“Lav i Neva Save Lus”

SAMUEL D. LADESUYI I TALEM STORE YA

Mi sapraes taem mi luklukbak long olgeta yia we oli pas finis, mo mi tingbaot ol samting we oli bin kamaot. Jeova i mekem plante bigbigfala wok long olgeta ples blong wol. Long taon ya Ilesa, long Naejeria, smol grup blong mifala we i stat blong prij long 1931, naoia i kam 36 kongregesen. Taem ol faswan misinari blong Wajtaoa Baebol Skul blong Gilead oli kam long Naejeria long 1947, i gat kolosap 4,000 man we oli stap talemaot gud nyus. Naoia i gat bitim 180,000. Long ol yia ya bifo, mifala i no tingbaot no drim se bambae namba i save gru bigwan olsem. !Mi mi glad tumas we mi bin gat jans blong joen long nambawan wok ya! Bambae mi storeyan long samting ya wetem yu.

WOK blong papa blong mi i blong go long ol wanwan taon, mo salem ol masket mo paoda blong wokem ol bolet long hem. Plante taem, hem i no stap long haos. Hem i gat seven waef we mi save olgeta, sam long olgeta oli no stap wetem hem. Brata blong papa blong mi i ded, ale Papa i karem woman blong hem, hemia nao mama blong mi. Hem i seken waef blong hem, mo mi mi stap wetem hem.

Wan dei, Papa blong mi i kambak long haos afta we hem i go luk faswan waef blong hem long wan narafala velej. Taem hem i stap longwe, hem i luk se step-brata blong mi, i stap go long skul. Step-brata ya i gat ten yia, olsem mi. Taswe Papa i wantem se mi tu mi mas go long skul. Hem i givim smol mane long mi we i olsem naen vatu​—tri vatu blong pem wan buk blong skul mo sikis vatu blong pem wan smol blakbod blong raet long hem. Hemia long 1924.

Wan Grup Blong Stadi Baebol i Stat

Stat taem mi smol nomo, mi laekem tumas Tok blong God, Baebol. Mi laekem ol lesen long saed blong Baebol long skul, mo oltaem tija blong Sande skul i glad long mi. Taswe long 1930, mi tekem jans blong go lesin long wan tok we wan Baebol Studen blong wan narafala ples i givim. Hem i wan long ol faswan man blong prij long Ilesa. Afta long tok ya, hem i givim wan buk long mi, The Harp of God, long lanwis Yoruba.

Evri taem mi stap go long Sande skul. Naoia mi stat blong karem buk ya The Harp of God wetem mi, mo mi yusum blong stretem sam long ol gyaman tijing we oli stap tijim long ples ya. From samting ya, sam rao oli kamaot, mo plante taem ol lida blong jyos oli givim woning long mi blong no folem ‘nyufala tijing ya.’

Wan yia biaen, taem mi stap wokbaot long rod, mi luk wan grup blong man we oli stap lesin long wan tok we wan man i stap givim. Man we i givim tok ya, hemia J. I. Owenpa, wan Baebol Studen. William R. Brown (plante taem oli kolem hem se Baebol Brown), we i stap long Lagos mo i stap lukaot long wok blong talemaot Kingdom long eria blong mifala, i sanem hem i kam.a Mi faenemaot se wan smol grup i stat blong stadi Baebol long Ilesa, mo bambae oli yusum buk ya The Harp of God, ale mi mi joen wetem olgeta.

Mi mi yangfala moa long ol narafala long grup ya. Mi wan boe we mi stap go long skul nomo, mi gat kolosap 16 yia nomo. Ating mi mas sem, no fraet, blong joen wetem ol man ya we oli olfala moa long mi, olsem 30 yia mo antap long 30 yia. Be olgeta ya oli glad we mi joen wetem olgeta, mo oli leftemap tingting blong mi blong kam. Oli olsem ol papa blong mi.

