Kingdom Blong God—?Yu Save Mining Blong Hem?
“Sid ya we i foldaon long gudfala graon, hemia i olsem man we i harem tok ya, mo i save mining blong hem.”—MATYU 13:23.
1. ?Wanem sam long ol bilif long saed blong ‘kingdom blong heven’?
?YU YU “save mining blong” Kingdom blong God se i olsem wanem? Long ol handred yia we oli pas, ol man oli gat plante defren bilif long saed blong ‘kingdom blong heven.’ Tede, sam memba blong jyos oli bilif se Kingdom i wan samting we God i putum insaed long hat blong man taem man i kam Kristin. Sam narafala, oli ting se hem i wan ples we, taem ol gudfala man oli ded, oli go long hem blong haremgud blong olwe. Sam narafala bakegen, oli talem se God i givim raet long man blong stanemap Kingdom long wol, taem oli wok blong mekem se ol Kristin tijing mo fasin oli go insaed long laef blong man mo rul blong gavman.
2. ?Olsem wanem Baebol i eksplenem Kingdom blong God, mo bambae Kingdom ya i mekem wanem?
2 Be, Baebol i soemaot klia se Kingdom blong God i no wan ogenaesesen blong wol. Hem i no wan samting we i stap long hat blong man, mo hem i no fasin ya blong pulum ol man oli kam Kristin. I tru, stret save long saed ya se Kingdom i olsem wanem, bambae i jenisim bigwan laef blong ol man we oli bilif long hem. Be, Kingdom i wan gavman we God i stanemap long heven. Bambae hem i mekem ol samting we God i wantem oli kamtru, bambae i tekemaot ol trabol blong sin mo ded, mo bambae i mekem wol ya i kamgud bakegen. Kingdom ya i stanap finis long heven. I no longtaem, bambae “hem i smasem mo i finisim olgeta kingdom [blong man], mo hem nomo bambae i stanap olwe.”—Daniel 2:44; Revelesen 11:15; 12:10.
3. Taem Jisas i stat blong prij, ?ol man oli gat wanem jans?
3 Man ya blong histri, H. G. Wells, i raetem se: “Tijing long saed blong Kingdom blong Heven, we i bigfala tijing blong Jisas, mo we i wan smol tijing nomo blong ol Kristin Skul, i rili wan long ol tijing we i pulum mo i jenisim tingting blong ol man bitim ol narafala tijing.” Tru long olgeta taem we Jisas i stap prij, hem i yusum stampa tok ya, se: ‘Yufala i mas tanem tingting blong yufala from ol sin blong yufala, from we kingdom blong heven i kam kolosap nao.’ (Matyu 4:17) Jisas i stap long wol olsem King we God i jusumaot. Mo i gud tumas se long taem ya, rod i stat blong open long ol man blong kasem ol blesing from Kingdom ya. !Mo tu, rod i open blong sam man oli kam ol rula mo pris wetem Jisas long Kingdom ya!—Luk 22:28-30; Revelesen 1:6; 5:10.
4. ?Long faswan handred yia, plante man oli mekem wanem taem oli harem ‘gud nyus blong kingdom,’ mo from samting ya wanem jajmen i kamaot long olgeta?
4 I gat plante man we oli harem nambawan ‘gud nyus blong kingdom ya.’ Be smol nomo oli bilif. Wan risen se, ol lida blong skul oli ‘lokem doa blong kingdom blong heven long fes blong ol man.’ Oli stap tijim ol man long ol gyaman tijing blong olgeta. Taswe, i olsem we oli “haedem ki blong doa blong haos we waes i stap insaed long hem.” Bighaf blong ol man oli no wantem Jisas olsem Mesaea mo King ya we God i jusumaot blong i rul long Kingdom blong Hem. Taswe Jisas i talem long olgeta se: “Bambae God i tekemaot kingdom long yufala, mo bambae i givim long wan nesen we i stap karem ol frut blong hem.”—Matyu 4:23; 21:43, NW; 23:13; Luk 11:52.
5. ?Olsem wanem bighaf blong ol man we oli lesin long parabol blong Jisas oli soem se oli no kasem save long mining blong hem?
