?I Minim Wanem Blong Laekem God?

SAMWE long sikis taosen yia bifo, faswan bebi i bon long wol. Afta we hem i bon, mama blong hem, Iv, i talem se: ‘From we Jeova i givhan long mi, mi mi kasem wan pikinini we i boe.’ (Jenesis 4:1) Tok ya i soem se Iv mo hasban blong hem Adam, nating se tufala i kasem jajmen finis se tufala i mas ded from we tufala i rebel, be tufala i save yet se Jeova i trufala God. Biaen, tufala i karem namba tu pikinini boe blong tufala. Tufala i kolem nem blong tufala boe ya, Ken mo Ebel.

Taem tufala boe ya i stap gru, i klia se tufala i lanem plante samting long saed blong lav we Jeova i soem. Tufala i save lanem samting ya taem tufala i lukluk nomo long ol samting we Hem i wokem. Tufala i haremgud long ol naesfala kala blong ol samting raonabaot long tufala mo ol defdefren anamol mo tri. God i no jes givim laef long tufala, be hem i mekem se tufala i naf blong haremgud long laef tu.

Tufala i lanem se papa mama blong tufala, oli stretgud olgeta taem Jeova i wokem olgeta, mo se faswan stampa tingting blong Jeova, hemia se ol man oli laef blong olwe. Ating Adam mo Iv, tufala i bin tokbaot naesfala garen blong Iden long tufala boe ya. Mo ating tufala i eksplenem from wanem God i ronemaot tufala long paradaes ya. Maet Ken mo Ebel, tufala i save profet tok blong God long Jenesis 3:​15. Long profet tok ya, Jeova i talemaot stampa tingting blong hem blong stretem ol samting long stret taem blong hem. Olsem nao, olgeta we oli laekem hem mo stap tru long hem, oli save kasem blesing.

Taem Ken mo Ebel, tufala i stap kasem save long Jeova mo ol fasin blong hem, samting ya i mas pusum tufala blong wantem mekem God i glad. Taswe, blong kam kolosap long Jeova, tufala i karem ol presen i kam blong givim long hem. Baebol i talem se: ‘Nao afta we sam taem i pas, Ken i tekem sam kakae we i kamaot long garen blong hem, i givim i go long Jeova blong mekem wosip long hem. Be Ebel i tekem wan fasbon blong ol sipsip blong hem, i kilim i ded, mo i tekem ol gudfala mit blong hem we i gat gris, nao i givim i go long Jeova blong mekem wosip long hem.’​—Jenesis 4:​3, 4.

Tufala i wantem se God i glad long tufala. Samting ya nao i openem rod blong tufala i save frengud wetem hem. Biaen, Ken i rebel agens long God. Be, Ebel i gohed blong letem trufala lav we hem i gat long God i pusum hem. Sipos Ebel i no bin kasem save fastaem long fasin blong Jeova mo long ol stampa tingting blong Hem, hem i no save frengud wetem God olsem.

Yu tu, yu save kasem save long Jeova. Eksampel, Baebol i tijim yu se Jeova i wan trufala man. Hem i no jes wan paoa we i no laef, mo we i stap wokem ol samting from laki nomo. (Skelem wetem Jon 7:​28; Hibrus 9:​24; Revelesen 4:​11.) Baebol i tijim yu tu se, Jeova i wan “God we i gat sore mo gladhat, hem i slou blong kam kros, mo hem i fulap long kaen fasin mo trutok.”​—Eksodas 34:​6, NW.

‘I Moagud Blong Obei Bitim Blong Mekem Wan Sakrifaes’

Store blong Ken mo Ebel i soem se i no naf blong kasem save long God mo blong wantem frengud wetem hem. I tru, tufala brata ya i tekem ol presen oli kam long God. Be, ‘Jeova i glad long fasin ya we Ebel i mekem, mo presen ya we i givim long hem, be i no glad long fasin we Ken i mekem, mo presen ya blong hem. Nao Ken i kros tumas, mo fes blong hem i kam nogud.’​—Jenesis 4:​3-5.