Ol Lida Blong Skul Oli Agens

I no longtaem, ol lida blong skul oli agensem mifala bigwan. Ol Katolik, ol Anglikan, mo sam narafala bakegen, we bifo oli stap agensem olgeta nomo, naoia oli joen wanples blong agensem mifala. Oli toktok wetem ol jif, blong pulum olgeta blong mekem sam samting blong traem stopem mifala. Oli sanem sam polis i kam blong karemaot ol buk blong mifala. Oli talem se ol buk ya oli save spolem ol man. Be, jif blong polis i givim woning se oli no gat raet blong karemaot ol buk ya, nao tu wik biaen oli givimbak ol buk ya.

Afta long samting ya, ol man oli singaotem mifala i kam long wan miting. Long ples ya, mifala i mitim oba, no bigfala jif, wetem sam narafala bigman blong taon. Long taem ya, i gat kolosap 30 man evriwan long grup blong mifala. Tingting biaen long miting ya, i blong mekem se mifala i no moa ridim ol buk ya we oli save “spolem” mifala. Oli askem sipos mifala i kam long narafala ples. Be taem oli luklukgud fes blong mifala, oli talem se, “Hemia ol pikinini blong yumi nomo ya. I gat sam nomo we oli kam long narafala ples.” Oli talem long mifala se, oli no wantem we mifala i gohed blong stadi long ol buk blong wan skul we i save spolem mifala.

Mifala i no talem wan samting, mifala i gobak long haos nomo. Tingting blong mifala i stap strong se bambae mifala i no save lesin long tok blong ol bigman ya. Plante blong mifala i glad tumas long ol samting we mifala i stap lanem, mo mifala i gat strong tingting blong gohed blong stadi. Taswe, nating se samfala oli fraet mo oli lego grup blong mifala, bighaf blong mifala i gohed blong stadi long woksap blong wan man blong bildim haos. I no gat wan man we i lidim stadi blong mifala. Mifala i jes stat wetem wan prea mo wanwan blong mifala i ridim ol haf long buk. Samwe long wan haoa biaen, mifala i prea bakegen mo gobak long haos. Be i gat sam man we oli stap haed blong wajem mifala. Nao ol jif mo lida blong skul oli gohed blong singaotem mifala evri tu wik, blong givim woning agensem stadi we mifala i mekem long buk blong ol Baebol Studen.

Long semtaem, mifala i stap traem blong halpem ol narafala man wetem smol save we mifala i gat, mo plante man oli stap agri wetem mifala. Sloslou, wanwan man i stap joen wetem mifala. Mifala i glad tumas. Be mifala i no save plante samting yet long saed blong skul ya we mifala i stap joen long hem.

Long stat blong yia 1932, wan brata blong Lagos i kamdaon blong givhan long mifala blong mekem wan plan blong folem, mo long Epril, “Baebol” Brown tu i kam. Taem Brata Brown i luk se i gat samwe 30 man long grup, hem i askem long mifala blong talem sam samting we mifala i lanem finis long riding blong mifala. Mifala i talemaot evri samting we mifala i save long hem. Nao hem i talem se mifala i naf blong tekem baptaes.

From we mifala i stap long taem we i no gat ren, mifala i mas wokbaot 14 kilomita longwe long Ilesa blong kasem wan reva, mo samwe 30 blong mifala oli tekem baptaes. Stat long taem ya, mifala i luk we mifala i naf blong mekem wok blong talemaot Kingdom, mo mifala i stat blong go long ol haos wanwan. Mifala i no bin plan blong mekem olsem. Be naoia, mifala i wantem tumas blong serem olgeta save blong mifala wetem ol narafala man. Mifala i mas reregud fastaem, blong mifala i save gat sam vas blong Baebol long tingting blong mifala. Ol vas ya oli save sapotem ol tok blong mifala blong daonem ol gyaman tijing we maet ol narafala oli tokbaot. Taswe, long ol miting blong mifala, mifala i tokbaot ol tijing, mo wanwan blong mifala i stap givhan long ol narawan wetem ol samting we mifala i save.

Wok Blong Prij Blong Mifala

Mifala i prij long olgeta ples long taon ya. Ol man oli jikim mifala mo oli singaot strong long mifala, be mifala i no wari long samting ya. Mifala i glad tumas from we mifala i gat trutok, nating se mifala i gat plante moa samting blong lanem.

