!Olgeta Man Oli Mas Givim Ona Long Jeova!

“Long ples we laet i stap saenaot long hem, ol man oli mas givim ona long Jeova.”​—AESEA 24:15.

1. ?Ol profet blong Jeova oli tingbaot nem blong hem olsem wanem, mo tingting blong olgeta i defren long wanem fasin we Krisendom i gat tede?

JEOVA​—!nem blong God! !Nem ya i nambawan tumas! !Ol profet bifo oli glad tumas blong talemaot tok long nem blong hem! Wetem bigfala glad oli givim ona i go long King mo Masta blong olgeta, Jeova, we nem blong hem i makemaot hem olsem Man ya we i Mekem Olgeta Stampa Tingting blong hem oli kamtru. (Aesea 40:5; Jeremaea 10:​6, 10; Esikel 36:23) Ol profet ya tu, we sam man oli talem se oli no impoten tumas, oli mekem bigfala toktok blong givim ona long Jeova. Wan long olgeta ya, hemia Hagae. Long buk blong Hagae, we i gat 38 vas nomo long hem, nem blong God i stap 35 taem. Ol profet tok ya oli no moa gat bigfala paoa, taem ol man oli karemaot nem blong Jeova we i nambawan tumas, mo oli putum taetel ya “Masta” long ples blong hem. Plante man blong Krisendoma we oli talem se oli ol nambawan aposol, oli tekemaot nem ya long Baebol blong olgeta.​—Skelem wetem 2 Korin 11:​5.

2, 3. (a) ?Olsem wanem wan nambawan profet tok long saed blong taem ya we Isrel i stanap bakegen, i kamtru? (b) ?Smol grup blong ol man Jyu mo ol narafala we oli joen wetem olgeta, oli gat bigfala glad from wanem samting?

² Long Aesea 12:2, oli raetem nem blong God long tu fasin.b Profet ya i talem se: “Yu luk, God i sevem mi. Bambae mi mi trastem hem, mo mi no save fraet. From we Ja Jeova i givim paoa long mi, mo hem i mekem mi mi strong. Hem i sevem mi.” (Lukluk Aesea 26:4 tu.) Long rod ya nao, samwe long 200 yia bifo we Isrel i gofri long kalabus blong Babilon, Ja Jeova i yusum profet blong hem, Aesea, blong talemaot long ol man Isrel se hem i bigfala Man blong Sevem olgeta. Olgeta ya oli stap kalabus stat long yia 607 i go kasem 537 B.K.T.c Mo tu, Aesea i raetem se: “Mi, Jeova, mi stap mekem evri samting, . . . mi mi Man ya we i tokbaot Saeras se, ‘Hem i man blong lukaot long sipsip blong mi, mo olgeta samting we mi wantem bambae hem i mekem oli kamtru fulwan’; ol tok blong mi long saed blong Jerusalem tu se, ‘Bambae oli bildim hem bakegen,’ mo long saed blong haos prea se, ‘Bambae oli putum faondesen blong yu.’” ?Hu ya Saeras ya? Samting we i mekem yumi sapraes se, profet tok ya i stret long King Saeras blong Pesia, we i winim Babilon long yia 539 B.K.T.​—Aesea 44:24, 28.

³ Stret long ol tok blong Jeova we Aesea i raetemdaon, Saeras i talemaot wan oda long ol man Isrel we oli kalabus, se: “Evriwan long yufala we oli man blong God, bambae God blong olgeta i stap wetem olgeta. Taswe, yufala i mas gobak long Jerusalem, we i stap long Juda, mo bildimap bakegen haos blong Jeova, God blong Isrel, we hem i trufala God. Haos ya i stap long Jerusalem.” Smol grup blong ol man Jyu mo ol Netinim we oli no man Jyu, wetem ol pikinini blong ol slef blong Solomon, oli glad tumas blong gobak long Jerusalem. Oli kasem Jerusalem stret long taem blong Lafet blong ol Wansaed Haos long yia 537 B.K.T., mo oli givim ol sakrifaes i go long Jeova long olta blong hem. Long nekis yia, long namba tu manis, oli putum faondesen blong namba tu haos prea. Hem i wan taem we oli singaot bigwan from glad mo oli presem Jeova.​—Esra 1:​1-4; 2:​1, 2, 43, 55; 3:​1-6, 8, 10-​13.

