‘Oli Stap Kilim Mi, Be Neva Se Mi Ded Olgeta’

ULF HELGESSON I TALEM STORE YA

Long Julae 1983, ol dokta we oli stap stanap kolosap long mi, oli talem se: “!Hem i wekap!” Ol dokta oli jes bin tekem 15 haoa blong katemaot wan soa long bigfala bun blong baksaed blong mi, we longfala blong soa ya i kasem 12 sentimita. Biaen, olgeta bodi blong mi i ded nomo.

SAM dei biaen, oli karem mi mi go long wan narafala hospital, samwe 60 kilomita long we long ples blong mi long Halsingbog, long saot blong Swiden. Long ples ya, mi folem wan program blong traem mekem bodi blong mi i wok bakegen. Dokta we i lukaot long mi, i talem se bambae program ya i hadwok tumas long mi. Be mi mi wantem statem ol eksasaes we mi mas mekem. Mi mi rili wantem wokbaot bakegen. From we mi strong blong folem wan program blong eksasaes faef haoa evri dei, kwiktaem nomo mi stat blong kamgud bakegen.

Wan manis biaen, taem elda we i goraon i kam long kongregesen blong mifala, hem wetem sam narafala Kristin elda oli mekem wan longfala trep, blong kam mekem miting blong ol elda blong kongregesen long rum blong mi long hospital. !Hat blong mi i glad tumas from lav ya we oli soem olsem ol stret brata! Ol nes blong hospital oli givim ti mo bred long mifala afta we miting i finis.

Fastaem ol dokta oli sapraes blong luk olsem wanem mi stap kamgud kwiktaem. Afta long tri manis, mi naf blong sidaon long wiljea blong mi mo stanap blong smoltaem tu. Mi mi hapi mo mi gat strong tingting blong wokbaot bakegen. Famle blong mi mo ol narafala Kristin, oli leftemap tingting blong mi bigwan taem oli kam luk mi. Mi gat jans blong gobak long haos blong mi blong smoltaem tu.

Wan Strong Traem

Be, afta we samtaem i pas, mi no moa gohed blong kamgud. I no longtaem, dokta i talemaot nyus we i mekem mi mi harem nogud, hem i se: “!Bambae yu no save kamgud moa!” Nao oli wantem trenem mi blong mi naf blong wokbaot nomo long wan wiljea. Mi stat blong tingbaot fyuja blong mi. ?Olsem wanem waef blong mi i save lukaot long mi? Ol dokta oli katem hem finis from wan bigfala sik mo hem i nidim help blong mi tu. ?Bambae mi mas stap long wan hospital oltaem?

Tingting blong mi i foldaon bigwan. Paoa blong mi, strong tingting we mi gat, olgeta evriwan oli lus. Plante dei oli pas, mo mi gohed blong stap we mi no save muf. Bodi blong mi i ded, mo antap long samting ya, mi mi ded long saed blong ol filing blong mi mo long saed blong speret tu. I olsem we wan samting i ‘kilim mi.’ Bifo mi ting se mi strong long saed blong speret. Mi mi gat wan strong bilif long Kingdom blong God. (Daniel 2:44; Matyu 6:10) Mi sua long ol promes blong Baebol se ol sik mo ol trabol long saed blong bodi bambae oli finis long nyufala wol blong God we i fulap long stret fasin, mo se olgeta man bambae oli kasem wan laef we i stretgud olgeta. (Aesea 25:8; 33:24; 2 Pita 3:13) Be, mi harem se mi ded long saed blong bodi mo long saed blong speret tu. Mi harem olsem se mi “ded olgeta.”​—2 Korin 4:9.

Bifo we mi toktok moa long samting ya, bambae mi tokbaot laef blong mi smol.

Wan Famle We i Hapi

Mi mi bon long 1934, mo mi no gat tumas trabol long helt blong mi. Jes afta 1950, mi mitim Ingrid. Mitufala i mared long 1958, mo mitufala i go stap long taon blong Ostasun, long medel blong Swiden. Laef blong mitufala i jenis long 1963, taem mitufala i stat blong stadi Baebol wetem ol Wetnes blong Jeova. Long taem ya, mitufala i gat tri smol pikinini​—Ewa, Björn, mo Lena. I no longtaem, fulwan famle i stap stadi mo gohed gud blong kasem save long trutok blong Baebol.