5 Wan taem, Jisas i stap tijim wan bigfala hif blong man. Olsem oltaem, hem i yusum sam parabol, blong traem ol man ya, mo blong mekem olgeta we oli no gat trufala intres long Kingdom oli seraot long ol narafala. Faswan parabol i long saed blong wan man we i planem sid long fo defren kaen graon. Trifala graon, oli nogud. Be namba fo graon, hem i “gudfala graon” we ol sid oli karem gudfala frut long hem. Sotfala parabol ya i finis wetem advaes ya, se: “Man we i gat sora blong hem i mas lesingud long tok ya.” (Matyu 13:1-9) Bighaf blong ol man we oli stap long taem ya, oli harem tok blong Jisas, be oli no “lesingud.” Oli no mekem wan samting from ol tok we oli harem. Oli no rili intres blong traem kasem save olsem wanem sid we oli planem long ol defren graon i olsem Kingdom blong heven. Oli gobak long haos blong olgeta, nao oli gohed long ol samting we oli stap mekem evri dei. Maet oli stap tingting se, ol parabol ya blong Jisas oli ol gudfala store nomo we oli soem wanem fasin i stret mo wanem fasin i no stret. !Oli mestem nambawan save, mo ol bigfala jans mo blesing, from we hat blong olgeta i strong!
6. ?From wanem ol disaepol blong Jisas nomo oli kasem save long ‘ol tok haed blong kingdom’?
6 Jisas i talem long ol disaepol blong hem, se: ‘God i openem rod long yufala blong yufala i save ol tok haed blong kingdom blong heven. Be olgeta ya, hem i no openem rod long olgeta olsem.’ Blong talem bakegen tok blong Aesea, hem i gohed se: ‘“Hat blong olgeta i kam strong finis. Oli blokem sora blong olgeta finis. Oli satem ae blong olgeta finis. Sipos no, maet oli save luk long ae blong olgeta, maet oli save harem long sora blong olgeta, maet oli save kasem mining blong hem wetem hat blong olgeta. Nao bambae oli save tanem tingting blong olgeta blong bilif long mi, nao mi bambae mi mekem olgeta oli gud bakegen.” Be yufala ya, yufala i save haremgud, from we ae blong yufala i save luk ol samting ya, mo sora blong yufala i save harem ol tok ya.’—Matyu 13:10-16; Mak 4:11-13.
“Save Mining Blong” Kingdom
7. ?From wanem i impoten blong “save mining blong” Kingdom?
7 Jisas i makemgud stampa blong problem blong olgeta. Problem ya i joen wetem fasin blong “save mining blong” mesej blong Kingdom. Taem hem mo ol disaepol blong hem nomo oli stap, hem i talem long olgeta se: ‘Yufala i lesingud blong harem mining blong parabol blong man ya we i go blong planem sid. Taem man i harem tok ya blong kingdom be i no save mining blong hem, Setan i kam tekemaot tok ya we oli planem long hat blong man ya.’ Hem i gohed blong eksplenem se, fo defren graon ya i minim ol defren fasin blong hat blong man, we oli planem ‘tok ya blong kingdom’ long olgeta.—Matyu 13:18-23; Luk 8:9-15.
8. ?Wanem i mekem se “sid” we i foldaon long trifala graon i no karem frut?
8 Evri “sid” oli gud nomo. Be frut we sid ya i karem bambae i dipen long graon we sid i gru long hem. Maet wan man i harem mesej blong Kingdom, be ol samting we hem i stap bisi long olgeta long laef blong hem oli mekem se graon, we i minim hat blong hem, i strong olsem wan rod we fulap man oli stap wokbaot long hem oltaem. Sipos i olsem, bambae i isi nomo blong hem i mekem eskyus, se hem i no gat taem blong Kingdom. I isi nomo blong sid ya i lus bifo we i putum rus blong hem. ?Be olsem wanem sipos sid i foldaon long hat we i olsem graon ya we i gat ston aninit? Maet fastaem, hem i gru smol. Be, bambae i hadwok long hem blong putum rus blong hem i go dip long graon, blong i grugud mo i gat paoa blong stanap. I save kam olsem wan bigfala traem long man ya blong gat strong tingting blong stap olsem wan man blong God we i obei, antap moa, taem ol man oli ronem hem. Hem i no save winim traem ya, ale bambae i foldaon. Mo bakegen, sipos graon i fulap long grasnil, we i minim se hat i fulap long ol wari blong laef no fasin blong ronem ol rij samting, bambae oli kavremap ol smol gru long saed blong Kingdom, nao oli kilim i ded. Long tri defren fasin ya long laef blong man, i no gat wan we Kingdom i save karem frut long hem.
