Trastem Jeova Mo Tok Blong Hem

“Olgeta we oli save yu, bambae oli trastem yu.”​—OL SAM 9:10.

1. ?From wanem yumi save trastem Jeova mo Tok blong hem long taem blong yumi?

MAET i luk olsem se tok blong singaot narafala blong trastem God mo Tok blong hem, Baebol, i no save wokgud mo i no stret long laef blong ol man long wol ya. Be, blong longtaem, ol pruf i soem se waes blong God i wokgud mo i tru. Hemia we i wokem man mo woman, hem i Stampa blong mared mo famle. Hem i savegud ol samting we yumi nidim, bitim we yumi save. Ol stampa samting we man i nidim oli no jenis, mo tu, ol stampa rod blong kasem ol samting ya oli no jenis. Nating se oli raetemdaon ol waes advaes blong Baebol plante handred yia bifo, hem i stap yet olsem beswan samting blong lidim man blong gat gudfala laef mo blong stretem ol problem blong hem. !Taem yumi folem ol advaes ya, yumi haremgud tumas​—nating se yumi stap long wan wol we i fulap long ol narafala gudfala save long saed blong sayens!

2. (a) ?Ol man blong Jeova oli stap kasem wanem frut from we oli obei long ol loa blong God? (b) ?Jeova i promes blong givim wanem samting bakegen long olgeta we oli obei long hem mo Tok blong hem?

² Taem man i trastem Jeova mo i folem ol rul blong Baebol evri dei, hem i save kasem ol gudfala frut. Laef blong ol milyan Wetnes blong Jeova raon long wol i pruvum samting ya. Wetem bilif mo strong tingting, oli stap folem ol advaes blong Baebol. Fasin blong olgeta blong trastem Man we i Wokem olgeta mo Tok blong Hem, i no blong nating nomo. (Ol Sam 9:9, 10) Fasin blong obei long ol loa blong God i mekem se oli kam ol gudfala man. Oli klin, oli tok tru mo mekem i stret oltaem, oli wok strong, oli gat respek long laef mo olting blong ol narafala man, mo oli no bitim mak long kakae mo dring. Samting ya i mekem se oli gat lav mo gudfala trening long famle​—oli tekem ol narafala i kam long haos blong olgeta, oli gat longfala tingting, oli gat sore, mo oli fogivim narafala​—mo plante narafala fasin olsem. Oli save blokem ol nogud frut we oli kamaot from kros, fasin blong no laekem nating narafala, fasin blong kilim man i ded, fasin jelas, fasin blong fraet, fasin les, fasin flas, fasin blong gyaman, fasin blong spolem nem blong narafala, fasin blong slip olbaot, mo ol nogud fasin blong seks. (Ol Sam 32:10) Be God i mekem moa bitim we hem i promes long ol man we oli folem ol loa blong hem, se bambae oli kasem gudfala frut. Jisas i talem se olgeta we oli folem Kristin rod, ‘bambae oli save kasem wan handred taem antap bakegen, wanem samting we oli livim, olsem haos, no brata no sista no mama no papa no pikinini no graon blong olgeta. Mo long nyufala wol ya we bambae i kam, bambae oli gat laef we i no save finis.’​—Mak 10:​29, 30.

No Trastem Waes Blong Wol

3. ?Taem ol Kristin oli stap gohed blong trastem Jeova mo Tok blong hem, samtaem oli save kasem wanem problem?

³ Wan problem blong ol sinman se, oli save daonem no fogetem samting we God i askem olgeta blong mekem. I isi nomo blong oli ting se oli save beswan rod blong folem, mo se waes blong wol ya i bitim waes blong God mo i stretgud long laef blong yumi tede. Ol man blong God tu, oli save gat tingting ya, from we oli stap laef long medel blong ol man blong wol ya. Taswe, Papa blong yumi long heven i stap singaot yumi wetem lav blong lesin long advaes blong hem. I stret nomo we hem i givim woning ya se: “Pikinini boe blong mi, yu no fogetem loa blong mi, mo ol tok blong mi i mas stap long hat blong yu, from we bambae yu kasem plante dei mo yia blong laef mo pis. Yu mas trastem Jeova long ful hat blong yu. Yu no mas stanap long prapa waes blong yu nomo. Long olgeta samting we yu yu mekem, lesin long hem, mo hem bambae i mekem ol rod blong yu oli stret. Yu no mas ting se yu yu waes. Fraetgud long Jeova mo tanem baksaed long samting we i nogud.”​—Proveb 3:​1, 2, 5-7.

