Ripot Long Wok Blong Kingdom
‘Wan Doa i Open Blong Mekem Moa Gudfala Wok’ Long Kuba
APOSOL Pol i wan nambawan man blong talemaot gud nyus blong Kingdom blong God long taem bifo. Hem i yusum olgeta jans we hem i gat blong serem promes blong God wetem ol man se, olgeta we oli obei bambae oli save kasem laef we i no save finis. Taem Pol i visitim Efesas bifo, hem i luksave se i gat wan nyufala rod i open we bambae i halpem hem blong givhan long plante moa man. Hem i talem se: “Bambae mi stap long ples ya long Efesas . . . , from we long ples ya i gat olsem doa we i open finis long mi, blong mi mekem wan gudfala wok we bambae i gat plante frut blong hem.”—1 Korin 16:8, 9.
Ol Wetnes blong Jeova long Kuba oli faenem se i gat wan nyufala rod we i open long olgeta tu. Nating se long ples ya, gavman i no rejista ol Wetnes olsem wan skul yet, be naoia oli fri moa blong serem hop blong Baebol wetem ol narafala man raonabaot long olgeta. I no longtaem, gavman blong Kuba i bin wantem blong letem ol defren jyos long kantri ya oli mekem wok blong olgeta long fasin we i fri. Presiden Castro i bin talemaot se ol Wetnes blong Jeova oli wan skul we naoia gavman blong Kuba i agri moa long olgeta bitim bifo.
Ol Wetnes oli luk nyufala rod ya ‘olsem wan doa we i open blong mekem moa gudfala wok.’ Eksampel, i no longtaem, ol Wetnes blong Jeova oli bin openem wan ofis long Kuba. Ofis ya i halpem olgeta blong lukaot mo lidim wok blong prij we i stap gohed long kantri ya. Bitim 65,000 Wetnes oli stap halpem ol man blong stadi mo blong kasem save long Baebol. Oli stap yusum ol buk we oli stanap long Baebol, olsem Wajtaoa mo Wekap! Plante man Kuba we oli laekem stret fasin, oli stap kasem plante blesing from we oli stadi Baebol wetem ol Wetnes blong Jeova.
Mo tu, ol Wetnes oli stap mekem ol miting evri wik, oli hivap long ol smosmol grup long olgeta ples blong aelan ya. Samtaem oli gat jans tu blong mekem ol asembli. Oli kam wanples long sam smol grup blong 150 man. Oli rili glad se gavman blong Kuba i letem olgeta i fri moa. Samting ya i givim jans long olgeta blong joen tugeta wetem ol brata mo sista blong olgeta long saed blong speret, oli save singsing blong presem God, mo oli save prea tugeta.
I no longtaem, oli bin mekem Distrik Asembli ya “Fraetgud long God,” bitim 1,000 taem long tri wiken nomo. Wan ripot i talem se i gat “oda, stret fasin, mo pis” oli kamaot klia nomo long ol wanwan asembli ya. Gavman i toktokgud long ol Wetnes from fasin ya we oli soemaot.
Long olgeta ples blong wol, ol trufala Kristin oli traehad blong folemgud oda we God i givim, blong go talemaot gud nyus blong Kingdom blong God. Long sem taem, oli traehad blong holemtaet pis wetem ol gavman. (Taetas 3:1) Ol Wetnes blong Jeova oli folem advaes blong aposol Pol, we i raetem se: “Fas tok blong mi, mi talem strong long yufala, se yufala i mas prea long God from olgeta man. Yufala i mas askem long hem blong i givim ol samting long yufala we yufala i wantem blong yufala mo blong ol narafala man. Mo yufala i mas talem tangkyu long hem tu from olgeta man. Mo yufala i mas stap prea from ol king, mo from ol narafala haeman blong yumi. Long fasin ya, bambae yumi gat kwaet laef, we i gat pis, we yumi save mekem ol fasin blong prea, mo yumi save folem ol stret fasin.”—1 Timote 2:1, 2.