Ol Woman Blong God Long Taem Bifo Oli Kasem Respek

“Nao Jeova God i tok bakegen se: ‘I nogud we man ya i stap hem wan nomo. Bambae mi mekem wan fren we i stret long hem, blong givhan long hem.’”​—JENESIS 2:18, NW.

1. ?Wan diksonari blong Baebol i talem wanem long saed blong laef blong ol woman long taem bifo?

WAN diksonari blong Baebol i eksplenem laef blong ol woman long taem bifo, i se: “Ol woman long olgeta kantri kolosap long solwora blong Mediterenia no kolosap long Medel Is, oli neva fri blong mekem ol samting we ol woman long ol kantri blong Wes oli mekem. Tingting we kolosap olgeta man long ol ples ya oli gat, hemia se ol woman oli mas stap daon aninit long paoa blong ol man, olsem we ol slef oli stap daon aninit long paoa blong ol friman, mo ol yangfala oli stap daon aninit long paoa blong ol olfala. . . . Oli tinghae moa long ol pikinini boe i bitim ol pikinini gel, mo samtaem oli livim ol bebi gel afsaed blong oli ded.”

2, 3. (a) Folem wan ripot, ?plante woman tede oli gat wanem kaen laef? (b) ?Wanem ol kwestin we oli kamaot from?

² Kaen laef olsem i no jenis bigwan long plante ples blong wol tede. Long 1994, hemia faswan taem we ripot we ‘U.S. State Department’ i raetem wan taem evri yia long saed blong raet blong ol man, i tokbaot fasin we ol man oli stap mekem long ol woman. Long saed blong ripot ya, wan stampa tok long New York Times, i talem se: “Ol Ripot Long 193 Kantri Oli Soem Se Fasin Blong Daonem Ol Woman i Stap Kamaot Evri Dei.”

³ Tede, plante woman we oli kamaot long ol defren laen mo kastom, oli stap joen wetem ol kongregesen blong ol man blong Jeova long olgeta ples blong wol. Taswe, i gat sam kwestin we oli kamaot: ?Fasin ya we yumi jes tokbaot, hemia nao fasin we God i wantem se i kamaot long ol woman? ?Ol man we oli wosip long Jeova long taem bifo, oli mekem wanem fasin long ol woman? mo ?Wanem ol stret fasin blong mekem long ol woman tede?

‘Wan Fren We i Stret Long Man’ Mo i “Givhan”

4. ?Jeova i luksave wanem samting taem faswan man i bin stap hem wan blong longtaem lelebet long garen blong Iden, mo biaen hem i mekem wanem?

⁴ Adam i stap hem wan long garen blong Iden blong longtaem lelebet, nao Jeova i tingting se: “I nogud we man ya i stap hem wan nomo. Bambae mi mekem wan fren we i stret long hem, blong givhan long hem.” (Jenesis 2:​18, NW) Nating se Adam i wan man we i stretgud olgeta, i nidim wan moa samting bakegen, blong mekem stampa tingting blong Man ya we i Wokem olgeta samting, i kamtru. Taswe, blong fulumap nid ya, Jeova i wokem wan woman, mo i mekem we tufala i mared.​—Jenesis 2:​21-24.

5. (a) ?Plante taem ol man blong raetem Baebol oli yusum tok ya “givhan” long wanem fasin? (b) ?Taem Jeova i talem se faswan woman i olsem “fren” blong man, samting ya i soem wanem?

⁵ Ol tok ya se woman i blong “givhan” mo hem i olsem wan ‘fren we i stret long man,’ ?oli minim se wok we God i givim long woman i daonem hem? No gat, i minim defren samting olgeta. Plante taem ol man blong raetem Baebol oli yusum Hibru tok (ʽeʹzer) we oli tanem i kam “givhan,” taem oli tokbaot God. Wan eksampel, Jeova i olsem man blong ‘lukaotgud long yumi mo givhan long yumi.’ (Ol Sam 33:20; Eksodas 18:4; Dutronome 33:7) Long Hosea 13:​9, Jeova i tokbaot hem wan se hem i man blong “givhan” long Isrel. Long saed blong Hibru tok (neʹghedh) we oli tanem i kam ‘fren we i stret long man,’ wan man blong stadi dip long Baebol, i eksplenem se: “Help we man i nidim, i no jes long ol wok we hem i mekem evri dei nomo, mo long wok blong mekem pikinini . . . be hemia sapot we tufala i stap givim long tufala, taem tufala i stap frengud oltaem.”

