?Yu Yu Stap Folem Fasin Blong God We i Mekem i Sem Mak Long Olgeta Man?

MEKEM I SEM MAK LONG OLGETA MAN​—?yumi save faenem fasin ya long weples? I gat wan Man nomo we i stretgud olgeta long fasin ya blong mekem i sem mak long olgeta man, i no stap jajem man from kala blong skin no kantri blong hem, i no stap mekem i moa gud long wan man i bitim narawan, mo i no stap daonem mo spolem man. Man ya hemia Jeova God, Man we i Wokem olgeta man. Wan man Engglan we i stap raetem ol buk long ol yia 18 handred, Charles Lamb, i talem stret se: “Blong talem long ol tok we i isi nomo, mi mi fulap long fasin ya blong jajem narafala from we hem i defren long mi. Mi mekem olsem from we mi laekem sam samting mo mi no laekem sam samting.”

Long saed blong fasin ya blong mekem i sem mak long olgeta man, yumi save talem se i no plante man nating we oli traehad blong folem fasin ya. Plante handred yia bifo, waes King Solomon blong Isrel i luksave se “man i rulum man blong spolem olgeta nomo.” (Eklesiastis 8:9) Fasin blong no laekem narafala man from we hem i kamaot long defren laen no kala, mo ol faet bitwin ol kantri, mo ol rao insaed long ol famle, olgeta samting ya oli stap kam antap kwiktaem tumas. Taswe, ?i stret blong bilif se, ol man nomo oli naf blong stanemap fasin ya bitwin long olgeta, we oli mekem i sem mak nomo long olgeta man?

Yumi wanwan i mas traehad blong bos long tingting blong yumi mo sakemaot ol fasin blong jajem narafala, we oli stap longtaem finis long yumi. (Efesas 4:​22-​24) Ating yumi no luksave, be maet yumi gat sam tingting we yumi bin kasem taem yumi stap gruap no taem yumi stap skul. Maet ol tingting ya oli bin kamaot long famle, laen, no kantri blong yumi. Ol tingting ya we maet yumi ting se oli smol nomo, plante taem oli stap dip insaed long yumi, mo oli save pusum yumi blong gat sam fasin we oli mekem yumi tinghae moa long sam man bitim ol narafala man. Wan jaj blong Skotlan we hem i raetem ol buk, Lord Francis Jeffrey, i talem klia se: “I gat wan samting we man i tekem longtaem moa blong luksave bitim ol narafala samting, hemia fasin we i stap strong tumas insaed long hem, blong jajem narafala man we i defren long hem.”

Lenaa i wan woman we i luksave se, blong winim fasin ya blong tinghae moa long sam man i bitim ol narafala, yumi mas rili traehad. Hem i talem se, blong blokem filing ya blong jajem narafala man from we hem i defren long yumi, i “hadwok, from we ol fasin we yumi karem taem yumi stap gruap oli gat bigfala paoa long yumi.” Lena i luksave tu se i nidim sam samting oltaem blong pulum yumi blong tingbaot fasin ya.

Ol Wok Blong Jeova We Oli Soemaot Se Hem i Mekem i Sem Mak Long Olgeta Man

Jeova i stretgud olgeta long fasin blong mekem i sem mak nomo long olgeta man. Long stat blong Baebol, yumi save ridim ol samting we hem i mekem blong soem se hem i stap mekem i sem mak long olgeta man. Yumi save lanem plante samting from ol nambawan eksampel ya we oli pulum yumi blong tingbaot fasin ya bakegen.

Jeova i mekem i sem mak long olgeta man taem hem i mekem rod blong man Jyu ya aposol Pita, i talemaot gud nyus long Konilyas mo long sam narafala hiten man long 36 K.T.b Long taem ya, Pita i talem se: “God i stap mekem i sem mak nomo long olgeta man. . . . Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan man Isrel, no i kamaot long wan narafala laen olgeta.”​—Ol Wok 10:34, 35.

Long olgeta samting we Jeova i mekem long ol man, oltaem hem i soemaot fasin ya blong mekem i sem mak nomo long olgeta man. Jisas Kraes i tokbaot Papa blong hem i se: “Hem i save mekem san blong hem i saen long ol gudfala man mo ol man we oli nogud, long sem mak nomo. Mo i save mekem i ren long ol stret man mo ol man we oli no stret tu.” (Matyu 5:​45) Pita i gohed blong leftemap Jeova olsem God ya we i mekem i sem mak nomo long olgeta man, i se: “Hem i stap mekem tingting blong hem i longfala blong wet long yufala, from we hem i no wantem blong ol man oli lus. Hem i wantem blong olgeta man bambae oli tanem tingting blong olgeta from ol sin blong olgeta.”​—2 Pita 3:9.