Evri Sande, mifala i stap go long ol haos wanwan. Ol man oli stap askem kwestin, mo mifala i traem ansarem olgeta. Long Sande naet, mifala i givim pablik tok. Mifala i no gat wan Haos Kingdom, taswe mifala i mekem ol miting long open ples nomo. Mifala i pulum ol man oli kam wanples, givim wan tok, mo givim jans long olgeta blong askem kwestin. Samtaem mifala i prij insaed long ol jyos tu.

Mo tu, mifala i go long ol ples we ol man oli neva bin harem tok blong ol Wetnes blong Jeova. Plante taem, mifala i go long baskel, be samtaem mifala i pem wan bas blong karem mifala. Taem mifala i kasem wan velej, mifala i blou long wan pupu blong mekem bigfala noes. !Fulwan velej i save harem mifala! Ol man oli spid nomo oli kamaot blong luk wanem samting i hapen. Ale mifala i talemaot mesej blong mifala. Afta we mifala i finis, ol man oli hareap blong karem ol buk we mifala i givimaot. Mifala i seremaot plante buk long fasin ya.

Mifala i wantem tumas we Kingdom blong God i kam. Mi tingbaot taem ya we mifala i kasem 1935 Yearbook. Wan brata i luk ol vas blong dei blong fulwan yia, nao i askem se: “?Samting ya i minim se bambae i gat wan moa ful yia bifo we Amageden i kam?”

Blong ansa long hem, brata we i lidim miting i askem se: “?Brata, yu yu ting se sipos Amageden i kam tumora, bambae yumi no moa ridim Yearbook?” Taem brata ya i talem no, hem i gohed se: “?Ale, from wanem yu yu stap wari?” Long taem ya, mifala i wantem tumas blong luk dei blong Jeova, mo i stap sem mak yet tede.

Ol Yia Long Taem Blong Faet

Long taem blong Seken Bigfala Faet Blong Wol, oli blokem mifala se mifala i no moa save karem ol buk oli kam long narafala kantri long sip. Wan brata long Ilesa i no lukaotgud, nao hem i soemaot buk ya Riches long wan polis. Polis ya i askem se: “?Buk ya i blong hu?” Brata ya i talem se buk ya i blong hem nomo. Polis ya i talem se i tabu blong holem ol buk olsem, nao hem i tekem brata ya i go long polis stesen, mo putum hem long kalabus.

Mi go long polis stesen ya mo, afta we mi toktok wetem olgeta, oli letem brata ya i gofri. Nao mi telefon i go long Brata Brown long Lagos blong talemaot long hem wanem samting i bin kamaot. Mi askem tu, sipos i gat wan loa we i putum tabu long fasin blong seremaot ol buk blong mifala. Brata Brown i talem se oli putum tabu long fasin blong karem ol buk ya oli kam long sip, be oli no putum tabu long fasin blong seremaot olgeta. Tri dei biaen, Brata Brown i sanem wan brata blong Lagos i kam blong luk wanem samting i stap hapen. Brata ya i mekem disisen se, nekis dei, bambae mifala evriwan i goaot long wok blong prij wetem ol magasin mo buk.

Mifala i seraot i go long ol defren ples. Afta wan haoa, mi harem nyus se polis i holem bighaf blong ol brata finis. Taswe, brata we i kam visitim mifala mo mi, mitufala i go long polis stesen. Ol polis oli no wantem lesin, taem mitufala i traem eksplenem long olgeta se i no gat loa we i putum tabu long ol buk ya.

Ol polis oli karem ol 33 brata we oli stap long han blong olgeta, oli go long Bigfala Kot blong Ife, mo mi mi go wetem olgeta. Taem ol man blong taon oli luk we mifala i stap go, oli singaot bigwan se, “Tede, wok blong ol man ya bambae i finis. Bambae oli no moa kambak long ples ya.”

Oli talemaot rong blong ol brata long fored blong jif jaj, we hem i wan man Naejeria. Oli soem olgeta buk mo magasin long hem. Hem i askem hu ya i bin givim raet long jif blong polis blong holem ol man ya. Jif blong polis i ansa se hem i folem tok blong bos blong ol polis long eria ya. Nao jif jaj i singaotem jif blong polis mo fo blong mifala, we mi mi wan long olgeta, blong go long ofis blong hem.