4. ?‘Waes blong wol’ i bigwan olsem wanem, mo from wanem waes ya ‘i krangke nomo long fes blong God’?

⁴ Wol ya i gat fulap waes long hem long saed blong plante defren samting. I gat plante kolej blong lanem samting, mo fasin ya we ‘man i mekem plante buk, i no gat en blong hem.’ (Eklesiastis 12:12) Naoia, samting we oli kolem, rod blong karem plante save long kompyuta, i promes blong givim fulap program long kolosap eni samting. Be nating se ol man blong wol oli gat olgeta save ya, oli no kam moa waes, mo oli no faenem rod blong winim ol problem blong wol. Defren nao, laef blong wol ya i stap kam moa nogud evri dei. Yumi kasem save from wanem Baebol i talem se, “olgeta fasin we ol man blong wol oli stap talem se oli waes, be long fes blong God oli krangke nomo.”​—1 Korin 3:​19, 20.

5. ?Baebol i givim wanem woning long yumi long saed blong ‘waes blong wol’?

⁵ Long laswan haf blong ol las dei ya, yumi save se, jif blong gyaman fasin, Devel Setan, bambae i mekem plante gyaman toktok i kamaot blong traem blokem ol man blong oli no trastem trutok blong Baebol. Ol man blong agensem Baebol oli wokem plante buk we oli fulap long ol tingting blong olgeta nomo, blong traem soem se Baebol i no kamaot long God mo i no tru. Pol i givim woning long Kristin fren blong hem se: “Timote, yu mas holemgud olgeta samting ya we God i putum long han blong yu finis. Bambae yu no go insaed long ol toktok ya we olgeta oli no tokgud long God, mo long ol krangke toktok ya we oli talem se i fasin blong man i kam waes, be oli gyaman nomo. From we plante man we oli stap folem fasin ya, oli go longwe finis long fasin blong bilif.” (1 Timote 6:​20, 21) Baebol i gohed blong givim woning se: ‘Yufala i mas lukaot gud, blong bambae i no gat ol man oli kam fasem yufala long ol rabis tok ya we i folem waes blong man. Ol tok ya i blong gyaman nomo, i stap kamaot long ol rabis speret we oli stap olbaot long wol ya fastaem, i no kamaot long Kraes.’​—Kolosi 2:8.

Faet Agensem Bilif We i Hafhaf

6. ?From wanem i nidim fasin blong lukaotgud blong mekem se tingting we i hafhaf i no gru long hat?

⁶ Wan narafala gyaman trik we Setan i stap yusum, hemia blong mekem se yumi no bilif tru, be tingting blong yumi i hafhaf. Oltaem, hem i stap traem blong faenem wan smol samting we bilif blong yumi i no strong long hem, nao i traem yusum samting ya blong spolem yumi. Wan man we tingting blong hem i hafhaf i mas tingbaot se, hemia we i stampa blong fasin olsem, hem nao i talem long Iv se: “?Olsem wanem long frut blong ol tri long ples ya? ?I tru we God i blokem olgeta se i tabu, yutufala i no save kakae, no i no tru olsem?” Fastaem, Man ya blong Traem man i mekem se tingting blong Iv i hafhaf. Ale, nekis samting we hem i mekem se, hem i talem gyaman tok long Iv, nao Iv i bilivim tok ya. (Jenesis 3:​1, 4, 5) Blong mekem se tingting we i hafhaf i no spolem bilif blong yumi, olsem i mekem long Iv, yumi mas wekapgud. Sipos tingting blong yumi i stat blong kam hafhaf long saed blong Jeova, Tok no ogenaesesen blong hem, yumi mas mekem wan samting kwiktaem blong blokem tingting ya bifo we hem i gru i kam bigwan, mo i spolem bilif blong yumi.​—Skelem wetem 1 Korin 10:12.

