Wan Kwestin

Galesia 6:​8 i talem se: ‘Man we i planem rabis fasin we bodi blong hem i wantem, rabis fasin ya blong hem bambae i givim kakae long hem, we i ded nomo. Be man we i planem fasin we speret i wantem, bambae speret i givim kakae long hem, we i laef ya we i no save finis.’ ?‘Speret’ ya i minim wanem, mo olsem wanem hem i save givim laef?

Hibru mo Grik wod we oli tanem i kam ‘speret,’ i gat ol defren mining. Olsem: (1) strongfala paoa blong God, (2) paoa we i givim laef long ol man mo ol anamol, (3) paoa blong tingting we i pusum man, mo (4) speret man, no enjel. Faswan long ol fo mining ya​—strongfala paoa blong God​—hemia nao mining blong Galesia 6:8.

Blong givim moa save, makemgud Galesia 3:​2. Hemia i faswan taem long buk blong Galesia we oli yusum wod ya ‘speret.’ Pol i askem ol Kristin, se: ‘?Yufala i kasem speret fastaem from wanem? ?From we yufala i stap folem Loa ya, no from we yufala i harem gud nyus ya, nao yufala i stap bilif long hem?’ Afta, long Galesia 3:5, hem i talem se ‘speret’ ya i save givim paoa long man blong mekem merikel. Taswe, ‘speret’ we hem i tokbaot, hemia tabu speret, strongfala paoa blong God we yumi no save luk.

Biaen, long Galesia 5:​16, Pol i soemaot se ol samting we speret i wantem, oli defren long ol samting we bodi i wantem. Yumi ridim se: ‘Mi talem long yufala. Sipos speret i stap lidim yufala, bambae yufala i no stap mekem ol samting we bodi blong yufala nomo i wantem.’ Taem Pol i talem se ‘ol samting we bodi nomo i wantem,’ hem i minim ol samting we bodi we i gat sin i wantem. Olsem nao, long Galesia 5:​19-23, hem i mekem wan lis blong ‘ol samting we bodi nomo i wantem,’ mo wan lis blong ‘ol frut blong speret’ we oli defren olgeta.

Taswe, long Galesia 6:​8, man we i ‘planem fasin we bodi blong hem i wantem,’ hemia man we i letem bodi we i gat sin i lidim hem, ale hem i mekem ‘ol samting we bodi nomo i wantem.’ Ol fasin ya oli save givim rabis frut long hem. Mo sipos hem i no jenisim fasin blong hem, bambae hem i no save go insaed no kasem laef aninit long Kingdom blong God.​—1 Korin 6:​9, 10.

Yumi, olsem ol Kristin we oli onagud long God, yumi mas wantem tumas blong ‘planem fasin we speret blong God i wantem.’ Samting ya i minim se yumi mas mekem ol fasin we oli openem rod long tabu speret, blong i wok fulwan long laef blong yumi, mo i givhan long yumi blong soemaot ol frut blong hem. Yumi mas tingbaot samting ya, taem yumi jusum wan buk blong ridim no wan program blong lukluk long televisin. Taem yumi lesingud long ol miting blong kongregesen, mo traehad blong folem ol advaes blong ol elda we tabu speret i putumap olgeta, yumi soem se yumi stap planem fasin we speret i wantem.​—Ol Wok 20:28.

Yumi intres long las haf blong Galesia 6:​8, we i mekem promes ya se, sipos yumi stap planem ol fasin we tabu speret i wantem, bambae yumi save ‘karem frut, we i laef ya we i no save finis.’ Yes, tru long ransom blong Kraes, bambae God i yusum tabu speret blong hem, blong givim laef we i no save finis long yumi.​—Matyu 19:29; 25:46; Jon 3:​14-16; Rom 2:​6, 7; Efesas 1:7.