?From wanem Jeova i no agri long sakrifaes blong Ken? ?Ol samting we Ken i givim olsem sakrifaes oli nogud? ?Jeova i kros long Ken from we Ken i givim ol “kakae we i kamaot long garen blong hem,” i no givim anamol? Maet i no samting ya we i mekem God i kros. Samtaem biaen, plante man blong wosip long God oli karem ol sid mo ol frut blong garen, ale oli givim long hem olsem presen. Mo hem i glad long ol presen ya. (Levitikas 2:​1-​16) Taswe, i klia se i gat wan samting we i no stret long hat blong Ken. Jeova i save ol tingting long hat blong Ken nao i givim woning long hem se: “?From wanem yu yu kros olsem? ?Weswe fes blong yu i kam nogud olsem? Sipos fasin blong yu i stret, bambae mi mi glad long yu, be fasin blong yu i no stret. Mo from we fasin blong yu i no stret, fasin nogud ya blong yu i olsem wan wael anamol we i stap kolosap long doa, i rere blong kakae yu. Fasin nogud ya i wantem tumas blong winim yu, be yu yu mas winim hem.”​—Jenesis 4:​6, 7.

Blong gat trufala lav long God, i minim moa bitim we yu jes givim presen i go long hem. Hemia nao risen from wanem Jeova i talem strong long Ken blong ‘mekem fasin we i stret.’ God i wantem we hem i obei long hem. Sipos Ken i bin obei long God, samting ya i save givhan long hem, mo openem rod blong hem i laekem mo frengud wetem Man ya we i wokem olgeta samting. Baebol i soem klia se fasin obei i impoten tumas. Hem i talem se: “?Jeova i glad long ol samting we ol man oli bonem blong givim olsem presen mo sakrifaes? ?No hem i glad moa taem oli obei long voes blong hem? !Yu luk! I moa gud blong obei i bitim blong mekem wan sakrifaes, i moagud blong lesin i bitim blong givim gris blong man sipsip.”​—1 Samuel 15:22.

Biaen, 1 Jon 5:3 i mekem poen ya i kam kliagud, i se: “Sipos yumi laekem God tumas, hemia i min se yumi stap folem ol loa blong hem. Mo ol loa blong hem oli no strong tumas blong folem.” I no gat wan narafala rod we i moagud blong soem lav long Jeova, i bitim we yumi obei long hem. Samting ya i minim se yumi mas obei long ol rul blong Baebol long saed blong stret fasin. (1 Korin 6:​9, 10) I minim se yumi mas laekem ol fasin we oli gud mo no laekem nating ol fasin we oli nogud.​—Ol Sam 97:10; 101:3; Proveb 8:​13.

Wan impoten rod blong soemaot lav long God, hemia se yumi mas laekem ol man we oli stap raonabaot long yumi. Baebol i talem se: “Man we i stap talem se ‘Mi mi laekem God tumas,’ be i nogud long brata blong hem, i agensem hem, hem i man blong gyaman nomo. ?Hem i luk brata blong hem finis, nao sipos i no save laekem hem, olsem wanem bambae hem i save laekem God we hem i no luk samtaem?”​—1 Jon 4:​20.

Yumi Save Frengud Wetem God

Maet samfala oli talem se: ‘Mi mi wosip long Jeova. Mi mi obei long ol loa blong hem. Mi mi stap mekem i gud long ol narafala man. Olgeta samting ya, mi mi mekem evriwan. Be, mi no harem se mi stap kolosap long God. Mi no harem se mi gat strongfala lav long hem. Mo samting ya i mekem mi mi harem se mi gat poen.’ Maet samfala oli ting se oli no naf blong gat wan gudfala fasin fren wetem Jeova.

Afta we wan Kristin i mekem wok blong Jeova blong kolosap 37 yia, hem i raetem se: “Plante taem long laef blong mi, mi harem se wok we mi stap mekem long Jeova i olsem wan kastom nomo. Mi harem se maet mi no stap mekem wok ya nating wetem hat blong mi. Be mi save se i stret blong mekem wok blong Jeova. Mo mi no letem mi blong kam slak. Be, evri taem mi ridim store blong sam narafala we oli talem se ‘hat blong olgeta i fulap wetem lav long Jeova,’ mi stap tingting se, ‘?Wanem i rong long mi? Mi mi neva gat filing olsem.’” ?Olsem wanem yumi save frengud wetem God?