7. ?Yumi save mekem wanem blong sakemaot tingting we i hafhaf?

⁷ ?Yumi save mekem wanem? Bakegen, ansa se, yumi mas trastem Jeova mo Tok blong hem. “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem. From we fasin blong God, hem i no save tok nogud long man we i askem samting long hem, hem i stap givim presen long ol man long gladhat blong hem. Be taem yufala i prea, yufala i mas bilif tru, we tingting blong yufala i no hafhaf, from we man we tingting blong hem i hafhaf, hem i olsem solwora nomo. Taem win i blu, solwora bambae i save go olbaot, olsem we win i pusum.” (Jemes 1:​5, 6; 2 Pita 3:​17, 18) Taswe, faswan samting we yumi mas mekem se, prea long Jeova wetem fulhat blong yumi. (Ol Sam 62:8) Biaen, yu no mas fraet blong askem help long ol elda long kongregesen, we oli gat lav. (Ol Wok 20:​28; Jemes 5:​14, 15; Jud 22) Bambae oli givhan long yu blong faenemaot from wanem tingting blong yu i hafhaf, we maet i kamaot from fasin flas no from sam rong tingting.

8. Plante taem, ?olsem wanem tingting blong apostasi i stat, mo wanem rod blong winim tingting olsem?

⁸ ?Yu bin ridim no lesin long tingting blong ol man blong apostasia no ol waes blong wol? ?Oli posenem tingting blong yu mo mekem bilif i hafhaf? Baebol i givim waes advaes ya se: “Yu mas traehad long evri rod blong kam we yu wan man blong wok we God i stap harem gud long yu. Long fes blong hem, yu mas kam we yu no gat sem long ol wok blong yu, we yu wan man we yu stap tijim ol man long trutok blong God, long stret fasin nomo. Bambae yu no go kolosap long ol toktok ya we olgeta oli no tok gud long God, oli stap toktok krangke nomo. Toktok olsem i stap pulum ol man oli go longwe nomo long God. Toktok blong ol man olsem i olsem wan soa long leg blong man, we i no save kamgud bakegen, oltaem i stap kam bigfala moa, i stap spolem leg blong man.” (2 Timote 2:​15-17) I gud blong makem se, plante we oli foldaon long apostasi, oli stat blong folem rod ya we i no stret taem oli toktok smol from fasin we ol narafala long ogenaesesen blong Jeova oli stap mekem long olgeta. (Jud 16) Biaen, oli traem blong faenem poen long saed blong ol tijing. Olsem we wan dokta i mas wok kwiktaem blong katemaot wan soa we i save gru gogo i spolem wan haf blong bodi, yu tu yu mas tekemaot kwiktaem ol tingting blong komplen, mo blong harem nogud long ol rod we Kristin kongregesen i stap yusum. (Kolosi 3:​13, 14) Sakemaot eni samting we i mekem tingting blong yu i hafhaf.​—Mak 9:43.

9. ?Olsem wanem wan gudfala tiokratik program i save givhan long yumi blong stap strong long bilif?

⁹ Stap kolosap oltaem long Jeova mo ogenaesesen blong hem. Yumi mas folem eksampel we Pita i soem blong fasgud long trutok, taem hem i talem wetem strong tingting se: “?Masta, mifala i save go long hu? Yu nomo yu gat ol tok blong laef ya we i no save finis.” (Jon 6:​52, 60, 66-68) Holem wan gudfala program blong stadi long Tok blong Jeova. Olsem nao, bilif blong yu bambae i stap strong, olsem wan bigfala sil we i save “blokem ol ara ya blong Setan, we faea i laet long hem.” (Efesas 6:16) Joen oltaem long Kristin wok blong talemaot gud nyus, mo wetem lav, serem mesej blong Kingdom wetem ol narafala. Evri dei, tingting dip wetem fasin tangkyu long olgeta blesing we Jeova i givim long yu finis. Yu mas gat fasin tangkyu from save we yu gat long trutok. Sipos yu folem wan gudfala program blong mekem ol Kristin wok, samting ya bambae i halpem yu blong stap glad, blong stanap strong, mo blong no gat tingting we i hafhaf.​—Ol Sam 40:4; Filipae 3:​15, 16; Hibrus 6:​10-12.

