Tok Blong God i Wokem Ol “Merikel”

THÉRÈSE HÉON I TALEM STORE YA

Wan dei long 1965, mi go insaed long wan bisnes ofis mo mi soemaot Wajtaoa mo Wekap! long ol man we oli wok long ples ya. Taem mi tanraon blong goaot bakegen, mi harem wan noes olsem masket i faerap. Wan bolet i kilim graon kolosap long leg blong mi. Wan long ol bisnesman ya i talem se: “Hemia nao fasin blong mekem long ol Wetnes blong Jeova.”

Samting ya i mekem mi mi fraet​—be hem i no naf blong mekem mi mi lego fultaem wok blong prij. Ol trutok blong Baebol we mi bin lanem oli sas tumas, mi no save letem wan samting i blokem mi long wok blong prij. I gud mi eksplenem from wanem mi talem tok olsem.

Afta we mi mi bon long Julae 1918, papa mama blong mi oli kam stap long Kap-de-la-Madlin, wan smol velej long Kebek, Kanada, we plante man oli kolem Ples blong Ol Merikel. Plante man oli stap kam long ples ya blong ona long tabu pija blong Vegin Meri. I no gat pruf blong soemaot se Meri i rili bin mekem sam merikel. Be Tok blong God i mekem samting olsem merikel blong jenisim laef blong plante man long velej ya, we naoia i gru i kam wan taon we i gat bitim 30,000 man long hem.

Taem mi gat raonabaot 20 yia, papa blong mi i luk se mi mi intres long ol samting long saed blong jyos, ale hem i givim Baebol blong hem long mi. Taem mi stat blong ridim, mi sapraes blong faenem long Eksodas japta 20 se God i agensem fasin blong wosip long ol aedol. Wantaem nomo, mi no moa trastem ol tijing blong Katolik Jyos, mo mi no moa go long Lames. Mi no wantem wosip long ol aedol. Mi save rimemba tok blong Papa yet, taem hem i askem se: “Thérèse, ?bambae yu go long jyos tede?” Mi ansa se: “No, mi stap ridim Baebol.”

Mi mared long Septemba, 1938. Mo afta long taem ya tu, mi gohed blong ridim Baebol oltaem. Plante taem, hasban blong mi, Rosaire, i mas wok long naet. Taswe, mi ridim Baebol taem hem i stap long wok. I no longtaem, mi luksave se i mas gat wan grup blong man we God i stap yusum, mo mi stat blong traem faenem olgeta.

Mi Traehad Blong Faenem Ol Man Blong God

From samting we mi bin lanem long jyos, taem mi mi smol, mi fraet blong go slip, from we mi no wantem se taem mi wekap, mi stap long helfaea. Blong faet agensem fraet ya, mi stap talem long mi wan se God we i gat lav, bambae i no save letem wan nogud samting olsem i kamaot. Wetem strong tingting, mi gohed blong ridim Baebol, mo blong traem faenem trutok. Mi mi olsem man Itiopia ya we i stap ridim Baebol be i no kasem save long hem.​—Ol Wok 8:​26-​39.

Brata blong mi, André, mo woman blong hem, tufala i stap long wan rum we i stap daon long mifala long wan store haos. Tufala i stat blong stadi Baebol wetem ol Wetnes blong Jeova raonabaot long 1957. Mi talem long woman blong brata blong mi se, taem ol Wetnes oli kam prij long store haos ya, hem i mas kilkilim ruf blong haos blong tufala, blong bambae mi harem antap nao mi save se ol Wetnes oli stap kam. Mo bambae mi no openem doa taem oli noknok. Be, wan dei, hem i fogetem blong kilkilim ruf, blong talemaot samting ya long mi.

Ale, mi openem doa mo mi mitim Kay Munday, wan paenia, hemia ol Wetnes blong Jeova we oli prij fultaem. Hem i storeyan wetem mi long saed blong nem blong God. Hem i eksplenem se God i gat wan prapa nem blong hem, Jeova. Afta we hem i go, mi jekem Baebol blong mi blong luk sipos samting we hem i talem i stret wetem Baebol. Ol samting we mi faenem long taem ya oli mekem mi mi glad tumas.​—Eksodas 6:3, Douay Version, futnot; Matyu 6:​9, 10; Jon 17:6.