Sipos yu rili laekem wan man, oltaem nomo yu tingbaot hem. Yu wantem tumas blong stap kolosap long hem from we yu laekem hem. Taem yu luk hem moa, yu toktok moa wetem hem, mo tingbaot hem moa, lav blong yu long hem i kam strong moa. Yu mas folem fasin ya tu sipos yu wantem laekem God tumas.

Long Ol Sam 77:12, tabu speret i pusum wan man blong raetem se: ‘Bambae mi stap tingting dip long olgeta samting ya we yu bin mekem, bambae mi stap tingtinggud long olgeta bigbigfala wok ya blong yu.” I impoten blong tingting dip, sipos yu wantem wokem fasin blong laekem God tumas. Samting ya i tru moa long saed blong God from we yumi no save luk hem. Be taem yu tingbaot hem moa, bambae long tingting blong yu, hem i kam moa olsem wan man we i rili stap. Long rod ya nomo, yu save wokem dip filing blong lav long hem, we i kamaot long hat blong yu​—from we long tingting blong yu, hem i rili stap.

Fasin blong yu blong tingting dip oltaem long ol rod mo wok blong Jeova, bambae i dipen long fasin blong yu blong lesin long hem. Yu lesin long hem taem yu ridim mo stadi oltaem long Tok blong hem, Baebol. Man blong raetem Ol Sam i talem se ol man we oli haremgud, hemia olgeta we ‘oli laekem loa blong Jeova, oli stap ridim loa ya oltaem, oli stap tingting long hem long dei mo long naet.’​—Ol Sam 1:1, 2.

Wan narafala impoten samting, hemia prea. Hemia nao from wanem Baebol i givim advaes long yumi plante taem se yumi mas prea​—“oltaem nomo,” ‘tekem taem blong prea,’ ‘no lego fasin blong prea,’ mo ‘oltaem stap prea.’ (Efesas 6:​18; 1 Korin 7:5; Rom 12:12; 1 Tesalonaeka 5:​17) Fasin blong prea oltaem long Jeova bambae i mekem se yumi frengud wetem hem. Mo taem yumi bilif strong se hem i stap harem prea blong yumi, samting ya bambae i pulum yumi blong kam kolosap long hem. Man blong raetem Ol Sam i agri long samting ya, hem i talem se: “Mi mi laekem Hae God tumas, from we oltaem hem i stap lesin long mi, oltaem hem i stap harem prea blong mi. From we hem i stap lesin long mi olsem, bambae mi mi save singaot long hem oltaem long laef blong mi.”​—Ol Sam 116:​1, 2.

Folem Fasin Blong God Blong Gat Lav

Jeova i mekem i gud tumas long yumi. Hem i Man ya we i wokem heven mo wol. Taswe, i gat plante samting we hem i mas tingbaot mo lukaot long olgeta. Be Baebol i talem long yumi, se nating we Jeova i hae we i hae olsem, hem i stap tingbaot ol man we hem i wokem olgeta. Hem i laekem yumi tumas. (1 Pita 5:​6, 7) Man blong raetem Ol Sam i talem samting ya, hem i se: “Hae God, yu yu Masta blong mifala. Olgeta man long evri ples long wol oli save luk bigfala paoa blong yu. Yu yu king, mo ol man long heven oli stap sing blong leftemap nem blong yu. Taem mi mi luk skae we yu yu mekem, wetem mun mo ol sta we yu yu putum oli stap long prapa ples blong olgeta, mi luk man se hem i nating nomo. I no stret blong yu yu tingbaot hem. I no stret nating blong yu yu lukaotgud long hem.”​—Ol Sam 8:​1, 3, 4.

?Olsem wanem Jeova i tingbaot ol man? Baebol i ansa, i se: “God i gat wan pikinini nomo blong hem, be i sanem hem i kam long wol blong i wokem rod blong yumi, blong yumi kasem laef. Long samting ya nao, God i soemaot fasin blong hem blong laekem yumi. Stampa blong fasin ya i no we yumi laekem God tumas, i we God i laekem yumi tumas, nao i sanem Pikinini blong hem blong i ded blong mekem rod blong God i tekemaot ol sin blong yumi.”​—1 Jon 4:​9, 10.