Folem Rod We Jeova i Soem Long Saed Blong Mared

10. ?From wanem i impoten tumas blong lukluk i go long Jeova blong lidim yumi blong mekem ol Kristin fasin insaed long mared?

¹⁰ Taem Jeova i mekem plan ya se man mo woman i stap wanples olsem hasban mo waef, stampa tingting blong hem i no jes blong tufala i gat plante pikinini blong fulumap wol, be tu, blong mekem tufala i glad moa. Be, from we tufala i mekem sin, nao tufala i no moa stretgud, ol bigfala problem oli save kamaot long mared tede. Ol Kristin tu oli save kasem ol problem ya, from we oli no stretgud olgeta mo oli kasem ol hadtaem long laef. Be, sipos oli trastem Jeova mo Tok blong hem, oli save gat wan gudfala mared mo tijimgud ol pikinini blong olgeta. I no gat ples blong ol fasin mo tingting blong wol insaed long mared blong ol Kristin. Tok blong God i givim advaes long yumi se: “Mared i wan fasin we yufala evriwan i mas tinghae long hem. Man i mas stap tru long woman blong hem, mo woman i mas stap tru long man blong hem. God bambae i jajem boe mo gel we tufala i slip wan ples, mo bambae i jajem man we i slip wetem woman we i no woman blong hem, mo woman we i slip wetem man we i no man blong hem.”​—Hibrus 13:4.

11. ?Hasban mo waef tugeta i mas tingbaot wanem, taem tufala i stap stretem sam problem long mared blong tufala?

¹¹ Ol hasban mo waef we oli folem ol rul blong Baebol long mared blong olgeta, oli haremgud long filing blong lav we i stap insaed long mared blong olgeta, oli tinghae long promes we oli mekem blong stap tugeta olwe, mo oli harem se oli stap sef. Tufala evriwan i kasem save mo folem rul ya we hasban i hed blong famle. Taem ol problem oli kamaot, plante taem i from we tufala i no bin folem advaes blong Baebol. Blong winim wan problem we i stap gohed longtaem, i impoten we hasban mo waef i mas luklukgud mo tok stret long saed blong problem ya mo traem stretem stampa blong problem ya, bitim we oli lukluk nomo long ol trabol we oli kamaot from problem ya. Sipos tufala i storeyan long problem ya be tufala i no save agri yet, tufala i save askem help long wan elda we i gat lav, mo we i no tekem saed blong wan agensem narawan.

12. (a) ?Baebol i givim advaes long saed blong wanem problem we oli kamaot plante taem long mared? (b) ?From wanem hasban mo waef tugeta i nidim blong mekem ol samting long rod we Jeova i glad long hem?

¹² ?Problem ya i long saed blong wanem? ?Long fasin blong toktok tugeta, tingbaot filing blong narafala, respek long plan ya we hasban i hed, no rod blong mekem ol disisen? ?Hem i long saed blong fasin blong trenem ol pikinini, no stret tingting long saed long nid blong seks? ?No fasin blong skelem mo yusumgud mane blong famle, spel, ol fren, sipos waef i mas wok, no weples bambae tufala i stap long hem? Nating se problem i olsem wanem, Baebol i givim ol advaes we oli save wokgud, taem hem i givim ol loa we oli joen stret wetem problem, no ol narafala rul we maet oli no go stret long problem be yumi save yusum olgeta blong luksave rod blong folem. (Matyu 19:​4, 5, 9; 1 Korin 7:​1-40; Efesas 5:​21-23, 28-33; 6:​1-4; Kolosi 3:​18-21; Taetas 2:​4, 5; 1 Pita 3:​1-7) Taem hasban mo waef tufala i no mekem i strong tumas long tufala, wan i tingbaot narawan fastaem, mo tufala i soemaot lav fulwan long mared blong tufala, bambae tufala i glad moa. Wanwan long tufala i mas wantem tumas blong jenisim ol samting we oli nidim blong jenisim, blong oli save mekem evri samting long fasin we Jeova i glad long hem. “Man we i soem fasin luksave long olgeta samting, bambae hem i kasem gudfala frut, mo man we i stap trastem Jeova i save haremgud.”​—Proveb 16:20.