4. ?Olsem wanem Aesea japta 35 mo 55 oli kamtru?

⁴ Profet tok blong Jeova long saed blong ples we i stanap bakegen, i kamtru bigwan long Isrel: “Bambae ples nating mo draeples oli haremgud, mo level ples we i drae bambae i glad olsem we gras ya safran i putum flaoa blong hem. . . . Bambae i gat olgeta we oli save luk bigfala paoa blong Jeova, ol naesfala wok blong God blong yumi.” “Yufala evriwan bambae yufala i wokbaot wetem bigfala glad, mo bambae yufala i kamtru wetem pis. Ol bigfala hil mo ol smosmol hil bambae oli glad tumas long fored blong yufala wetem wan voes we i kraeaot from glad . . . Mo samting ya bambae i mekem se ol man oli save ol wok blong Jeova, olsem wan saen blong olwe we i no gat wan samting i save karemaot hem.”​—Aesea 35:​1, 2; 55:12, 13.

5. ?From wanem glad blong ol man Isrel i stap blong smoltaem nomo?

⁵ Be, glad ya i no stap blong longtaem. Ol man raonabaot we oli mekem wosip long ol narafala god, oli wantem joen wetem olgeta blong bildim haos prea. Fastaem, ol man Jyu oli stanap strong mo oli no letem ol man ya oli winim olgeta. Oli se: “Yufala i no gat bisnes nating blong joen wetem mifala blong bildim wan haos blong God blong mifala. Mifala nomo bambae mifala i bildim haos ya blong Jeova we i God blong Isrel, olsem King Saeras, king blong Pesia i givim oda long mifala blong mekem.” Nao ol man ya we oli stap raonabaot long olgeta oli agensem olgeta strong. Oli “gohed blong mekem ol man blong Juda oli kam slak long wok blong olgeta, mo oli daonem tingting blong olgeta blong oli no bildim haos ya.” Mo tu, ol man ya oli talem plante gyaman tok long saed blong bisnes ya, long king Atakseses, nao hem i putum tabu long wok blong bildim haos prea ya. (Esra 4:​1-​24) Wok i no moa gohed blong 17 yia. Sore tumas, long ol yia ya, ol man Jyu oli foldaon long fasin blong ronem ol sas samting.

“Jeova Blong Ol Ami” i Toktok

6. (a) ?Taem Jeova i luk fasin blong ol man Isrel, hem i mekem wanem? (b) ?From wanem mining blong nem blong Hagae i stret nomo?

⁶ Nating se i olsem, Jeova i soemaot long Isrel ‘se hem i strong mo i gat paoa,’ taem hem i sanem ol profet, olsem Hagae mo Sekaraea, blong wekemap ol man Jyu blong oli mekem wok ya bakegen. Nem ya Hagae i joen wetem ol lafet, from we i luk olsem se mining blong nem ya, hemia, “Bon long taem blong lafet.” Taswe, i stret nomo we Hagae i stat talemaot profet tok long faswan dei blong manis we oli mekem Lafet blong ol Wansaed Haos long hem. Long taem ya, ol man Jyu oli mas “haremgud nomo.” (Dutronome 16:15) Jeova i yusum Hagae blong talemaot fo mesej long ol man, long 112 dei.​—Hagae 1:1; 2:​1, 10, 20.

7. ?Ol fastok blong Hagae oli mas leftemap tingting blong yumi olsem wanem?

⁷ Blong statem profet tok blong hem, Hagae i talem se: “Hemia samting we Jeova blong ol ami i talem.” (Hagae 1:2a) ?Hu ya “ol ami” ya? Hemia kampani blong ol enjel blong Jeova, we samtaem Baebol i tokbaot olgeta olsem ol bigfala ami. (Job 1:6; 2:1; Ol Sam 103:20, 21; Matyu 26:53) Ating samting ya i leftemap tingting blong yumi tede, taem yumi save se, King mo Masta Jeova, hem wan i stap yusum ol enjel ya long heven we oli gat bigfala paoa, blong lidim wok blong yumi blong stanemap trufala wosip bakegen long wol ya.​—Skelem wetem 2 King 6:​15-​17.

