik tumas blong mekem wan samting, blong traem winim wan hadtaem no wari we yumi kasem. Maet yumi bin talem wan tok we i no kaengud, mo mekem wan fasin we i spolem narafala. Maet yumi bin letem wan smol trabol wetem wan we yumi laekem tumas, i kam wan bigfala rao we yumi evriwan i wantem winim. Plante fasin kros, fasin agens mo fasin blong harem nogud i bin kamaot from. Afta, maet yumi sore, nao yumi gat tingting se, ‘Sipos mi bin wet smol.’ Yes, sipos yumi soem fasin blong wet long laef blong yumi, samting ya i save lukaot long yumi, ale yumi no harem nogud long plante defren rod. Frut ya nomo i save mekem laef blong yumi i kwaet, i no olbaot, mo yumi haremgud.​—Filipae 4:​5-7.

Longfala tingting i save halpem yumi blong gat wan hat we i kwaet mo we i fulap long tras. Samting ya i save mekem se yumi haremgud moa long saed blong bodi, filing, mo speret. (Proveb 14:30) Fasin blong kros bitim mak, we man i lusum hed mo i no traem blokem, i save mekem hem i sik bigwan long saed blong filing mo bodi, mo tu hem i save ded from. Be, sipos yumi gat longfala tingting, yumi save tingtinggud long saed blong ol narafala, antap moa ol brata sista blong yumi long saed blong speret, mo ol memba blong famle blong yumi. Ale, bambae yumi wantem moa blong soem kaen fasin mo halpem ol narafala, bitim we yumi tok kros mo tok agens long olgeta. Nao biaen, ol narafala man bambae oli faenem i moa isi mo oli glad moa blong joen wetem yumi.

Ol elda long Kristin kongregesen oli rili nidim longfala tingting. Samtaem, sam narafala Kristin oli kam luk olgeta from sam bigfala problem. Ol Kristin ya oli rili wantem mekem i stret, be maet tingting blong olgeta i fasfas, oli harem nogud, no tingting blong olgeta i foldaon. Mo ol elda tu, maet oli taed no oli gat ol prapa wari mo problem blong olgeta mo long famle blong olgeta. !Be, i impoten tumas we ol elda oli soemaot longfala tingting long ol taem olsem, we oli save traem olgeta! Long rod ya, oli save tijim ol man “long fasin we i kwaet nomo,” mo ‘lukaot long ol sipsip wetem kaen fasin.’ (2 Timote 2:​24, 25; Ol Wok 20:​28, 29) Laef blong ol sipsip ya i sas tumas. !Hem i wan blesing long kongregesen taem i gat ol elda we oli kaengud, oli gat lav mo longfala tingting!

Ol hed blong famle oli mas soemaot longfala tingting, traem kasem save long filing blong narafala, mo soem kaengud fasin insaed long haos blong olgeta. Mo tu, oli mas wantem we olgeta memba blong famle oli mekem olsem, mo oli mas pulum olgeta blong folem rod ya. (Matyu 7:12) Samting ya bambae i givhan bigwan blong mekem se i gat lav mo pis long haos.

Longfala tingting taem yumi stap mekem wok blong prij, bambae i givhan long ol Kristin blong glad moa long wok ya. Bambae i moa isi blong stanap strong tru long fasin agens we maet oli kasem, mo taem ol man oli no intres. Ol Kristin we oli gat longfala tingting, oli no rao wetem ol man blong haos we oli kros. Oli save givim wan ansa we i kwaet, no goaot long haos long kwaet fasin. Olsem nao, oli holem pis mo glad blong olgeta. (Matyu 10:​12, 13) Mo tu, taem ol Kristin oli soemaot longfala tingting mo kaen fasin long ol narafala, bambae oli pulum ol man we oli olsem sipsip blong lesin long mesej blong Kingdom. Jeova i blesem ol wok we ol man oli mekem wetem longfala tingting, long olgeta ples blong wol. Evri yia, plante handred taosen man we oli gat tingting daon mo oli stap lukaotem trutok, oli kam insaed long kongregesen blong Jeova we i gat lav.

Yes, sipos yumi rili traehad blong gat longfala tingting long laef blong yumi, bambae yumi kasem plante blesing. Yumi save blokem plante akseden mo problem we oli kamaot, taem man i mekem samting long fasin we i olbaot nomo, no taem hem i kwik tumas blong toktok. Yumi save hapi moa, tingting i moa kwaet, mo ating yumi haremgud moa long saed blong bodi tu. Yumi kasem moa glad mo pis from wok blong prij, insaed long kongregesen, mo long haos blong yumi. Be samting we i moa impoten, yumi kam kolosap moa long God. Taswe, wet long Jeova. !Soemaot longfala tingting!

[Futnot]

[Tok blong pija long pej 10]

?Yu yu gat longfala tingting evri dei long laef blong yu?