Holemtaet Tingting Blong Yu Blong Hareap Blong Mekem Ol Impoten Wok

?WANEM wan fasin we yumi mas gat, we God i agri long hem, blong yumi save gohed oltaem blong mekem wok blong Jeova wetem olgeta laef blong yumi? Hem i strong tingting blong hareap, we i tru mo i stap dip insaed long hat blong yumi. Blong mekem wok blong God wetem olgeta laef blong yumi, i minim se yumi givim yumi fulwan blong mekem wok blong hem. Hem i minim tu, se yumi traehad oltaem blong obeigud long olgeta samting we hem i askem yumi blong mekem.

Profet Moses i makem nid blong samting ya, taem hem i tijim nesen blong Isrel se: “Yufala i mas laekem Jeova, we i God blong yufala, wetem ful hat blong yufala, wetem ful laef blong yufala, mo wetem olgeta paoa blong yufala.” (Dutronome 6:5) Sam handred yia biaen, Jisas Kraes i talem bakegen semfala oda ya, i se: “Yu mas laekem Jeova, we i God blong yu, long olgeta hat blong yu mo long olgeta sol blong yu, mo long olgeta maen blong yu.” (Matyu 22:37, NW) Aposol Pol i tokbaot semfala samting ya, taem hem i talem long ol man Efesas se oli mas mekem wil blong God ‘wetem olgeta laef blong olgeta.’ Mo bakegen, hem i pulum ol man Kolosi se: “Long wanem wok we yufala i mekem, be yufala i mas mekem wetem olgeta laef blong yufala, olsem we yufala i stap wok blong Jeova, yufala i no stap wok blong ol man nomo.”​—Efesas 6:6; Kolosi 3:23, NW.

Be, i hadwok blong wok wetem fulhat mo laef blong yumi long wok blong God sipos filing ya se i impoten blong hareap long wok ya i no stap dip insaed long yumi, no sipos filing ya we yumi gat bifo se i impoten blong wok kwik i no moa strong​—no maet hem i lus olgeta. Tede, yumi laef long wan taem we i impoten tumas blong hareap long wok blong yumi bitim olgeta narafala taem long histri blong man.

Sam Spesel Taem Blong Hareap

Bifo Kristin taem, i gat samfala taem we i impoten blong hareap. Olsem taem blong Noa mo taem ya we Sodom mo Gomora oli lus, oli rili ol taem we oli impoten blong hareap. (2 Pita 2:​5, 6; Jud 7) Ol yia bifo we Bigfala Wora i ron, oli fulap long ol wok we i impoten blong mekem kwik. Nating se Noa mo famle blong hem oli no save stret taem we Bigfala Wora bambae i ron, be fasin ya we oli ‘fraetgud long God’ i mekem se oli no slou blong mekem wok ya we oli mas mekem.​—Hibrus 11:7.

Long sem fasin, bifo we tufala taon ya Sodom mo Gomora oli lus, ol enjel oli ‘tok long Lot, blong traem mekem hem i hareap,’ mo oli talem long hem se: “!Yufala i resis! !Sipos no, bambae yufala i lus ya!” (Jenesis 19:​15, 17) Yes, long taem ya tu, fasin blong hareap i sevem laef blong sam man blong stretfasin. Sam handred yia biaen, ol man Jyu we oli kalabus long Babilon, oli kasem tok ya se: “Yufala i gowe, yufala i gowe, yufala i kamaot long ples ya, yufala i no tajem samting we i doti. Yufala i kamaot long medel blong hem.” (Aesea 52:11) Long 537 B.K.T.,a raonabaot 200,000 man we oli bin kalabus oli hareap blong kamaot long Babilon, blong obei long impoten oda ya we i olsem wan profet tok.

Tingting ya blong hareap we i kamaot long tufala store ya, hem i pulum ol man ya blong mekem wok blong God wetem olgeta laef blong olgeta, from we oli gat mo oli holemtaet strong bilif se oli stap laef long wan taem we i impoten tumas.

