Mekem Narafala i Haremgud Mo Leftemap Tingting—Ol Sas Ston We Oli Gat Plante Saed

BIGHAF blong yumi i bin gotru long wan taem we yumi pua tumas​—⁠maet i no long saed blong mane be long tingting blong yumi. Yumi bin harem se yumi no moa gat hop, we tingting blong yumi i foldaon olgeta. Be, long ol taem olsem, maet wan sas samting i bin stap kolosap nomo long yumi, mo hem i save givhan bigwan long yumi. “Ston” ya we i sas tumas, hem i narafala we i leftemap tingting blong yumi.

Long Baebol, oli yusum wan Grik tok nomo blong talem “leftemap tingting” mo “mekem narafala i haremgud.” Tufala tok ya oli gat sem mining: blong mekem man i no moa fraet, i kam strong, mo i gat hop. Taswe, i klia se taem yumi harem we tingting blong yumi i slak no i foldaon, yumi nidim se narafala i mekem yumi haremgud mo i leftemap tingting blong yumi. ?Yumi save faenem tufala fasin ya long weples?

Baebol i talem klia se Jeova i “God we i stampa blong givhan.” (2 Korin 1:⁠3) Baebol i talem tu se, “hem i no stap longwe long yumi nating.” (Ol Wok 17:27) Taswe, i gat rod blong kasem givhan we i mekem yumi haremgud mo i leftemap tingting blong yumi. I gud we yumi tingbaot fo bigfala rod we Jeova i stap yusum blong leftemap tingting blong yumi.

Tru Long Wan Gudfala Fasin Fren Wetem God

Bigfala rod blong kasem givhan we i mekem yumi haremgud, hem i tru long wan gudfala fasin fren wetem Jeova God. Taem yumi tingbaot se yumi save gat wan fasin fren olsem wetem God, hemia nomo i naf blong leftemap tingting blong yumi. Tingbaot, ?i gat wan haeman long wol ya we i rere blong toktok wetem yumi long telefon, no soemaot se hem i intres long ol problem blong yumi? Jeova i hae moa bitim ol haeman ya. Be, hem i gat tingting daon tu​—⁠hem i rere blong givhan long ol sinman we oli no impoten nating. (Ol Sam 18:35) Jeova i soemaot lav blong hem long yumi. Fas Jon 4:10 i talem se: “Stampa blong fasin ya i no we yumi laekem God tumas, i we God i laekem yumi tumas, nao i sanem Pikinini blong hem blong i ded blong mekem rod blong God i tekemaot ol sin blong yumi.” Mo tu, wetem fasin lav, Jeova i pulum yumi i go long Pikinini blong hem.​—⁠Jon 6:⁠44.

From ol samting ya we God i mekem long yu, ?yu yu stap soem se yu laekem hem? ?Yu yu traem blong frengud wetem hem blong kasem fasin blong haremgud? (Skelem wetem Jemes 2:23.) Wan eksampel, sipos yu gat wan fren we yu laekem hem tumas, ?yu yu glad blong spenem taem wetem hem, yutufala nomo, blong tokbaot ol wari mo trabol blong yu, ol hop mo glad blong yu? Jeova i askem yu blong mekem sem mak wetem hem. Hem i no makem hamas menet yu save toktok wetem hem long prea​—⁠mo hem i lesingud long yu. (Ol Sam 65:2; 1 Tesalonaeka 5:17) Jisas i prea oltaem mo hem i prea wetem ol dip filing blong hem. Yes, bifo we hem i jusum ol 12 aposol blong hem, hem i prea long wan ful naet.​—⁠Luk 6:​12-16; Hibrus 5:⁠7.

Sam samtaem, yumi gat jans blong stap yumi wanwan wetem Jeova. Taem yumi sidaon kwaet kolosap long wan windo, taem yumi stap wokbaot long wan ples we i kwaet, hemia ol gudfala jans blong prea, blong talemaot long Jeova olgeta samting we oli stap long hat blong yumi. Taem yumi mekem olsem, samting ya i save givim spel long tingting blong yumi mo mekem yumi haremgud. Taem yumi stap tingting dip, i gud blong lukluk wan samting we Jeova i wokem​—⁠maet yumi lukluk skae, ol tri no ol pijin. Samting we yumi stap lukluk, i save pulum yumi blong tingbaot lav blong Jeova, mo olsem wanem hem i stap tingbaot yumi.​—⁠Rom 1:⁠20.

