“!Mi Mi Sas Long Ae Blong Jeova!”

NAOIA we laef long wol ya “i kam strong tumas,” plante man blong Jeova we oli gat strong bilif, oli faet oltaem agensem filing ya se oli olsem nating nomo. (2 Timote 3:1) Yumi no sapraes long samting ya, from we wan long ol “gyaman trik” blong Setan, hemia blong mekem yumi harem se i no gat man i laekem yumi. !Mo, hem i wantem tu we yumi gat tingting ya se Man ya we i Wokem yumi, hem i no laekem yumi! (Efesas 6:​11, futnot) From samting ya, long Wajtaoa blong Epril 1, 1995, i gat tu haf blong stadi long kongregesen we nem blong olgeta “!Yu Yu Sas Long Ae Blong God!” mo “Yumi Pulum Yumi Blong Kam Strong Moa Long Lav Mo Gudfala Wok​—?Olsem Wanem?” Ol haf ya oli blong mekem yumi rimemba se Jeova i stap tinghae tumas long fasin traehad blong yumi. Samfala man mo woman oli raet i kam blong talem tangkyu from ol haf ya. Oli talem se:

“Long olgeta 27 yia we mi stap olsem wan Wetnes blong Jeova, i neva gat wan buk we i pulum filing blong mi olsem hemia. Mi no save blokem wora blong ae blong mi​—ol haf insaed long buk ya oli mekem tingting blong mi i spelgud. Naoia mi harem se Jeova i laekem mi tumas. I olsem se buk ya i tekemaot wan hevi samting we mi stap karem long solda blong mi.”​—C. H.

“Mi ridim buk ya bakegen mo bakegen, fo taem long wan dei. Mi laekem tumas haf ya we i talem se sipos yumi bilif se yumi olsem nating nomo, hemia wan gyaman tijing. Bambae mi mi yusum haf ya blong givhan long ol brata sista taem mi go visitim olgeta blong leftemap tingting blong olgeta, mo long wok blong prij long ol haos wanwan.​—M. P.

“Setan i gat gudhan blong pulum ol man mo samfala we oli laekem Jeova tu, blong ting se oli nating nomo, mo se i no gat man i laekem olgeta. Taem mi ridim tok ya blong ‘slef we i stret mo waes,’ we i talem bakegen long yumi se Jeova i laekem yumi tumas mo hem i glad long olgeta smosmol samting we yumi mekem blong hem, samting ya i leftemap tingting blong mi i bitim olgeta narafala toktok we mi bin ridim bifo. Long plante yia finis, mi gat ol filing we yufala i tokbaot long tufala haf ya. Oltaem mi harem se mi no gud inaf blong Jeova i soemaot lav blong hem long mi, taswe mi traehad blong mekem moa oltaem long wok blong hem olsem wan rod blong winim lav blong hem. Be, samting we i pusum mi, hemia we mi harem se mi gat poen long fes blong God mo mi sem from. Taswe, nomata hamas haoa mi spenem long wok blong prij, no hamas man mi givhan long olgeta, mi harem se wanem we mi stap mekem i no naf yet. Mi stap lukluk ol slak fasin blong mi nomo. Be naoia, taem lav i pusum mi blong mekem wok blong Jeova, mi tingbaot se hem i stap smael long mi mo se hem i glad from wok we mi mekem. Samting ya i mekem lav blong mi long hem i kam bigwan moa, mo i mekem se mi wantem wok moa. Naoia mi kasem bigfala glad taem mi mekem wok blong Jeova.”​—R. M.

“!Ol haf long Wajtaoa ya oli nambawan, oli mekem man i strong, yes, oli gud moa long ol narafala haf we mi bin ridim samtaem we oli pulum filing blong mi! Mi bin ridim Wajtaoa blong 55 yia nao, mo i gat plante bigfala poen we oli bin kamaot. Be ol haf long Wajtaoa ya oli bitim evriwan. Oli givhan long yumi blong sakemaot ol rong tingting, save, mo fraet se yumi ‘nating nomo,’ ‘i no gat man i laekem yumi,’ mo se yumi neva save mekem naf blong ‘winim’ lav blong Jeova. Wajtaoa ya i stret long help we ol brata blong yumi oli nidim tumas long saed blong speret. Tingting blong mi i blong yusum ol haf ya bakegen mo bakegen taem mi go visitim ol brata mo sista blong leftemap tingting blong olgeta.”​—F. K.

