Holemtaet Fasin Joengud Long Ol Lasdei Ya
“Yufala i mas mekem we fasin blong laef blong yufala evri dei, i stret gud long mak blong gud nyus blong Kraes . . . , yufala i gat wan tingting nomo, yufala i stap stanap strong, nao yufala i stap wok olsem wan tim nomo, blong traehad blong mekem ol man oli bilif long gud nyus.”—FILIPAE 1:27.
1. ?Olsem wanem ol Wetnes blong Jeova oli defren long ol man blong wol ya?
HEMIA ol ‘lasdei’ ya. I klia se, ‘laef long wol ya i kam strong tumas.’ (2 Timote 3:1-5) Long ‘taem ya blong en,’ we laef blong ol man i olbaot nomo, ol Wetnes blong Jeova oli defren olgeta from we oli gat pis mo oli joengud. (Daniel 12:4) Be ol wanwan memba blong bigfala famle ya blong ol man we oli wosip long Jeova long fulwol, oli mas wok strong blong holemtaet fasin joengud ya.
2. ?Pol i talem wanem long saed blong fasin joengud we yumi mas holemtaet, mo bambae yumi faenem ansa blong wanem kwestin?
2 Aposol Pol i talem long ol Kristin brata blong hem se oli mas holemtaet fasin joengud. Hem i raetem se: “Yufala i mas mekem we fasin blong laef blong yufala evri dei, i stret gud long mak blong gud nyus blong Kraes. Long fasin ya, sipos mi kam long yufala blong luk yufala long ae blong mi, no mi stap longwe yet long yufala, mi harem nyus nomo blong yufala, be bambae i sem mak nomo. Bambae mi save harem we yufala i gat wan tingting nomo, yufala i stap stanap strong, nao yufala i stap wok olsem wan tim nomo, blong traehad blong mekem ol man oli bilif long gud nyus. Mo mi save harem we yufala i no seksek nating long ol enemi blong yufala, tingting blong yufala i stap strong. Fasin ya i olsem wan saen we God i soem long ol enemi ya blong yufala, se olgeta bambae oli mas lus, be hem bambae i sevem yufala.” (Filipae 1:27, 28) Ol tok ya blong Pol oli soemaot klia se yumi ol Kristin, yumi mas joengud long wok blong yumi. Ale, ?wanem samting i save halpem yumi blong holemtaet Kristin fasin joengud long taem ya we laef i strong tumas?
Obei Long Samting We God i Wantem
3. ?Wetaem mo olsem wanem ol faswan hiten man we oli no sakomsaes, oli kam ol man blong Kraes?
3 Wan rod blong holemtaet fasin joengud, hemia blong obei oltaem long samting we God i wantem. Blong mekem samting ya, maet yumi nidim blong stretem tingting blong yumi. Tingbaot ol faswan man Jyu we oli kam disaepol blong Jisas Kraes. Taem aposol Pita i go prij fastaem long ol hiten man we oli no sakomsaes long 36 K.T., God i givim tabu speret long ol hiten man ya mo oli tekem baptaes. (Ol Wok japta 10) Kam kasem taem ya, ol man Jyu, ol man blong narafala kantri we oli joen long skul blong ol man Jyu, mo ol man Sameria, olgeta ya nomo oli kam ol man blong Jisas Kraes.—Ol Wok 8:4-8, 26-38.
4. ?Pita i talem wanem afta we hem i eksplenem samting we i kamaot long Konilyas, mo wanem samting i traem ol disaepol blong Jisas we oli man Jyu?
4 Taem ol aposol mo ol narafala brata long Jerusalem oli harem nyus se Konilyas mo sam narafala hiten man oli kam Kristin, oli wantem tumas blong harem ripot blong Pita. Afta we aposol Pita i eksplenem samting we i hapen long Konilyas mo long sam narafala hiten man we oli bilif, hem i talem se: “Nao i klia gud we God i givim sem presen nomo [tabu speret] long ol hiten man ya [ol man ya blong narafala kantri we oli bilif], we i givim finis long yumi [ol man Jyu], long taem ya we yumi bilif long Jisas Kraes, Masta blong yumi. ?Nao olsem wanem mi mi save girap, mi traem blokem God?” (Ol Wok 11:1-17) Samting ya i olsem wan traem long ol man Jyu we oli folem Jisas Kraes. ?Bambae oli obei long samting we God i wantem, mo agri se ol hiten man we oli bilif, oli brata mo sista blong olgeta? no ?Bambae samting ya i spolem fasin joengud blong ol man blong Jeova long wol?
