Laet Blong Olgeta i No Ded

LONG ol taem we oli bin raetem Baebol, i gat ol Wetnes blong Jeova we oli kasem ol trabol mo traem. Plante man oli agensem olgeta, mo samtaem oli harem se wok blong olgeta i blong nating nomo. Be, oli no lego, taem tingting blong olgeta i foldaon. I olsem se, laet blong olgeta i no ded.

Eksampel, Jeova i singaot Jeremaea blong mekem wok olsem profet blong hem long nesen blong Juda we i lego trufala wosip. Hem i talemaot woning se Jerusalem bambae i lus. (Jeremaea 1:​11-19) From samting ya, plante taem, ol manples blong Jeremaea oli rao long hem, oli ting se hem i wan man we i talemaot trabol nomo.

Wan taem, pris ya Pasa, we i nambawan haeman long haos blong God, hem i kilim Jeremaea, mo i fasem ol han, leg mo hed blong hem long wan bigfala wud, from ol profet tok we hem i bin talemaot. Taem Jeremaea i kasem traem ya, hem i talem se: “Oli laf long mi, stat long moning go kasem sapa; evriwan oli stap jikim mi. Taem mi toktok, mi kraeaot. Mi stap tokbaot raf fasin mo fasin blong spolem olgeta samting. Tok blong Jeova i kam olsem samting we i mekem olgeta oli jikim mi mo oli laf long mi long moning go kasem sapa.” Tingting blong profet ya i foldaon moa, nao hem i talem se: “Bambae mi no moa tokbaot hem [Jeova], mo bambae mi no moa talemaot ol tok long nem blong hem.”​—Jeremaea 20:​1, 2, 7-9.

Be, Jeremaea i no letem tingting we i foldaon i winim hem. Hem i talem “tok blong Jeova,” se: “Long hat blong mi, tok ya i kam olsem wan bigfala faea we i stap laet insaed long ol bun blong mi; mo mi no moa save holem tok ya i stap insaed long mi, mi no naf blong mekem olsem.” (Jeremaea 20:8, 9) From we Jeremaea i gat strong filing blong talemaot ol tok blong God, tabu speret i givhan long hem, mo hem i finisim wok blong hem.

Aposol Pol tu i gat plante risen blong kam slak, sipos hem i letem ol tingting olsem oli winim hem. Hem i kasem ol trabol olsem ol hariken, sip i rek, ol man oli ronem hem, mo oli kilim hem. Antap long ol samting ya, ‘evri dei hem i stap tingting tumas long ol memba blong kongregesen long olgeta ples.’ (2 Korin 11:​23-28) Yes, evri dei Pol i mas fesem ol trabol, i stap wari long ol nyufala kongregesen we hem i bin givhan blong stanemap. Antap moa, from we hem i no stretgud olgeta, hem i kasem trabol long saed blong bodi, we i olsem ‘nil blong aranis, we i stap stikim hem.’ Hemia i minim trabol wetem ae blong hem we i mekem se i no save lukluk gud. Be hem i stanap strong taem hem i kasem ol trabol ya. (2 Korin 12:7; Rom 7:15; Galesia 4:15) Mo tu, samfala oli tok agensem Pol biaen long baksaed blong hem, mo Pol i faenemaot samting ya we oli bin mekem.​—2 Korin 10:10.

Nating se i olsem, Pol i no letem tingting we i foldaon i winim hem. I no min se hem i wan man we i gat spesel paoa bitim ol narafala man. (2 Korin 11:​29, 30) ?Wanem i mekem se hem i holem strong tingting, olsem wan faea we i laet insaed long hem? Faswan samting, hem i gat ol gudfala fren we oli givhan long hem. Sam long olgeta oli go wetem hem long Rom, taem ol soldia oli holem hem i stap kalabus long wan haos. (Ol Wok 28:​14-16) Namba tu samting, aposol ya i gat stret tingting long saed blong ol trabol we hem i kasem. Ol man we oli ronem hem, mo oli stap agensem hem, olgeta ya nao oli rong, i no Pol. Kolosap long en blong laef blong hem long wol, hem i gat strong tingting taem i skelem minista wok blong hem. Hem i talem se: “Nao praes blong ol man we oli win, hem i stap wet blong mi go tekem. Praes ya we Masta blong yumi bambae i givim long mi blong ona long mi, hemia we hem i talem se mi mi wan stret man. Masta ya blong yumi, hem i wan stret jaj. Nao long dei ya we hem bambae i jajem olgeta man, hem bambae i givim praes ya long mi.”​—2 Timote 4:8.

Antap long ol samting ya, oltaem Pol i prea long Jeova God. Nao ‘Masta blong yumi, hem i stap wetem hem, mo i givim paoa long hem.’ (2 Timote 4:17) Pol i talem se: “Mi mi naf blong mekem evri samting long paoa blong Hemia we i stap givim paoa long mi.” (Filipae 4:​13, NW) Fasin blong toktok wetem God mo wetem ol Kristin brata sista blong hem, mo stret tingting taem hem i skelem minista wok blong hem, i givhan long Pol blong gohed blong mekem wok blong Jeova.

Tabu speret blong God i pusum Pol blong raetem se: “Yumi no kam slak blong mekem ol gudfala fasin, from we sipos yumi no lego, bambae long stret taem blong hem, yumi save kasem kakae from ol hadwok ya blong yumi.” (Galesia 6:​7-9) ?Kasem wanem? Laef blong olwe. Taswe, yu mas mekem olsem Jeremaea, Pol, mo ol narafala Wetnes we Baebol i talem se oli stap tru long Jeova. Yes, yu mas mekem olsem olgeta ya, mo yu no mas letem tingting we i foldaon i winim yu. No letem laet blong yu i ded.​—Skelem wetem Matyu 5:​14-16.

[Tok Blong Pija Long Pej 25]

Pol mo Jeremaea tufala i no letem laet blong tufala i ded