“Mifala we mifala i stap faet agens long tingting ya se mifala i olsem nating nomo, mo ol filing we mifala i no laekem mifala, i had long mifala blong kasem paoa blong gohed oltaem long trutok. Olgeta tok blong Wajtaoa ya oli soemaot dip fasin sore, mo oli kasem save stret long tingting blong mifala. Hem i olsem wan meresin we i go stret long hat blong mekem man i haremgud mo i kamgud bakegen. !I leftemap tingting blong yumi taem yumi ridim ol tok olsem long Wajtaoa mo taem yumi save se Jeova i rili kasem save long yumi! Tangkyu blong talem bakegen long mifala se Jeova i no traem pulum ol man blong mekem wok blong hem from we oli harem se oli gat fol, oli sem, no oli fraet. Mi mi no mekem plante long wok blong prij naoia, from sam problem we oli kamaot long saed blong mane mo helt insaed long famle blong mifala. Be, mi kasem glad yet long smol wok we mi naf blong mekem. Mi faenem se mi glad moa long wok blong mi taem mi letem lav nao i pusum mi blong mekem wok ya.”​—D. M.

“Mi mi jes ridim haf ya ‘!Yu Yu Sas Long Ae Blong God!’ Evri tok insaed long hem oli mekem wora i ron long ae blong mi. Mi mi gruap long wan famle we i no soemaot plante lav. Oltaem ol famle blong mi oli daonem mi, jikim mi, mo laf long mi. Taswe, taem mi smol yet, mi gat filing ya finis se mi mi nating nomo. Ol nogud filing we mi kasem from laef blong mi bifo, oli stap yet long mi, mo taem mi kasem trabol oli daonem mi bakegen. Taem mi stop long wok blong mi olsem wan elda long kongregesen, mi harem se mi mi nating nomo​—long fored blong God, famle blong mi, mo ol brata blong mi long kongregesen. Olgeta filing ya oli no save lus kwiktaem, be Wajtaoa ya we i kamaot long stret taem nomo, i givhan long mi blong stretem tingting blong mi lelebet. Hem i leftemap tingting blong mi.”​—D. L.

“Tangkyu from haf ya ‘!Yu Yu Sas Long Ae Blong God!’ Mi mi faet strong agensem filing ya se mi no laekem mi wan mo se mi mi nating nomo. Ol filing ya oli kamaot from we sam narafala oli bin mekem nogud long mi taem mi smol. Hem i stret blong tingbaot ol filing ya olsem wan trik blong Setan nomo. Oli save mekem tu we man i no moa wantem stap laef. Mi mi mas wokhad evri dei blong faet agensem gyaman tingting ya se i no gat man i save laekem mi. Yufala i no save olsem wanem ol tok ya oli rili sas long tingting blong mi.”​—C. F.

“Tede, ol brata oli laekem tumas blong save se Jeova i glad tumas taem oli mekem wok blong hem from oli laekem hem, bitim we narafala man i pusum no fosem olgeta. Taem yumi tingbaot kaengud fasin mo filing blong Jeova, olsem wanem we hem i intres long ol wanwan man blong hem, mo lav we hem i soemaot, samting ya i mekem yumi haremgud mo i pusum yumi blong wok. From samting ya, taem mifala i kasem haf ya ‘!Yu Yu Sas Long Ae Blong God!’ plante long mifala i talemaot tangkyu from. I luk olsem we hem i openem rod long plante man blong frengud moa wetem Jeova. Waef blong mi, mo mi, mitufala i wantem talemaot tangkyu from fasin kaen mo filing we tok blong ol Wajtaoa blong naoia oli stap soemaot. Mifala i mekem plan blong yusumgud plante long ol poen ya taem mifala i visitim ol kongregesen.”​—Wan elda we i visitim ol kongregesen i raetem tok ya.

“Mi bin ridim ol Wajtaoa long kolosap 30 yia finis, be mi neva ridim wan samting we i givim paoa long mi mo i leftemap tingting blong mi olsem Wajtaoa ya. Ol tok we oli joengud wetem ol vas blong Baebol oli stret long laef blong yumi, mo oli halpem mi blong karemaot sam gyaman filing we oli stap haed insaed long mi. Samting ya i mekem se mi kam kolosap moa long Jeova. Long plante yia mi mekem wok blong Jeova from we mi harem se mi gat poen long fes blong hem. Mi mi gat save long saed blong ransom sakrifaes mo lav blong God, be samting ya i olsem save long hed blong mi nomo. Tangkyu from ol gudfala haf ya we oli soemaot fasin luksave mo fasin blong tingting dip. Mi hop se bambae i gat plante moa Wajtaoa olsemia we mi save ridim.”​—M. S.

“Long olgeta 29 yia we mi stap long trutok, mi no rimemba wan Wajtaoa we i bin mekem se mi gat bigfala tangkyu mo mi haremgud long hat blong mi olsem hemia ya. Nating se mi mi gruap long wan famle we i soem bigfala lav mo i keagud long mi, oltaem mi harem se mi nating nomo we mi no naf blong stap laef, mo mi no naf blong mekem wok blong Jeova tu. Afta we mi ridim Wajtaoa ya, mi nildaon, mo mi krae bigwan taem mi talem tangkyu long Jeova. Bambae mi mi tingbaot ol tok ya blong olwe. Naoia mi gat narafala tingting long saed blong mi wan, from we mi kasem save se mi mi sas long ae blong Jeova.”​—D. B.