Tru Long Stadi Blong Yumi Wanwan Long Baebol

Be, ol fasin blong Jeova oli kam klia moa long yumi, taem yumi stadi wanwan long Baebol. Plante taem, Baebol i tokbaot Jeova olsem wan “God we i gat sore mo gladhat, hem i slou blong kam kros, mo hem i fulap long kaen fasin.” (Eksodas 34:6; Nehemaea 9:17; Ol Sam 86:15) Fasin blong wantem mekem ol man blong hem long wol ya oli haremgud, i wan impoten haf blong fasin blong Jeova.

Wan eksampel, tingbaot tok blong Jeova long Aesea 66:13: “Olsem wan man we mama blong hem i stap mekem hem i haremgud oltaem, long sem fasin, bambae mi mi gohed blong mekem yufala i haremgud.” Jeova i mekem se lav we wan mama i gat long ol pikinini blong hem, i naf blong pusum hem blong lego olgeta samting we hem i wantem from olgeta, mo blong stap tru long olgeta oltaem. Sipos yu yu luk finis wan mama we i gat lav, ale i stap mekem pikinini blong hem we i kasem kil i haremgud bakegen, bambae yu kasem save long mining blong tok blong Jeova, taem hem i talem se bambae hem i mekem ol man blong hem oli haremgud bakegen.

Plante store long Baebol oli soem fasin ya blong mekem narafala i haremgud. Taem rabis Kwin Jesabel i talemaot se bambae hem i kilim i ded profet Elaeja, profet ya i fraet mo i ronwe blong sevem laef blong hem. Hem i harem se i no moa gat hop, ale hem i wokbaot wan ful dei i go long draeples. Hem i no karem wora mo kakae. Hem i harem nogud tumas nao i talem long Jeova se hem i wantem ded nomo. (1 King 19:​1-4) ?Jeova i mekem wanem blong leftemap tingting blong profet blong hem mo mekem hem i haremgud bakegen?

Jeova i no tok strong long Elaeja, taem hem i harem se i stap hem wan, i nating nomo, mo i fraet. Defren olgeta, profet ya i harem “wan voes we i kwaet, mo i kaen.” (1 King 19:12) Sipos yu ridim 1 King japta 19, bambae yu luk olsem wanem Jeova i mekem Elaeja i haremgud bakegen, i mekem hem i no moa fraet, mo i mekem bilif blong hem i kam strong moa. Fasin ya blong mekem Elaeja i haremgud bakegen i no wan gyaman wan. Hem i go stret long hat blong Elaeja we i trabol, mo i leftemap tingting blong profet ya blong gohed. (Skelem wetem Aesea 40:​1, 2.) I no longtaem, hem i gobak long wok blong hem bakegen.

Long sem fasin, Jisas Kraes i mekem ol man blong hem we oli stap tru long hem, oli haremgud, mo i leftemap tingting blong olgeta. Aesea i talemaot wan profet tok long saed blong Mesaea se: “Hae Masta Jeova . . . hem i sanem mi mi go blong kavremapgud ol soa blong olgeta we oli sore tumas long hat blong olgeta, . . . blong leftemap tingting blong olgeta we oli krae from ded.” (Aesea 61:​1-3) Long ful laef blong Jisas, hem i soemaot klia se ol tok ya oli stret long hem. (Luk 4:​17-21) Sipos yu harem se yu nidim narafala blong mekem yu yu haremgud bakegen, tingting dip long kaen fasin mo lav we Jisas i bin soem long ol man we oli harem nogud mo oli gat nid. Yes, dip stadi blong Baebol i wan nambawan samting blong mekem yumi haremgud mo leftemap tingting blong yumi.

Tru Long Kongregesen

Long Kristin kongregesen,a ol man we oli mekem ol narafala oli haremgud mo leftemap tingting blong olgeta, oli saenaot olsem ol sas ston we oli gat plante saed blong olgeta. Tabu speret i pusum aposol Pol blong raetem se: “Yufala i mas stap toktokgud long yufala blong mekem tingting blong yufala i strong, mo yufala i mas givgivhan long yufala, olsem we yufala i stap mekem naoia.” (1 Tesalonaeka 5:11) ?Olsem wanem ol miting blong kongregesen oli save mekem yumi haremgud mo leftemap tingting blong yumi?