6. ?God i talem wanem afta we hem i wokem woman, mo from wanem hem i talem olsem?

⁶ Taswe i no gat wan samting we i daonem woman, long ol tok blong Jeova we i talem se woman i blong “givhan,” mo i olsem ‘wan fren we i stret long man.’ Woman ya i gat prapa fasin blong hem long saed blong tingting, filing, mo bodi blong hem. Hem i wan gudfala fren blong man, we i stret blong mekem hem i haremgud. Tufala ya oli defren, be i nidim tufala tugeta blong “fulumap wol ya,” folem stampa tingting blong Man ya we i Wokem olgeta samting. I klia se, taem God i “luk olgeta wok ya we i mekem, mo i glad tumas long olgeta,” hemia afta we hem i wokem faswan man mo woman ya.​—Jenesis 1:​28, 31.

7, 8. (a) ?Olsem wanem sin we i kamaot long Iden i jenisim laef blong ol woman? (b) ?Wanem ol kwestin we oli stanap long saed blong fasin we Jenesis 3:16 i kamtru long laef blong ol man blong Jeova?

⁷ Afta we tufala i sin, ol samting oli jenis long saed blong man mo woman. Jeova i talemaot panis we tufala i mas kasem from sin. Taem Jeova i tok long Iv, hem i tokbaot ol samting we bambae Hem i letem i kamaot long Iv, olsem we Hem i mekem i kamaot. Hem i se: “Bambae mi mi mekem we long taem we yu yu gat bel, bambae yu harem nogud moa long bodi blong yu.” Hem i ademap se: ‘Taem we yu bonem pikinini, bambae yu harem bak blong yu i soa moa. Be bambae yu stap wantem hasban blong yu yet, mo hem bambae i mekem i strong long yu.’ (Jenesis 3:16) Stat long taem ya, plante hasban oli strong tumas long woman blong olgeta, mo plante taem oli gat raf fasin tu. Plante taem, ol man oli no tingbaot ol woman se, oli stap blong givhan long olgeta mo oli olsem fren blong olgeta, be oli mekem olsem we woman i wan wokman no wan slef nomo.

⁸ ?Be, olsem wanem tok blong Jenesis 3:16 i gat paoa long laef blong ol woman we oli wosip long Jeova? ?Hem i min se ol woman oli mas stap daon olgeta we i mekem olgeta oli sem? !I no olsem nating! ?Be, olsem wanem long ol store blong Baebol we oli tokbaot sam kastom mo fasin long saed blong ol woman, we maet oli no stret long tingting blong sam man tede?

Kasem Save Long Ol Kastom We Baebol i Tokbaot

9. Taem yumi skelem ol kastom blong bifo long saed blong ol woman, ?wanem trifala samting we yumi mas tingbaot?

⁹ Ol man blong God long taem blong Baebol, oli mekem i gud long ol woman. Be, taem yumi tingbaot ol kastom long saed blong ol woman long taem ya, i gud blong rimemba sam samting. Faswan se, taem Baebol i tokbaot sam nogud samting we oli kamaot from we ol rabis man oli bos long woman long fasin we oli tingbaot olgeta nomo, i no minim se God i agri long fasin we oli bin mekem long ol woman ya. Seken samting, nating se Jeova i letem ol man blong hem blong folem sam kaen kastom blong smoltaem, be hem i kontrolem ol kastom ya blong protektem ol woman. Namba tri samting, yumi mas lukaotgud se yumi no yusum ol rul blong naoia blong jajem ol kastom blong bifo. Sam kastom we maet ol man tede oli ting se oli nogud, be ol woman blong bifo, maet oli no tingbaot olgeta olsem wan samting we i daonem olgeta. I gud yumi tokbaot sam eksampel.

