“Yufala i No Mas Letem Han Blong Yufala i Kam Slak”

“Yufala i no mas letem han blong yufala i kam slak. Jeova, God blong yufala i stap wetem yufala. Hem i strongfala Man, bambae hem i sevem yufala.”—SEFANAEA 3:​16, 17.

1. ?Wan man blong eksplenem Baebol i talem wanem long saed blong profet tok blong Sefanaea?

PROFET tok blong Sefanaea i tokbaot samting we bambae i kamaot longtaem biaen we i kamtru fastaem, long ol yia 500 B.K.T. mo 600 B.K.T. Taem Tija C. F. Keil i raetem ol tok blong hem blong eksplenem buk blong Sefanaea, hem i talem se: “Profet tok blong Sefanaea . . . i stat wetem mesej blong wan bigfala jajmen long ful wol. Hemia i jajmen we i kamaot long Juda from ol sin blong hem, mo long ol nesen blong wol from we oli mekem i nogud long ol man blong Jeova. Be i no hemia nomo. Hem i tokbaot bigfala dei blong Jeova tu, we bambae i mekem ol man oli fraet tumas.”

2. ?Olsem wanem ol samting we oli kamaot long taem blong Sefanaea oli sem mak long ol samting we oli kamaot insaed long Krisendom tede?

² Tede, disisen blong Jeova i blong hivimap plante moa nesen bitim long taem blong Sefanaea, blong hem i spolemgud olgeta. (Sefanaea 3:⁠8) Ol nesen ya we oli talem se oli Kristin, oli gat moa fol long fes blong God. Jerusalem i kasem strongfala panis from we hem i no stap tru long Jeova. Long sem fasin, Krisendom i mas kasem panis from ol rabis fasin blong hem. Jajmen blong God we Sefanaea i talemaot agens long Juda mo Jerusalem, i stret moa mo i strong moa long ol jyos mo grup blong Krisendom. Oli mekem klin wosip i kam doti wetem ol tijing blong olgeta we oli no givim ona long God, we plante blong olgeta oli kamaot long ol hiten man nomo. Oli givim plante milyan pikinini blong olgeta blong ded long ol faet tede, olsem we long taem bifo, oli kilim olgeta long olta blong mekem sakrifaes. Antap long hemia, ol man blong ogenaesesen ya we Jerusalem i pija blong hem, oli mekem sem fasin olsem olgeta we oli wosip long Bal oli bin mekem. Oli meksemap ol skul we oli kolem Kristin skul, wetem fasin blong talemaot fyuja from ol sta, wok blong ol rabis speret, mo ol rabis fasin long saed blong seks.​—Sefanaea 1:​4, 5.

3. ?Yumi save talem wanem long saed blong plante lida blong wol mo politik gavman tede, mo profet Sefanaea i talem wanem?

³ Plante lida blong politik long Krisendom oli laekem we ol man oli luk olgeta insaed long jyos. Be olsem “ol prins” blong Juda, plante blong olgeta oli olsem “ol laeon we oli stap singaot bigfala,” mo olsem “ol wael dog” we oli hanggri tumas. Oli spolem ol man blong mekem i gud long olgeta bakegen. (Sefanaea 3:​1-3) Ol man we oli wok aninit long ol lida ya blong politik “oli fulumap haos blong masta blong olgeta wetem faet mo gyaman.” (Sefanaea 1:⁠9) Fasin blong ‘pasem mane aninit long tebel’ mo kruked fasin i fulap. Long saed blong ol politik gavman insaed mo afsaed long Krisendom, naoia plante moa oli ‘tok flas’ agensem ol man blong Jeova blong ol ami, ol Wetnes blong hem. Oli mekem nogud long olgeta, mo oli talem se oli “wan krangke skul” nomo. (Sefanaea 2:⁠8; Ol Wok 24:​5, 14) Long saed blong ol politik lida ya mo ol man we oli biaen long olgeta, profet Sefanaea i talem se: “Selva mo gol blong olgeta bambae i no save sevem olgeta long dei blong kros blong Jeova. Be bambae faea blong kros blong hem i spolem fulwol, from we bambae hem i kilim i ded, i rili spolemgud, olgeta man long wol.”​—Sefanaea 1:⁠18.

“Haed Long Dei Blong Kros Blong Jeova”

4. ?Wanem samting i soem se sam man bambae oli stap laef tru long bigfala dei blong Jeova, be oli mas mekem wanem?

