Fasin Blong No Mared Long Ol Hadtaem Long Saed Blong Mane

CHUKS we i stap long Wes Afrika i talem se: “Taem mi gat 25 yia, mi bin wantem blong mared. Mi stap tingbaot wan gel we mi wantem mared wetem hem, mo gel ya i intres long mi tu. I gat wan problem nomo, hemia mane. Papa blong mi mo bigfala brata blong mi, tufala i no gat wok. Mo ol smol brata mo sista blong mi oli stap skul yet. Evriwan i dipen long mi blong sapotem famle. Antap long samting ya, papa mama blong mi tufala i kam sik. Samting ya i min se mifala i nidim moa mane bakegen blong pem ol meresin blong tufala.”

Chuks, wan Wetnes blong Jeova, i wantem se hem i naf blong sapotem waef blong hem, taem hem i mared. Hem i tingbaot ol tok blong Pol long 1 Timote 5:8 se: “Man we i no wantem lukaot long olgeta famle blong hem, mo antap long hem, we i no save lukaot long olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.”

Chuks i gohed se: “Mi mi wok had, be oltaem, mane we mi kasem i no naf. From samting ya, mitufala i mas jenisim ol plan blong mared plante taem. Biaen, mi kasem wan leta long gel ya, we i talem se wan narafala man i kam askem papa blong hem blong mared wetem hem. Papa blong gel ya i agri. Sam dei biaen we mi kasem leta ya, famle i mekem lafet blong makem promes blong tufala blong mared.”

Olsem Chuks, plante Kristin man oli luk se ol plan blong olgeta blong mared oli foldaon, no oli jenis, from trabol long saed blong mane. Long plante kantri, praes blong ol samting i go antap bitim mak. Wan eksampel: !Long wan kantri long medel blong Afrika, ol praes oli go antap long 8,319 pesen long wan yia nomo! Long sam kantri, i had blong faenem wok. Mo tu, plante taem, pei i smol tumas, mekem se i hadwok long wan man blong sapotem hem wan, moa wos taem i gat wan waef mo ol pikinini. Wan yangfala man long Naejeria i harem nogud from we fultaem wok we oli wantem givim long hem long wan faktri, i save karem pei blong 1,700 VT nomo long wan manis​—!mane ya i smol moa long praes blong bas we hem i mas pem, blong go mo kambak long wok blong wan manis!

Plante Kristin woman we oli no mared, oli faenem tu se trabol long saed blong mane i stap spolem ol plan blong olgeta blong mared. Plante taem, oli mas wok blong sapotem sam memba blong famle. Sam man oli fraet blong mared wetem olgeta from we laef i had olsem. Oli luksave se sipos oli mared wetem wan we i gat problem olsem, bambae oli nidim blong kasem naf mane, i no jes blong sapotem waef blong olgeta nomo, be famle blong woman ya tu. Ayo, wan yangfala gel we i winim pepa blong hem long yunivesiti finis, i hadwok blong sapotem hem wan, mama blong hem, mo ol smol brata mo sista blong hem. Hem i harem nogud i se: “Mi mi wantem mared, be taem ol man oli kam mo luk bigfala famle blong mi [we mi mas sapotem long saed blong mane], oli ronwe.”

Plante Kristin we oli no mared mo oli gat trabol long saed blong mane, oli kasem ol tok long ol famle mo man raonabaot, we i stap fosem olgeta blong mared mo blong gat pikinini. Samtaem ol man ya oli jikim olgeta. Wan eksampel: Long sam ples blong Afrika, i gat wan kastom se taem yu talem halo long wan bigman, yu askem hem olsem wanem long woman no man blong hem mo ol pikinini blong hem. Samtaem oli stap yusum ol tok olsem blong jikim olgeta we oli no mared. Jon, we i bitim 40 yia finis, i talem se: “Taem ol man oli jikim mi mo oli talem se, ‘?Olsem wanem long woman blong yu?,’ mi mi ansa se, ‘Hem i stap kam.’ Be, blong talem tru, ?olsem wanem mi save gat wan waef sipos mi no save sapotem hem?”

