Wan Kwestin

Long Filipae 2:​9, Pol i tokbaot Jisas se: “God i leftemap nem blong hem i go antap olgeta, mo hem i glad blong givim nem long hem we i hae moa long ol narafala nem.” ?Wanem nyufala nem ya? Mo, sipos Jisas i daon moa long Jeova, ?olsem wanem nem ya blong Jisas i hae moa long ol narafala nem?

Filipae 2:​8, 9 i talem se: “Mo [Jisas] i mekem tingting blong hem i stap daon blong i obei long God, gogo i ded. Mo ded ya blong hem, ol man oli nilim hem long [pos]. From samting ya, God i leftemap nem blong hem i go antap olgeta, i givim nem long hem we i hae moa long ol narafala nem.”

Vas ya i no minim se Jisas i semfala man olsem Jeova, from we Jeova nomo i gat wan nem we i hae moa long ol narafala nem. Olsem ol narafala vas we oli stap long Filipae japta 2 oli soem, Jisas i kasem hae nem ya afta we hem i laef bakegen long ded. Bifo, hem i no gat hae nem olsem. Be, long saed blong Jeova, oltaem nomo hem i hae olgeta, mo hae ples blong hem i no save jenis. Jisas i kasem wan nem we i hae moa long nem we hem i gat bifo we hem i kamdaon long wol. Ale, samting ya i pruvum se hem i no sem mak long Jeova. Taem Pol i talem se Jisas i kasem wan nem we i hae moa long ol narafala nem, hem i minim se naoia Jisas i gat wan nem we i hae moa long olgeta narafala laef samting we God i wokem.

?Wanem hae nem ya blong Jisas? Aesea 9:6 i halpem yumi blong faenem ansa. Vas ya i wan profet tok long saed blong Mesaea Jisas we i mas kam. Hem i se: “Rul blong prins bambae i stap long solda blong hem. Mo bambae ol man oli singaot nem blong hem se Nambawan Man Blong Givim Advaes, Strong God, Papa Blong Olwe, Prins blong Pis.” Long ples ya, “nem” blong Jisas i joen wetem hae ples mo bigfala paoa we hem i gat. Hemia i sem mak long nem ya “we i hae moa long ol narafala nem” we Filipae 2:9 i tokbaot. Vas ya i talem se olgeta man oli mas bodaon long Jisas from hae ples mo paoa we Jeova i givim long hem​—paoa we i bigfala moa long paoa we hem i givim long eni narafala laef samting. Tok ya “narafala” long vas ya i no stap long olfala Grik hanraet, be mining ya i stap insaed long vas ya. “Nem” blong Jisas i no hae moa long nem blong hem wan bakegen, be i hae moa long nem blong ol narafala samting we i laef.

!Yumi glad tumas blong joen wetem ol enjel mo ol trufala man blong God, blong bodaon from we yumi luksave hae nem ya blong Jisas! Blong mekem olsem, yumi obei long Jisas we i stap long hae ples mo i gat bigfala paoa we Jeova i givim long hem​—mo long fasin ya yumi “leftemap nem blong God, Papa blong yumi.”​—Filipae 2:11; Matyu 28:18.