5. ?Ol aposol mo ol narafala brata oli gat wanem tingting taem oli harem se God i rere blong fogivim ol hiten man we oli tanem tingting blong olgeta from sin blong olgeta, mo yumi save lanem wanem from fasin ya blong olgeta?
5 Baebol i talem se: “Nao taem olgeta [ol aposol mo ol narafala brata] oli harem tok ya blong Pita, oli no moa tok nogud long hem bakegen, oli stap leftemap nem blong God. Oli talem se ‘Samting ya i min se God i mekem rod finis blong ol hiten man tu oli save tanem tingting blong olgeta from ol sin blong olgeta, blong oli kasem laef.’” (Ol Wok 11:18) Tingting ya i halpem ol man blong Jisas blong holemtaet mo leftemap fasin joengud. Long smoltaem nomo, wok blong prij i kasem plante moa hiten man, no man blong ol narafala kantri, mo Jeova i blesem wok ya. Yumi tu yumi mas rere blong mekem eni samting we oli askem long yumi blong mekem, blong givhan blong statem wan nyufala kongregesen, no blong mekem sam tiokratik jenis taem tabu speret blong God i lidim ol man blong hem blong mekem. Sipos yumi wok tugeta wetem fulhat blong yumi, bambae yumi mekem Jeova i glad, mo bambae yumi holemtaet fasin joengud long ol lasdei ya.
Holemstrong Long Trutok
6. ?Olsem wanem trutok i mekem se ol man we oli wosip long Jeova oli joengud?
6 Yumi we yumi haf blong famle blong ol man we oli wosipim Jeova, yumi joengud from we ‘Jeova i tijim’ yumi, mo yumi holemstrong long ol trutok we hem i mekem i kam klia moa. (Jon 6:45; Ol Sam 43:3) From we ol tijing blong yumi oli stanap long Tok blong God, yumi evriwan i talemaot sem toktok. Yumi glad blong kasem kakae long saed blong speret we Jeova i stap givim tru long ‘slef we i stret mo waes.’ (Matyu 24:45-47) From we yumi evriwan i kasem semkaen tijing nomo, samting ya i givhan long yumi blong holemtaet fasin joengud long olgeta ples blong wol.
7. ?Sipos yumi wanwan i faenem i had blong kasem save long wan tijing, yumi mas mekem wanem, mo wanem samting i no stret blong mekem?
7 ?Olsem wanem sipos yumi wanwan i faenem i had blong kasem save no blong agri long wan tijing? Yumi mas prea long God blong i givim waes long yumi, mo stadi dip long Baebol mo ol narafala Kristin buk. (Proveb 2:4, 5; Jemes 1:5-8) Sipos yumi storeyan wetem wan elda, samting ya i save givhan tu. Be, sipos yumi no klia yet long poen ya, i moa gud yumi livim i stap fastaem. Maet biaen i gat sam buk we oli prentem blong eksplenem poen ya, nao bambae yumi kasem moa save long saed ya. Be, i nogud we yumi traem pusum sam narafala long kongregesen blong agri wetem tingting blong yumi we i defren. Long fasin ya, yumi stap mekem ol narafala oli gat ol defdefren tingting, mo yumi no stap traehad blong holemtaet fasin joengud. !I moa gud sipos yumi “folem trutok oltaem” long laef blong yumi, mo pulum ol narafala blong mekem sem mak!—3 Jon 4.
8. ?Wanem stret tingting we yumi mas gat long saed blong trutok?
8 Long faswan handred yia, Pol i talem se: “Naoia yumi save luk fasin blong God, olsem we yumi stap luk long wan glas we i no klia gud. Be taem we ol samting ya bambae oli kamtru, bambae yumi save luk hem stret long fes blong yumi. Naoia save blong mi i hafhaf nomo. Be long taem ya, bambae mi savegud olgeta samting, olsem we God i savegud olgeta fasin blong mi finis.” (1 Korin 13:12) Nating se ol faswan Kristin oli no kasem save long plante samting, oli holemtaet fasin joengud. Tede, save blong yumi long saed blong stampa tingting blong Jeova mo trutok blong Baebol, i klia moa. Taswe, yumi mas gat tangkyu from trutok we yumi stap kasem tru long ‘slef we i stret mo waes.’ Mo yumi mas gat tangkyu long Jeova from we hem i stap lidim yumi tru long ogenaesesen blong hem. Nating se maet bifo yumi no gat plante save, be yumi neva hanggri no tosta long saed blong speret. Yes, Man blong Lukaot long ol Sipsip blong hem, Jeova, i stap mekem yumi joengud mo i stap lukaotgud long yumi.—Ol Sam 23:1-3.