Fasin Blong Hareap Long Kristin Taem

Plante tok long Kristin Grik haf blong Baebol oli soemaot se i gat nid blong hareap. ‘Stap lukluk,’ ‘stap wekap,’ “lukaotgud,” “stap rere,”​—olgeta tok ya Jisas Kraes i yusum blong mekem ol man blong hem oli kasem stret tingting se i impoten tumas blong hareap. (Matyu 24:​42-44; Mak 13:​32-37) Antap moa, ol pijatok blong hem long saed blong ol ten yang gel, rabis slef, ol man we oli holem mane blong masta blong olgeta, mo wok blong seraotem ol sipsip mo nani, oli pulum man blong tingbaot samting we bambae i kamaot biaen, mo oli givim wan filing se i impoten blong hareap.​—Matyu 25:​1, 14, 15, 32, 33.

Jisas i no toktok nomo long saed blong fasin blong hareap, be hem i sapotem ol tok blong hem wetem fasin blong wok hareap. Long wan taem, hem i talem long wan bigfala hif blong man we oli traem holemtaet hem, se: “No, be mi mas go long ol narafala velej ya tu, mi mas talemaot gud nyus ya long olgeta, se God i stap kam king blong ol man blong hem. From we God i sanem mi blong mi mekem olsem.” (Luk 4:​42, 43) Mo tu, hem i leftemap tingting blong ol disaepol blong hem blong askem Masta blong garen blong sanem sam moa man i kam blong pikimap kakae ya long garen blong Hem, from we “i gat plante kakae tumas i stap long garen, be smol man nomo oli stap blong karem i go.” (Matyu 9:​37, 38) Wan prea olsem we i askem God blong mekem samting ya, hem i rili soemaot tingting blong hareap.

?I Rili Impoten Blong Hareap Olsem?

Maet samfala oli askem wan gudfala kwestin se: ?From wanem olgeta ya long taem bifo oli nidim blong hareap taem oli save se “bigfala trabol” bambae i jes kamtru plante yia biaen?​—Matyu 24:21.

Yumi save sua se ol tok we Jisas i talem i no blong gyaman long ol man blong hem, blong pulum olgeta blong stap bisi long wok blong prij mo tij. No gat. Kraes i laekem tumas ol disaepol blong hem. Mo tu, long fasin we i stretgud olgeta, hem i kasem save long tingting blong Jeova long saed blong taem. Ol samting ya nao oli stampa risen blong advaes ya we hem i givim blong hareap. Yes, Jisas Kraes i save se oli nidim tingting blong hareap blong finisim olgeta wok we Jeova i wantem olgeta blong mekem, folem stampa tingting blong Hem. Antap moa, hem i save se sipos ol disaepol blong hem oli holemtaet tingting ya blong hareap gogo kasem taem we hem i kambak bakegen, bambae oli save stap strong long saed blong speret.

Jisas Kraes i talemaot klia se i gat wan bigfala wok blong mekem, hemia blong givim wetnes long olgeta ples blong wol. Mo taem we i stap blong finisim wok ya i gat mak blong hem. (Matyu 24:14; Mak 13:10) Taem wok ya i stap gohed, long taem ya nomo, sloslou ol defren haf blong hem oli kam klia. Be i nidim fasin blong wok hareap blong finisim ol wanwan haf blong wok ya. Jisas i tokbaot olsem wanem bambae wok ya i gohed, taem hem i talem se: “Bambae yufala i mas go talemaot mi long Jerusalem, mo long olgeta ples long Judia mo Sameria, gogo i finisim olgeta ples long wol.” (Ol Wok 1:8) Mo long rod ya nao, wok ya i gohed kam kasem taem blong yumi. Samting ya i mekem se samtaem ol man blong God oli kasem sam sapraes, mo oli mas stretem sam tingting we oli gat.

Tingting blong ol Kristin blong hareap long impoten wok ya, hem i givhan blong mekem stampa tingting blong Jeova i kamtru. Hem i halpem ol disaepol blong Kraes blong mekem ol wanwan haf long wok blong olgeta, folem ol stret taem we God i makemaot finis. Taswe tede, taem yumi luklukbak long kolosap 2,000 yia we oli pas finis, yumi kasem save long program ya blong God long fasin we i moa klia.