⁴ I no evri man Juda we oli ded long sikis handred yia B.K.T. I sem mak, bambae i gat sam man oli stap laef tru long bigfala dei blong Jeova. Jeova i yusum profet Sefanaea blong talem long olgeta ya se: “Bifo we oda blong hem i mekem wan samting i kamtru, bifo we dei ya i pas finis olsem we skin blong wit i pas, bifo we bigfala kros blong Jeova i kamtru long yufala, bifo we dei blong kros blong Jeova i kamtru long yufala, yufala i mas lukaot Jeova, yufala olgeta kwaet man blong wol we tingting blong yufala i stap daon, we yufala i obei long ol jajmen blong hem. Yufala i mas lukaot stret fasin, yufala i mas lukaot tingting daon. Maet bambae yufala i haed long dei blong kros blong Jeova.”​—Sefanaea 2:​2, 3.

5. ?Long taem blong yumi kolosap long en, hu ol faswan we oli harem woning blong Sefanaea, mo Jeova i bin yusum olgeta long wanem rod?

⁵ Long taem blong yumi, long en blong wol, ol faswan we oli obei long profet tok ya, hemia smol grup blong ol man Isrel long saed blong speret, ol tabu Kristin. (Rom 2:​28, 29; 9:6; Galesia 6:​16) Oli lukaot stret fasin mo tingting daon, mo oli soem respek long ol loa mo disisen blong Jeova. From samting ya, long 1919, oli kamfri long Bigfala Babilon, hemia ogenaesesen blong ol gyaman skul long wol, mo God i glad long olgeta bakegen. Stat long taem ya, antap moa, stat long 1922, smol grup ya we oli stap tru long God, oli no fraet blong talemaot jajmen blong Jeova agensem ol jyos mo ol grup blong Krisendom mo agensem ol politik nesen.

6. (a) ?Profet Sefanaea i talem wanem long saed blong smol grup blong ol tabu man blong God? (b) ?Olsem wanem profet tok ya i bin kamtru?

⁶ Long saed blong smol grup ya we oli stap tru long God, profet Sefanaea i talem se: “Bambae mi letem i stap long medel blong yufala ol man we oli no flas be oli gat tingting daon. Nem blong Jeova bambae i olsem wan sefples blong oli haed long hem. Mo ol man Isrel we oli stap yet, bambae oli no mekem fasin we i no stret, mo bambae oli no talem gyaman toktok, mo bambae tang long maot blong olgeta i no save trikim man, no gat. From we olgeta ya bambae oli kakae mo oli ledaon we oli stretemgud bodi blong olgeta, mo bambae i no gat wan man we i mekem olgeta i seksek.” (Sefanaea 3:​12, 13) Oltaem nomo, ol tabu Kristin ya oli putum nem blong Jeova long fasples, be oli mekem moa stat long 1931, taem oli tekem nem ya ol Wetnes blong Jeova. (Aesea 43:​10-​12) Taem oli talemaot hae rul blong Jeova, oli givim ona long nem blong hem, mo samting ya i kam olsem wan sefples we oli save haed long hem. (Proveb 18:10) Jeova i fidim olgeta wetem plante kakae long saed blong speret, mo oli stap long paradaes long saed blong speret we oli no fraet nating.​—Sefanaea 3:​16, 17.

“Wan Nem Mo Wan Samting Blong Presem Long Medel Blong Ol Man”

7, 8. (a) ?Wanem narafala profet tok we i bin kamtru long smol grup blong ol man Isrel long saed blong speret? (b) ?Plante milyan man oli luksave wanem, mo wanem ol filing blong yu long saed ya?

⁷ Plante man oli stap luk se smol grup ya oli laekem tumas nem blong Jeova mo ol stret rul long Tok blong Hem. Ol man we hat blong olgeta i stret oli luksave se fasin blong smol grup ya i defren long kruked fasin mo fasin tu fes blong ol lida blong politik mo ol skul long wol ya. Jeova i blesem “ol man Isrel [long saed long speret] we oli stap yet.” Hem i ona long olgeta, i givim blesing long olgeta blong karem nem blong hem, mo hem i mekem se oli gat gudnem long medel blong olgeta man long wol. Hemia i olsem we profet Sefanaea i talem se: “Jeova i talem tok ya se: ‘Long taem ya, bambae mi mi tekem yufala i kam insaed, long taem ya we mi stap hivimap yufala i kam wanples. Bambae mi mekem yufala i kam wan nem mo wan samting blong presem long medel blong olgeta man long wol, taem mi tekem olgeta blong yufala we oli kalabus oli hivap bakegen long fes blong yufala.,’ ”​—Sefanaea 3:⁠20.