9. ?From wanem sid we i foldaon long gudfala graon i karem gudfala frut?
9 ?Be, olsem wanem long sid blong Kingdom we i foldaon long gudfala graon? Jisas i givim ansa se: “Be sid ya we i foldaon long gudfala graon, hemia i olsem man we i harem tok ya, mo i save mining blong hem. Ol man olsem oli gat frut blong tok ya long laef blong olgeta, sam i gat olsem handred frut, sam i gat olsem sikiste, mo sam i gat olsem tate.” (Matyu 13:23) Olgeta we oli “save mining blong” Kingdom, oli karem frut, folem ol samting long laef blong olgeta wanwan.
Taem Man i Kasem Save Hem i Gat Wok Blong Mekem
10. (a) ?Olsem wanem Jisas i soem se, taem man i “save mining blong” Kingdom, hem i kasem ol blesing mo wan wok tu? (b) ?Wok ya we Jisas i givim blong go mekem ol disaepol, hem i blong ol disaepol blong faswan handred yia nomo?
10 Afta we Jisas i talem ol sikis narafala parabol blong eksplenem ol defren wok blong Kingdom, hem i askem long ol disaepol blong hem se: ‘?Yufala i kasem mining blong ol samting ya?’ Oli ansa se: “Yes, mifala i save.” Nao, hem i talem long olgeta se: “Tok ya i min se man we fastaem i tija blong Loa be biaen i kam man we God i king blong hem, hem i olsem wan man we i gat plante samting long haos blong hem. Nao taem hem i wantem mekem wan wok, hem i save yusum olfala samting we i gud yet, mo i save yusum nyufala samting tu we i jes kamtru, blong mekem wok ya blong hem.” Ol tijing mo trening we Jisas i givim long ol disaepol blong hem, i mekem se oli kam ol Kristin we oli bigman long saed blong speret. I olsem we long ‘haos blong olgeta,’ i gat fulap nambawan kakae long saed blong speret we oli save givimaot long ol man. Plante long ol kakae ya, oli long saed blong Kingdom blong God. Jisas i mekem i klia se taem man i “save mining blong” Kingdom, bambae hem i no kasem ol blesing nomo, be hem i gat wan wok tu blong mekem. Jisas i talem long ol man blong hem se: ‘Yufala i mas go long ol man long olgeta ples long wol, blong pulum olgeta oli kam man blong mi. . . . Mo yufala i mas tijim olgeta blong oli folem olgeta tok ya we mi mi givim finis long yufala. Mo yufala i mas save, bambae mi mi stap wetem yufala oltaem, gogo kasem en blong ol fasin blong wol ya.’—Matyu 13:51, 52; 28:19, 20.
11. ?Long 1914, wanem ol samting long saed blong Kingdom we oli kamtru?
11 Jisas i mekem olsem we hem i bin promes. Hem i stap wetem ol trufala disaepol blong hem tru long ol handred yia we oli pas, kam kasem tede. Long ol las dei ya, sloslou hem i stap givim save long olgeta. Mo hem i givim wok long olgeta blong yusumgud laet ya blong trutok we i stap kam klia moa. (Luk 19:11-15, 26) Long 1914, ol samting long saed blong Kingdom oli stat kamtru kwiktaem mo long bigfala fasin. Long sem yia ya, Kingdom, we longtaem finis ol man oli stap tingting strong long hem, i “bon.” Be tu, “en blong ol fasin blong wol ya” i stat. (Revelesen 11:15; 12:5, 10; Daniel 7:13, 14, 27) Ol tru Kristin oli luksave mining blong ol samting we oli stap kamtru, taswe oli stap talemaot Kingdom mo tijim ol man, long fasin we i bigwan moa bitim ol narafala taem bifo. Jisas i bin tokbaot samting ya, se: ‘Bambae ol man oli stap talemaot gud nyus blong kingdom long olgeta ples long wol, blong oli wetnes blong hem long fes blong olgeta man. Nao biaen, bambae en i save kam.’—Matyu 24:14.
