Oli Mekem Samting We Jeova i Wantem

Obei Long Ol Tok We Jisas i Talem Bifo We Hem i Ded

LONG naet blong Naesan 14, 33 K.T.,a Jisas Kraes mo ol 11 aposol we oli stap strong long hem oli stap sidaon raon long wan tebel antap long wan rum long Jerusalem. From we hem i save se i no longtaem bambae hem i mas ded, hem i talem long olgeta se: “Bambae mi mi no save stap longtaem bakegen wetem yufala.” (Jon 13:33) Yes, Judas Iskariot i go finis blong mekem plan wetem ol rabis man we oli wantem kilim Jisas i ded.

Long olgeta man we oli stap long rum ya, Jisas nomo i luksave se taem ya i impoten tumas. Hem i savegud se kolosap nao bambae hem i harem nogud bigwan. Jisas i save tu se long sem naet ya, bambae ol aposol blong hem oli lego hem. (Matyu 26:31; Sekaraea 13:7) Hemia i laswan jans we Jisas i gat blong toktok wetem ol aposol blong hem bifo we hem i ded. From samting ya, yumi sua se ol lastok blong hem long taem ya oli impoten tumas.

“Yufala i Mas Stap Mekem Samting Ya Blong Tingbaot Mi Bakegen”

Taem Jisas i stap wetem ol gudfala aposol blong hem, hem i stanemap wan lafet we bambae i tekem ples blong Pasova blong ol man Jyu. Aposol Pol i kolem lafet ya se “Kakae blong Masta.” (1 Korin 11:20) Jisas i tekem wan bred we i no gat is long hem, mo hem i mekem wan prea. Ale hem i brekem bred ya mo i givim long ol aposol blong hem. Hem i talem se: “Yufala i tekem, yufala i kakae. Hemia i bodi blong mi.” Nao hem i tekem wan kap blong waen, i mekem prea blong talem tangkyu long God, mo i givim long ol aposol blong hem. Hem i talem se: “Yufala evriwan, yufala i dring long hem. From we hemia i blad blong mi, we i blong mekem promes blong God i stanap. Blad blong mi bambae i ron blong tekemaot ol sin blong plante man.”​—Matyu 26:26-​28.

?Wanem mining blong lafet ya? Olsem Jisas i soemaot, bred i minim bodi blong hem we i no gat sin. (Hibrus 7:​26; 1 Pita 2:​22, 24) Waen i minim blad blong Jisas we i ron, nao i openem rod blong God i fogivim ol sin. Blad blong sakrifaes blong hem tu bambae i stanemap nyufala kontrak bitwin long Jeova God mo ol 144,000 man, we biaen bambae oli rul wetem Jisas long heven. (Hibrus 9:​14; 12:22-​24; Revelesen 14:1) Taem Jisas i singaot ol aposol blong hem blong joen long kakae ya, hem i soemaot se bambae oli joen wetem hem long Kingdom blong heven.

Long saed blong kakae ya, Jisas i givim oda se: “Yufala i mas stap mekem samting ya blong tingbaot mi bakegen.” (Luk 22:19) Yes, Kakae blong Masta hem i wan samting blong mekem wan taem evri yia, olsem lafet blong Pasova bifo. Lafet blong Pasova i blong tingbaot taem we ol man Isrel oli fri long Ijip, oli no moa slef. Kakae blong Masta i poen i go long wan fasin blong kam fri we i bigwan moa​—hemia blong pemaot ol man long sin mo ded we i stap holem olgeta olsem slef. (1 Korin 5:7; Efesas 1:7) Antap long hemia, olgeta we oli kakae bred mo dring waen we i saen blong bodi mo blad blong Jisas, bambae oli tingbaot ol blesing blong olgeta long fyuja, hemia blong kam king mo pris long Kingdom blong God long heven.​—Revelesen 20:6.

Ded blong Jisas Kraes i rili wan samting we i impoten tumas long histri blong man. Olgeta we oli gat tangkyu from samting we Jisas i mekem, oli obei long oda ya long saed blong Kakae blong Masta se: “Yufala i mas stap mekem samting ya blong tingbaot mi bakegen.” Ol Wetnes blong Jeova oli tingbaot ded blong Jisas evri yia, long dei we i stret long Naesan 14. Long 1996, dei ya i foldaon stret long Epril 2, afta we san i godaon. Mifala i glad blong singaot yu blong kam long wan Haos Kingdom long eria blong yu long taem ya.

‘Mi Givim Wan Nyufala Loa Long Yufala’

Antap long Kakae blong Masta we Jisas i stanemap, hem i gat sam narafala advaes blong givim long ol aposol blong hem. Nating se ol man ya oli kasem nambawan trening finis, i gat plante samting yet we oli mas lanem. Oli no luksave fulwan stampa tingting blong God long saed blong Jisas, long saed blong olgeta, mo long saed blong fyuja. Be long taem ya, Jisas i no traem eksplenem evri samting ya long olgeta. (Jon 14:26; 16:​12, 13) Be, hem i tokbaot wan samting we i rili impoten. Hem i talem se: “Mi mi givim wan nyufala loa long yufala, se ‘Yufala i mas laeklaekem yufala.’ Olsem we mi mi laekem yufala, ale long sem fasin, yufala i mas laeklaekem yufala.” Biaen, Jisas i ademap se: “Nao from we yufala i stap laeklaekem yufala, bambae olgeta man oli luksave se yufala i man blong mi.”​—Jon 13:​34, 35.

?Olsem wanem loa ya i “wan nyufala loa”? Loa blong Moses i givim oda ya: “Yu mas laekem ol man raonabaot long yu olsem yu laekem yu wan.” (Levitikas 19:18) Be, Jisas i talem long ol man blong hem se oli mas soemaot lav, we oli rere blong lego sam samting we oli laekem tumas. Maet oli save givim laef blong olgeta tu, from ol Kristin brata sista blong olgeta. Yes, ol man blong Jisas oli mas folem ‘loa blong lav’ tu long taem we i no gat trabol. Oltaem ol man blong Jisas Kraes oli mas tekem fas step blong soemaot lav, taem oli halpem ol narafala long saed blong speret no long sam narafala rod.​—Galesia 6:​10.

Long laswan naet ya long laef blong Jisas long wol, lav i pusum Jisas blong prea long Jeova God from ol disaepol blong hem. Wan haf blong prea blong hem i olsem se: “Naoia mi mi stap kam long yu, mi no moa stap long wol ya. Be olgeta ya oli stap yet long wol ya. Papa, yu yu tabu. Plis yu holem olgeta ya bambae oli sef long paoa blong nem ya blong yu, we yu yu givim long mi, blong olgeta oli save stap wan nomo, olsem we yumitufala i wan nomo.” (Jon 17:11) Makemgud se Jisas i prea long Papa blong hem mo, i askem strong long hem blong halpem ol man blong hem blong oli joengud long lav. (Jon 17:20-​23) Oli mas ‘laeklaekem olgeta, olsem we Jisas i laekem olgeta.’​—Jon 15:12.

Ol aposol ya we oli stap strong long bilif, oli folem ol lastok blong Jisas. Yumi tu, yumi mas folem ol oda blong hem. Long ol “las dei” ya we laef i strong tumas, i impoten moa we ol man blong wosip long God oli laeklaekem olgeta mo oli joengud. (2 Timote 3:1) Yes, ol trufala Kristin oli obei long loa we Jisas i givim mo oli soemaot lav long ol brata mo sista blong olgeta. Samting ya i minim tu se oli mas obei long oda blong hem blong mekem Kakae blong Masta.

[Futnot]