Taem Kay i kambak bakegen, mitufala i tokbaot tijing blong Katolik long saed blong Triniti, we oli talem se God i olsem tri man insaed long wan God nomo. Biaen, mi luklukgud long Baebol blong mi blong pruvum sipos i tru se i no gat wan Triniti. (Ol Wok 17:11) Stadi we mi mekem i soemaot klia se Jisas i no sem mak olsem God, be God i hae moa. I gat wan Man we i wokem Jisas. Jisas i gat wan stat, be Jeova i no gat. (Ol Sam 90:​1, 2; Jon 14:28; Kolosi 1:​15-​17; Revelesen 3:​14) From we mi glad long ol samting we mi stap lanem, mi gohed blong storeyan long saed blong Baebol evritaem wetem sista ya.

Wan dei long 1958, long manis Novemba taem bigfala sno i stap foldaon, Kay i askem mi blong kam long wan seket asembli we bambae oli mekem long sem naet ya long wan bigfala haos we oli rentem. Mi agri blong go, mo mi laekem tumas ol samting we mi harem long naet ya. Afta we asembli i finis, mi storeyan wetem wan Wetnes we i kam sekhan long mi. Mi askem long hem se: “?Wan trufala Kristin i mas go prij long ol haos wanwan?”

Hem i talem se: “Yes, oli mas talemaot gud nyus long olgeta man, mo Baebol i soemaot se fasin blong go luk ol man long prapa haos blong olgeta, i wan impoten rod blong prij.”​—Ol Wok 20:20.

!Mi glad tumas long ansa ya we hem i givim! Samting ya i mekem mi mi sua se mi faenem ol trufala man blong God. Sipos hem i bin talem long mi se: “No gat, i no nid blong prij,” bambae mi mi no save bilif fulwan se olgeta nao oli gat trutok, from we mi mi save wanem we Baebol i talem long saed blong wok blong prij long ol haos wanwan. Stat long taem ya, mi gohed kwiktaem long saed blong speret.

Afta long seket asembli ya, mi stat blong joen long olgeta miting blong ol Wetnes blong Jeova we oli stap long wan taon kolosap, nem blong hem Trois-Rivières. Kay mo fren blong hem, Florence Bowman, tufala nomo oli Wetnes long Kap-de-la-Madlin. Wan dei, mi talem long tufala se: “Bambae mi mi kam prij wetem yutufala tumora.” Tufala i glad we mi mi go wetem tufala.

Prij Long Velej Blong Mi

Mi mi ting se olgeta man bambae oli laekem mesej blong Baebol, be kwiktaem nomo mi luk se hemia i no tru. Taem Kay mo Florence tufala i muf i go long wan narafala ples blong prij, mi wan nomo mi stap talemaot ol trutok blong Baebol long ol wanwan haos blong taon ya. Wetem fasin no fraet, mi gohed blong prij mi wan blong tu yia, kasem taem we mi baptaes long Jun 8, 1963. Long sem dei ya, mi fulumap pepa blong kam wan haftaem paenia.

Mi gohed long wok blong haftaem paenia blong wan yia. Nao, Delvina Saint-Laurent i promes se bambae hem i kam long Kap-de-la-Madlin wan taem long wan wik blong wok wetem mi, sipos mi mi joen long wok blong fultaem paenia. Ale, mi fulumap pepa blong kam fultaem paenia. Be sore tumas, jes tu wik bifo we mi statem fultaem wok blong paenia, Delvina i ded. ?Bambae mi mekem wanem nao? From we mi mi fulumap pepa finis, mi no wantem jenisim plan blong mi. Taswe, long Oktoba 1964, mi statem wok blong mi olsem fultaem paenia. Long ol nekis fo yia, mi prij mi wan nomo long olgeta haos wanwan.

Ol man long Kap-de-la-Madlin, we oli strong Katolik, plante taem oli kros long mi. Samfala oli singaotem polis i kam blong traem blokem mi blong prij. Olsem mi talem long stat blong store ya, wan bisnes man i traem mekem mi mi fraet taem i sutum bolet kolosap long leg blong mi. Samting ya i mekem bigfala toktok i goraon long taon. Long televisin, oli kolem samting ya wan krused agensem ol Wetnes blong Jeova. Ol toktok ya i mekem se ol man blong taon oli kasem wan gudfala wetnes. Mo, ten yia biaen, wan famle blong bisnes man ya we i sutum bolet long mi, i kam wan Wetnes.