!Yusum Tang Blong Yumi Long Stret Rod!
9. ?Olsem wanem yumi save yusum tang blong yumi blong mekem fasin joengud i kam strong moa?
9 Taem yumi yusum tang blong yumi blong leftemap tingting blong ol narafala, hemia wan nambawan rod blong mekem fasin joengud i kam strong moa, mo blong pulum yumi evriwan blong joen olsem ol brata nomo. Leta we hed kampani blong faswan handred yia i sanemaot blong stretem bisnes long saed blong sakomsaes, hem i leftemap tingting blong ol brata. Afta we ol disaepol long Antiok we bifo oli hiten man, oli ridim leta ya, “oli haremgud, from we tok blong hem i leftemap tingting blong olgeta.” Judas mo Saelas, we tufala i aot long Jerusalem blong karem leta ya i go, “tufala i stap leftemap tingting blong [ol brata], mo tufala i stap mekem olgeta oli strong.” I sua se, from we Pol mo Banabas oli stap long taem ya, samting ya tu i leftemap tingting blong ol man blong bilif long Antiok mo i mekem olgeta oli strong. (Ol Wok 15:1-3, 23-32) Yumi save mekem sem mak taem yumi kam wanples long ol Kristin miting. Yumi save ‘mekem tingting blong narafala i kam strong moa’ tru long fasin blong yumi blong go long ol miting, mo tru long ol gudfala ansa we yumi givim.—Hibrus 10:24, 25.
10. ?Blong holemtaet fasin joengud, maet kongregesen i mas mekem wanem sipos wan brata i gohed blong tok nogud long wan narafala brata?
10 Be, sipos yumi yusum tang blong yumi long rod we i no stret, samting ya i save spolem fasin joengud. Disaepol Jemes i raetem se: “Tang blong yumi i wan smol samting nomo, be hem i save tok flas long plante bigbigfala samting. Yufala i traem tingbaot. Wan smol faea nomo, be i save bonem ol haos long wan bigfala velej we i finisim olgeta.” (Jemes 3:5) Jeova i no laekem nating olgeta we oli raorao oltaem. (Proveb 6:16-19) Ol tok olsem oli save mekem ol man oli seraot. Be, ?olsem wanem sipos i gat tok i kamaot agensem narafala, maet wan brata i daonem no i tok nogud long wan narafala brata? Bambae ol elda oli traem halpem brata ya we i mekem i no stret. Be, sipos brata ya i gohed long fasin ya, mo i no wantem tanem tingting blong hem from sin we hem i mekem, oli mas putumaot hem long kongregesen, blong mekem se pis, oda, mo fasin joengud oli stap insaed long kongregesen. Yes, Pol i raetem se: “Yufala i mas no go joen wetem ol man ya we oli stap talem se oli brata blong yumi, be . . . oli stap spolem nem blong narafala man . . . . Bambae yufala i no go sidaon wetem ol man olsem blong kakae wetem olgeta.”—1 Korin 5:11.
11. ?From wanem tingting daon i impoten sipos yumi bin talem wan samting we i mekem narafala brata i kros long yumi?
11 Sipos yumi bos long tang blong yumi, samting ya bambae i halpem yumi blong holemtaet fasin joengud. (Jemes 3:10-18) Be, ?olsem wanem sipos wan samting we yumi talem i mekem wan narafala Kristin i harem nogud long yumi? I stret blong traem mekem pis wetem brata ya blong yumi, mo talem sore long hem sipos i nidim blong mekem olsem. (Matyu 5:23, 24) I tru, yumi mas gat tingting daon blong mekem olsem, yumi no save gat flas tingting. Taswe Pita i raetem se: “Yufala i mas mekem tingting blong yufala i stap daon. Nao long fasin ya yufala i save givhan gud long yufala. Baebol i talem se ‘God i agensem olgeta we oli flas, be i stap givhan long gladhat blong hem, long olgeta we tingting blong olgeta i stap daon.’” (1 Pita 5:5) Tingting daon bambae i pusum yumi blong ‘traehad blong kasem pis’ wetem ol brata blong yumi. Mo, bambae hem i mekem se yumi talemaot we yumi mekem mastik mo yumi talem sore from. Samting ya i save givhan blong holemtaet fasin joengud insaed long famle blong Jeova.—1 Pita 3:10, 11.