8. ?Wanem tingting i bin spolem ol man Isrel, mo wanem i kamaot from?

⁸ ?Wanem i stap insaed long faswan mesej blong Hagae? Ol man long taem ya oli bin talem se: “Stret taem blong bildim bakegen haos blong Jeova i no kam yet.” Nao, tingting blong olgeta i no moa strong blong bildim haos prea, we i rod blong stanemap trufala wosip bakegen. Oli no moa ting se hem i impoten moa long ol narafala samting. Olgeta ya oli intres moa blong bildim ol bigfala sas haos blong olgeta. Fasin blong ronem ol sas samting i mekem se tingting blong olgeta i no moa strong long saed blong wosip blong Jeova. From samting ya, Jeova i karemaot blesing blong hem long olgeta. Ol garen blong olgeta oli no moa karem frut, mo oli no gat gudfala klos blong kavremap olgeta long taem blong kolkol. Mane we oli kasem i smol nomo, mo i olsem we oli stap putum mane blong olgeta i go insaed long wan bag we i fulap long hol.​—Hagae 1:2b-6.

9. ?Wanem strongfala advaes we Jeova i givim blong mekem ol man oli strong bakegen?

⁹ Tu taem, Jeova i givim strong advaes ya se: “Putum hat blong yufala long ol rod blong yufala.” I klia se, Serubabel, rula blong Jerusalem, wetem hae pris Josuad, tufala i obei long tok ya. Tufala i no fraet, mo tufala i traem pulum ol man “blong lesin long voes blong Jeova, God blong olgeta, mo long tok blong profet Hagae, we Jeova, God blong olgeta, i sanem hem i kam; mo ol man oli stat blong fraet long Jeova.” Antap moa, “Hagae, man blong karem tok blong Jeova, i gohed blong talem long ol man ol samting we Jeova i bin talem long hem, se: ‘“Mi mi stap wetem yufala,” hemia nao tok blong Jeova.’”​—Hagae 1:​5, 7-​14.

10. ?Olsem wanem Jeova i yusum paoa blong hem blong givhan long ol man Isrel?

¹⁰ Sam olfala long Jerusalem maet oli tingting se sipos oli bildim haos prea bakegen, bambae hem i olsem “nating nomo,” from we hem i no nambawan olsem faswan haos prea. Be, raonabaot 51 dei biaen, Jeova i pusum Hagae blong talemaot namba tu mesej. Hagae i talemaot se: “‘Stap strong, O Serubabel,’ hemia tok blong Jeova, ‘mo stap strong, O Josua, pikinini blong hae pris ya Jeosadak. Stap strong, yufala ol man blong ples ya, mo wokhad,’ hemia nao tok blong Jeova. ‘From we mi mi stap wetem yufala,’ hemia tok blong Jeova blong ol ami. . . . ‘Yufala i no mas fraet.’” Jeova, we long stret taem blong hem bambae i yusum bigfala paoa blong hem blong ‘seksekem heven mo wol,’ i meksua se oli winim olgeta trabol we ol man oli mekem agensem olgeta, mo tabu we king ya i bin putum long wok ya tu. Ale, long faef yia nomo, oli bildim haos prea bakegen.​—Hagae 2:​3-6.

11. ?Olsem wanem God i fulumap namba tu haos prea wetem ‘glori we i bigwan moa’?

¹¹ Long taem ya, wan nambawan promes i kamtru: “‘Ol gudgudfala samting blong olgeta nesen oli mas kam insaed. Mo bambae mi mi fulumap haos ya wetem glori,’ hemia nao tok blong Jeova blong ol ami.” (Hagae 2:7) Ol “gudgudfala samting” ya, hemia ol man we oli no blong Isrel be oli kam blong wosip long haos prea, we i fulap wetem bigfala glori blong God. ?Olsem wanem? ?Haos prea ya i sem mak long hemia we Solomon i bildim long taem blong hem? Profet blong God i talemaot se: “‘Glori blong haos ya bambae i bitim hemia blong fastaem,’ Jeova blong ol ami i talem.” (Hagae 2:9) Taem profet tok ya i kamtru fastaem, haos prea we oli bildim bakegen i stap longtaem moa i bitim faswan haos prea. Taem Mesaea i kamtru long 29 K.T.,e haos prea ya i stap stanap yet. Mo tu, Mesaea hem wan i karem glori i kam long haos prea ya taem hem i talemaot trutok insaed long hem, bifo we ol enemi blong hem we oli agensem trutok, oli kilim hem i ded long yia 33 K.T.