⁸ Stat long 1935, plante milyan man oli luksave se Jeova i stap blesem smol grup ya. Oli glad blong biaenem ol man Jyu ya long saed blong speret. Oli talem se: “Bambae mifala i go wetem yufala, from we mifala i harem we God i stap wetem yufala.” (Sekaraea 8:​23) Ol “narafala sipsip” ya oli tingbaot smol grup ya olsem “slef ya we i stret mo waes,” we Kraes i putumap “blong lukaot long olting blong hem [long wol].” Wetem fasin tangkyu, oli tekem ol kakae long saed blong speret we grup ya we i olsem slef i mekemrere long “stret taem blong hem.”​—Jon 10:16; Matyu 24:​45-​47, NW.

9. ?Wanem “lanwis” we plante milyan man oli lanem blong toktok, mo wanem wok we ol narafala sipsip oli stap mekem wetem smol grup blong ol tabu man olsem we “solda blong wan i joen long solda blong narawan”?

⁹ Ol milyan narafala sipsip ya oli joen wetem smol grup blong ol tabu Kristin, nao oli lanem blong stap laef mo toktok long fasin we i laenap wetem “klin lanwis.”a Jeova i yusum profet Sefanaea blong talem se: “Long taem ya, bambae mi jenisim lanwis blong ol man i kam klin lanwis. Nao olgeta oli save singaot nem blong Jeova, blong mekem wok blong hem, we solda blong wan i joen long solda blong narawan.” (Sefanaea 3:⁠9) Yes, ol narafala sipsip oli joen wetem ol memba blong ‘smol kampani,’ we “solda blong wan i joen long solda blong narawan” long impoten wok blong “talemaot gud nyus ya blong kingdom . . . blong givim wetnes long olgeta nesen.”​—Luk 12:32; Matyu 24:⁠14, NW.

“Dei Blong Jeova Bambae i Kam”

10. ?Oltaem smol grup blong ol tabu man oli sua long wanem samting, mo olgeta olsem wan grup, bambae oli stap laef blong luk wanem?

10 Oltaem, smol grup blong ol tabu Kristin oli bin tingbaot tok ya we tabu speret i pusum aposol Pita blong raetem, se: “Long tingting blong sam man, Jeova i slou blong mekem promes blong hem i kamtru, be i no olsem. Hem i stap mekem tingting blong hem i longfala, from we hem i no wantem we wan man i lus. Hem i wantem we olgeta man oli tanem tingting blong olgeta. Be dei blong Jeova bambae i kam olsem wan man blong stil.” (2 Pita 3:​9, 10, NW) Ol memba blong grup we i olsem slef ya we i stret, oli no save gat tingting we i hafhaf se maet dei blong Jeova i no kam long taem blong yumi. No gat. Bigfala dei ya bambae i stat taem God i mekem jajmen blong hem i kamtru agensem Krisendom, we Jerusalem i pija blong hem, mo agensem ol narafala haf blong Bigfala Babilon.​—Sefanaea 1:​2-4; Revelesen 17:​1, 5; 19:​1, 2.

11, 12. (a) ?Wanem narafala haf blong profet tok blong Sefanaea we i bin kamtru long smol grup blong ol tabu man blong God? (b) ?Olsem wanem smol grup ya oli bin folem tok ya, “Yufala i no mas letem han blong yufala i kam slak”?

¹¹ Ol tabu Kristin we oli stap tru long God oli haremgud tumas, from we long 1919, oli kamfri long Bigfala Babilon, ogenaesesen blong ol gyaman skul, we oli bin stap kalabus long hem long saed blong speret. Profet tok ya blong Sefanaea i kamtru long olgeta, se: “!Yu singaot wetem glad, dota blong Saeon! !Yu singsing wetem glad, Isrel! !Yu glad mo yu haremgud long fulhat blong yu, dota blong Jerusalem! Jeova i tekemaot jajmen agens long yu. Hem i mekem enemi blong yu i gowe. King blong Isrel, Jeova, i stap wetem yu. Bambae yu no moa save fraet se bigfala trabol bambae i spolem yu. Long taem ya, bambae ol man oli talem long Jerusalem, se: ‘Yufala blong Saeon, yufala i no fraet. Yufala i no mas letem han blong yufala i kam slak. Jeova, God blong yufala i stap wetem yufala. Hem i wan strongfala Man, bambae hem i sevem yufala.’ ”​—Sefanaea 3:​14-​17.