Long taem blong Noa, “olgeta man long wol oli stap mekem nogud, mo oltaem, tingting blong olgeta i fulap long ol samting nogud.” Taswe, Jeova i talemaot se bambae hem i spolem ol man long taem ya. (Jenesis 6:​5-7, 11, 12) Be, folem oda blong God, Noa i bildim wan sip long open ples we evri man i save luk. Taem Noa mo ol pikinini boe blong hem oli stap bildim sip ya, Noa i “wan prija blong talemaot stret fasin” tu. (2 Pita 2:5) Nating se Jeova i save we hat blong ol man long taem ya i nogud, hem i mekem i sem mak long olgeta evriwan, taem hem i sanem wan mesej we i klia nomo long olgeta. Hem i traem pulum tingting mo hat blong olgeta taem hem i talem long Noa blong bildim sip mo blong prij. Oli gat jans blong obei, be oli no wantem “save wan samting, kamkam we wora i ron bigfala, i tekemaot olgeta.”​—Matyu 24:39.

!Jeova hem i rili wan nambawan eksampel long fasin ya blong mekem i sem mak long olgeta man! Long ol las dei ya we laef i had, eksampel blong God i pusum ol man blong hem blong talemaot gud nyus blong Kingdom wetem fasin ya blong mekem i sem mak long olgeta man. Antap moa, oli no haedem mesej ya blong dei we bambae Jeova i jajem olgeta man, be oli talemaot long klia ples. Long fored blong olgeta man, oli talemaot mesej blong Jeova wetem fasin blong mekem i sem mak long olgeta man, blong olgeta evriwan oli harem.​—Aesea 61:​1, 2.

Promes we Jeova i mekem long ol olfala ya Ebraham, Aesak, mo Jekob, i soemaot klia se hem i wan God we i stap mekem i sem mak nomo long olgeta man. Hem i promes se, bambae i gat wan Man i bon long laen blong olgeta we God i jusumaot hem, nao from hem, ‘olgeta nesen blong wol bambae oli kasem blesing.’ (Jenesis 22:18; 26:4; 28:14) Jisas Kraes nao i Man ya we God i jusumaot. Jeova i mekem rod blong sevem olgeta man we oli obei long hem, tru long ded mo laef bakegen blong Jisas. Yes, ol blesing blong ransom sakrifaes blong Kraes oli save kasem olgeta man i sem mak nomo.

Long taem blong Moses, Jeova i mekem i sem mak long olgeta man long wan rod we i pulum intres blong yumi tumas, hemia long saed blong ol pikinini gel blong Selofehad. Ol faefala woman ya oli fesem wan trabol long saed blong graon long Promes Lan, we oli mas kasem long papa blong olgeta. Hemia from we, folem kastom blong ol man Isrel, papa i mas givim graon i go long ol pikinini boe blong hem nomo. Be, taem Selofehad i ded, hem i no gat wan pikinini boe. Taswe, ol faefala gel blong Selofehad oli kam luk Moses blong askem long hem blong mekem i sem mak long olgeta olsem we oli mekem long ol man. Oli talem se: “?From wanem nem blong papa blong mifala i mas lus long famle blong hem, jes from we hem i no gat wan pikinini boe? Plis yufala i givim sam graon blong papa blong mifala i kam long mifala, olsem we yufala i givim sam long ol brata blong papa blong mifala.” Jeova i lesin long voes blong ol woman ya mo hem i givim oda long Moses se: “Sipos wan man i ded be hem i no gat wan pikinini boe, ale yu mas givim graon blong hem i go long pikinini gel blong hem.”​—Namba 27:​1-​11.

!Hemia i rili wan nambawan rul we i soem lav mo i mekem i sem mak long olgeta man! Blong meksua se graon ya i no go long wan narafala laen taem ol gel ya oli mared, oli mas mared nomo long wan man long “laen blong papa blong olgeta.”​—Namba 36:​5-​12.

Yumi luk moa long saed blong fasin ya blong Jeova blong mekem i sem mak nomo long olgeta man, long taem blong jaj mo profet ya Samuel. Jeova i givim oda long hem blong putumap wan nyufala king we i kamaot long laen blong Juda, mo long famle blong wan man Betlehem, Jesi. Be Jesi i gat eit pikinini boe. ?Bambae hem i makemaot weswan long olgeta olsem king? Samuel i laekem Elaeab from hem i gat strong bodi. Be, Jeova i no letem lukluk blong man i gat paoa long hem. Hem i talem long Samuel se: “Yu no mas lukluk long hem we i strong, mo i longfala . . . From we God i no luk ol samting long sem fasin olsem ol man oli stap luk ol samting ya. Ol man oli luk ol samting we ae blong olgeta nomo i save luk. Be long saed blong Jeova, hem i luk wanem i stap long hat blong man.” Hem i jusumaot Deved, lasbon pikinini boe blong Jese.​—1 Samuel 16:​1, 6-​13.

