Hop We Mi Gat Long Ful Laef Blong Mi​—Blong No Ded Samtaem

OLSEM HECTOR R. PRIEST I TALEM

Dokta i talem se: “I no gat meresin blong winim sik blong yu, kansa. Mifala i no moa save mekem wan samting blong givhan long yu.” Oli faenemaot sik ya ten yia i pas finis. Be mi holemtaet yet hop ya we i stanap long Baebol, blong laef blong olwe long wol we bambae mi no save ded samtaem.​—Jon 11:26.

PAPA mo mama blong mi tufala i skul Metodis. Oltaem tufala i go long jyos long wan smol taon kolosap long plantesin blong mifala. Mi bon long Wairarapa, wan naesfala ples we plante man oli wokem garen long hem. Hem i kolosap 130 kilomita not-is long Welington, Nyusilan. Long ples ya, mifala i save lukluk ol bigfala hil we oli gat sno antap long olgeta, ol reva we oli ron bitwin long ol bigfala hil ya, ol smol hil, mo ol flat ples we graon i gud blong wokem garen long hem.

Long Metodis Jyos, oli tijim mifala se ol stret man bambae oli go long heven be ol man nogud bambae oli go long hel, wan ples blong harem i soa long faea blong olwe. Mi no kasem save from wanem God i no putum ol man long heven fastaem, sipos hem i wantem we oli laef long ples ya. Bifo, oltaem mi mi fraet long ded, mo plante taem mi tingbaot from wanem yumi mas ded. Long 1927, taem mi gat 16 yia, famle blong mifala i kasem wan bigfala trabol. Samting ya i lidim mi blong traem faenemaot ansa long ol kwestin blong mi.

?From Wanem Reg i Ded?

Taem brata blong mi Reg i gat 11 yia, hem i kasem wan bigfala sik. Dokta i no save faenemaot wanem i rong mo i no save givhan long hem. Mama i singaot pasta blong Metodis jyos i kam. Hem i prea long Reg, be samting ya i no mekem Mama i haremgud. Ale, hem i talem long pasta ya se ol prea blong hem oli no gat paoa.

Taem Reg i ded, Mama i storeyan wetem olgeta man blong traem kasem trufala ansa long kwestin ya se from wanem pikinini blong hem i ded. Taem hem i stap toktok wetem wan bisnesman long taon, hem i askem sipos man ya i save wanem i hapen long yumi taem yumi ded. Bisnesman ya i no save, be hem i talem se: “Wan man i livim wan buk long ples ya. Yu save karem sipos yu wantem.”

Mama i tekem buk ya i go long haos, mo i stat blong ridim. Hem i no save lego buk ya i stap. Sloslou, fasin mo tingting blong hem i jenis fulwan. Hem i talem long famle se: “!Hemia nao trutok ya!” Nem blong buk ya se The Divine Plan of the Ages. Hem i faswan long ol buk blong Studies in the Scriptures. Fastaem, mi no bilif, mo mi rao long ol tok long buk ya long saed blong stampa tingting blong Man we i Wokem Olgeta Samting. Be biaen, mi no moa save talem wan tok agens.

Mi Akseptem Trutok Blong Baebol

Mi tingting se: ‘!Tingbaot laef we i no save finis, bambae yu no save ded samtaem!’ Yumi save se wan God we i gat lav bambae i givim wan hop olsem. !Wan paradaes long wol! Yes, mi mi wantem samting ya.

Afta we Mama i lanem ol nambawan trutok ya, samtaem hem mo tri narafala Kristin sista blong Welington​—sista Thompson, sista Barton, mo sista Jones​—oli goaot long taon blong sam dei, blong sakem sid blong Kingdom long ol ples longwe. Nating se Papa i no gat tingting olsem Mama blong wok olsem wan misinari, hem i sapotem Mama long wok blong hem.

Mi akseptem trutok, be blong longtaem lelebet, mi no mekem wan samting blong soemaot bilif blong mi. Long 1935, mi mared wetem Rowena Corlett. Biaen, mitufala i glad blong gat wan pikinini gel, nem blong hem, Enid, mo wan pikinini boe we nem blong hem, Barry. Wok blong mi i blong pem ol buluk, mi pem plante taosen buluk long ol plantesin raonabaot. Taem ol wokman long ol plantesin ya oli tokbaot politik, mi haremgud blong talem long olgeta se: “Ol man ya oli stap traehad blong nating nomo, oli no save win. Kingdom blong God nomo hem i gavman we bambae i wokgud.”