12. ?Wanem risen blong faswan mo namba tu haos prea?

¹² Faswan mo namba tu haos prea long Jerusalem oli impoten, from we oli olsem saen blong sam impoten wok we Mesaea bambae i mekem olsem pris. Mo tu, oli mekem trufala wosip blong Jeova i gohed long wol ya gogo kasem taem we Mesaea i kamtru.​—Hibrus 10:1.

Haos Prea Long Saed Blong Speret We i Fulap Long Glori

13. (a) ?Wanem samting i hapen long haos prea long saed blong speret stat long yia 29 go kasem 33 K.T.? (b) ?Olsem wanem ransom sakrifaes blong Jisas i impoten tumas long saed blong ol samting ya?

¹³ ?Profet tok blong Hagae long saed blong haos prea we i stanap bakegen, hem i gat spesel mining long ol yia we oli kam biaen? !Yes hem i gat spesel mining! Haos prea we oli bildim bakegen long Jerusalem i kam stampa ples blong trufala wosip long wol ya. Be hem i pija blong wan narafala haos prea long saed blong speret we i fulap moa long glori. Haos ya i stat mekem wok blong hem long yia 29 K.T., taem Jisas i tekem baptaes long Jodan Reva. Long taem ya, Jeova i makemaot hem olsem Hae Pris, mo tabu speret i kamdaon long hem olsem wan sotleg. (Matyu 3:​16) Afta we Jisas i finisim wok blong hem long wol ya, hem i ded olsem wan sakrifaes. Nao hem i laef bakegen blong go long heven. Heven i olsem Tabu Ples we i Tabu Tumas long haos prea. Long ples ya, Jisas i givim praes blong sakrifaes blong hem i go long Jeova. Praes ya, hem i olsem wan ransom we i kavremap sin blong ol disaepol blong hem, mo i openem rod, long dei blong Pentekos long yia 33 K.T., blong makemaot olgeta olsem ol pris, long haos prea blong Jeova long saed blong speret. Olgeta ya oli strong blong mekem minista wok blong olgeta long yad blong haos prea, hemia wol ya, gogo kasem we oli ded. From samting ya, oli save kasem laef bakegen long heven long fyuja, blong gohed long wok blong ol pris.

14. (a) ?Wanem glad i joen wetem strong wok blong faswan Kristin kongregesen? (b) ?From wanem glad ya i blong smoltaem nomo?

¹⁴ Plante taosen man Jyu we oli tanem tingting blong olgeta from ol sin blong olgeta​—mo biaen sam hiten man tu​—oli joen long Kristin kongregesenf ya. Mo, oli talemaot gud nyus se i no longtaem bambae Kingdom blong God i rul antap long wol ya. Afta long 30 yia, aposol Pol i save talem se oli talemaot gud nyus ya finis long “olgeta man long wol.” (Kolosi 1:​23) Be afta we ol aposol oli ded, wan bigfala apostasig i stat, mo laet blong trutok i no moa saenaot klia. Ol grup blong Krisendom, we oli stanap long ol hiten tijing mo waes blong man, oli haedem trufala Kristin skul.​—Ol Wok 20:29, 30.

15, 16. (a) ?Olsem wanem profet tok i kamtru long 1914? (b) ?Wanem wok blong hivimap ol man i makem ol yia kolosap long 1900 mo afta 1900?