10. ?Wanem tingting blong Jeova long saed blong poligami? ?Wanem samting i soemaot se hem i neva jenisim faswan tingting blong hem se ol man oli mas gat wan woman nomo?

¹⁰ Poligami:a Folem stampa tingting we Jeova i gat fastaem, wan waef i no save serem hasban blong hem wetem wan narafala woman. God i wokem wan waef nomo blong Adam. (Jenesis 2:​21, 22) Afta we tufala i rebel agensem God long garen blong Iden, fasin blong poligami i kamaot long laen blong Ken. Samtaem biaen, fasin ya i kam wan kastom we samfala man blong Jeova oli folem. (Jenesis 4:19; 16:​1-3; 29:​21-28) Jeova i letem poligami i gohed, mo fasin ya i givhan blong mekem namba blong ol man Isrel i kam antap. Be hem i soemaot se hem i tingbaot ol woman. Hem i no letem ol man oli bitim mak long fasin ya, ale samting ya i mekem se ol man oli lukaotgud long ol waef mo pikinini blong olgeta. (Eksodas 21:​10, 11; Dutronome 21:​15-17) Antap moa, Jeova i neva lego faswan rul blong hem, se man i mas gat wan woman nomo. Noa mo ol pikinini boe blong hem, we oli kasem oda ya bakegen blong ‘gat plante pikinini mo fulumap wol,’ olgeta evriwan oli gat wan waef nomo. (Jenesis 7:7; 9:1; 2 Pita 2:5) Taem God i tokbaot fasin fren blong hem wetem Isrel, hem i yusum pijatok ya se hem i olsem wan hasban we i mared long wan woman nomo. (Aesea 54:​1, 5) Mo biaen, Jisas Kraes i tokbaot bakegen faswan rul we God i putum, long saed blong fasin blong mared long wan woman nomo, mo ol man long faswan Kristin kongregesen oli folem fasin ya.​—Matyu 19:​4-8; 1 Timote 3:​2, 12.

11. ?From wanem ol man long taem blong Baebol oli folem fasin blong pem woman, mo fasin ya i daonem ol woman?

¹¹ Fasin blong pem woman: Buk ya Ancient Israel​—Its Life and Institutions i talem se: “Loa ya se man i mas givim mane, no samting we i gat sem praes, i go long famle blong gel, i mekem mared blong ol man Isrel i luk olsem wan samting we man i go pem long stoa nomo. Be [fasin blong pem woman] i no rili minim praes we oli pem blong woman, be mane we oli givim long famle blong pembak olgeta from woman ya.” (Mifala nomo i raetem long narafala raeting.) Taswe praes we oli pem blong mared wetem wan gel, i pembak famle blong woman ya from olgeta wok we hem i no moa save mekem long famle, mo from fasin traehad blong famle mo mane we famle i yusum blong lukaot long hem. Fasin ya i no daonem woman, be i soemaot se woman ya i sas long ae blong famle blong hem.​—Jenesis 34:​11, 12; Eksodas 22:16; lukluk Wajtaoa, Septemba 1, 1990, pej 26-29.

12. (a) ?Samtaem long Baebol oli tokbaot man mo woman we i mared olsem wanem? ?Ol woman oli harem nogud long ol tok ya? (b) ?Wanem samting yumi save makem long saed blong ol tok we Jeova i yusum long Iden? (Lukluk futnot.)