¹² Ol tabu Kristin oli gat strong tingting se Jeova i stap wetem olgeta, mo i gat plante pruf blong soem samting ya. Taswe, oli no fraet blong gohed nomo long wok we God i givim long olgeta blong mekem. Oli talemaot gud nyus blong Kingdom mo oli talemaot jajmen blong Jeova agensem Krisendom, agensem ol haf blong Bigfala Babilon, mo agensem fulwan rabis wol blong Setan. Long ol yia stat long 1919, nating se oli kasem ol hadtaem, oli obei long oda ya blong God se: “Yufala blong Saeon, yufala i no fraet. Yufala i no mas letem han blong yufala i kam slak.” Oli no les blong seremaot plante bilyan traket, magasin, buk, mo buklet we oli talemaot Kingdom blong Jeova. Oli kam olsem wan eksampel we i mekem bilif blong ol narafala sipsip i kam strong. Stat long 1935, plante milyan narafala sipsip oli joen wetem olgeta.

“Yufala i No Mas Letem Han Blong Yufala i Kam Slak”

13, 14. (a) ?From wanem sam man Jyu oli no moa mekem wok blong Jeova, mo olsem wanem oli soemaot tingting blong olgeta? (b) ?Bambae i no waes sipos yumi mekem wanem, mo yumi no mas letem han blong yumi i kam slak long wanem wok?

¹³ Taem yumi ‘stap wet’ long bigfala dei blong Jeova, ?olsem wanem profet tok ya blong Sefanaea i save givhan long yumi? Fastaem, yumi no mas mekem olsem ol man Jyu long taem blong Sefanaea, we oli no moa wantem folem Jeova from we tingting blong olgeta i hafhaf se maet dei blong Jeova i no kolosap. Ol man Jyu ya oli no talemaot klia se tingting blong olgeta i hafhaf, be fasin blong laef blong olgeta i soemaot se oli no rili bilif we dei blong Jeova i kolosap. Oli stap tingbaot nomo blong hivimap plante rij samting, bitim we oli wet long Jeova.​—Sefanaea 1:​12, 13; 3:8.

¹⁴ Tede i no taem blong letem tingting we i hafhaf i gru long hat blong yumi. I no waes nating blong gat tingting long hed no long hat blong yumi, se dei blong Jeova i stap longwe yet. (2 Pita 3:​1-4, 10) Yumi mas blokem fasin blong no moa folem Jeova mo blong ‘letem han blong yumi i kam slak’ long wok blong hem. Samting ya i minim tu se, “yumi no mas wok wetem han we i slak” long wok blong talemaot “gud nyus.”​—Proveb 10:4; Mak 13:10.

Traem Winim Fasin Ya Blong No Kea

15. ?Wanem i save mekem han blong yumi i kam slak long wok blong Jeova, mo olsem wanem profet tok blong Sefanaea i talemaot samting ya?

¹⁵ Namba tu samting se, yumi mas lukaotgud blong no letem fasin blong ol man we oli no intres mo oli no kea, i mekem yumi kam slak. Long plante kantri long Wes, fasin ya blong no intres long ol samting long saed blong speret i save mekem tingting blong sam man blong talemaot gud nyus i foldaon. Fasin ya i stap tu long taem blong Sefanaea. Jeova i yusum profet blong hem blong talem se: “Bambae mi lukluk i go long ol man we oli stap . . . talem long hat blong olgeta se, ‘Jeova bambae i no givhan, mo bambae i no givim panis.’ ” (Sefanaea 1:​12) Taem A. B. Davidson i eksplenem vas ya long buk ya Cambridge Bible for Schools and Colleges, hem i talem se i stap tokbaot ol man we oli “no moa gat intres mo filing, mo tu, maet oli no moa bilif se God bambae i mekem wan samting blong stretem ol trabol long wol.”

16. ?Wanem tingting blong plante memba blong ol skul blong Krisendom, be olsem wanem Jeova i leftemap tingting blong yumi?

¹⁶ Fasin ya blong no kea i bigfala fasin long plante ples long wol tede. Hem i kamaot moa long ol kantri we oli rij. Sam memba blong ol skul blong Krisendom tu oli no bilif se Jeova God bambae i stretem ol trabol blong man long taem blong yumi. Oli ting nating long ol traehad we yumi stap mekem blong talemaot gud nyus blong Kingdom long olgeta. Maet oli smael olsem we oli no bilif mo oli talem kwik, se, “!Mi mi no intres!” From fasin ya, samtaem i hadwok blong gohed strong long wok blong givim wetnes. Hemia i wan traem long yumi long saed blong fasin blong stanap strong longtaem. Be Jeova i yusum profet Sefanaea blong givim paoa long ol man blong hem, i se: “Yufala i no mas letem han blong yufala i kam slak. Jeova, God blong yufala i stap wetem yufala. Hem i wan strongfala Man, bambae hem i sevem yufala. Bambae hem i glad tumas long yufala wetem bigfala glad. Bambae hem i stap kwaet from lav we hem i gat long yufala. Bambae hem i singaot bigwan from hem i glad long yufala.”​—Sefanaea 3:​16, 17.