Smoltaem afta we mifala i stat blong stadi, mifala i muf i go long Halsingbog. Long ples ya, long 1964, waef blong mi mo mi, mitufala i givim laef blong mitufala blong mekem wok blong Jeova mo tekem baptaes. Glad blong mifala i kam bigwan moa long 1968, taem fasbon gel blong mitufala, Ewa, i baptaes. Seven yia biaen, long 1975, Björn mo Lena tufala i tekem baptaes tu. Mo wan yia biaen, mi kam wan elda long Kristin kongregesen.

Wok blong mi i gud, mekem se mi save givim olgeta samting we famle blong mi i nidim long saed blong bodi. Mo glad blong mifala i gru moa taem Björn mo Lena i joen long wok blong fultaem paenia. Smoltaem biaen, Björn i go wok long branj ofis blong ol Wetnes blong Jeova long Aboga. Laef blong mifala i gud nomo. Long stat blong yia 1980, mi stat harem nogud long bodi blong mi from bigfala soa ya we mi tokbaot fastaem se ol dokta oli katemaot long 1983.

Winim Fasin Ya We Mi Ded Long Saed Blong Speret

Taem dokta i talem long mi se bambae mi no moa save wokbaot bakegen, mi harem olsem se laef blong mi i blong nating nomo. ?Olsem wanem mi kasem paoa long saed blong speret bakegen? Mi faenem se i moa isi blong mekem samting ya, bitim we mi bin tingbaot fastaem. Mi jes karem Baebol blong mi mo mi stat blong ridim. Moa mi ridim, moa paoa mi kasem long saed blong speret. Mi laekem moa Bigfala Tok we Jisas i mekem antap long Hil, bitim ol narafala haf. Mi ridim bakegen mo bakegen, mo mi tingting dip long hem.

Glad we mi gat bifo, i kambak bakegen. From fasin blong rid mo tingting dip, mi stat blong luk ol traem olsem ol jans. Mi kasem bakegen strong filing we mi gat fastaem, blong serem ol trutok blong Baebol wetem ol narafala man. From samting ya, mi haremgud taem mi wetnes long ol man we oli wok long hospital mo sam narafala man we mi mitim olgeta. Famle blong mi i sapotem mi fulwan, mo oli kasem trening blong lukaot long mi. Ale, biaen mi naf blong lego hospital.

Nao mi kam stap long haos blong mi bakegen. !Hemia i rili wan hapi dei long mifala evriwan! Famle blong mi i mekem wan plan blong ol wok we oli mas mekem blong keagud long mi. Pikinini boe blong mi, Björn, i mekem disisen blong lego wok blong hem long branj ofis blong ol Wetnes blong Jeova, mo hem i kambak long haos blong givhan long mi. I leftemap tingting blong mi bigwan taem famle blong mi i soemaot lav mo fasin keagud long mi olsem.

Stanap Strong Tru Long Wan Narafala Traem

Taem i stap pas, mo helt blong mi i godaon moa, nao i hadwok long mi blong muf. Biaen, nating se famle blong mi i traehad bigwan, oli no moa naf blong lukaot long mi long haos. Taswe, mi tingting se i moa gud sipos mi go stap long wan hospital bakegen, wan ples we oli stap lukaot long ol olfala mo ol sikman. Samting ya i minim se mi mas jenisim sam samting mo folem wan nyufala program bakegen. Be, mi no letem samting ya i daonem mi long saed blong speret.

Mi neva lego fasin blong ridim Baebol mo stadi long hem. Mi tingbaot nomo ol samting we mi naf blong mekem, mi no tingbaot ol samting we mi no save mekem. Mi tingting dip long ol blesing long saed blong speret we olgeta Wetnes blong Jeova oli gat. Mi stap kolosap long Jeova tru long prea, mo mi yusum olgeta jans we mi gat blong prij long ol narafala.

Naoia, mi stap evri naet mo sam dei tu, long hospital ya. Sam aftenun mo naet mi stap long haos blong mi. Mo ol narafala naet, mi go long ol Kristin miting. I gat wan spesel trak blong gavman we i kam oltaem blong karem mi i go mo kambak long ol miting no long haos blong mi. Famle blong mi we i stap soemaot lav long mi oltaem, ol brata long kongregesen, mo ol man we oli wok long hospital ya we mi stap long hem, olgeta evriwan ya oli lukaot long mi long nambawan fasin.