Kristin fasin ya blong wok hareap i halpem ol disaepol blong givim wan nambawan wetnes long Jerusalem, Judia, Sameria, mo long olgeta man Jyu raonabaot, bifo 36 K.T.b Long taem ya, spesel jans we ol man Isrel oli kasem, i finis. (Daniel 9:27; Ol Wok 2:​46, 47) Long sem fasin, Kristin tingting blong hareap i givhan long faswan kongregesen blong givim wan woning we i klia long olgeta man Jyu, se i no longtaem, fasin blong laef blong olgeta bambae i finis. (Luk 19:​43, 44; Kolosi 1:​5, 6, 23) Ale, hem i finis wantaem nomo long 70 K.T. Biaen, fasin blong hareap i halpem ol wetnes blong Kraes long faswan handred yia, blong talemaot hop blong go long heven long plante man, bifo we fasin blong apostasic i mekem se tudak long saed blong speret i kavremap ol man. (2 Tesalonaeka 2:3; 2 Timote 4:2) Mo tu, tru long ol handred yia blong Dak Ejes,d smol grup blong ol Kristin we oli olsem wit, oli mekem se hop blong Kingdom i stap strong olsem we Jisas Kraes i bin talemaot. (Matyu 13:​28-30) Biaen, long taem blong yumi, Jeova i stanemap wan strong kongregesen long stret taem blong hem. Impoten mesej long saed blong jajmen blong olgeta man long ol las dei blong wol ya, i stap pusum olgeta blong wok strong.​—Matyu 24:34.

Olsem Daniel blong bifo, olgeta Wetnes blong God long taem blong yumi we oli gat strong bilif, oli neva tingbaot blong askem kwestin long Jeova, se: “?Yu yu mekem wanem ya?” (Daniel 4:35) Oli trastem Jeova se hem i save wanem samting i nidim, blong finisim olgeta wok blong hem stret long taem we hem i makemaot. Taswe, bitim we oli no trastemgud fasin we Jeova i yusum blong wokem program blong hem, oli glad se God i givim jans long olgeta blong wok wetem hem long impoten taem ya.​—1 Korin 3:9.

Wan Narafala Samting Blong Pulum Yumi Blong Hareap

Wan narafala samting we i mekem se i impoten tumas blong hareap long wok blong yumi, hemia from we yumi no save stret dei mo haoa we bigfala trabol bambae i faerap wantaem. Jisas Kraes i talem klia se i no gat wan man long wol we i save stret dei mo haoa we God i makemaot finis, we impoten taem ya bambae i stat. (Matyu 24:36) Long wan narafala taem, hem i talem long ol aposol blong hem we oli wantem tumas blong save samting ya, se: “I no blong yufala i save ol taem ya mo ol dei ya we Papa blong mi nomo i gat raet blong jusumaot.” (Ol Wok 1:7) Yes, samting we bambae i kamaot hem i klia, be olgeta smosmol haf blong hem, yumi no save long olgeta.

Aposol Pol i gat stret tingting long saed blong fasin blong wok hareap. Ating hem i stap tingbaot ol tok blong Jisas, taem hem i raet i go long ol man Tesalonaeka long saed blong taem we Kraes bambae i kambak: “Ol brata mo sista. Long saed blong stret dei mo stret taem blong ol samting ya, i no gat nid blong mi raetem tok i go long yufala.” (1 Tesalonaeka 5:1) Hem i raetem leta ya samwe long 17 yia afta we Jisas i bin talem se: “Bambae yufala i mas go talemaot mi long . . . olgeta ples long wol.” (Ol Wok 1:8) Long taem ya, oli no save raetem sam moa samting from we i no gat sam nyufala save i kamaot yet. Nating se i olsem, oli save gat strong tingting se dei blong Jeova bambae i kam olsem wan “man blong stil, we i kamtru long naet.” Long taem ya, bambae ol Kristin man oli stap gohed yet blong hareap blong mekem wok blong prij.​—1 Tesalonaeka 5:2.

