Wan Nyufala Tul Blong Halpem Ol Man Blong Save Wanem We God i Wantem

“OL TOK blong hem we i isi, klia, mo i kaen, bambae oli mekem plante gudfala frut i kamaot bitim samting we yumi save tingbaot. Oli raetem ol haf blong hem long fasin we i no hadwok blong kasem save long olgeta, mo i mekem man i haremgud. From samting ya, eni man we i gat gudfala hat mo i wantem faenem God, bambae i mas talem se, ‘Tru, God i stap long medel blong yufala.’” (1 Korin 14:25) Hemia nao toktok we wan Wetnes blong Jeova long Taelan i talem, long saed blong nyufala buk ya, ?Wanem Samting We God i Wantem Yumi Blong Mekem? Watch Tower Sosaeti i prentem nyufala buk ya blong soemaot long Distrik Asembli ya, “Ol Man Blong Talemaot Pis Blong God,” we i kamaot long ol defren ples long 1996 mo 1997.

Buk ya we i gat 32 pej blong hem, i stap long kala, mo i stretgud blong mekem stadi blong Baebol wetem ol man. Hem i tokbaot ol stampa tijing blong Baebol. Ol tok blong hem oli isi mo oli sot, mo hem i eksplenem klia wanem samting we God i wantem yumi blong mekem. Ol man we oli ridim buk ya, bambae oli no faenem i hadwok blong kasem save long hem. ?Olsem wanem yu save yusum nyufala buk ya blong mekem Baebol stadi?

Yusum ol kwestin. I gat ol kwestin i stap long stat blong evri stadi. Afta long ol wanwan kwestin, i gat ol namba i stap, we oli makem stret paragraf we yu save faenem ansa blong kwestin ya long hem. Yumi save yusum ol kwestin ya bifo long stadi mo long en blong stadi, olsem wan samting blong givhan blong tijim ol man. Eksampel, long stat blong wan Baebol stadi wetem man long haos blong hem, maet yu askem ol kwestin ya blong save tingting blong hem. Sipos ol ansa blong hem oli rong, i moagud we yu no traem stretem olgeta wantaem nomo, be gohed blong stadi fastaem. Nao long en blong stadi ya, yu save askem ol kwestin ya bakegen, blong luk sipos naoia studen i save ol ansa we oli stret wetem Baebol.

Ridim ol vas long Baebol. Long ol wanwan stadi, i gat ol vas i stap blong sapotem ol trutok blong Baebol. Bighaf blong ol vas, oli no raetem ol tok blong olgeta, taswe i impoten blong pulum studen blong ridim ol vas ya long prapa Baebol blong hem. Hem i mas ridim mo tingting dip long Tok blong God, bifo we hem i save folem ol tok ya long laef blong hem.​—Josua 1:8.

Tokbaot ol pija. Buk ya i fulap long ol foto mo pija​—bitim 50 nambawan pija. Ol pija ya oli no jes blong mekem buk i naes nomo, be oli blong givhan blong tijim man tu. Wan eksampel, tufala laswan stadi (we tufala i stap long tu laswan pej) oli karem tufala stampa tok ya, “Halpem Ol Narafala Blong Mekem Ol Samting We God i Wantem” mo “Disisen Blong Yu Blong Mekem Wok Blong God.” Ol foto we oli stap long tufala pej ya, oli soemaot ol defren samting we wan man i mekem blong gru long saed blong speret. Fastaem, oli soem we hem i stap tekem jans blong prij, nao biaen, hem i prij long ol haos wanwan, biaen bakegen, hem i givim laef blong hem long God, mo laswan samting, hem i tekem baptaes. Taem yu pulum studen blong luklukgud long ol pija ya, yu givhan long hem blong luksave ol wanwan samting we hem i mas folem blong mekem wok blong God.

?Olsem wanem sipos wan man we i intres, i no save ridgud no maet i no save rid nating? Sosaeti i stap putum ol tok blong nyufala buk ya i go long kaset long plante defren lanwis. Kaset ya i gat olgeta tok we i stap insaed long buklet ya, wetem tok blong plante vas blong Baebol we oli no raetem fulwan insaed long hem. Oli folem plan ya long kaset: Oli ridim faswan kwestin, nao oli ridim paragraf (no ol paragraf) we i givim ansa long kwestin ya, mo oli ridim sam vas we oli no raetem fulwan insaed long haf ya. Nao oli ridim nekis kwestin, wetem paragraf mo ol vas we oli ansa long hem, mo i gogohed olsem. Ol studen oli save lesin long kaset ya taem oli mekemrere stadi blong olgeta. Yumi save yusum kaset ya tu, taem yumi mekem stadi wetem studen ya.

Olgeta we oli stap long asembli ya oli wantem tumas blong yusum nyufala buk ya long wok blong prij. Eksampel, long Yunaeted Stet, sam dei nomo afta we tu paenia (olgeta we oli mekem wok blong prij fultaem) oli kasem buk ya, oli givim i go long wan yangfala man mo woman blong hem, we tufala paenia ya i stap visitim tufala. Taem man mo woman ya tufala i lukluk nem blong ol stadi insaed long buk ya, tufala i intres tumas long haf ya, “Ol Fasin We God i No Laekem Nating.” Yangfala woman ya i talem se: “Long ful laef blong mi, mi kasem tijing se God i no save gat fasin ya blong no laekem nating wan samting​—hem i fulap long lav nomo. Hemia faswan samting we bambae mi ridim.” Taem tufala paenia ya oli kambak long nekis wik, yangfala woman ya i talem se: “Mi stap ridim nyufala buk ya. I hadwok tumas blong mekem olgeta samting we mitufala i mas mekem. Jeova i no glad long mitufala​—mitufala i no mared. Be mitufala i mekem wan disisen finis. Mitufala i plan blong mared nekis wik long Fraede.” Tufala ya oli holem tufala paenia ya, mo oli gohed blong talem se: “Mitufala i sore from we mitufala i no save mekem stadi oltaem wetem yufala, be disisen blong mitufala blong stretem bisnes ya i olsem we mitufala i lego wan bigfala hevi samting we mitufala i stap karem.”

Yes, tekem olgeta jans blong yusum nyufala buk ya ?Wanem Samting We God i Wantem Yumi Blong Mekem? Hem i wan nambawan tul blong halpem ol narafala blong kasem save long samting we God i wantem olgeta blong mekem.

[Tok blong pija long pej 17]

?Olsem wanem bambae yu yusum nyufala buk ya?