Hem i askem long mifala hu ya Masta Brown. Mifala i talem long hem se hem i wan man we i wok blong Watch Tower Sosaeti long Lagos. Hem i talem long mifala se hem i kasem wan mesej we Masta Brown i sanem i kam long hem long saed blong mifala. Hem i no jajem bisnes ya long dei ya, mo hem i letem ol brata oli givim sam mane olsem promes se bambae oli kambak long nekis dei. Ale, long nekis dei, hem i talem se ol brata oli no gat fol, i letem olgeta oli gofri, mo hem i givim oda long ol polis blong givimbak ol buk blong olgeta.

Long rod blong gobak long Ilesa, mifala i stap singsing. Bakegen, ol man oli stat blong singaot bigwan, be naoia oli talem se, “!Oli kambak bakegen!”

Ol Rul Blong Jeova Long Saed Blong Mared Oli Kam Klia

Long yia 1947, ol tri faswan misinari blong Gilead oli kasem Naejeria. Wan long ol brata ya, Tony Attwood, i stap yet long ples ya. Hem i stap mekem wok long Betel blong Naejeria. Stat long taem ya, mifala i luk ol bigfala jenis oli kamaot long ogenaesesen blong Jeova long Naejeria. Wan bigfala jenis i kamaot long saed blong tingting we mifala i gat long fasin blong tekem plante waef wantaem.

Mi maredem Olabisi Fashugba long Febuwari 1941, mo mi gat naf save blong luksave se mi no mas tekem wan narafala waef bakegen. Be go kasem taem we ol misinari oli kam long 1947, fasin blong gat plante waef i stap long plante kongregesen. Ol brata we oli gat plante waef, ol narafala oli talem long olgeta se oli mekem olsem from we oli no save se hem i rong. Taswe sipos oli gat tu, tri, fo, no faef waef, oli talem long olgeta se oli save stap olsem, be oli no save karem moa. Hemia nao rul we mifala i folem.

Plante man oli wantem tumas blong joen wetem mifala, antap moa olgeta we oli joen long wan grup we oli kolem Jerubim mo Serafim long Ilesa. Oli talem se ol Wetnes blong Jeova nomo oli stap tijim trutok. Oli agri wetem ol tijing blong mifala, mo oli wantem mekem ol jyos blong olgeta oli kam ol Haos Kingdom. Mifala i wok had blong mekem samting ya i kamtru. Mifala i gat sam spesel ples tu blong trenem ol elda blong olgeta.

I no longtaem, i gat ol nyufala save i kamaot long saed blong fasin blong gat plante waef. Wan misinari i givim wan tok long seket asembli long 1947. Hem i tokbaot ol fasin mo kastom we oli stret. Nao hem i tekem vas blong 1 Korin 6:​9, 10, we i talem se ol man nogud oli no save go insaed long Kingdom blong God. Mo hem i talem se: “!Mo olgeta we oli gat plante waef bambae oli no save go insaed long Kingdom blong God!” Sam long ol man we oli stap lesin oli singaot se: “?Wanem ya? !Ol man we oli gat plante waef bambae oli no save go insaed long Kingdom blong God!” Ale, fasin seraot i kamaot. Hem i olsem wan faet. Plante long olgeta we oli jes stat blong joen wetem mifala, oli no moa joen, oli talem se: “Tangkyu long God we mifala i no joen fulwan wetem olgeta ya.”

Be bighaf blong ol brata oli stat blong stretem laef blong olgeta. Oli stap wetem wan waef nomo, oli letem ol narawan oli gofri. Oli givim mane long olgeta mo oli talem se, ‘Sipos yu yangfala yet, yu go faenem wan narafala hasban blong yu. Mi mi rong ya taem mi maredem yu. Naoia mi mas gat wan waef nomo.’

I no longtaem, i gat wan narafala problem i kamaot. Samfala, we oli mekem disisen blong stap wetem wan waef nomo mo lego ol narafala, oli jenisim tingting blong olgeta. !Nao oli wantem karembak wan long ol narafala waef, mo lego hemia we oli kipim fastaem! Ale, trabol i stat bakegen.