Ol Yangfala​—Lesin Long Tok Blong God

13. ?From wanem i no isi long ol Kristin yangfala blong gruap wetem strong bilif long Jeova mo Tok blong hem?

¹³ I no isi long ol Kristin yangfala blong kam strong long bilif, taem i gat ol rabis fasin blong wol i stap raonabaot long olgeta. Wan risen se, “fulwol i stap aninit long paoa blong hemia we i rabis nomo,” Devel Setan. (1 Jon 5:​19, NW) Rabis Enemi ya we i save mekem se man i luk nogud samting olsem se i gud nomo, hem i stap agensem ol yangfala. Tingting ya se mi fastaem, fasin blong ronem ol samting we yumi nomo i wantem, tingting blong wantem mekem ol rabis fasin mo mekem narafala i harem nogud, mo fasin blong ronem ol pleplei blong haremgud​—olgeta samting ya oli mekemap wan tingting we Baebol i kolem ‘rabis tingting ya we i stap wok long ol man ya we oli no save obei long God.’ (Efesas 2:​1-3) Long fasin haed, Setan i stap leftemap ‘tingting’ ya long ol buk we ol pikinini oli yusum long skul, long plante defren kaen myusek, long spot, mo long sam narafala pleplei. Ol papa mo mama oli mas traehad oltaem blong blokem ol tingting ya long ol pikinini blong olgeta. Oli save mekem olsem sipos oli givhan long olgeta blong gruap wetem fasin blong trastem Jeova mo Tok blong hem.

14. ?Olsem wanem ol yangfala oli ‘save ronwe long ol krangke fasin blong ol yangfala, we oli wantem tumas ol samting we oli no stret’?

¹⁴ Pol i givim advaes olsem wan papa, long yangfala fren blong hem Timote, se: ‘Yu mas ronwe long ol krangke fasin blong ol yangfala, we oli wantem tumas ol samting we oli no stret. Yu yu mas joen long olgeta we tingting blong olgeta i klin gud, we oli stap ona long Masta blong yumi. Yu mas traehad blong mekem ol stret fasin, mo blong folem fasin blong bilif mo blong laekem tumas ol man, mo blong stap long kwaet laef.’ (2 Timote 2:22) I tru, i no evri samting we ‘ol yangfala oli wantem’ we oli nogud. Be tok ya ‘ronwe long’ olgeta, i min se oli no mas letem ol samting ya i tekem tumas taem blong olgeta, we i gat smoltaem nomo i stap, no maet i no gat taem nating, blong mekem wok blong God. Fasin blong bildimap masel, ol spot, myusek, ol pleplei, ol samting we man i mekem blong spel, mo mekem trep i go long narafala ples, nating se oli no rong, oli save kam wan trap sipos yumi putum olgeta long fasples long laef blong yumi. Ronwe long storeyan we oli olsem tok olbaot nomo, fasin blong wokbaot blong nating nomo, fasin blong tingting tumas long saed blong seks, fasin blong westem taem, fasin les, mo fasin blong tok agensem papa mo mama blong yu se tufala i no kasem save long yu.

15. ?Wanem samting i save hapen long haos we i save mekem se yangfala i gat dabol laef?