12. (a) ?Wanem frut blong bigfala wok blong talemaot Kingdom long taem blong yumi? (b) ?Long wol ya we bilif blong ol man i hafhaf, ol Kristin oli stap long wanem denja?
12 Bigfala wok ya blong talemaot Kingdom i go kasem moa long 230 kantri. Naoia, bitim faef milyan trufala disaepol oli stap mekem wok ya, mo i gat sam narafala yet we oli stap hivap. Be sipos yumi skelem namba blong ol disaepol wetem 5.6 bilyan man long fulwol, bambae yumi luk klia se, olsem long taem blong Jisas, bighaf blong ol man oli no “save mining” blong Kingdom. Olsem Baebol i talem, plante long olgeta oli laf mo oli talem se: “?Olsem wanem nao? ?Hem i promes finis blong kam, be hem i stap wea?” (2 Pita 3:3, 4) I gat denja i stap long saed blong yumi ol Kristin. Maet sloslou, fasin blong ol man blong wol we oli no kea, we bilif blong olgeta i hafhaf, mo we oli wantem plante tumas samting, i save spolem gudfala tingting blong yumi long saed blong ol nambawan jans we yumi gat blong mekem wok blong Kingdom. From we yumi stap long medel blong ol man blong wol ya, i isi nomo blong yumi tekem sam tingting mo fasin blong olgeta. !I impoten tumas we yumi “save mining blong” Kingdom blong God mo holemstrong long hem!
Jekemap Yumi Long Saed Blong Kingdom
13. Long saed blong wok blong talemaot gud nyus blong Kingdom, ?olsem wanem blong jekem sipos yumi stap ‘harem’ wetem fasin luksave?
13 Jisas i tokbaot taem blong tekem kakae long garen, hemia taem we yumi stap long hem naoia, se: “Mi, mi Pikinini blong Man, bambae mi sanem ol enjel blong mi oli go tekemaot ol samting blong mekem man i foldaon long sin, wetem ol man blong mekem sin. . . . Nao biaen, ol stret man bambae oli go long nyufala wol ya we Papa blong olgeta i king long hem, nao long ples ya bambae oli saen olsem san. Man we i gat sora blong hem i mas lesingud long tok ya.” (Matyu 13:41, 43) ?Olsem wanem long yu? ?Yu stap ‘harem’ mo obei long oda ya blong talemaot Kingdom mo blong mekem disaepol? Tingbaot, “sid we i foldaon long gudfala graon” i olsem man we i ‘harem tok, i save mining blong hem,’ mo i karem gudfala frut.—Matyu 13:23.
14. Taem yumi kasem advaes, ?olsem wanem blong soem se yumi “save mining blong” advaes ya?
14 Taem yumi stap stadi wanwan mo go long ol Kristin miting, yumi ‘mas mekem hat blong yumi i laekem fasin luksave.’ (Proveb 2:1-4) Sipos yumi kasem advaes long saed blong fasin blong yumi, klos, myusek, mo pleplei, yumi mas letem advaes ya i go insaed long hat blong yumi mo pusum yumi blong jenisim ol fasin we yumi nidim blong jenisim. Yumi neva mas gyaman long yumi wan, mekem eskyus, no soem long wan narafala rod se yumi no wantem lesin. Sipos Kingdom i wan trufala samting long laef blong yumi, bambae yumi folem ol rul blong hem mo wok strong blong talemaot Kingdom ya long ol narafala. Jisas i talem se: “I no olgeta man evriwan we oli stap singaot mi se ‘Masta blong mi, Masta blong mi’ we bambae oli save go insaed long nyufala wol ya we God i king long hem. Man we i stap mekem ol samting we Papa blong mi long heven i wantem, hem nomo bambae i save go insaed.”—Matyu 7:21-23.