¹² Hasban i olsem “bos” long woman blong hem: Wan samting we i kamaot long laef blong Ebraham mo Sera kolosap long yia 1918 B.K.T., i soemaot se long taem blong olgeta, kastom i kamaot finis se man we i mared i “bos” (Hibru, baʹʽal) long woman blong hem, mo woman we i mared i mas ‘stap aninit long hemia we i bos.’ (Hibru, beʽu·lahʹ). (Jenesis 20:3) Samtaem Baebol i yusum ol tok ya bakegen, mo i no gat wan samting we i soemaot se ol Kristin woman long taem bifo oli harem nogud long fasin ya.b (Dutronome 22:22) Be, ol man ya oli no mas tingbaot waef blong olgeta olsem we oli tingbaot wan pis graon, no narafala samting olsem. Ol pis graon no ol sas samting, ol man oli save pem, salem, mo oli save pasem i go long ol narafala man taem oli ded. Be samting ya i no save hapen long wan waef. Wan Proveb long Baebol i talem se: “Ol samting we ol papa oli pasem i go long ol pikinini blong olgeta, hemia ol haos mo ol sas samting, be wan waef we i waes i kam long Jeova.”​—Proveb 19:14; Dutronome 21:14.

Wan Wok We i Karem Ona

13. ?Taem ol man we oli fraetgud long God, oli folem eksampel blong Jeova mo obei long Loa blong hem, ol woman oli kasem wanem?

¹³ ?Nao, olsem wanem long ol woman blong God bifo long Kristin taem? ?Ol man oli tingbaot ol woman ya olsem wanem, mo oli soemaot wanem kaen fasin long olgeta? Blong talem long klia fasin, taem ol man we oli fraetgud long God, oli folem eksampel blong Jeova mo obei long Loa blong hem, ol woman oli kasem respek mo oli haremgud, from we oli gat raet mo jans blong mekem plante samting.

14, 15. ?Wanem samting i soemaot se ol man Isrel oli respektem ol woman, mo from wanem Jeova i wantem se ol man we oli wosipim hem oli mas respektem olgeta?

¹⁴ Ol woman oli mas kasem respek. God i givim Loa long ol man Isrel, se oli mas respektem ol papa blong olgeta mo sem mak long ol mama blong olgeta tu. (Eksodas 20:12; 21:​15, 17) Levitikas 19:3 i talem se: “Yufala evriwan i mas fraetgud long mama mo papa blong yufala.” Taem Batsiba i kam luk pikinini boe blong hem Solomon, “wantaem nomo, king ya i stanap blong mitim hem, mo i bodaon long hem,” blong soemaot respek long hem. (1 King 2:​19) Encyclopaedia Judaica i talem se: “Plante profet tok oli tokbaot lav we God i gat long ol man Isrel, se i olsem lav we wan hasban i gat long waef blong hem. Oli no save yusum ol tok olsem, sipos ol man long taem ya oli no gat respek long ol woman.”

¹⁵ Jeova i wantem se ol man we oli wosipim hem oli respektem ol woman, from we hem i respektem olgeta. Yumi save luk pruf blong samting ya long sam vas blong Baebol. Jeova i yusum ol samting we oli kamaot long laef blong ol woman olsem ol pijatok, mo hem i yusum filing blong ol woman blong eksplenem ol filing blong hem. (Aesea 42:14; 49:15; 66:13) Samting ya i halpem ol man we oli ridim ol tok ya, blong kasem save long filing we Jeova i gat. Yumi intres blong save, se Hibru tok we oli tanem i kam “fasin sore,” no “fasin blong tingbaot narafala,” we Jeova i yusum blong tokbaot hem wan, i kolosap sem mak long tok we oli tanem i kam “basket blong pikinini,” we i save minim “filing olsem wan mama.”​—Eksodas 33:19; Aesea 54:7.

16. ?Wanem sam eksampel we oli soemaot se ol man oli tinghae long advaes blong sam woman we oli onagud long God?

