Oli Mekem Samting We Jeova i Wantem

Wan Smol Gel We i No Fraet Blong Toktok

LONG ol yia 900 B.K.T.a tufala kantri ya Isrel mo Siria, oli kam badfren. Plante taem, faet i kamaot bitwin long tufala. Taswe, taem tri yia i pas we i no gat wan faet i kamaot, oli raetemdaon samting ya long ol buk blong histri.​—1 King 22:⁠1.

Long taem ya, wan samting we i givim bigfala fraet, hemia ol grup blong ol man Siria, we oli ol man blong faet mo stil. I gat plante handred soldia oli joen long ol grup ya. Oli stap faet wetem ol man Isrel mo stilim olting blong olgeta. Oli fosem plante man Isrel blong go wetem olgeta mo oli karem plante oli go wok slef​—sam long olgeta oli ol pikinini nomo.

Long wan faet we oli mekem, oli no sore nating long “wan smol gel.” Oli tekemaot hem long famle blong hem we oli fraetgud long God. (2 King 5:2) Oli tekem hem i go long Siria, nao oli putum hem i stap wetem ol man we hem i fraet long olgeta mo hem i no save olgeta. Ol man ya oli stap wosip long san, mun, ol sta, ol tri, ol flaoa mo ol ston. !Oli defren olgeta long famle mo ol fren blong gel ya, we oli wosip long wan trufala God, Jeova! Nating se gel ya i stap long wan ples we i narakaen olgeta, hem i soem nambawan fasin blong no fraet blong stanap strong long saed blong wosip blong Jeova. Frut we i kamaot se, hem i jenisim laef blong wan haeman blong king blong Siria. Yumi luk olsem wanem hem i mekem samting ya.

Hem i No Fraet Blong Toktok

Gel ya, nem blong hem i no stap long Baebol. Hem i kam wan haosgel blong waef blong Neman, wan strongfala man blong faet we i lidim ami blong King Ben-hadad 2. (2 King 5:1) Ol man oli tinghae long Neman, be hem i gat nogud sik ya, leprosi.

Maet respek we smol gel ya i soemaot, i pulum waef blong Neman blong trastem hem, ale hem i talemaot trabol blong hem long gel ya. Maet hem i askem long gel ya se: ‘?Long Isrel, wanem samting yufala i stap mekem blong winim leprosi?’ Yangfala gel Isrel ya i no sem blong talem klia se: “!I gud sipos masta blong mi i go luk profet ya we i stap long Sameria! Profet ya i naf blong mekem sik blong hem leprosi, i kamgud bakegen.”​—2 King 5:3.

Woman ya i no ting nating long tok blong gel ya olsem we i tok blong wan pikinini nomo. No gat. Wan i go talemaot tok ya long King Ben-​hadad. Ale, king i sanem Neman mo sam man bakegen oli mekem wan trep blong 150 kilomita, oli go long Sameria blong lukaot profet ya.​—2 King 5:​4, 5.

Neman i Kamgud Bakegen

Neman mo ol man blong hem oli go luk King Joram blong Isrel. Oli karem wan leta we Ben-hadad i raetem blong talemaot se oli hu, mo oli karem bigfala mane we hem i sanem olsem wan presen. I no wan samting blong sapraes se, King Joram we i wosip long aedol blong pikinini buluk, i no bilif long profet blong God, olsem haosgel blong Neman i bilif long hem. Defren nao, hem i ting se Neman i kam blong rao wetem hem. Taem profet blong God, Elaesa, i harem se King Joram i no bilif long hem, kwiktaem nomo hem i sanem mesej i go blong askem king blong sanem Neman i kam long haos blong hem.​—2 King 5:​6-8.

Taem Neman i kamtru long haos blong Elaesa, profet ya i sanem wan man blong karem mesej i go long hem se: “Yu mas swim seven taem long reva Jodan, nao bambae sik blong yu i finis, mo yu kam klin.” (2 King 5:​9, 10) Neman i kros we i kros. Hem i ting se bambae profet ya i mekem merikel long wan bigfala fasin, blong finisim sik blong hem. Hem i talem se: “Reva Abana mo Fapa long Damaskas, oli moa gud bitim ol wora blong Isrel. ?From wanem mi no save swim long olgeta blong kam klin?” Neman i aot long haos blong Elaesa, mo i kros we i kros. Be taem ol man blong Neman oli toktok wetem hem, hem i jenisim tingting blong hem. Afta we hem i swim seven taem long Reva Jodan, “skin blong hem i kam olsem skin blong wan smol boe bakegen, mo hem i kam klin.”​—2 King 5:​11-​14.

Neman i tanraon, i gobak long Elaesa, mo i talem se: “I tru tumas, naoia mi save se i no gat wan God long olgeta ples long wol we i olsem God blong Isrel.” Neman i promes se bambae hem i “no moa givim presen no bonem sakrifaes long ol narafala god. Bambae hem i mekem long Jeova nomo.”​—2 King 5:​15-​17.

Ol Samting We Yumi Lanem

Sipos yangfala haos gel ya i bin fraet blong toktok, Neman i no save go luk profet Elaesa. Tede, plante yangfala oli folem eksampel blong hem. Long skul, oli stap long medel blong ol studen we oli no intres blong mekem wok blong God. Nating se i olsem, oli tokbaot samting we oli bilif long hem. Sam long olgeta oli stat blong mekem olsem, taem oli smol pikinini nomo.

Tingbaot eksampel blong Alexandra, wan smol gel long Ostrelya we i gat faef yia. Taem hem i stat blong go long skul, mama blong hem i go luk tija blong eksplenem bilif blong ol Wetnes blong Jeova long hem. Be mama blong Alexandra i sapraes tumas. Tija i talem long hem se: “Mi mi save finis plante bilif blong yufala, mo mi save tu ol samting we Alexandra i save mekem mo i no save mekem long skul.” Mama blong Alexandra i sek from we long skul ya, i no gat wan narafala studen we i wan Wetnes. Tija i eksplenem se: “Alexandra i talem evri samting long mifala finis.” Yes, smol gel ya i bin storeyan long waes fasin wetem tija blong hem.

Ol yangfala olsem oli no fraet blong toktok. Olsem nao, oli mekem samting we Ol Sam 148:12, 13, i tokbaot, se: “Yufala ol gel wetem ol boe, yufala ol ololfala wetem ol pikinini tu, yufala i presem hem. I gud yumi olgeta ya evriwan yumi presem nem blong Hae God. Nem blong hem i hae moa, i winim ol narafala nem, mo paoa blong hem i kasem evri ples long heven mo long wol.”

[Futnot]