Fastaem, yumi go long ol Kristin miting blong ‘Jeova i tijim yumi,’ mo blong kasem moa save long saed blong hem mo ol rod blong hem. (Jon 6:45) Ol tijing ya oli mas leftemap tingting blong yumi mo mekem yumi haremgud. Long Ol Wok 15:32 yumi ridim se: ‘Judas mo Saelas tufala i toktok long ol brata ya blong leftemap tingting blong olgeta, mo tufala i stap mekem olgeta oli strong.’

?Samtaem yu bin go long wan Kristin miting wetem tingting we yu harem nogud, be biaen yu gobak long haos we yu haremgud? Maet wan samting we oli talem long wan tok, wan ansa, no long wan prea, i kasem hat blong yu, mo i givim samting we yu nidim blong haremgud mo blong leftemap tingting blong yu. Taswe, yumi no mas mestem ol Kristin miting.​—⁠Hibrus 10:​24, 25.

Taem yumi joen wetem ol Kristin brata mo sista long wok blong prij no long sam narafala taem bakegen, samting ya tu i save leftemap tingting mo mekem yumi haremgud. Long lanwis Hibru, plante tok we oli minim “blong joenem ol samting oli kam wan nomo,” oli tekem mining ya “paoa” no “givim paoa” tu​—⁠tingting we i stap biaen long ol tok ya se ol samting oli kam strong moa taem oli joen tugeta. Rul ya i tru insaed long kongregesen. Taem yumi joen tugeta yumi haremgud mo i leftemap tingting blong yumi, yes, yumi kasem paoa. Mo lav, we i strong moa long ol narafala samting blong joenem ol man, hem nao i joenem yumi.​—⁠Kolosi 3:⁠14.

Samtaem, fasin blong ol Kristin brata mo sista blong yumi we oli stap holemstrong long God, i leftemap tingting blong yumi. (1 Tesalonaeka 3:​7, 8) Samtaem, lav we oli soemaot i leftemap tingting blong yumi. (Faelimon 7) Mo samtaem, i leftemap tingting blong yumi blong wok wetem narafala blong tokbaot Kingdom blong God long ol man, olsem we yumi joenem solda blong yumi long solda blong narafala ya. Sipos yu harem se yu slak mo yu nidim we narafala i leftemap tingting blong yu, ale, mekem plan blong wok wetem wan man blong talemaot Kingdom we i olfala moa, no we i bin mekem wok ya longtaem finis. Bambae samting ya i save mekem yu yu haremgud bigwan.​—⁠Eklesiastis 4:​9-12; Filipae 1:⁠27.

Tru Long ‘Slef We i Stret Mo Waes’

?Hu ya i stap mekem plan blong ol defren haf blong wosip blong yumi we oli stap mekem yumi haremgud? Jisas i jusum wan grup blong man we hem i kolem olgeta, “slef ya we i stret mo waes,” blong givimaot kakae long saed blong speret “long stret taem blong hem.” (Matyu 24:​45, NW) Long faswan handred yia K.T.,b grup blong ol Kristin ya we tabu speret i makemaot olgeta, oli stap wok finis. Hed kampani blong ol elda long Jerusalem, oli sanem ol leta oli go long ol wanwan kongregesen blong givim advaes blong lidim olgeta. ?Wanem samting i kamaot from? Baebol i soemaot olsem wanem ol kongregesen oli mekem, taem oli kasem wan long ol leta ya, se: “Taem ol man oli ridim leta ya, oli harem gud, from we tok blong hem i leftemap tingting blong olgeta.”​—⁠Ol Wok 15:​23-31.

Long sem fasin, long ol las dei ya we laef i strong tumas, slef we i stret mo waes i stap givimaot kakae long saed blong speret, we i mekem ol man blong Jeova oli haremgud mo i leftemap tingting blong olgeta. ?Yu yu stap tekem ol kakae ya? Yumi save kasem kakae ya long olgeta buk we grup ya we i olsem slef i mekemrere long olgeta ples blong wol. Ol Wajtaoa mo Wekap! wetem ol narafala buk we Watch Tower Sosaeti i wokem, oli givhan long plante man we oli ridim olgeta blong oli haremgud.

Wan elda we i stap visitim ol kongregesen, i raetem se: “Bighaf blong ol brata mo sista blong yumi, oli wantem mekem samting we i stret. Be plante taem, oli stap traehad blong winim ol wari, fraet, mo filing se oli no naf blong givhan long olgeta bakegen. Ol defren haf insaed long ol buk ya oli givhan long plante man blong oli harem se oli bos bakegen long laef mo filing blong olgeta. Mo tu, ol elda oli save yusum ol haf ya blong givhan bigwan long ol narafala, bitim we oli leftemap tingting blong smoltaem nomo.”