15. ?From wanem i impoten blong ‘lukaot kingdom mo stret fasin blong God’ fastaem?
15 Oltaem ol man oli wari long kakae we oli nidim, klos, mo haos. Be Jisas i talem se: ‘Fastaem yufala i mas lukaot kingdom mo stret fasin blong God. Nao biaen hem i save givim olgeta samting ya tu long yufala.’ (Matyu 6:33, 34) Taem yu jusum ol impoten samting, putum Kingdom i stap long fasples long laef blong yu. Mekem laef blong yu i isi, mo haremgud long ol samting we yu nidim nomo. I no waes nating blong bisi oltaem blong mekem ol wok mo kasem olting we oli no impoten. Yumi no mas mekem eskyus se i oraet nomo blong folem fasin ya, from we ol samting ya oli no rong. Maet i tru se oli no rong. Be sipos yumi spenem plante taem blong kasem mo yusum ol samting ya we yumi no nidim, ?olsem wanem long program blong yumi blong stadi Baebol wanwan, go long ol Kristin miting, mo joen long wok blong talemaot gud nyus? Jisas i talem se Kingdom i olsem wan bisnesman we i faenem wan “perel we i nambawan, [nao] hem i go salemaot olgeta samting we hem i gat, i go pem perel ya i blong hem.” (Matyu 13:45, 46) Hemia nao filing we yumi mas gat long saed blong Kingdom blong God. Yumi mas folem eksampel blong Pol, i no eksampel blong Demas we i lego Kristin wok from we “hem i laekem tumas ol samting blong laef long wol ya.”—2 Timote 4:10, 18; Matyu 19:23, 24; Filipae 3:7, 8, 13, 14; 1 Timote 6:9, 10, 17-19.
‘Ol Man We Oli Stap Mekem i No Stret, Oli No Save Go Insaed Long Kingdom Blong God’
16. ?Olsem wanem fasin blong “save mining blong” Kingdom blong God bambae i givhan long yumi blong blokem ol nogud fasin?
16 Taem ol Kristin long Korin oli letem fasin blong slip olbaot i stap insaed long kongregesen,a Pol i talem stret long olgeta se: ‘Yufala i save finis. Ol man we oli stap mekem i no stret, bambae oli no save go insaed long kingdom blong God. Yufala i no mastik long samting ya. Man we i stap ronem woman, mo man we i stap prea long ol narafala god, bambae oli no save go insaed long kingdom ya. Man we i stap slip wetem woman blong narafala man, mo woman we i stap mekem i krangke long man blong hem, mo man we i stap slip wetem man, mo woman we i stap slip wetem woman, bambae oli no save go insaed long kingdom ya. Man we i stap stil, mo man we i wantem plante samting tumas, mo man we i stap dring we i lusum hed, mo man we i stap spolem nem blong narafala man, mo man we i stap mekem ol bisnes blong stilim mane, bambae oli no save go insaed. Ol man olsem bambae oli no save go insaed samtaem long kingdom blong God.’ (1 Korin 6:9, 10) Sipos yumi “save mining blong” Kingdom blong God, bambae yumi no save gyaman long yumi wan bakegen, blong ting se bambae Jeova i agri long sam kaen fasin blong slip olbaot, from we hem i luk se yumi stap bisi long Kristin wok. Yumi no mas storeyan tu long ol fasin we oli no klin. (Efesas 5:3-5) ?Yu yu faenem se sloslou, sam doti tingting mo fasin blong wol ya oli stap kam insaed long laef blong yu? !Sipos yes, yu mas sakemaot olgeta kwiktaem! Yumi no wantem lusum Kingdom we i sas tumas, from ol samting olsem.—Mak 9:47.
17. Taem yumi save mining blong Kingdom blong God, ?olsem wanem samting ya bambae i givhan long yumi blong gat tingting daon mo blong no mekem ol fasin we ol narafala oli save foldaon from?
