Givim Presen Long Narafala—?Wan Fasin We Yumi Mas Mekem?

ATING yu savegud se plante taem kastom blong ol man nomo i pulum olgeta blong givim presen. Long plante kantri, i gat sam spesel taem we ol man oli mas givim presen long narafala. Ol presen olsem oli minim se man i gat respek no i laekem narafala tumas. Plante taem, man i no yusum presen ya we hem i kasem. Sam narafala presen oli stret long samting we man i nidim, mo hem i gat bigfala tangkyu from.

Long Denmak, taem wan bebi i bon, ol fren mo ol famle we oli visitim hem, oli karem sam presen i kam we oli ting se bambae papa mama i save yusum long pikinini ya. Long sam narafala kantri, ol fren oli mekem wan lafet bifo we bebi i bon, mo oli givim presen long papa mama blong bebi ya.

Plante taem, ol man oli wet blong kasem presen long sam spesel lafet evri yia. Ol faswan Kristin oli no mekem samting ya, be naoia ol lafet oli kam wan bigfala fasin blong ol man we oli talem se oli Kristin mo ol man we oli no Kristin. Folem kastom blong sam kantri, taem pikinini i kam bigwan, ol man oli no moa givim presen blong betde long olgeta. Be kastom blong ol man Gris i defren. Olgeta ya oli tinghevi long ol lafet blong betde. Mo tu, oli givim presen long man long “dei we i laenap wetem nem blong hem.” ?Samting ya i minim wanem? Kastom blong skul i putum nem blong ol “tabu man” long ol wanwan dei blong yia. Mo plante man oli tekem nem blong ol “tabu man ya.” Taem dei blong wan “tabu man” i kam, olgeta we oli karem nem blong hem, oli kasem presen.

Long Koria, antap long lafet blong betde blong ol pikinini, ol man oli gat wan pablik holide we oli kolem Dei blong Pikinini. Long taem ya, ol famle oli go wokbaot, mo oli givim presen long ol pikinini nating se i no betde blong olgeta. Ol man Koria oli gat Dei blong ol Papa Mama tu, hemia wan taem we ol pikinini oli givim presen long papa mama blong olgeta. Mo oli gat Dei blong ol Tija, hemia wan dei we ol studen oli ona long ol tija blong olgeta, mo oli givim ol presen. Folem kastom blong ol man Koria, taem wan man i kasem 60 yia blong hem, oli mekem wan bigfala lafet. Ol famle mo fren oli kam wanples mo wisim hem wan longfala mo hapi laef, mo oli givim presen long hem.

Long plante ples, mared i wan narafala taem we kastom i pulum ol man blong givim presen. Long Kenya, taem man mo woman i mared, famle blong man ya i mas givim presen long famle blong woman. Ol man we oli kam long mared ya tu, oli karem ol presen i kam. Sipos man mo woman ya we i mared oli folem kastom, tufala i mas sidaon long wan ples we i antap lelebet, mo ol man we oli kam long mared ya oli karem ol presen i kam long tufala. Taem wanwan long olgeta i karem presen i kam, oli talemaot se “Man ya (oli talem nem blong hem) i karem presen i kam long tufala ya.” Plante we oli givim presen oli no glad nating sipos oli no talemaot nem blong olgeta.

Taem wan man mo woman Lebanon i mared, ol fren mo ol man raonabaot, mo ol man we oli no savegud tufala ya, oli stap karem ol presen i kam go kasem plante dei afta long mared. Taem oli pikinini nomo, oli kasem tijing ya se oli mas givim presen, olsem we oli mas pem ol kaon blong olgeta. Wan man Lebanon i talem se: “Sipos yu no mekem samting ya, yu harem nogud. Hem i wan kastom.”

Long plante kantri, Krismas i wan taem we ol man oli wet nomo blong kasem presen. ?Hemia i tru long ples blong yu tu? I no longtaem, olsem long 1990, oli talem se evri yia ol man Amerika oli spenem kolosap 40 bilyan dola (4 milyan milyan vatu) long ol Krismas presen. Long Japan tu, ol man Budis mo Sinto oli mekem lafet ya wetem bigfala glad. Mo i gat plante defren fasin blong mekem lafet ya, long Yurop, long Saot Amerika, mo long samfala ples long Afrika.

Krismas i wan taem we ol man oli mas glad, be plante oli no glad. Plante man oli luk se taem oli hareap blong pem ol presen long ol stoa we oli fasfas tumas, mo taem oli wari blong pem kaon blong ol presen ya, samting ya i blokem glad we oli save kasem.

Be, Baebol i talem se man i save kasem glad taem hem i givim presen. Yes, samting ya i tru sipos stret tingting i pusum yumi blong givim presen.​—Ol Wok 20:35.