Sore tumas, biaen mi kam slef blong tabak. Oltaem mi gat wan sigaret long maot blong mi. Sloslou, helt blong mi i kam nogud, mo mi go slip long hospital from bel i soa tumas. Dokta i talem long mi se mi gat wan strong sik long bel blong mi, from we mi stap smok. Ale, mi lego fasin ya blong smok, be plante taem biaen, mi drim se mi stap smok wan sigaret we i no save finis. !Tru tumas, tabak i rili wan nogud samting we man i save kam slef blong hem!

Afta we mi lego fasin ya blong yusum tabak, mi mekem sam narafala impoten jenis long laef blong mi. Long 1939, taem mi gat 28 yia, mi tekem baptaes long Mangatai Reva, kolosap long haos blong mifala afsaed long taon. Robert Lazenby, we biaen hem i lukaot long wok blong prij long kantri blong Nyusilan, i aot long Welington i kam kasem haos blong mifala blong givim tok mo baptaesem mi. Stat long taem ya, mi kam wan strong Wetnes blong Jeova.

Mekem Plan Blong Wok Blong Prij

Afta we mi tekem baptaes, oli putumap mi olsem elda long kongregesena blong Eketahuna. Waef blong mi, Rowena, i no akseptem trutok blong Baebol yet. Be, mi talem long hem se mi wantem invaetem Alf Bryant blong Pahiatua i kam, blong soem long mi olsem wanem blong prij long ol haos wanwan. Mi wantem mekem wan gudfala plan blong prij long olgeta teritori blong mifala.

Rowena i talem se: “Hector, sipos yu go prij long ol haos wanwan, bambae mi no moa stap taem yu kambak. Bambae mi lego yu. Wok blong yu i stap long ples ya—long haos wetem famle blong yu.”

Mi no moa save se bambae mi mekem wanem. Wetem tingting we i no strong gud, mi jenis. Mi stap tingting long mi wan se: ‘Mi mas mekem samting ya. Laef blong mi mo laef blong famle blong mi i dipen long samting ya.’ Taswe, mi promes long Rowena se mi no wantem mekem hem i harem nogud. Mi talem long hem se mi laekem hem tumas. Be nem blong Jeova mo hae rul blong hem, mo prapa laef blong mifala tu, oli joen long bisnes ya, mekem se mi mas go prij long ol haos wanwan.

Mi mo Alf, mitufala i go long faswan haos, mo hem i toktok fastaem. Be biaen mi nao mi toktok. Mi talem long man blong haos se, samting we i hapen long taem blong Noa i sem mak long ol samting we oli stap hapen long taem blong yumi. Mo yumi mas mekem wan samting blong mekem sua se yumi sevem laef blong yumi. (Matyu 24:​37-39) Mi livim sam buklet wetem man blong haos ya.

Taem mitufala i aot long haos, Alf i talem se: “?Yu yu kasem ol save ya long weples? Yu no nidim mi. Yu go yu wan, nao namba blong ol haos we yumitu prij long olgeta bambae i dabol.” Ale, mitufala i mekem olsem.

Taem mitufala i stap gobak long haos, mi no save wanem samting bambae i kamaot. Mi sapraes mo mi glad, taem mi luk se Rowena i mekem ti i rere blong mitufala. Tu wik biaen, waef blong mi i joen wetem mi long wok blong prij, mo hem i kam wan gudfala eksampel blong Kristin fasin blong wok strong.

Sam long ol faswan man we oli kam Wetnes blong Jeova long ples blong mifala, hemia Maud Manser, boe blong hem William, mo gel blong hem Ruby. Hasban blong Maud i no stap frengud wetem ol man mo i gat strong fasin. Wan dei, mi mo Rowena, mitufala i go long plantesin blong olgeta blong karem Maud blong go prij. Yangfala William i bin mekem plan se mifala i save yusum trak blong hem. Be papa blong hem i gat narafala tingting.

I luk olsem we wan trabol bambae i kamaot. Mi askem Rowena blong holem bebi blong mitufala, Enid. Nao mi jyam long trak blong William mo mi spid i goaot long haos we trak i stap long hem. Masta Manser i stap traem blong satem doa blong haos ya bifo we mifala i save aot long hem. Be hem i mestem. Ale, mifala i ron long trak smoltaem, nao mifala i stop. Mi kamaot long trak blong mitim Masta Manser we i kros tumas. Mi talem long hem se: “Mifala i stap go long wok blong prij, mo Misis Manser bambae i kam wetem mifala.” Ating ol tok blong mi oli stret long tingting blong hem, nao kros blong hem i godaon. Naoia we mi tingtingbak long taem ya, i moagud sipos mi bin stretem trabol ya long defren fasin. Biaen, man ya i kam moa kaen long ol Wetnes blong Jeova, nating se hem i neva kam wan Wetnes.