12. ?Olsem wanem yumi save yusum tang blong yumi blong leftemap mo holemtaet fasin joengud blong ol man blong Jeova?
12 Sipos yumi yusum tang blong yumi long stret rod, bambae yumi givhan blong mekem ol brata insaed long ogenaesesen blong Jeova oli joen olsem wan famle nomo. Hemia nao samting we Pol i mekem, taswe hem i save talem long ol man Tesalonaeka, se: “Yufala i save gud we mifala i mekem long yufala evriwan, stret olsem wan papa we i stap lukaot long ol pikinini blong hem. Mifala i stap leftemap tingting blong yufala, mifala i stap mekem yufala i harem gud. Mifala i stap tok strong long yufala blong mekem yufala i kam holem ol fasin we oli stret long fes blong God.” (1 Tesalonaeka 2:11, 12) Pol i soemaot wan gudfala eksampel long saed ya, taswe hem i save pusum ol narafala Kristin blong ‘toktok gud, blong leftemap tingting blong olgeta we oli harem nogud mo we tingting blong olgeta i foldaon.’ (1 Tesalonaeka 5:14) Tingbaot olsem wanem yumi save mekem i gud long narafala, taem yumi yusum tang blong yumi blong soem sore, leftemap tingting, mo mekem narafala i strong bakegen. !Yes, “wan tok long stret taem blong hem, i gud tumas!” (Proveb 15:23) Antap moa, olkaen toktok olsem oli givhan blong mekem ol man blong Jeova oli joengud mo blong holemtaet fasin joengud ya.
!Fogivim Narafala!
13. ?From wanem yumi mas fogivim narafala?
13 Sipos narafala we i mekem nogud long yumi i kam nao i talem sore from samting we hem i mekem, i impoten we yumi fogivim hem. Long rod ya nomo, yumi save holemtaet Kristin fasin joengud. ?Hamas taem yumi mas fogivim narafala? Jisas i talem long Pita se: ‘Mi mi no save talem se seven taem nomo. Yu save mekem sevente-seven taem we yu stap fogivim hem.’ (Matyu 18:22) Sipos yumi no fogivim narafala, samting ya i no save givhan long yumi nating. ?Olsem wanem? Sipos yumi holem kros blong yumi mo yumi gohed blong tingting nogud long narafala, samting ya bambae i spolem pis long tingting blong yumi. Mo sipos ol man oli luk se yumi gat strong fasin mo yumi no stap fogivim narafala, maet bambae i no moa gat man we i wantem joen wetem yumi. (Proveb 11:17) God i no laekem fasin ya we yumi stap kros longtaem agensem narafala, mo tingting olsem i save pusum yumi blong mekem wan bigfala sin. (Levitikas 19:18) Rimemba se rabis woman ya Herodias i wokem plan ya blong katemaot hed blong Jon Baptaes, from we hem i “stap kros long Jon.”—Mak 6:19-28.
14. (a) ?Matyu 6:14, 15 i tijim yumi long wanem samting long saed blong fasin fogif? (b) ?Yumi mas wet se narafala i talem sore long yumi nao yumi jes fogivim hem, no olsem wanem?
14 Long prea we Jisas i tijim long ol disaepol blong hem, hem i talem se: “Yu fogivim mifala from ol sin blong mifala, from we mifala i stap fogivim ol man we oli mekem i nogud long mifala.” (Luk 11:4) Sipos yumi no fogivim narafala, yumi stap long denja, from we wan dei, maet Jeova God i no moa fogivim ol sin blong yumi. Jisas i talem se: “Sipos yufala i stap fogivim ol man we oli stap mekem i nogud long yufala, Papa blong yufala long heven bambae i fogivim yufala tu. Be sipos yufala i no fogivim ol man we oli mekem i nogud long yufala, bambae Papa blong yufala i no save fogivim yufala from ol sin blong yufala.” (Matyu 6:14, 15) Taswe sipos yumi rili wantem givhan blong holemtaet fasin joengud insaed long famle blong ol man we oli wosip long Jeova, yumi mas fogivim narafala. Maet i moagud blong fogetem nomo samting we narafala i mekem long yumi. Maet hem i mekem samting ya from we hem i no tingtinggud fastaem, no maet hem i no minim blong spolem yumi. Pol i talem se: “Yufala i mas stap givgivhan long yufala, mo taem wan long yufala i gat sam poen agens long narawan long yufala, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yufala.” (Kolosi 3:13) Taem yumi fogivim narafala, yumi stap givhan blong holemtaet fasin joengud insaed long ogenaesesen blong Jeova.