¹⁶ Oli tinghae long ol advaes blong ol woman we oli ona long God. Wan taem, Ebraham we i fraetgud long God, i no wantem folem advaes blong woman blong hem, Sera, we i ona long God tu. Nao Jeova i talem long hem, se: “Yu mekem olsem we woman blong yu i talem.” (Jenesis 21:​10-12) Ol woman blong Esao we oli Hitaet, oltaem oli “mekem Aesak mo Rebeka, tufala i harem nogud tumas.” Samtaem biaen, Rebeka i talem long Aesak se bambae hem i harem nogud sipos pikinini boe blong tufala, Jekob, i maredem wan woman Hitaet tu. ?Aesak i mekem wanem? Store i talem se: “Aesak i singaot Jekob i kam long hem, nao i talem long hem se, ‘Bambae yu yu no mared long wan gel Kenan.’” Yes, nating se Rebeka i no tok long Aesak olsem we hem i stap givim advaes, be hasban blong hem i mekem wan disisen we i soem se hem i tingbaot filing blong woman blong hem. (Jenesis 26:34, 35; 27:46; 28:1) Mo tu, King Deved i lesin long tok blong Abigel. Samting ya i blokem hem blong i no kilim man i ded, mo gat fol long fes blong God from.​—1 Samuel 25:​32-35.

17. ?Wanem samting i soemaot se ol woman oli gat raet blong mekem sam disisen long famle?

¹⁷ Ol woman oli gat raet blong mekem sam disisen long famle. Ol pikinini oli kasem advaes ya se: “Pikinini blong mi, plis yu lesin long papa blong yu taem hem i stretem yu. Mo yu no mas lego loa blong mama blong yu.” (Proveb 1:8) Ol tok blong Proveb japta 31 long saed blong wan “gudfala waef,” oli soemaot se wan woman we i mared mo i gat fasin blong wok had, hem i no jes lukaotgud long famle blong hem nomo. Maet hem i naf tu, blong lukaot long bisnes blong pem no salem wan haos no graon, mekem wan gudfala garen we i karem plante frut, wokem wan smol bisnes blong hem, mo kasem wan gudnem from ol waes tok we hem i stap talem. Samting we i moa impoten, we ol man oli save presem wan woman from, hemia fasin blong gat dip respek long Jeova mo fraetgud long hem. !Taswe wan woman olsem, i moa gud “i winim ol naesfala korel we i sas tumas”! Ol red korel we oli sas tumas, ol man oli laekem tumas blong kasem, blong flasem bodi no haos blong olgeta.​—Proveb 31:​10-31.

Ol Woman We Oli Kasem Spesel Blesing Long God

18. ?Long wanem rod sam woman long taem blong Baebol oli kasem spesel blesing?

¹⁸ Jeova i soemaot se hem i tinghae long ol woman, taem hem i givim spesel blesing long sam woman long taem blong Baebol. Sam enjel oli visitim Hega, Sera, mo woman blong Manoa, blong talemaot toktok blong God blong lidim olgeta. (Jenesis 16:​7-12; 18:​9-15; Jajes 13:​2-5) I bin gat sam “woman blong wok” long haos tapolen, mo sam woman blong singsing long haos blong Solomon tu.​—Eksodas 38:8; 1 Samuel 2:22; Eklesiastis 2:8.

19. ?Olsem wanem Jeova i yusum sam woman blong tok long ples blong hem?

¹⁹ Long taem blong ol man Isrel, plante taem Jeova i yusum wan woman blong talemaot tok blong hem no tok long nem blong hem. Long saed blong woman profet ya Debora, yumi ridim se: “Ol man Isrel oli stap go luk hem, blong hem i jajem wan bisnes blong olgeta.” (Jajes 4:5) Afta we Isrel i win long faet agensem king Jabin blong Kenan, Debora i kasem wan blesing we i rili spesel. Hem i wokem wan singsing, no haf blong hem, we i tokbaot faet ya we oli winim. Mo biaen, singsing ya i kam wan haf blong ol tok we Jeova i givim long ol man, blong oli raetemdaon long Baebol.c (Jajes, japta 5) Sam handred yia biaen, King Josaea i wantem save tingting blong Jeova long wan samting. Ale, hem i sanem wan grup blong ol man blong hem wetem hae pris, oli go luk woman profet ya Halda. Halda i gat raet blong talem long olgeta, se: “Hemia nao tok we Jeova, God blong Isrel, i talem.” (2 King 22:​11-15) Long taem ya, king i givim oda long grup ya blong go luk wan woman profet, be hemia i blong kasem ol advaes blong Jeova blong lidim hem.​—Skelem Malakae 2:7.