I no gat plante man blong Jeova long ol yia ya. Taswe, mifala i rili glad mo mifala i kasem blesing, taem olgeta we oli stap prij fultaem oli kam stap wetem mifala long plantesin. Sam long olgeta ya we oli kam visitim mifala, hemia Adrian Thompson mo sista blong hem Molly. Tufala ya i bin joen long wan long ol faswan klas blong Wajtaoa Baebol Skul blong Gilead blong kam misinari, mo tufala i wok long Japan mo Pakistan.

Ol Ekspiryens Long Taem Blong Faet

Long Septemba 1939, Seken Bigfala Faet Blong Wol i stat, mo long Oktoba 1940, gavman blong Nyusilan i putum tabu long wok blong ol Wetnes blong Jeova. Gavman i putum plante Kristin brata blong yumi long kot. Oli putum samfala long ol kalabus we oli mas wokhad oltaem, mo oli stap longwe long waef mo ol pikinini blong olgeta. Taem faet i stap gohed, mi stap tingbaot sipos bambae oli singaot mi blong joen long ami no no gat, from we mi gat wan plantesin blong ol buluk blong lukaot long hem. Biaen, oli talemaot se ol man we oli stap wok long ol plantesin, oli no nidim blong joen long ami.

Mi mo Rowena i gohed long Kristin wok blong prij, mo mitufala i spenem bitim 60 haoa evri manis long wok ya. Long ol taem ya, mi gat jans blong givhan long ol yangfala Wetnes we oli holem Kristin fasin blong no joen long faet. Blong givhan long olgeta, mi stanap fored long ol kot long Welington, Pamaston Not, Pahiatua, mo Mastaton. Plante taem, i gat wan lida blong jyos long grup we oli jusum ol man blong joen long ami. Mo mi glad tumas blong soemaot se fasin blong olgeta ya blong sapotem ol faet, i no Kristin nating.​—1 Jon 3:​10-12.

Wan naet, taem mi mo Rowena i stap stadi long Wajtaoa, ol polisman oli kam insaed long haos blong mifala. Oli lukluk evri ples mo oli faenem sam buk we oli tokbaot Baebol. Oli talem long mifala se: “Yufala i save go long kalabus from ol buk ya.” Taem ol polisman oli tekem trak blong olgeta blong go, oli faenemaot se ol brek oli fas mo trak i no save muf. Ale, William Manser i givhan blong fiksimap trak ya. Mo mifala i no luk ol polisman ya bakegen.

Long taem ya we oli putum tabu long wok blong mifala, mifala i haedemgud ol buk we oli tokbaot Baebol, long wan ples long plantesin blong mifala. Long medel naet, mi stap visitim branj ofis blong Nyusilan, mo mi stap fulumap trak blong mi wetem ol buk. Biaen, mi karem ol buk ya oli go long haos, mo putum olgeta long ples haed ya long plantesin blong mifala. !Wan naet, taem mi kasem branj ofis blong karem ol buk long fasin haed, wantaem nomo, olgeta laet blong ofis oli laet! Polis i singaot se: “!Mifala i kasem yu!” Be, mi sapraes se oli letem mi mi gofri we oli no mekem tumas trabol long mi.

Long 1949, mi mo Rowena i salem plantesin, mo mitufala i mekem disisen blong wok olsem ol paenia go kasem we mitufala i yusum olgeta mane we mitufala i gat. Mitufala i muf i go long wan haos long Mastaton, mo mitufala i mekem wok blong paenia wetem kongregesen long ples ya. Bifo we tu yia i pas, kongregesen i stanap long Fetaston wetem 24 pablisa we oli wok strong. Mo mi wok olsem presiden elda long kongregesen ya. Afta, long 1953, mi glad long jans we mi kasem blong go long wan intenasnal asembli blong ol Wetnes blong Jeova blong eit dei, long Yanki Stadium, Nyu Yok, Yunaeted Stet. Rowena i no save kam wetem mi, from we hem i mas lukaot long smol gel blong mitufala, Enid, we i harem nogud from wan sik.