Fasin Joengud Mo Ol Prapa Disisen Blong Yumi
15. ?Wanem i halpem ol man blong Jeova blong holemtaet fasin joengud taem oli mekem ol prapa disisen blong olgeta?
15 God i mekem yumi we yumi fri blong jusum rod we yumi wantem folem. Yes, hem i givim jans mo wok long yumi blong mekem ol prapa disisen blong yumi. (Dutronome 30:19, 20; Galesia 6:5) Nating se i olsem, yumi save holemtaet fasin joengud wetem ol narafala yet. Hemia from we yumi folem ol loa mo rul blong Baebol. Yumi tingting long ol loa ya taem yumi mekem ol prapa disisen blong yumi. (Ol Wok 5:29; 1 Jon 5:3) Tingbaot sipos yumi mas mekem disisen blong joen long faet no blong no joen long faet. Yumi wanwan i save mekem wan gudfala disisen taem yumi tingbaot se yumi “no man blong wol ya,” mo se yumi ‘tanem ol naef blong faet finis oli kam tul blong wokem garen.’ (Jon 17:16; Aesea 2:2-4) Sem mak, taem yumi mas mekem prapa disisen blong yumi long fasin we yumi mas soemaot long gavman, yumi tingbaot tok blong Baebol se, ‘samting we i blong God yumi mas givimbak long God.’ Be, yumi obei long “gavman” long ol narafala samting. (Luk 20:25; Rom 13:1-7, NW; Taetas 3:1, 2) Yes, taem yumi mekem se ol prapa disisen blong yumi oli stanap long ol loa mo rul blong Baebol, yumi givhan blong holemtaet Kristin fasin joengud.
16. ?Olsem wanem yumi save holemtaet fasin joengud taem yumi mekem sam disisen we Baebol i no talem klia wanem i stret mo wanem i no stret blong mekem? Givim wan eksampel.
16 Yumi save givhan blong holemtaet Kristin fasin joengud taem yumi mekem wan disisen we hem i blong yumi nomo, nating se i no gat wan loa no rul long Baebol we i talem wanem i stret mo wanem i no stret long bisnes ya. ?Olsem wanem yumi save mekem olsem? Taem yumi mekem wan disisen, yumi mas soem lav mo tingbaot ol narafala we maet disisen blong yumi i save spolem olgeta. Tingbaot wan eksampel: Long kongregesen blong Korin bifo, wan kwestin i stanap long saed blong fasin blong kakae mit we man i yusum long wosip blong ol aedol. I tru, wan Kristin i no save joen long wan lafet we i go long wan gyaman god. Be, i no rong blong kakae haf mit we i stap afta long wan lafet olsem, we man i salem long maket, sipos mit ya i no gat blad i stap long hem. (Ol Wok 15:28, 29; 1 Korin 10:25) Be, tingting blong sam Kristin i trabol from bisnes ya blong kakae mit olsem. Taswe Pol i askem long ol narafala Kristin blong no folem fasin ya we i save mekem samfala oli foldaon. Yes, hem i raetem se: “Sipos mit i save spolem brata no sista blong mi, bambae mi mi no moa save kakae mit bakegen samtaem. Mi no wantem nating blong mekem wan samting we i save spolem wan narafala Kristin, nao bambae hem i foldaon long sin.” (1 Korin 8:13) Taswe, nating se i no gat wan loa no rul blong Baebol we i talemaot stret evri samting we yumi mas mekem, be yumi mas soem lav mo tingbaot ol narafala taem yumi mekem ol prapa disisen blong yumi. !Long rod ya, yumi holemtaet fasin joengud we i stap long famle blong God!
17. ?I gud blong mekem wanem taem yumi mekem ol prapa disisen blong yumi?
17 Sipos yumi no save stret wanem rod blong folem, i waes blong jusum rod we tingting blong yumi i no save stikim yumi from. Mo ol narafala oli mas respektem disisen blong yumi. (Rom 14:10-12) Yes, taem yumi mas mekem wan prapa disisen blong yumi, yumi mas prea long Jeova blong askem hem blong lidim yumi. Olsem man blong raetem Sam, yumi save prea wetem strong tingting se: “Yu harem mi. . . . Yu nao yu sefples blong mi, yu nomo yu strong ples blong mi blong haed. Plis yu go fastaem, yu lidim mi, olsem we yu yu bin promes.”—Ol Sam 31:2, 3.