Mi Mekem Samting We Mi Naf Blong Mekem

Mi no stap tingbaot mi wan olsem wan man we i handikap. Mo famle blong mi wetem ol Kristin brata tu, oli no tingbaot mi olsem wan handikap. Evriwan oli lukaotgud long mi wetem lav, mo samting ya i givhan long mi blong gohed gud long wok blong mi olsem wan elda. Mi stap lidim wan Buk Stadi long kongregesen evri wik, wetem stadi blong Wajtaoa long Haos Kingdom evri wik tu. I hadwok long mi blong tanem ol pej blong Baebol. Taswe, long ol miting, oli askem wan brata blong halpem mi blong mekem samting ya. Taem mi lidim miting mo givim ol tok, mi sidaon long wiljea blong mi nomo.

Taswe, mi save mekem plante samting yet we mi laekem tumas blong mekem bifo, olsem storeyan wetem ol brata mo sista blong leftemap tingting blong olgeta. (1 Pita 5:2) Mi mekem olsem taem oli kam luk mi blong kasem help no advaes. Mi stap yusum telefon tu. Mi nao mi telefon long olgeta blong storeyan wetem olgeta. Samting ya i stap leftemap tingting blong olgeta mo blong mi tu. (Rom 1:​11, 12) I no longtaem i pas, wan fren i bin talem long mi se: “Long stret taem we mi harem nogud, yu yu stap telefon i kam blong leftemap tingting blong mi.” Samting ya i leftemap tingting blong mi, from mi save se Jeova i stap blesem ol traehad blong mi.

Bifo mo afta long ol miting, mi joengud wetem ol smol pikinini long kongregesen. From we mi stap sidaon long wiljea blong mi, mi no longfala tumas, ale oli save luk stret long fes blong mi. Mi laekem olgeta from we oli talem trutok oltaem, mo oli no save haedem wan tingting we oli gat. Wan taem, wan smol boe i talem long mi se: “!Yu yu wan handikap we fes blong yu i naes tumas!”

From we mi stap tingting strong long ol samting we mi naf blong mekem bitim we mi wari tumas long ol samting we mi no save mekem, mi stap glad long wok blong Jeova. Mi lanem plante samting tru long ol traem we mi kasem. Mi luksave se ol traem we yumi kasem oli stap trenem yumi mo mekem yumi strong.​—1 Pita 5:10.

Mi luk se plante man we oli gat gudfala helt, oli no kasem save se oltaem yumi mas tinghevi long wosip we i go long Papa blong yumi long heven. Sipos yumi no mekem olsem, bambae program blong yumi blong stadi, go long ol miting, mo long wok blong prij, oli save kam olsem wan kastom nomo. Mi tingbaot ol samting ya olsem ol impoten samting we oli save mekem yumi stap laef tru long taem we wol ya i kasem en blong hem, blong go insaed long paradaes we God i promes blong mekem long wol.​—Ol Sam 37:​9-11, 29; 1 Jon 2:17.

Oltaem yumi mas holem hop blong yumi blong stap laef long nyufala wol blong God, i stap strong long hat blong yumi. (1 Tesalonaeka 5:8) Mi lanem tu blong neva lego faet blong mi agensem enikaen fasin we i save mekem tingting i foldaon. Mi lanem blong luk Jeova olsem Papa blong mi, mo ogenaesesen blong hem olsem Mama blong mi. Mi luksave se sipos yumi rili traehad, Jeova i save yusum eni wan long yumi blong mekemgud wok blong hem.

Nating se samtaem mi harem olsem se, ‘man i kilim mi,’ be ‘neva se mi ded olgeta.’ Jeova mo ogenaesesen blong hem, famle blong mi, mo ol Kristin brata blong mi, neva oli lego mi. Mi glad tumas se mi bin tekem Baebol mo mi bin stat blong ridim bakegen, from we tru long samting ya nao, mi kasem paoa long saed blong speret bakegen. Mi mi tangkyu long Jeova God, we i givim ‘paoa ya we i bigfala tumas i blong Hem, i no blong yumi,’ taem yumi trastem hem.​—2 Korin 4:7.

Wetem strong tingting mo fasin blong trastem Jeova fulwan, mi mi stap lukluk i go long fyuja wetem glad. Mi mi sua se kolosap nao Jeova God bambae i mekem promes blong hem long saed blong wan paradaes long wol wetem olgeta blesing blong hem, oli kamtru.​—Revelesen 21:​3, 4.