Taem mi gobak long Nyusilan, mi mas faenem wan wok blong winim smol mane. Mifala i gobak long kongregesen blong Mastaton, we mi kam presiden elda blong hem. Long taem ya, William Manser i pem wan haos sinema long Mastaton, mo haos ya i kam faswan Haos Kingdom long Wairarapa. Long ol yia biaen long 1950, kongregesen blong mifala i grugud long saed blong speret, mo namba blong ol man long hem i kam antap. From samting ya, taem seket elda i visitim mifala, oltaem hem i leftemap tingting blong olgeta ya we oli bigman long saed blong speret, blong muf i go long ol narafala ples long kantri blong givhan long wok blong prij longwe. Mo plante brata sista oli mekem olsem.

Famle blong mifala i gohed blong stap long Mastaton. Long ol yia we oli kam biaen, mi kasem plante blesing blong wok long kongregesen, mo mi glad blong kasem spesel wok long ol nasnal mo intenasnal asembli tu. Rowena i gohed strong long wok blong prij, mo oltaem hem i givhan long ol narafala blong mekem sem mak.

Winim Ol Traem Blong Bilif

Olsem mi talem finis long stat, long 1985, oli faenem se mi gat kansa we oli no save winim. !Mi mo gudfala waef blong mi Rowena, wetem ol pikinini blong mitufala, mifala evriwan i wantem stap long medel blong olgeta milyan man we oli laef naoia, we oli no save ded samtaem! Be ol dokta oli sanem mi mi gobak long haos nomo blong ded, from oli no save mekem wan samting. Be, fastaem, oli askem long mi wanem tingting blong mi long saed blong nyus ya se i no gat rod blong winim sik ya.

Mi ansa se: “Bambae mi gohed blong holemtaet kwaet tingting mo blong hop se mi save winim.” Yes, wan proveb blong Baebol i mekem mi mi strong, i se: “Hat blong man we i kwaet, i givim laef long bodi blong hem.”​—Proveb 14:30.

Ol spesel dokta long saed blong sik ya kansa, oli agri long advaes ya blong Baebol. Oli talem se: “Naente pesen blong meresin blong sik ya kansa i wan tingting olsem.” Mo tu, oli talem long mi se i gud sipos, blong seven wik, oli yusum wankaen paoa blong lektrik blong traem kilim kansa ya long mi. Mi glad se, biaen mi winim sik ya.

Long hadtaem ya, wan narafala trabol i kasem mi we i mekem mi mi harem nogud tumas. Naesfala waef blong mi, we i stap tru long mi oltaem, i kasem wan nogud sik we wan string i brok long bren blong hem, mo hem i ded. Ol eksampel long Baebol long saed blong olgeta ya we oli stap tru long God, oli leftemap tingting blong mi. Mo i halpem mi tu, taem mi luk olsem wanem Jeova i givhan long olgeta ya we oli holemstrong long Hem. Taswe, hop blong mi long saed blong nyufala wol i stap klia long tingting blong mi.​—Rom 15:4.

Nating se i olsem, tingting blong mi i foldaon, mo mi no moa wantem wok olsem wan elda. Ol brata long ples ya, oli leftemap tingting blong mi go kasem taem we mi gat paoa bakegen blong gohed long wok ya. From samting ya, mi gohed blong mekem wok olsem wan Kristin elda mo seket elda, blong ol 57 yia we oli pas finis.

Lukluk i Go Long Fyuja Wetem Bilif

I wan bigfala blesing blong mekem wok blong Jeova long olgeta yia ya. !Mi bin kasem fulap blesing! I olsem se i no longtaem tumas, we mi bin gat 16 yia, nao mi harem mama blong mi i talem se: “!Hemia nao trutok ya!” Mama blong mi i wan Wetnes we i stanap strong long bilif gogo kasem ded blong hem long 1979, taem hem i gat bitim 100 yia blong hem. Gel blong hem mo ol sikis pikinini boe blong hem tu, oli kam ol Wetnes we oli gat strong bilif.

Samting we mi wantem tumas, i blong stap laef gogo mi luk taem ya we bambae Jeova i tekemaot olgeta doti we ol man oli bin sakem long nem blong hem. ?Hop blong no ded samtaem we mi gat longtaem finis, hem i save kamtru? Hemia wan samting we bambae yumi wet blong luk. Be, mi sua se, plante, yes plante milyan man, bambae oli kasem blesing ya long fyuja. Long ful laef blong mi, bambae mi holemtaet hop ya blong stap long medel blong olgeta ya we bambae oli neva ded.​—Jon 11:26.

[Futnot]

[Tok Blong Pija Long Pej 28]

Mama blong mi

[Tok Blong Pija Long Pej 28]

Mi mo waef blong mi wetem ol pikinini blong mitufala