?Olsem wanem yumi save talem se sakrifaes ya we i tekemaot sin blong yumi i nambawan samting we i soem se God i laekem yumi? I gud yumi tingbaot samting we i hapen long garen blong Iden. Adam mo Iv, tufala i mas mekem wan disisen. ?Bambae tufala i obei long loa blong Jeova mo laef foreva wetem bodi we i stretgud? no ?Bambae tufala i rebel agens long Jeova mo kasem ded from? Tufala i jusum blong rebel. (Jenesis 3:​1-6) Olsem nao, tufala i mekem se ded i kasem olgeta man. (Rom 5:​12) Flas fasin blong tufala i mekem se yumi no gat jans blong jusum rod blong yumi. Oli mekem se, i no gat wan long yumi we i save mekem prapa disisen blong hem long bisnes ya.

Be, Jeova i laekem ol man tumas, taswe hem i gohed blong tingbaot olgeta, mo hem i luk ol trabol blong olgeta. Tru long ded blong Pikinini blong Hem, Jisas Kraes, Jeova i stanemap wan rod, we i laenap wetem stret fasin blong hem. Samting ya i givim jans long yumi wanwan blong jusum laef no ded, blong obei no blong rebel. (Jon 3:​16) I olsem we Jeova i givim jans long yumi blong mekem prapa disisen blong yumi, we hem i save jajem yumi from. I olsem we yumi gat jans blong gobak long Iden, mo jusum prapa rod blong yumi. Lav ya i bigwan moa, i bitim ol narafala lav we olgeta man oli bin soem.

Tingbaot olsem wanem Jeova i harem nogud tumas, taem hem i stap lukluk ol man we oli tok nogud long fasbon pikinini blong hem, oli mekem hem i soa tumas long bodi blong hem, mo oli nilim hem long wan wud olsem wan man blong brekem loa. Mo God i harem nogud olsem, blong givhan long yumi. Jeova i laekem yumi fastaem. Taem yumi kasem save long samting ya, yumi mas harem se yumi laekem Hem tumas mo se yumi wantem faenem hem. (Jemes 1:​17; 1 Jon 4:​19) Baebol i singaot yumi blong ‘lukaot Jeova mo paoa blong hem. Yumi mas lukaot hem oltaem. Tingbaot ol nambawan wok we hem i bin mekem, ol merikel blong hem mo ol loa blong hem.’​—Ol Sam 105:​4, 5.

Blong fasgud long God, blong laekem hem, mo blong kam olsem fren blong hem, i no wan drim. Yumi save mekem samting ya. I tru, yumi no save talem se lav we yumi gat long God i sem mak long fasin fren we yumi gat wetem ol man. Lav we yumi gat long hasban no waef, papa mama, brata sista, ol pikinini, mo ol fren blong yumi, i defren long lav we yumi gat long God. (Matyu 10:37; 19:29) Blong laekem Jeova tumas, yumi mas onagud long hem, wosip long hem, mo givim ful laef blong yumi long hem. (Dutronome 4:​24) Yumi no stap givim ona mo wosip long ol man we yumi frengud wetem olgeta. Be, wetem fasin ona, mo fasin blong fraetgud long God, yumi save wokem ol filing blong lav long Hem, we oli dip mo oli strong.​—Ol Sam 89:7.

Nating se yu yu no stretgud olgeta, olsem Ken mo Ebel, yu yu naf blong laekem tumas Man ya we i wokem yu. Ken i jusum rod blong hem, hem i joen wetem Setan, mo i kam faswan man we i kilim narafala i ded. (1 Jon 3:​12) Be Ebel i defren. Jeova i stap tingbaot Ebel olsem wan man blong bilif mo stret fasin mo bambae i blesem hem, i mekem hem i laef long Paradaes we i kolosap.​—Hibrus 11:4.

Yu tu, yu save jusum rod blong yu. Wetem help blong tabu speret mo Tok blong God, yu rili save laekem God “long olgeta hat blong yu mo long olgeta laef blong yu mo long olgeta paoa blong yu.” (Dutronome 6:5) From samting ya, bambae Jeova i gohed blong laekem yu, from we hem i “stap mekem i gud long olgeta we oli stap traem faenem hem.”​—Hibrus 11:6.

[Tok Blong Pija Long Pej 7]

God i agri long sakrifaes we Ebel i givim