17 Ol disaepol blong Jisas oli askem se: ‘?Long ol man long kingdom blong heven, hu man we i hae moa long olgeta?’ Blong ansarem kwestin blong olgeta, Jisas i singaot wan pikinini i kam stanap long medel blong olgeta, nao i talem se: ‘Tru mi talem long yufala, sipos yufala i no jenisim fasin blong yufala blong kam olsem pikinini ya, bambae yufala i no save go insaed samtaem long kingdom blong heven. Be man we i mekem tingting blong hem i stap daon olsem smol pikinini ya, hem i hae moa, i winim olgeta narafala man long kingdom blong heven.’ (Matyu 18:1-6) Ol man we oli flas, ol man we oli strong long narafala, ol man we oli no kea, mo ol man blong brekem loa, bambae oli no save go insaed samtaem long Kingdom blong God. Mo oli no save stap aninit long rul blong Kingdom ya tu. ?Lav we yu gat long ol brata, tingting daon, mo fasin blong fraetgud long God, oli stap pusum yu blong no mekem ol fasin we oli save mekem ol narafala oli foldaon? ?No yu strong blong mekem “ol samting we yu gat raet blong mekem,” nating se tingting mo fasin ya i save spolem narafala?—Rom 14:13, 17.
18. ?Ol man we oli obei bambae oli kasem wanem blesing taem Kingdom blong God i mekem ‘ol samting oli kamaot long wol ya olsem oli kamaot finis long heven’?
18 I no longtaem, bambae Jeova, Papa blong yumi long heven, i ansa fulwan long prea ya we yumi mekem wetem olgeta hat blong yumi, se: ‘Mekem kingdom blong yu i kam. Mekem olgeta samting we yu yu wantem oli kamaot long wol olsem oli kamaot finis long heven.’ I no longtaem nating, King ya we i stap rul, Jisas Kraes, bambae i sidaon long bigfala jea blong hem blong jajem ol man, mo blong seraotem “ol sipsip” long “ol nani.” Long stret taem ya we God i makemaot, ‘bambae king i talem long olgeta long raet saed blong hem, se “Yufala i kam. Papa blong mi i mekem i gud tumas long yufala finis. Taem hem i no mekem wol ya yet we yumi stap long hem, be hem i makemaot ol ples blong yufala long kingdom. Yufala i kam tekem ples ya blong yufala.”’ Ol nani, “bambae oli go blong kasem panis ya we i no save finis. Be ol stret man ya bambae oli go blong kasem laef ya we i no save finis.” (Matyu 6:10; 25:31-34, 46) “Bigfala trabol” bambae i finisim olfala fasin blong wol ya mo olgeta we oli no wantem “save mining blong” Kingdom. Be ol milyan man we oli pastru long “bigfala trabol” mo ol bilyan man we bambae oli laef bakegen long ded, bambae oli kasem ol blesing blong Kingdom gogo i no save finis, long wol ya we i kam Paradaes bakegen. (Revelesen 7:14) Kingdom ya, hem i nyufala gavman long heven we bambae i rulum wol. Bambae hem i mekem stampa tingting blong Jeova long saed blong wol mo man, i kamtru fulwan. Hemia i blong leftemap nem blong hem we i tabu tumas. ?Yu no ting se hemia i wan presen we i sas tumas, we yumi wantem wok from, lego sam samting blong yumi from, mo wet long hem? !Blong “save mining blong” Kingdom yumi mas mekem olsemia!
[Futnot]
a Wan grup blong man we oli joen wanples blong wosip.
?Bambae Yu Ansa Olsem Wanem?
◻ ?Wanem ya Kingdom blong God?
◻ ?From wanem bighaf blong ol man we oli harem tok blong Jisas oli no “save mining blong” Kingdom?
◻ ?Olsem wanem fasin blong “save mining blong” Kingdom, i givim ol blesing mo wok tu?
◻ Long saed blong wok blong prij, ?wanem i pruvum sipos yumi “save mining” blong Kingdom, no no gat?
◻ ?Olsem wanem blong soem long fasin blong yumi se yumi “save mining blong” ol advaes we yumi kasem?
[Tok Blong Pija Long Pej 17]
Ol disaepol blong Jisas oli “save mining blong” Kingdom mo oli karem gudfala frut