Wan waes tok long lanwis Yoruba, i laenapgud wetem problem blong Jon mo plante narafala we oli olsem hem, se: “Fasin blong mared kwiktaem i no wan samting blong tokflas from. Blong pem kakae, hemia nao hadwok.”

Stap Glad Long Wanem Kaen Laef We Yu Gat

Tingting i save foldaon isi nomo, taem yumi wantem wan samting be yumi no kasem. Proveb 13:12 i talem se: “Samting we yu putum tingting blong yu i stap strong long hem, be taem hem i no kamtru, bambae i mekem hat blong yu i trabol.” Maet hemia filing blong yu, sipos yu wantem mared, be from problem blong mane yu no save mekem olsem. Samting ya i tru moa, sipos yu yu wan man olsem aposol Pol i talem se, “oli wantem tumas blong mared.”​—1 Korin 7:9.

Maet i no isi blong winim problem ya. Be i gat sam samting we yu save mekem blong stanap strong mo blong faenem glad tu, long laef we yu stap long hem. Jisas Kraes, wan man we i no mared, i givim advaes long Baebol we i save wokgud, blong halpem yu blong winim fasin blong harem nogud from wan samting we yu wantem be yu no kasem. Hem i talem se: “Man we i givim presen i go, i save haremgud moa, i winim man we i stap kasem presen blong hem.”​—Ol Wok 20:35.

Yu save folem advaes ya, taem yu mekem sam gudfala samting long famle blong yu mo long ol narafala long kongregesen. Maet yu save mekem moa long Kristin minista wok blong yu. Sipos yu stap bisi oltaem long fasin blong givim we yu no tingbaot yu wan, maet bambae yu faenem se, ‘tingting blong yu i stap kwaet, mo yu bos long ol filing blong yu.’​—1 Korin 7:37.

Wan narafala man we i no mared, aposol Pol, hem i raetem wan advaes we i save givhan: “Yufala i mas lukaotgud long ol fasin we yufala i stap mekem. Bambae yufala i no mekem fasin blong man we i no gat hed. Yufala i mas mekem fasin blong man we i waes. Yufala i mas yusum evri jans we yufala i kasem blong wokem i gud, from we long taem ya nao, ol fasin nogud oli gat paoa.” (Efesas 5:​15, 16) Plante Kristin we oli no mared, oli faenem we ‘tingting blong olgeta i gat spel,’ taem oli yusum taem blong olgeta blong kam kolosap moa long Jeova tru long prea, stadi long Tok blong Hem, mo joen long ol Kristin miting. (Matyu 11:​28-30) Sipos yu mekem olsem, bambae yu stanap strong moa tru long ol trabol long saed blong mane. Samting ya i save halpem yu tu, blong kam strong moa long ol gudfala fasin long saed blong speret. Hem i save mekem se bambae yu kam wan hasban no waef we i gud moa, sipos wan dei yu mared.

Neva fogetem se Jeova i stap keagud long olgeta we oli mekem wok blong hem. Hem i luksave ol problem mo hadtaem we yu stap gotru long hem. Papa blong yumi long heven, we i laekem yumi tumas, i save tu, wanem samting i moagud long yu biaen, long saed blong speret mo long saed blong ol filing. Sipos yu mekem tingting blong yu i longfala mo folem ol advaes long Tok blong hem long laef blong yu evri dei, yu save sua se bambae hem i halpem yu long taem we hem i save se i stret. Bambae hem i givim wanem we yu nidim mo yu wantem, long wan fasin we i save mekem yu yu haremgud blong olwe. Baebol i promes long yumi se: ‘Jeova i no save holembak ol gudgudfala samting blong hem, long olgeta we oli stap mekem ol stret fasin.’​—Ol Sam 84:11.

Lukluk Gudfala Saed Blong Ol Samting

No fogetem tu se, long sam rod, fasin blong no mared i moa gud long fasin blong mared. Aposol Pol i raetem se: ‘Man we i gohed, i mared, hem i mekem i gud. Be man we i no mared, hem i mekem i gud moa.’​—1 Korin 7:38.