20. ?Wanem sam eksampel we oli soemaot se Jeova i tingbaot filing mo laef blong ol woman?

²⁰ Taem yumi ridim store blong sam samting we Jeova i mekem blong givhan long ol woman we oli mekem wosip long hem, i klia se hem i tingbaot ol woman. Tu taem, hem i protektem naesfala waef blong Ebraham, Sera, blong ol man oli no spolem hem. (Jenesis 12:​14-20; 20:​1-7) God i soemaot sore long Lea, woman blong Jekob we Jekob i no laekem hem olsem narafala waef blong hem. Jeova i ‘mekem we Lea i save karem pikinini,’ ale, hem i bonem wan pikinini boe. (Jenesis 29:​31, 32) Tu woman Isrel we tufala i fraetgud long God, mo we tufala i stap halpem ol woman taem oli bonem pikinini, kolosap tufala i lusum laef blong tufala, blong sevem ol Hibru pikinini boe we oli mas ded from oda blong king blong Ijip. Jeova i glad long tufala, nao hem i mekem se “tufala i gat ol pikinini blong tufala.” (Eksodas 1:​17, 20, 21) Hem i ansarem dip prea blong woman ya Hana. (1 Samuel 1:​10, 20) Mo, taem wan wido woman blong wan profet i gat kaon long wan man, ale man ya i rere blong karemaot olgeta pikinini blong woman ya blong pem kaon blong hem, Jeova i no lego woman ya i stap hem wan. Wetem lav, God i givim paoa long profet Elaesa, blong hem i mekem saplae blong oel long haos blong woman ya i kam bigwan, nao hem i gat rod blong pem kaon blong hem. Olsem nao, hem i sevem famle blong hem, mo hem i holem gudnem blong hem.​—Eksodas 22:​22, 23; 2 King 4:​1-7.

21. ?Hibru haf blong Baebol i soemaot wanem stret tingting long saed blong laef blong ol woman?

²¹ From ol samting ya, yumi luk se Hibru haf blong Baebol i no pulum ol man blong daonem ol woman. Defren olgeta, hem i eksplenem laef blong ol woman we oli mekem wok blong God, long fasin we i soemaot stret tingting long ol woman. Jeova i no mekem se ol woman we oli wosip long hem, oli no kasem ol trabol we Jenesis 3:16 i tokbaot. Be, ol man long taem bifo we oli ona long Jeova, we oli folem eksampel blong hem, mo oli obei long Loa blong hem, oli respektem mo tinghae long ol woman.

22. ?Taem Jisas i kamtru long wol, olsem wanem laef blong ol woman i jenis finis, mo wanem sam kwestin we yumi save askem?

²² Long ol handred yia biaen long taem we oli raetem Hibru haf blong Baebol, laef blong ol woman long Isrel i jenis. Taem Jisas i kamtru long wol, kastom blong ol tija blong Loa i blokem bigwan ol woman long saed blong ol wok we oli save mekem long skul, mo fasin blong joen wetem ol narafala. ?Ol kastom olsem, oli jenisim fasin we Jisas i mekem long ol woman? ?Wanem fasin we ol man oli mas mekem long ol Kristin woman tede? Bambae yumi tokbaot ol kwestin ya long nekis haf.

[Ol futnot]

?Bambae Yu Yu Ansa Olsem Wanem?

◻ ?Ol tok ya “givhan” mo “fren” oli soemaot wanem long saed blong wok we God i givim long ol woman?

◻ ?Taem yumi skelem ol kastom long saed blong ol woman long taem blong Baebol, yumi mas tingbaot wanem?

◻ ?Wanem i soemaot se ol man blong God long taem bifo, oli respektem ol woman?

◻ ?Long wanem rod Jeova i givim spesel blesing long sam woman bifo Kristin taem?