Holemtaet Kristin Fasin Joengud Oltaem
18. ?Pol i yusum wanem pijatok blong eksplenem fasin joengud insaed long Kristin kongregesen?
18 Long 1 Korin japta 12, Pol i yusum pijatok long saed blong bodi blong man, blong eksplenem fasin joengud insaed long Kristin kongregesen. Hem i soem klia se ol wanwan memba oli dipen long ol narawan, mo se olgeta memba oli impoten. Pol i talem se: “Sipos olgeta haf blong bodi ya oli sem mak nomo, bambae i no gat bodi blong man. Bodi blong man i gat plante haf blong hem i stap, be bodi ya i wan nomo. Nao ae blong mi i no save talem long han blong mi se ‘Mi mi no wantem yu.’ Mo hed blong mi i no save talem long leg blong mi, se ‘Mi mi no wantem yu.’” (1 Korin 12:19-21) Long sem fasin, yumi evriwan long famle blong ol man we oli wosip long Jeova, yumi mekem ol defdefren wok. Nating se i olsem, yumi joengud, mo yumi evriwan i nidim ol narafala.
19. ?Olsem wanem yumi save haremgud long ol kakae long saed blong speret we God i givim, mo wan olfala brata i talem wanem long saed ya?
19 Bodi i nidim kakae, mo i nidim we yumi keagud long hem mo lidim hem. Long sem fasin, yumi nidim kakae long saed blong speret we God i givim long yumi tru long Tok blong hem, speret blong hem, mo ogenaesesen blong hem. Blong kasem ol kakae ya, yumi mas stap insaed long famle blong Jeova long wol. Wan brata we i mekem wok blong God long plante yia finis, i raetem se: “Mi mi glad tumas we mi bin laef folem save blong Jeova, stat bifo 1914 taem trutok i no klia yet . . . kam kasem tede we trutok i saenaot strong olsem san long medel dei. I gat wan samting we i impoten tumas long mi, hemia blong stap kolosap oltaem long ogenaesesen blong Jeova long wol. Ol samting long laef blong mi bifo, oli tijim mi se i no waes nating blong trastem tingting blong man. Taem mi luksave poen ya, tingting blong mi i kam strong blong stap insaed long ogenaesesen oltaem. I no gat wan narafala rod blong mekem Jeova i agri long yumi mo, blong kasem blesing blong hem.”
20. ?Yumi mas gat strong tingting blong mekem wanem long saed blong fasin joengud we ol man blong Jeova oli gat?
20 Jeova i singaot ol man blong hem blong oli kamaot long wol ya we i tudak mo we i stap seseraot. (1 Pita 2:9) Hem i mekem yumi joengud long nambawan fasin, wetem hem mo wetem ol brata mo sista blong yumi long saed blong bilif. Bambae fasin joengud ya i stap long nyufala wol tu, we i kolosap nomo. Taswe, long ol las dei ya we laef i strong tumas, yumi mas gohed blong ‘wokem fasin blong laekem ol man tumas, olsem we fasin ya i klos blong yumi.’ Mo yumi mas mekem evri samting we yumi naf blong mekem blong leftemap mo holemtaet fasin joengud ya we i sas tumas.—Kolosi 3:14.
?Bambae Yu Ansa Olsem Wanem?
◻ ?Olsem wanem fasin blong mekem samting we God i wantem mo fasin blong fasgud long trutok i save halpem yumi blong holemtaet fasin joengud?
◻ ?Olsem wanem fasin blong yusum tang long stret rod i save mekem yumi joengud?
◻ ?I minim wanem blong gat fasin fogif?
◻ ?Olsem wanem yumi save holemtaet fasin joengud taem yumi mekem ol prapa disisen blong yumi?
◻ ?From wanem yumi mas holemtaet Kristin fasin joengud?
[Tok blong pija long pej 16]
Jeova i mekem ol man blong hem oli joengud olsem we man ya blong lukaot long sipsip i mekem ol sipsip blong hem oli stap wanples
[Tok blong pija long pej 18]
Sipos yumi talem sore wetem tingting daon taem yumi mekem narafala i harem nogud, yumi givhan blong leftemap fasin joengud