?From wanem fasin blong no mared i ‘gud moa’ i winim fasin blong mared? Pol i eksplenem: “Man we i no mared, hem i stap tingbaot moa long ol wok blong Masta blong yumi. Hem i stap lukaot rod blong mekem Masta blong hem i glad. Be man we i mared finis, hem i stap tingbaot moa long ol bisnes blong wol. Hem i stap lukaot rod blong mekem woman blong hem i glad, nao tingting blong hem i seraot long tu rod. Mo long sem fasin, woman we i no mared, no yang gel, hem i stap tingbaot moa long ol wok blong Masta blong yumi. Hem i wantem we bodi blong hem mo tingting blong hem i klin gud, i blong God. Be woman we i mared finis, hem i stap tingbaot moa long ol bisnes blong wol. Hem i stap lukaot rod blong mekem man blong hem i glad.”​—1 Korin 7:​32-34.

Blong talem long ol narafala tok, ol Kristin we oli mared oli stap tingbaot ol nid blong hasban no waef blong olgeta, ol samting we hem i laekem no i no laekem. Mo i stret blong mekem olsem. Be ol Kristin we oli no mared, oli save mekem wok blong Jeova we oli givim ful tingting blong olgeta long hem. Taem yumi skelem olgeta Kristin we oli no mared wetem olgeta we oli mared, fasin blong laef blong olgeta we oli no mared i mekem i moa isi blong oli ‘mekem wok blong Masta we i no gat narafala tingting i pulum olgeta.’​—1 Korin 7:35.

Pol i no stap talem se i no gat wan samting we i save pulum tingting blong wan Kristin we i no mared. No gat. Sipos trabol long saed blong mane i kam olsem wan baden long yu, maet yu harem se i gat plante samting we oli save spolem strong tingting blong yu long Kristin minista wok blong yu. Be i tru yet, se kolosap oltaem, man no woman we i no mared, i fri moa blong mekem wok blong God, bitim hemia we i mared.

Taem aposol Pol i talem se fasin blong no mared i rod we i moagud, hem i no stap talem se i rong blong mared. Hem i raetem se: “Sipos yu gohed, yu mared, hemia yu no mekem sin.” Be, hem i givim woning se: “Olgeta we oli mared oli gat trabol long laef blong olgeta.”​—1 Korin 7:28.

?Tok ya i minim wanem? Mared i save givim sam wari. Long ol hadtaem long saed blong mane, trabol ya long laef i save minim, taem wan papa i tingbaot oltaem blong givim ol samting we waef mo ol pikinini blong hem oli nidim. Sik tu, hem i save ademap moa baden long saed blong mane mo filing blong famle.

So nating se maet laef we yu yu gat naoia i no kaen laef we yu laekem moa, be maet laef blong yu i save had moa sipos yu mared mo yu gat responsabiliti blong sapotem ol pikinini. Ol hadtaem we yu fesem naoia oli blong smoltaem nomo. Bambae oli lus long nyufala wol blong God, mo maet sam oli finis bifo long taem ya.​—Skelem Ol Sam 145:16.

?Yu Yu Save Mekem Moa Long Kristin Minista Wok Blong Yu?

I tru se i no evriwan we i save mekem olsem. Be samfala oli bin gat jans blong joen long Kristin wok fultaem, nating se oli gat trabol long saed blong mane. Chuks, we yumi tokbaot fastaem, i mekem wok we i pem mo salem ol buk, pen mo pepa, blong sapotem famle blong hem. Kolosap long semtaem we ol plan blong hem blong mared oli foldaon, hem i kasem wan leta we i askem hem blong wok smoltaem long wok blong bildim ol haos, long branj ofis blong Watch Tower Sosaeti long ples blong hem. Bigfala brata blong hem i wari long saed blong mane. Ale, hem i daonem tingting blong Chuks blong i no go. Be, Chuks i tingbaot se Jeova i bin halpem hem blong stanemap smol bisnes blong hem long saed blong ol buk. Taswe, hem i mas putum ol intres blong Kingdom long fasples, mo trastem paoa blong God blong givim olgeta samting we hem i nidim. (Matyu 6:​25-34) Mo tu, hem i tingbaot se, wok ya i blong tri manis nomo.