¹⁵ Plante handred yia oli pas. Ale, afta long yia 1870, wan grup blong ol trufala Kristin oli stat blong stadi dip long Baebol. From ol tok blong Baebol, oli luksave se yia 1914 bambae i makem en blong ‘rul blong ol hiten nesen.’ Long yia ya, ol seven “taem” (we i minim 2,520 yia we ol man oli rul long fasin we i olsem wael anamol) bambae oli finis, taem Jisas Kraes i sidaon long jea blong king long heven. Hemia Man ya we i gat “raet” blong rul olsem Mesaea King long wol ya. (Luk 21:24; Daniel 4:​25; Esikel 21:26, 27) Afta 1919, ol Baebol Studen ya, we tede oli Wetnes blong Jeova, oli joen moa long bigfala wok blong talemaot gud nyus long olgeta ples blong wol, se Kingdom i stap kam. Long 1919, sam taosen Wetnes oli obei long tok we i kamaot long asembli long Seda Poen, Ohaio, Yunaeted Stet, we i singaotem olgeta blong tekem aksin. Namba blong olgeta ya i kam antap, gogo, long 1935, i gat 56,153 man oli givim ripot blong wok blong prij. Long sem yia ya, 52,465 man oli kakae bred mo dring waen long Memoriol blong ded blong Jisas, we oli mekem wan taem evri yia. Long fasin ya, oli soemaot se oli gat hop blong kam ol pris wetem Jisas Kraes, long haos prea blong Jeova long saed blong speret, long haf blong hem we i stap long heven. Mo tu, bambae oli wok wetem hem olsem ol king long Kingdom blong Mesaea ya.​—Luk 22:29, 30; Rom 8:​15-​17.

¹⁶ Be, Revelesen 7:​4-8 mo 14:​1-4 i soem se fulnamba blong olgeta Kristin ya we tabu speret i makemaot, hemia 144,000 man nomo. Plante blong olgeta ya oli hivap finis long faswan handred yia, bifo we bigfala apostasi i stat. Kolosap long yia 1900 mo long ol yia biaen, Jeova i finisim wok blong hivimap grup ya, we Tok blong hem we i olsem wora, i mekem olgeta oli kam klin. Olgeta ya oli kam olsem stret man long fes blong hem, from bilif we oli gat long sakrifaes blong Jisas we i karemaot ol sin. Nao, God i putum mak blong hem long olgeta olsem ol tabu Kristin, mo oli mekemap fulnamba blong ol 144,000 man.

17. (a) ?Wanem wok blong hivimap ol man i stat mo i gohed afta long yia 1930? (b) ?From wanem yumi intres long Jon 3:​30 long ples ya? (Lukluk tu Luk 7:​28.)

¹⁷ ?Wanem samting i hapen afta we grup blong ol tabu man ya i kasem fulnamba blong hem finis? Long 1935, long wan bigfala asembli long Wasington, D.C., Yunaeted Stet, oli talemaot se “bigfala kampani” we Revelesen 7:​9-​17 i tokbaot, hem i wan grup we bambae i kamaot klia “afta” we ol 144,000 oli hivap. Mo olgeta ya bambae oli kasem laef we i no save finis long paradaes long wol. Jon Baptaes, we bambae i laef bakegen long wol ya olsem wan long ol “narafala sipsip,” i talemaot klia se Jisas we i bin kasem tabu speret, hem i Mesaea. Nao biaen, hem i talem se: “Mesaea ya, hem i mas kam hae moa, mo mi mi mas godaon moa.” (Jon 1:​29; 3:​30; 10:16; Matyu 11:11) Wok blong Jon Baptaes blong mekemrere sam disaepol blong Mesaea, i finis taem Jisas i stat blong jusum ol man we bambae oli kam haf blong ol 144,000, mo namba blong olgeta i stap kam antap. Long ol yia biaen long 1930, wan jenis i kamaot. I no moa gat plante man we hem i ‘singaot mo jusum olgeta’ blong joen long ol 144,000, be namba blong “bigfala kampani” no “narafala sipsip,” i stat kam antap bigwan. Naoia, we Amageden i stap kam kolosap moa blong finisim ol rabis fasin blong wol ya, fulap man oli stap joen yet long bigfala kampani ya.

18. (a) ?From wanem yumi save bilif fulwan se “plante milyan man we oli laef naoia, bambae oli neva ded samtaem”? (b) ?From wanem yumi mas strong blong folem tok blong Hagae 2:4?