“Ol Merikel” We Tok Blong God i Mekem

Long olgeta yia we oli pas, mi luk se fasin blong ol man long Kap-de-la-Madlin blong agensem trutok blong Baebol, i godaon sloslou. Raonabaot long 1968, sam narafala Wetnes oli muf i kam long ples ya, nao ol man long taon ya oli stat blong lesin long ol trutok blong Baebol. Long ol yia biaen long 1970, namba blong ol man we oli mekem Baebol stadi, i kam antap bitim mak. Hem i kasem wan mak we mi mas askem sam narafala Wetnes blong karem sam long ol Baebol stadi we mi mi stap mekem, blong givim jans long mi blong spenem smoltaem long wok blong prij long ol haos wanwan.

Wan dei, mi soemaot buk ya we i eksplenem Baebol, Trutok Blong Soemaot Rod Blong Itenel Laef, long wan yangfala woman, ale hem i karem. Long taem ya, hem i stap fren wetem wan yangfala man we nem blong hem André. Hem i wan man blong brekem loa we lukluk blong hem i olbaot mo i raf. Be man ya i joen long storeyan blong mitufala. André i soemaot intres, nao hem i stat blong stadi Baebol. Smoltaem biaen, hem i stat storeyan wetem ol fren blong hem long olgeta samting we hem i stap lanem.

Wan taem, mi stadi Baebol wetem fo stronghed man blong brekem loa. Wan long olgeta ya i no talem plante samting, be hem i lesingud. Nem blong hem Pierre. Wan moning raonabaot long tu klok, mi mo hasban blong mi, mitufala i sapraes blong harem wan man i kilkilim doa. Tingbaot samting ya: Fo stronghed man ya blong brekem loa oli stap stanap afsaed, mo oli wantem askem sam kwestin long mi. I gud we, Rosaire i neva tok kros long mi from ol visit olsem, we oli save kamaot enitaem nomo.

Ale, ol fofala man ya evriwan oli kam long ol miting. Be biaen, André mo Pierre nomo oli gohed. Tufala i stretem laef blong tufala blong mekem i laenap wetem ol rul blong God, mo tufala i tekem baptaes. Naoia, bitim 20 yia i pas finis, be tufala man ya oli gohed strong yet long wok blong Jeova. Taem oli stat stadi, olgeta man oli savegud tufala from ol fasin blong brekem loa we oli stap mekem, mo polis i stap wajem tufala oltaem. Sam samtaem, ol polis oli kam lukaot tufala afta we mifala i jes finisim wan Baebol stadi tugeta, no long taem blong miting blong kongregesen.a Mi mi glad se mi bin prij long ‘olkaen man,’ mo from samting ya, mi luksave klia olsem wanem Tok blong God i save jenisim man olsem wan merikel nomo.​—1 Timote 2:4.

Sipos oli bin talem long mi taem mi jes stat blong prij, se wan dei bambae i gat wan Haos Kingdom long Kap-de-la-Madlin, mo se bambae hem i fulap wetem ol man blong Jeova, mi mi no save bilivim samting ya. Be, mi glad tumas blong luk se smol kongregesen we i stap long taon kolosap, hemia Trois-Rivières, i gru gogo i kam sikis bigfala kongregesen naoia, we oli mekem miting long tri Haos Kingdom. Wan long olgeta kongregesen ya i stap long Kap-de-la-Madlin.

Mi wan mi bin kasem bigfala glad, from we mi bin halpem samwe long 30 man blong kam naf blong givim laef blong olgeta long Jeova mo tekem baptaes. Naoia, mi gat 78 yia, mo mi save talem tru se mi glad we mi givim laef blong mi i go long Jeova. Be, mi mas talem tu se i gat sam taem long laef blong mi we tingting blong mi i foldaon. Blong winim ol taem ya we mi harem nogud, mi openem Baebol blong mi mo mi ridim sam vas we oli mekem mi mi haremgud bakegen. Mi no save letem wan dei nating i pas we mi no ridim Tok blong God. Wan vas we i rili leftemap tingting blong mi, hemia Jon 15:​7, we i talem se: “Sipos laef blong yufala i joen long laef blong mi, mo ol tok blong mi oli stap oltaem long yufala, wanem samting we yufala i wantem, be yufala i save askem, nao bambae yufala i kasem.”

Hop blong mi, hemia blong luk Rosaire bakegen long nyufala wol we i kolosap nao. (2 Pita 3:​13; Revelesen 21:​3, 4) Smoltaem bifo we hem i ded long 1975, hem i stap gohed gud mo kolosap hem i tekem baptaes. Be, naoia, long taem we i stap bifo we nyufala wol ya i kamtru, mi gat strong tingting blong gohed long fultaem wok blong prij mo haremgud long wok blong Jeova.

[Futnot]