Yusum fulwan olgeta buk we grup blong slef ya we i stret i stap givim. Ol magasin, mo plante narafala buk bakegen, we oli tokbaot ol samting we oli stap kamaot long laef blong yumi naoia, oli save halpem yumi blong haremgud, nating se yumi kasem hadtaem. Mo tu, sipos yu yu naf blong leftemap tingting blong narafala we i harem nogud, yusum ol advaes blong Baebol we i stap insaed long ol buk ya. Oli raetem ol haf ya wetem fasin kea. Samtaem oli tekem plante wik no manis blong faenem ol defren poen, stadi long olgeta, mo prea from. Olgeta advaes ya i stanap long Baebol, i wokgud mo i tru. Samfala oli luk se sipos oli ridimaot wan no tu haf blong wan buk long narafala we i harem nogud, samting ya i naf blong givhan long man ya. Samting ya i save mekem hem i haremgud mo leftemap tingting blong hem bigwan.

Sipos yu yu faenem sam sas ston, ?bambae yu haedem olgeta? ?No bambae yu serem ol sas samting ya wetem ol narafala? Traehad blong kasem mak ya we oltaem yu mekem ol Kristin brata mo sista long kongregesen oli haremgud, mo yu leftemap tingting blong olgeta. Sipos yu mekem man i strong bitim we yu daonem hem, sipos yu talem ol gudfala tok blong leftemap hem bitim we yu tok agensem hem, sipos yu tok wetem “tang blong ol man we [God] i tijim” olgeta bitim tang we ‘i olsem wan naef blong faet we i stikim man,’ yu yu save jenisim laef blong plante narafala. (Aesea 50:4; Proveb 12:18) Yes, ol narafala oli save tingbaot yu olsem wan ston we i sas​—⁠!wan man we i rili mekem narafala i haremgud mo leftemap tingting blong hem!

[Ol futnot]

[Bokis blong pija long pej 20]

Mekem Narafala i Haremgud Taem Hem i Nidim

PLANTE man oli talem se sam haf blong ol Wajtaoa mo Wekap! oli bin mekem fasin fren blong olgeta wetem Jeova i kam strong moa. Wan woman i talem se: “Afta we mi ridim haf ya, mi harem olsem se Jeova we i hae tumas i stap kolosap long mi wetem olgeta paoa blong hem. Mi haremsave se hem i wan man we i laef i stap.” Wan narafala leta i talem se: “Hat mo tingting blong mifala i jenis bigwan long saed blong Jeova, mekem se mifala i no semfala man olsem bifo. I olsem we wan man i klinim glas blong ae blong mifala, mo naoia mifala i save luk evri samting i klia nomo.”

Samfala oli raetem leta blong talem olsem wanem ol buk ya oli givhan long olgeta blong stretem sam spesel trabol no traem. From samting ya, oli sua se Jeova i intres long olgeta. Wan woman i talem olsem: “Tangkyu tumas blong soemaot bakegen long mifala olsem wanem Jeova i laekem tumas ol man blong hem mo i stap kea long olgeta.” Wan woman long Japan, we wan pikinini blong hem i ded, i talem tingting blong hem long ol haf long Wekap! we i tokbaot samting ya, se: “Bigfala fasin sore blong God i kamaot stret long ol pej ya, mo i mekem mi mi krae we mi krae. Naoia mi putum ol buk ya long wan ples we mi save karem olgeta kwiktaem, blong ridim olgeta taem mi harem nogud mo mi stap mi wan.” Wan narafala woman we i stap krae tu from wan we i ded, i raetem se: “Ol haf blong Wajtaoa mo Wekap! mo buk ya “When Someone You Love Dies” oli givim paoa we mi nidim blong stanap strong tru long ol taem we mi stap sore bigwan.”

Tabu Baebol i beswan stampa blong ol tok we i mekem man i haremgud. (Rom 15:⁠4) Wajtaoa i yusum Baebol oltaem blong sapotem ol tok blong hem, mo Wekap! i mekem olsem tu. From samting ya, ol buk ya oli rili mekem ol man we oli ridim olgeta oli haremgud, mo oli leftemap tingting blong olgeta.

[Tok Blong Pija Long Pej 23]

God ya we i stampa blong givhan hem i Man blong Harem prea tu