Ating ol Kristin long faswan handred yia we oli stap tingting long ol tok ya, oli mas ting se dei blong Jeova i stap kolosap nomo. I tru se, oli savegud ol parabol blong Jisas long saed blong wan king we i go long wan kantri farawe, mo long saed blong wan masta we i wokbaot i go long wan narafala kantri. Oli save tu, se ol parabol ya oli soemaot se king ya bambae i kambak samtaem ‘long fyuja,’ mo masta ya we i wokbaot bambae i kambak bakegen afta we “plante yia i pas.” Be i sua se oli wantem tumas blong save ansa blong samfala kwestin olsem: ?Wetaem nao ‘fyuja ya’? ?Mo “plante yia i pas” i minim hamas yia? ?I minim ten yia? ?Twante yia? ?Fefte yia? ?No longtaem moa? (Luk 19:​12, 15; Matyu 25:​14, 19) Ol tok blong Jisas bambae oli stap long tingting blong olgeta oltaem, se: “Yufala tu i mas stap rere. From we mi, mi Pikinini blong Man, bambae mi kamtru long taem we yufala i no tingbaot.”​—Luk 12:40.

Fasin Blong Hareap i Mekem Gudfala Samting i Kamaot

Yes, fasin ya blong hareap we God i putum long tingting blong ol Kristin long faswan handred yia, i leftemap tingting blong olgeta bigwan, mo i pulum olgeta blong stap bisi oltaem long impoten wok ya blong prij mo tij. Fasin ya i stap gohed yet blong leftemap tingting blong yumi tede long plante rod. Hem i mekem se oltaem yumi luk wok ya olsem wan samting we i impoten tumas, yumi no kam ‘taed blong mekem.’ (Galesia 6:​9, King James Version) Hem i protektem yumi blong no joen tumas long wol mo long fasin blong hem blong ronem ol sas samting, we i save kasem yumi sloslou. Hem i mekem tingting blong yumi i stap strong long “laef ya we i prapa wan.” (1 Timote 6:19) Masta Jisas i talem se ol disaepol blong hem bambae oli olsem ‘ol sipsip we ol wael dog oli stap raon long olgeta.’ Mo hem i save se blong blokem ol fasin blong wol, yumi nidim blong mekem tingting blong yumi i stap strong blong lukluk i go long wan mak nomo long fyuja. Yes, strongfala Kristin tingting blong yumi blong hareap blong mekem ol impoten wok we i stap, hem i stap lukaotgud long yumi mo blokem yumi long plante trabol.​—Matyu 10:16.

Jeova God, we hem i waes tumas, oltaem i stap givim naf save long ol man blong hem, blong mekem tingting blong hareap i stap strong long olgeta. From kaen fasin blong hem, hem i talemaot finis se yumi stap long ‘ol las dei’ blong wol ya we i fulap long ol rabis fasin. (2 Timote 3:1) Oltaem yumi kasem tok ya se yumi mas gohed blong saenaot olsem ol laet, gogo kasem taem we ol rabis man we oli stap laef naoia bambae oli lus long bigfala trabol, we en blong hem hemia Amageden.​—Filipae 2:15; Revelesen 7:14; 16:14, 16.

Yes, yumi nidim tingting ya blong hareap we i laenap wetem tingting blong God, blong mekem wok blong Jeova wetem olgeta laef blong yumi. Tingting olsem i save givhan blong agensem mo winim olgeta traem we Devel Setan i stap mekem long ol man blong God, blong traem pulum olgeta blong kam ‘taed, mo lego fasin ya blong bilif.’ (Hibrus 12:3) Fasin blong mekem wok blong Jeova wetem olgeta laef, bambae i mekem se ol man blong hem oli save gohed blong obei long hem gogo i no save finis. Naoia, long ol laswan dei bifo Amageden, yumi nidim wan dip, trufala filing blong hareap, blong yumi save wosip long God wetem olgeta laef blong yumi.

Yumi wantem se Jeova, we i God blong yumi, bambae i halpem yumi evriwan blong holemtaet tingting blong hareap, taem yumi gohed blong talemaot ol tok ya blong aposol Jon se: “Amen. Jisas, Masta, plis yu kam.”​—Revelesen 22:20.

[Ol futnot]