Ale, Chuks i agri blong go joen long wok blong bildim ol haos blong branj ofis. Mo hem i givim bisnes blong hem i go long bigfala brata blong hem. Sikis yia biaen, Chuks i stap mekem Kristin wok fultaem yet. Hem i wan elda long Kristin kongregesen. Mo hem i gat naf mane blong mared. ?Hem i harem nogud from wei we ol samting oli hapen long laef blong hem? Chuks i talem se: “Mi bin harem nogud from we mi no save mared taem mi bin wantem. Be wei we ol samting oli hapen, i rili mekem i gud moa long mi. Mi kasem plante gladtaem mo jans blong wok, we ating mi no save kasem sipos mi mared mo gat pikinini.”

Seftaem Long Fyuja

Long ol taem we laef i had, plante oli traem faenem seftaem insaed long mared, olsem we hem i wan fenis we i save blokem ol trabol long saed blong mane long fyuja. Sam kantri we oli gat plante bigfala kaon, oli givhan smol nomo long ol olfala, mo samtaem oli no givhan nating. Taswe, plante taem, ol papa mama oli dipen long famle blong olgeta, antap moa ol pikinini blong olgeta, blong sapotem olgeta taem oli kam olfala. From samting ya, plante taem ol man mo woman we oli no mared, oli kasem plante toktok we i fosem olgeta blong mared mo blong gat pikinini, nating se oli gat trabol long saed blong mane.

Be fasin blong mared mo gat pikinini i no wan promes blong seftaem. Sam man blong wol ya, oli no wantem lukaot long olfala papa mama blong olgeta. Samfala oli no gat rod blong mekem olsem, mo sam narafala bakegen, oli ded bifo we papa mo mama blong olgeta i ded. Ol Kristin oli lukaotem seftaem, fastaem long wan narafala ples, wetem promes blong God long tingting blong olgeta, se: “Bambae mi mi no save livim yu yu stap yu wan. Bambae mi mi no save lego yu samtaem.”​—Hibrus 13:5.

Jeova i no save lego olgeta we oli livim mared fastaem, blong mekem wok blong Hem fultaem. Christiana i wan woman we i gat 32 yia finis, mo hem i no mared. Hem i mekem wok olsem fultaem paenia long Naejeria long naen yia finis. Hem i talem se: “Mi mi trastem Jeova, we hem i promes se bambae hem i neva lego ol man blong hem. Promes blong hem i mekem tingting blong mi i strong. Jeova i stap keagud long mi long saed blong speret mo bodi tu. Hem i pruvum finis se hem i wan Papa we i gat gladhat blong givim ol samting. Wan eksampel: Mi muf blong go paenia long wan ples we oli nidim moa Wetnes. Nating se mi no gat evri samting we mi nidim long ples ya, be mi lan long laef ya. Taem mi mas go slip long hospital from sik ya taefus, ol brata long kongregesen we mi stap long hem bifo, oli kwik blong kam givhan long mi.

“Mi mi rili glad long Kristin wok ya we mi stap mekem fultaem. Mi tingbaot wok ya olsem wan nambawan blesing, from mi stap wok wetem Man ya we i Wokem olgeta samting long heven mo wol, mo wetem plante brata mo sista raonabaot long wol. Mi luk plante yangfala we oli harem nogud mo oli no gat hop, taem oli luk ol samting we oli stap hapen raonabaot long olgeta. Be long saed blong mi, laef blong mi i gat mining. Mi save lukluk i go long fyuja wetem strong tingting. Mi save se blong stap kolosap long Jeova, hemia beswan rod blong winim ol problem we yumi fesem tede.”

!Sipos yu wantem mared be yu no save mekem olsem from trabol long saed blong mane, no letem tingting blong yu i foldaon! I no yu nomo. I gat plante narafala we oli stap stanap strong wetem help blong Jeova, tru long ol semfala traem. Blong stap glad long wanem kaen laef we yu stap long hem, mekem ol gudfala samting blong ol narafala man, mo traem kamgud moa long saed blong speret. Kam kolosap long God. Bambae hem i halpem yu, from we oltaem hem i stap tingbaot yu.​—1 Pita 5:7.