¹⁵ Long haos tu, i gat denja i stap blong ol yangfala. Sipos oli stap lukluk ol rabis fasin blong seks mo faet long televisin mo video, bambae oli wantem blong mekem ol fasin nogud. (Jemes 1:​14, 15) Baebol i givim advaes ya se: “Yufala we i laekem tumas Jeova, yufala i mas no laekem nating ol rabis fasin.” (Ol Sam 97:​10, NW; 115:11) Jeova i save sipos wan man i gat dabol laef. (Proveb 15:3) Kristin yangfala, lukluk raon insaed long rum blong yu. ?Wanem pija we yu putum long wol? ?Ol pija long saed blong ol top man blong spot no myusek, we oli mekem plante fasin nogud? ?No yu putum ol gudfala pija we oli pulum tingting blong yu i go long ol samting we oli gud? (Ol Sam 101:3) ?Long kabod blong yu, yu gat ol klos we oli stret long wan Kristin, no sam long olgeta oli soem fasin blong ol man blong wol blong putum klos? Long ol rod we oli haed, Setan i save trikim yu blong foldaon long trap blong hem, sipos yu folem tingting ya blong wantem traem ol samting we oli nogud. Baebol i givim waes advaes ya se: “Yufala i mas lukaot gud. Yufala i mas rere. Enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigfala, i stap lukaot man blong i kakae.”​—1 Pita 5:8.

16. ?Olsem wanem advaes blong Baebol i save givhan long wan yangfala blong mekem se evriwan we oli impoten long laef blong hem oli praod long hem?

¹⁶ Baebol i talem se yu mas jusumgud ol fren blong yu. (1 Korin 15:33) Ol fren blong yu oli mas olgeta ya we oli fraet long Jeova. Yu no mas letem ol narafala yangfala oli fosem yu blong folem olgeta. (Ol Sam 56:11; Proveb 29:25) Yu mas obei long papa mo mama blong yu, we tufala i fraetgud long God. (Proveb 6:​20-22; Efesas 6:​1-3) Askem ol elda blong soem rod mo leftemap tingting blong yu. (Aesea 32:​1, 2) Oltaem, yu mas putum tingting mo ae blong yu long ol gudfala fasin mo mak we yu wantem kasem long saed blong speret. Lukaot ol jans blong gohed moa long saed blong speret, mo blong joen long ol wok blong kongregesen. Lanem olsem wanem blong mekem ol wok wetem han blong yu. !Kam strong mo gohedgud long saed blong bilif, nao bambae yu pruvum se yu rili wan man​—wan man we i stret blong stap long nyufala wol blong Jeova! Bambae Papa blong yumi long heven i praod long yu, bambae papa mo mama blong yu long wol ya oli haremgud long yu, mo fasin blong yu bambae i leftemap tingting blong ol Kristin brata mo sista blong yu. !Hemia nao ol samting we oli impoten moa!​—Proveb 4:​1, 2, 7, 8.

17. ?Ol man we oli trastem Jeova mo Tok blong hem, oli save kasem wanem blesing?

¹⁷ Tabu speret i pusum man we i raetem Ol Sam blong yusum ol naesfala tok ya se: ‘Jeova i no save holemtaet ol gudgudfala samting long olgeta we oli stap mekem ol stret fasin, oltaem hem i stap givim ol samting ya i go long olgeta. Jeova, yu yu gat olgeta paoa. Olgeta we oli trastem yu bambae oli save haremgud.’ (Ol Sam 84:​11, 12) Yes, ol man we oli trastem Jeova mo Tok blong hem, Baebol, tingting blong olgeta i no save foldaon olgeta, mo laef blong olgeta i no save kam nogud olgeta. Be bambae oli glad mo oli gat gudfala laef.​—2 Timote 3:​14, 16, 17.

[Futnot]

?Bambae Yu Ansa Olsem Wanem?

◻ ?From wanem ol Kristin oli no mas trastem ‘waes blong wol’?

◻ ?Yumi mas mekem wanem sipos yumi no bilif tru, be tingting blong yumi i hafhaf?

◻ ?Olsem wanem fasin blong folem ol rod blong Jeova i save mekem mared i glad mo i gohedgud?

◻ ?Olsem wanem Baebol i givhan long ol yangfala blong ‘ronwe long ol krangke fasin blong ol yangfala’?

[Tok Blong Pija Long Pej 23]

Ol Kristin oli lukluk long Jeova mo Tok blong hem, mo oli tanem baksaed long ‘ol waes blong wol’ olsem samting we i krangke

[Tok Blong Pija Long Pej 25]

Ol famle we oli trastem Jeova mo Tok blong hem oli gat gudfala laef mo oli glad