¹⁸ Long ol yia jes biaen long 1920, ol Wetnes blong Jeova oli mekem wan pablik tok we nem blong hem, “Plante Milyan Man We Oli Laef Naoia, Bambae Oli Neva Ded Samtaem.” Ating long taem ya, tok ya i bitim mak lelebet. Be tede, yumi save talem tok ya wetem ful bilif. !Naoia, ol profet tok blong Baebol oli stap kam moa klia, mo wol ya we i stap lus i olbaot tumas! !Tufala samting ya oli soem klia se en blong ol rabis fasin blong wol blong Setan i kolosap tumas! Long Memoriol blong 1996, i gat 12,921,933 man oli kam, be i gat 8,757 (.068 pesen) nomo we oli kakae bred mo dring waen blong soemaot se oli gat hop blong go long heven. I no longtaem, wok blong stanemap trufala wosip bakegen bambae i finis fulwan. Be yumi neva mas letem han blong yumi i kam slak blong mekem wok ya. Yes, Hagae 2:4 i talem se: “Hemia tok blong Jeova: ‘Stap strong, yufala ol man blong ples ya, mo wokhad. From we mi mi stap wetem yufala,’ hemia nao tok blong Jeova blong ol ami.” !I gud yumi gat strong tingting blong no letem enikaen fasin blong ronem ol sas samting, no enikaen fasin blong wol ya oli mekem yumi kam slak long wok blong Jeova!​—1 Jon 2:​15-​17.

19. ?Olsem wanem yumi save joen blong mekem tok blong Hagae 2:​6, 7 i kamtru?

¹⁹ Yumi glad tumas from jans we yumi gat blong joen long wok ya we Hagae 2:​6, 7 i tokbaot, mo we i stap kamtru long taem blong yumi, se: “Jeova blong ol ami i talem olsem: ‘I no longtaem, wan taem nomo bambae mi seksekem heven mo wol mo solwora mo graon. Mo bambae mi seksekem olgeta nesen, nao bambae ol gudgudfala samting blong olgeta nesen oli mas kam insaed. Mo bambae mi mi fulumap haos ya wetem glori,’ hemia tok blong Jeova blong ol ami.” Fasin griri, kruked fasin, mo fasin blong no laekem narafala man, oli kasem evri ples blong wol ya long taem blong yumi. Wol ya i rili stap long ol las dei blong hem. Mo Jeova i stat finis blong ‘seksekem’ wol ya, taem hem i sanem ol Wetnes blong hem oli go blong ‘talemaot dei ya we hem i makem finis blong givimbak.’ (Aesea 61:2) Faswan fasin ya blong seksekem wol, bambae i finis taem wol ya i lus long Amageden. Be bifo long taem ya, Jeova i stap hivimap ol “gudgudfala samting blong olgeta nesen”​—hemia ol man we tingting blong olgeta i stap daon, we oli olsem sipsip, blong oli mekem wok blong hem. (Jon 6:​44) “Bigfala kampani” ya naoia i stap ‘mekem tabu wok blong hem’ long yad blong haos wosip, we i minim wol ya.​—Revelesen 7:​9, 15.

20. ?Weples nao yumi save faenem samting we i sas moa i bitim olgeta narafala samting?

²⁰ Wok insaed long haos prea blong Jeova long saed blong speret, i karem blesing we i sas moa i bitim olgeta sas samting blong wol ya. (Proveb 2:​1-6; 3:13, 14; Matyu 6:​19-​21) Mo tu, Hagae 2:9 i talem se: “‘Glori blong haos ya bambae i bitim hemia blong fastaem,’ Jeova blong ol ami i talem. ‘Mo long ples ya, bambae mi putum pis,’ hemia tok blong Jeova blong ol ami.” ?Ol tok ya oli minim wanem tede? Nekiswan haf bambae i ansarem kwestin ya.

[Ol futnot]

Ol Kwestin Blong Tingtingbak

◻ ?Wanem fasin blong ol profet we yumi mas folem long saed blong nem blong Jeova?

◻ ?Olsem wanem strongfala mesej blong Jeova blong stanemap Isrel bakegen i leftemap tingting blong yumi?

◻ ?Wanem nambawan haos prea long saed blong speret we i stap mekem wok blong hem tede?

◻ ?Wanem ol grup we oli hivap folem stret oda, long ol yia 1800 mo 1900, mo wanem nambawan hop blong olgeta ya?

[Tok blong pija long pej 7]

Ol ami blong Jeova long heven oli lidim mo givhan long ol Wetnes blong hem long wol