Ripot Long wok Blong Kingdom

Oli Gohed Blong Talemaot Trutok Blong Baebol Long Aerlan

LONG ol yia we oli jes pas, naesfala kantri blong Aerlan i kam wan ples blong trabol nomo. Long semtaem, ol man Aerlan oli stap lesingud long mesej blong Baebol we i givim hop, we ol Wetnes blong Jeova oli stap talemaot long olgeta. Ol store biaen we oli kamaot long Aerlan, oli soemaot samting ya.

■ Long Dublin, wan Wetnes blong Jeova mo smol gel blong hem, tufala i stap talemaot gud nyus long ol haos wanwan. Tufala i faenem wan woman we nem blong hem Cathy. Woman ya i bisi tumas, hem i gat plante pikinini. Wetnes ya i askem sipos smol gel blong hem, we i stap lanem blong talemaot gud nyus, i save talem wan sotfala mesej long woman ya. Cathy i agri. Nao smol gel ya i givim wan mesej we i klia mo we hem i bin mekemrere gud. Cathy i sapraes tumas long smol gel ya, we i talemaot mesej ya wetem fulhat blong hem mo wetem respek. Ale, hem i tekem wan traket we i tokbaot Baebol, we smol gel ya i givim long hem.

Biaen, Cathy i tingtingbak long pikinini ya we i kam long haos blong hem, we i reregud mo i gat gudfala fasin. Hem i talem se: “Mi mi sapraes tumas se wan smol gel i save talemaot wan nambawan mesej olsem, long fasin we hem i no traem blong soem hem wan nating. Mi mekem disisen se, nekis taem we ol Wetnes blong Jeova oli kam long haos blong mi, bambae mi lesin long olgeta.”

Biaen, Cathy i muf i go long wan smol taon long saotwes blong Aerlan. Taon ya i stap long ples we graon blong Kork mo graon blong Keri i joen. Samtaem biaen, ol Wetnes blong Jeova oli kam long haos blong hem, mo hem i singaot olgeta oli kam insaed. Hem i agri blong stadi Baebol. Mo naoia, hem i stap go long ol miting blong kongregesena wetem sam long ol pikinini blong hem. Cathy i gat bigfala tangkyu long smol gel ya we i rili wantem talemaot gud nyus long hem.

■ Long Tulamo, i gat wan woman we nem blong hem Jean. Seven yia finis, ol Wetnes oli stap kam luk hem blong tokbaot Baebol wetem hem. Sam samtaem, hem i soem intres mo i tekem ol buk, be samtaem hem i no intres. Wan dei, taem Wetnes ya Frances mo wan sista, tufala i go luk Jean, tufala i faenem se hem i kros. Wetnes ya i talem se: “Nomata wanem tok we mitufala i talem, hem i kam kros moa. Biaen, hem i talem long mitufala blong aot kwiktaem, mo hem i satem doa strong.”

Frances i stap ting se maet hem i kros bakegen sipos hem i go luk hem long wan narafala taem. Hem i tingting se: ‘Maet i gud blong no moa go luk hem sipos hem i no rili intres long Baebol.’ Hem i tokbaot bisnes ya wetem hasban blong hem, Thomas, mo Thomas i gat defren tingting, hem i ting se maet woman ya i save kamgud. Nekis taem oli stap prij raon long ples ya, oli go luk Jean bakegen. Hem i toktokgud wetem olgeta mo i tekem sam Wajtaoa mo Wekap! Oli go luk hem bakegen plante taem biaen, mo oltaem hem i glad blong toktok wetem olgeta. Nao Thomas mo Frances tufala i stat blong stadi Baebol wetem hem.

?From wanem hem i jenis? Jean i eksplenem se hem i ronemaot ol Wetnes, from we, long taem ya, hem i jes bonem wan pikinini mo i jes kamaot long hospital. Hem i stap givim titi long bebi we i jes bon, mo i stap fidim pikinini we i bigwan moa lelebet, wetem spun. From samting ya, hem i slip wan haoa haf nomo evri naet. Jean i talem se: “Long taem ya, mi no intres nating blong tokbaot skul.”

Afta tu manis nomo, Jean i go long olgeta miting blong kongregesen, mo fo manis biaen, hem i joen long wok blong talemaot gud nyus. Ten manis afta we hem i stat blong stadi Baebol, hem i baptaes. Naoia store blong Jean i stap givhan long hem wan bakegen long wok blong prij. Hem i talem se: “Sipos mi faenem wan man we fasin blong hem i raf tumas, mi traem blong kasem save long problem blong hem. Oltaem mi raetemdaon man ya. Maet tingting blong hem i jenis taem mi luk hem bakegen. Maet bambae hem i haremgud moa, mo i lesingud.”

[Futnot]