Gospel Blong Ol Man Blong Hae Save

“?OL MAN oli stap taltalem mi, se mi hu?” (Luk 9:​18) Jisas i askem kwestin ya long ol disaepol blong hem kolosap 2,000 yia bifo. Hemia wan kwestin we ol man long taem ya oli mekem tumas toktok from. Be, i luk olsem se i gat moa toktok long saed ya tede, antap moa, long taem blong Krismas, we ol man oli talem se hem i taem blong tingbaot Jisas. Plante man oli bilif se God i sanem Jisas, i aot long heven, i kam blong sevem olgeta man. ?Yu yu bilif olsemia?

Sam man blong hae save, oli gat wan narafala tingting. Marcus J. Borg, wan tija long saed blong jyos mo kastom, i talem se: “Pija long tingting blong plante man long saed blong Jisas, hemia se hem i man ya we i tijim se hem i Pikinini blong God we i ded blong tekemaot sin blong olgeta man long wol. Be, histri i soem se samting ya i no tru.”

Wan narafala man blong hae save i talem se trufala Jisas i defren long Jisas ya we yumi ridim store blong hem long Baebol. Samfala oli bilif se ol man oli raetem ol Gospel 40 yia no bitim 40 yia afta we Jisas i ded, mo se long taem ya, ol man oli ademap plante samting finis long store blong Jisas. Ol man blong hae save ya oli talem se, problem ya i kamaot, i no from we ol man blong raetem ol Gospel oli no rimemba gud ol samting we i hapen, be from fasin blong olgeta blong eksplenem. Afta we Jisas i ded, ol disaepol oli jenisim tingting blong olgeta long saed blong hem. Nao oli tingbaot hem olsem Pikinini blong God, Sevya, mo Mesaea. Samfala oli strong blong talem se Jisas i jes wan waes man we i stap wokbaot olbaot, mo we i wantem jenisim fasin blong laef blong ol man. Sam man blong hae save oli talem se, hemia nao samting we i rili tru.

“Hae Save” Long Saed Blong Jisas

Blong traem pruvum se “hae save” blong olgeta i tru, ol man blong toktok agens oli strong blong sakemaot eni samting long saed blong Jisas, we i luk olsem se i kamaot from paoa blong God. Eksampel, samfala oli talem se store ya se Jisas i bon long wan vejin gel, i blong haedem nomo se Jisas i bon long wan gel we i slip olbaot. Sam narafala oli sakemaot profet tok we Jisas i talem long saed blong Jerusalem, se bambae taon ya i lus. Oli talem se ol man oli putum ol save ya insaed long ol Gospel afta we trabol ya i “kamtru” finis. Samfala oli talem tu se ol sikman we Jisas i mekem merikel long olgeta, sik blong olgeta i stap long tingting blong olgeta nomo, ale oli kamgud bakegen taem oli jenisim tingting blong olgeta. ?Yu yu ting se ol tok ya i tru no i krangke?

Sam man blong hae save oli talem tu se, ol disaepol blong Jisas oli mekemap store long saed blong laef bakegen, blong mekem se skul blong olgeta i no foldaon. Oli talem se, hemia from we ol man blong Jisas oli no gat paoa taem Jisas i no moa stap wetem olgeta. Taswe, oli putum Masta blong olgeta insaed long store we oli raetem. I olsem we oli talem se Kristin Skul nao, i no Kraes, we i laef bakegen. Sipos yu ting se ol man blong hae save ya oli stap twistim trutok, ?olsem wanem long tok blong woman ya blong stadi long tijing blong ol skul, Barbara Thiering, se oli no bin kilim Jisas i ded? Woman ya i bilif se taem oli nilim Jisas long pos, hem i no ded, ale biaen, hem i mared tu taem, mo hem i gat tri pikinini.

Olgeta tok ya oli daonem Jisas i go kasem mak we plante man blong hae save oli talem: wan waes man, i joen smol nomo long kastom blong ol man Jyu, wan man we i traem blong jenisim fasin blong laef blong ol man. Ol man blong hae save ya oli talem eni samting, i bitim we oli agri se hem i Pikinini blong God, we i kam ‘blong givim laef blong hem blong pem rod blong plante man oli gofri.’​—Matyu 20:28.

Maet long taem ya blong yia, yu yu ridim sam haf blong ol Gospel, olsem haf ya we i tokbaot se Jisas i bon long haos blong ol anamol. Maet yu bin harem ol store olsem long jyos. ?Yu yu agri se ol store blong Gospel oli impoten mo yumi save bilif long olgeta? Sipos yes, tingbaot samting ya we i mekem yumi sapraes bigwan. Stat long 1985, wan grup blong ol man blong hae save oli mekem miting tu taem evri yia we oli kolem Jisas Semina, blong faenemaot sipos ol tok blong Jisas i tru no no gat. ?Jisas i rili talem samting we Baebol i tokbaot long saed blong hem? Ol memba blong grup ya oli yusum ol bidbid we oli gat kala blong vot long ol wanwan tok blong Jisas. Bidbid we i red i minim se Jisas i sua blong talem tok ya. Bidbid we i ping i minim se maet Jisas i bin talem tok ya. Bidbid we i blak be i waet lelebet i minim se oli no save sipos Jisas i bin talem tok ya no no gat. Mo bidbid we i blak i minim se tok ya i gyaman.

Ating yu sapraes blong save se long Jisas Semina ya, oli talem se maet 82 pesen blong ol tok we Jisas i bin talem folem ol store long Baebol, hem i no bin talem. Long Gospel blong Mak, i gat wan tok blong Jisas nomo we oli talem se i tru. Oli talem se Gospel blong Luk i fulap tumas long ol tingting we ol man nomo oli mekemap, taswe “i no gat rod blong save trufala store blong bifo.” Oli vot wetem bidbid we i blak long saed blong ol tok long Gospel blong Jon, hemia i min se ol tok blong hem i gyaman. Trifala laen nomo blong Jon, oli vot wetem bidbid we i blak be i waet lelebet, i minim se oli no save sipos Jisas i bin talem tok ya no no gat.

I Bitim Hae Save

?Yu yu agri wetem ol man blong hae save ya? ?Olgeta oli stap givim save long saed blong Jisas we i moa stret bitim save we yumi faenem long Baebol? Ol kwestin ya oli no jes samting blong ol man blong hae save oli rao from. Oli impoten moa. Long taem ya blong yia, maet yu harem samfala oli tokbaot store blong Baebol, se God i sanem Jisas ‘blong olgeta man we oli bilif long hem, bambae oli no save lus, be oli gat laef we i no save finis.’​—Jon 3:​16.

Sipos Jisas i jes wan waes man we i stap wokbaot olbaot nomo, mo we yumi save smol nomo long saed blong hem, i blong nating nomo we yumi ‘bilif long hem.’ Be, sipos store blong Jisas long Baebol i tru, hem i joen wetem jans we yumi gat blong kasem laef we i no save finis. Taswe, yumi mas save ansa long kwestin ya, ?Baebol i talem trutok long saed blong Jisas no no gat?