17. ?Ol nyuwan blong ol narafala sipsip oli mas folem eksampel blong hu, mo olsem wanem?

¹⁷ I tru se long histri blong ol man blong Jeova long taem blong yumi, ol tabu Kristin mo ol olfala we oli blong ol narafala sipsip, oli mekem wan bigfala wok blong hivimap ol man long ol lasdei ya. Olgeta Kristin ya we oli stap tru long God, oli soem fasin blong stanap strong longtaem long ol yia we oli pas. Nating se bighaf blong ol man long Krisendom oli no intres mo oli no kea, tingting blong olgeta i no foldaon. Taswe, ol nyuwan we oli blong ol narafala sipsip oli no mas letem tingting blong olgeta i foldaon, taem oli luk we plante man oli no kea long ol samting long saed blong speret. Oli no mas letem ‘han blong olgeta i kam slak,’ mo i no moa gat paoa. I gud we oli tekem evri jans blong seremaot Wajtaoa mo Wekap!, mo ol narafala nambawan spesel buk we oli blong givhan long olgeta we oli olsem sipsip, blong oli lanem trutok long saed blong dei blong Jeova mo ol blesing we bambae oli kamaot biaen.

!Gohed Taem Yu Stap Wet Long Bigfala Dei Ya!

18, 19. (a) ?Olsem wanem tok blong Matyu 24:13 mo Aesea 35:​3, 4 i leftemap tingting blong yumi blong stanap strong longtaem? (b) ?Bambae yumi kasem wanem blesing sipos yumi joengud blong gohed nomo long wok blong Jeova?

¹⁸ Jisas i talem se: “Man we i stanap strong gogo olgeta samting ya i finis, bambae God i sevem hem.” (Matyu 24:13) !Taswe, taem yumi stap wet long bigfala dei blong Jeova, ‘yumi no mas letem han blong yumi i kam slak’ no ‘letem leg blong yumi i seksek’! (Aesea 35:​3, 4) Profet tok blong Sefanaea i mekem promes long saed blong Jeova se: “Hem i wan strongfala Man, bambae hem i sevem yufala.” (Sefanaea 3:​17) Yes, bambae Jeova i sevem “bigfala hif blong man” tru long laswan haf blong “bigfala trabol,” taem hem i givim oda long Pikinini blong hem blong smasem ol politik nesen we oli stap “tok flas” agensem ol man blong hem.​—Revelesen 7:​9, 14; Sefanaea 2:​10, 11; Ol Sam 2:​7-9.

¹⁹ !Bigfala dei blong Jeova i stap kam kwik tumas! !From samting ya, yumi mas gohed strong blong mekem wok blong hem “we solda blong wan i joen long solda blong narawan”! (Sefanaea 3:⁠9) Olsem nao, bambae yumi wan mo plante narafala man i save “haed long dei blong kros blong Jeova,” mo luk ol bigfala samting we bambae oli givim moa ona long tabu nem blong Hem.

[Futnot]

Tingtingbak

◻ ?Olsem wanem ol fasin insaed long ol skul blong Krisendom oli sem mak long ol samting we oli kamaot long taem blong Sefanaea?

◻ ?Olsem wanem ol lida blong politik tede oli sem mak long ol “prins” long taem blong Sefanaea?

◻ ?Wanem ol promes long buk blong Sefanaea we oli bin kamtru long smol grup blong ol tabu man blong God?

◻ ?Plante milyan man oli luksave wanem?

◻ ?From wanem yumi no mas letem han blong yumi i kam slak long wok blong Jeova?

[Tok Blong Pija Long Pej 15]

Olsem Sefanaea, smol grup blong ol tabu Kristin we oli stap tru long God oli no fraet blong talemaot ol jajmen blong Jeova

[Tok Blong Pija Long Pej 18]

Ol “narafala sipsip” oli no letem fasin blong ol man we oli no kea mo oli no intres, i mekem tingting blong olgeta i foldaon