Sam moa save blong lidim mifala i kam long hedkwota blong Bruklin. Hem i stanap long Malakae 2:​14, we i tokbaot “waef we yu tekem long yang taem blong yu.” Advaes ya i soem se ol hasban oli mas kipim faswan waef we oli bin tekem. Olsem nao, ansa blong problem ya i kam klia.

Ol Gudfala Jans Blong Wok

Long 1947, Sosaeti i stat blong mekem ol kongregesen oli kam strong moa. Mo hem i stat blong seraotem olgeta long ol defren seket. Oli wantem putumap sam brata we oli bigman long saed blong speret mo we oli gat plante save, blong kam olsem ol ‘man blong wok blong ol brata,’ we naoia yumi kolem olgeta ol seket elda. Brata Brown i askem mi sipos mi agri blong mekem wan wok olsem. Mi talem long hem se, risen blong baptaes blong mi i blong mekem ol samting we Jeova i wantem, mo mi ademap se: “Yu nao yu baptaesem mi. Taem mi gat jans blong mekem moa long wok blong Jeova, ?yu ting se mi no save agri?”

Long Oktoba blong sem yia ya, i gat seven long mifala we i go long Lagos blong kasem trening, bifo we mifala i stat blong wok olsem ol seket elda. Long taem ya, ol seket oli bigwan. Oli seraotem fulwan kantri i go long seven seket nomo. I no gat plante kongregesen.

Wok blong mifala olsem ol man blong wok blong ol brata, i rili had. Mifala i wokbaot long plante kilomita evri dei, plante taem mifala i pastru long ol bus we ples i hot tumas. Evri wik mifala i mas wokbaot, stat long wan velej i go long narafala velej. Samtaem, mi harem olsem we mi no moa gat paoa long leg blong mi. !Mo samtaem mi harem olsem we bambae mi ded nomo! Be i gat bigfala glad tu, antap moa taem mifala i luk namba blong ol man we oli joen long trutok i kam antap. !Yes, afta seven yia nomo, namba blong ol pablisa long kantri ya, i fo taem antap long namba we i stap seven yia bifo!

Mi mekem wok blong seket elda go kasem 1955. Long taem ya, mi kasem wan sik we i mekem se mi mas kambak long Ilesa. Long ples ya, oli givim wok long mi blong lukaot long olgeta kongregesen long taon ya. From we mi stap wetem famle blong mi bakegen, samting ya i givim jans long mi blong spenem moa taem blong givhan long olgeta long saed blong speret. Naoia, ol sikis pikinini blong mi oli stap holemstrong long wok blong Jeova.

Trufala Lav i Neva Save Lus

Taem mi luklukbak long olgeta yia bifo, i gat plante samting we mi save talem tangkyu from. I gat ol taem blong harem nogud, ol wari, mo ol sik, be i gat plante bigfala glad tu. Nating se save mo mining blong ol save ya oli kam bigwan moa long ol yia we oli pas, mi mi lanem tru long ol samting we oli hapen long laef blong mi, mining blong 1 Korin 13:​8 (NW), we i talem se: “Lav i neva save lus.” Sipos yu laekem Jeova tumas mo yu stanap strong oltaem long wok blong hem, bambae hem i halpem yu tru long olgeta trabol we yu fesem, mo bambae hem i blesem yu bigwan.

Laet blong trutok i stap kam strong moa. Taem mifala i jes stat nomo, mifala i ting se Amageden bambae i kam kwiktaem. Taswe, mifala i hareap blong mekem olgeta wok we mifala i naf blong mekem. Be olgeta samting ya oli givhan long mifala. Taswe, mi mi agri wetem ol tok blong man blong raetem Sam ya we i talem se: “Bambae mi stap presem hem oltaem, taem mi stap laef, bambae mi sing long God blong mi oltaem long laef blong mi.”​—Ol Sam 146:2.

[Futnot]

[Tok blong pija long pej 23]

Samuel wetem Milton Henschel long 1955

[Tok blong pija long pej 24]

Samuel wetem waef blong hem, Olabisi