Lanem Samting From Jeova We i Mekem i Sem Mak Long Olgeta Man

I gud sipos ol Kristin elda oli traehad blong folem fasin blong Jeova, nao oli luk ol gudfala fasin long saed blong speret we ol Kristin brata mo sista blong olgeta oli gat. I isi blong jajem wan man folem samting we yumi ting se i stret mo i no stret, nao yumi letem ol prapa filing blong yumi oli pulum yumi blong jajem hem nogud. Wan elda i talem se: “Mi traehad blong mekem ol samting long ol narafala we Jeova i save glad long hem, be i no folem prapa tingting we mi mi gat long saed blong hem.” !I impoten tumas we ol man blong Jeova oli yusum Tok blong hem olsem rul we i lidim olgeta!

Ol eksampel blong Baebol we yumi jes tokbaot, oli givhan long yumi blong faet agensem ol filing we maet yumi gat yet, se yumi wantem jajem narafala man we i defren long yumi. Sipos yumi folem fasin blong Jeova blong mekem i sem mak long olgeta man, bambae yumi givhan blong mekem se Kristin kongregesenc i no gat fasin ya blong jajem narafala we i defren long yumi, fasin blong daonem mo spolem narafala, mo fasin blong mekem i moagud long samfala i bitim ol narafala.

Aposol Pita i luksave se “God i stap mekem i sem mak nomo long olgeta man.” (Ol Wok 10:34) Fasin blong mekem i moa gud long wan man i bitim narawan, i go agensem fasin ya blong mekem i sem mak long olgeta man, mo tu, hem i brekem ol rul long saed blong lav mo fasin joengud. Ol defren kaen man, olsem ol puaman, ol man we oli no moa gat paoa, mo ol man we oli no gat nem, oli laekem Jisas. Mo hem i givim spel long tingting blong olgeta. (Matyu 11:28-30) Hem i defren olgeta long ol lida blong skul blong ol man Jyu, we oli mekem i strong tumas long ol man, mo we oli stap putumap plante rul we oli hevi tumas long ol man blong folem. (Luk 11:45, 46) Samting ya mo fasin blong mekem i moa gud long ol rijman mo ol haeman, i no laenap nating wetem ol tijing blong Kraes.​—Jemes 2:​1-4, 9.

Tede, ol Kristin elda oli stap aninit long Kraes we i olsem hed blong olgeta, mo oli mekem i sem mak nomo long olgeta man blong Jeova we oli givim laef blong olgeta long hem finis. Taem oli stap ‘lukaot long ol sipsip blong God,’ oli traehad blong no mekem i moagud long samfala i bitim ol narafala from we maet oli gat plante mane, oli gat fasin we i stret wetem prapa fasin blong ol elda ya, no from we oli famle wetem olgeta. (1 Pita 5:2) Sipos ol Kristin elda ya oli folem fasin blong God we i mekem i sem mak long olgeta man, mo sipos oli obei long woning blong hem se oli no mas mekem i moa gud long samfala i bitim ol narafala, ale, bambae oli pulum olgeta man long kongregesen blong gat fasin ya tu blong mekem i sem mak long olgeta man.

Kristin kongregesen blong ol Wetnes blong Jeova i wan bigfala kampani blong ol brata long olgeta ples blong wol. Hem i olsem wan pruf we i laef, blong soem se aninit long rul blong Jisas Kraes, bambae ol man oli save laef tugeta we oli mekem i sem mak nomo long olgeta man, mo oli no jajem narafala man from we hem i defren. Ol Wetnes oli putum ‘nyufala fasin blong laef we God i wokem olsem we hem i wantem. Fasin ya i kamaot long trufala stret fasin mo fasin blong obei long hem oltaem.’ (Efesas 4:​24) Yes, olgeta ya oli stap lanem blong folem eksampel blong God ya, Jeova, we i stap mekem i sem mak nomo long olgeta man. Mo oli gat hop blong laef we i no save finis long wol ya, taem bambae i no moa gat fasin we man i tinghae moa long samfala i bitim ol narafala.​—2 Pita 3:​13.

[Ol futnot]

[Tok blong pija long pej 26]

Aposol Pita i luksave se God i no stap tinghae moa long samfala i bitim ol narafala