Trutok i Mekem Yumi Fri

LONG Yunaeted Stet, bitim wan milyan man oli stap long kalabus. Kolosap tri taosen long ol man ya, kot i jajem olgeta finis se oli mas ded. Traem tingbaot sipos yu yu wan long ol man ya. ?Bambae yu harem olsem wanem? I tru, yu harem nogud tumas taem yu tingbaot samting ya. Be, long wan fasin, olgeta man oli fesem samting ya. Baebol i talem se: “Olgeta evriwan oli mekem nogud finis, mo oli stap longwe long ol gudgudfala fasin blong God.” (Rom 3:​23) Yes, from we yumi pikinini blong Adam, yumi stap “kalabus” long sin. (Rom 5:​12) Evri dei, yumi harem paoa blong sin ya we i stap holemtaet yumi, i sem mak olsem Kristin aposol Pol, we i raetem se: “Mi luk we rabis fasin ya we i stap wok long laef blong mi, hem i narafala. Mo narafala fasin ya i agens long Loa ya blong God, we long tingting blong mi, mi glad tumas long hem. Narafala fasin ya i stap mekem mi, olsem we mi mi slef blong fasin blong sin, we i stap wok oltaem long tingting blong mi.”​—Rom 7:​23.

From we yumi sinman, i olsem we oli jajem yumi finis se yumi mas ded, from we Baebol i talem se: “Pei we ol man bambae oli kasem, from we oli stap mekem sin, hemia we bambae oli ded from.” (Rom 6:​23) Wan man blong raetem Ol Sam, Moses, i tru nomo taem i talem long saed blong laef blong yumi, se: “Yumi save kasem sevente yia​—sipos bodi blong yumi i strong, yumi save kasem eite. Be olgeta yia ya oli fulap long trabol nomo, yumi stap harem nogud nomo. Laef blong yumi i finis kwiktaem, nao yumi lus olgeta.”​—Ol Sam 90:10, Today’s English Version; skelem wetem Jemes 4:​14.

Jisas i stap tingbaot we ol man oli stap kalabus long sin mo ded, taem hem i talem long ol man blong hem se: “Trutok ya bambae i mekem yufala i friman.” (Jon 8:​32) Jisas i talem ol tok ya blong givim hop long ol man blong hem, hop blong samting we i moa gud, i bitim we oli kamfri long rul blong Rom. !Hem i stap givim long olgeta, jans blong kasem fogif blong sin mo kamfri long ded! ?Olsem wanem hem i save givim samting ya long olgeta? Jisas i talem long olgeta se: “Sipos mi, mi Pikinini blong God, mi mekem yufala i fri, hemia yufala i friman tru.” (Jon 8:​36) Yes, taem “Pikinini blong God,” Jisas, i givim laef blong hem, hem i kam olsem wan sakrifaes blong kavremap sin, we i pembak samting we Adam i lusum. (1 Jon 4:​10) Samting ya i openem rod blong olgeta man we oli obei, blong oli kamfri long sin mo ded. Pikinini blong God, wan nomo we hem i gat, i ded, blong ‘olgeta man we oli bilif long hem, bambae oli no save lus, oli gat laef we i no save finis.’​—Jon 3:​16.

Taswe, Jisas Kraes nao i stampa blong trutok we i save mekem yumi fri. Olgeta we oli folem hem, oli gat hop blong kamfri long sin mo ded taem Kingdom blong God i rul fulwan long wol ya. Naoia tu, olgeta we oli folem trutok long Tok blong God, oli kasem trufala fasin fri. ?Long wanem rod?

Fri Long Fraet Long Ol Dedman

Plante milyan man tede, oli fraet long ol dedman. ?From wanem? From we skul blong olgeta i bin tijim olgeta se taem man i ded, sol i aot long bodi nao i go laef long ples blong ol speret man. Hemia nao from wanem sam kantri oli gat kastom ya se, taem wan man i ded, ol famle blong hem oli stap kolosap long bodi blong dedman blong sam dei mo sam naet bifo we oli berem hem. Plante taem, kastom ya i joen wetem fasin blong singsing long bigfala voes mo blong kilim tamtam. Ol man we oli stap krae long dedman ya, oli bilif se kastom ya bambae i mekem dedman ya i glad, mo blokem speret blong hem blong i no kambak blong spolem olgeta we oli laef. Ol gyaman tijing blong Krisendoma long saed blong ol dedman, oli sapotem kastom ya mo mekem ol man oli strong moa blong folem.

Be, Baebol i talem trutok long saed blong ol dedman. Hem i talem klia se sol hem i yu, i no wan samting we i haed insaed long bodi blong yu, we i gohed blong laef afta long ded. (Jenesis 2:7; Esikel 18:4) Mo tu, ol dedman oli no stap harem nogud long wan helfaea, mo oli no go long ples blong ol speret man, we oli save spolem ol man we oli laef. Baebol i talem se: “Ol dedman oli no save wan samting nating. . . . I no gat wok no plan no save no waes long Seol [beregraon], ples ya we bambae yu yu go long hem.”​—Eklesiastis 9:​5, 10.

Ol trutok ya blong Baebol oli mekem plante man oli fri finis long fraet long saed blong ol dedman. Oli no moa givim ol sakrifaes we oli sas, blong kwaetem ol olfala bubu blong olgeta we oli ded finis. Mo oli no moa wari se olgeta we oli bin laekem olgeta tumas nao oli ded, oli stap harem nogud long strong panis we oli stap kasem from sin blong olgeta. Oli lanem finis se Baebol i givim wan nambawan hop long saed blong olgeta we oli ded. Yes, Baebol i talem se long stret taem we God i makemaot finis, ‘bambae ol man oli laef bakegen long ded, ol man we oli stret, wetem ol man we oli no stret.’ (Ol Wok 24:15; Jon 5:​28, 29) Taswe naoia, ol dedman oli stap spel nomo, i olsem we oli slip ded.​—Skelem wetem Jon 11:11-​14.

Taem yumi kasem save long trutok long saed blong ol dedman mo hop ya blong laef bakegen, yumi kamfri long tingting ya se man i no moa gat hop afta we hem i ded. Hop ya i givhan long wan papa mo mama long Yunaeted Stet, taem boe blong tufala we i gat fo yia nomo, i ded long wan akseden. Mama blong hem i talem se: “I gat wan hol long laef blong mitufala mo i no gat wan samting i save blokem, go kasem taem we bambae mitufala i luk boe blong mitufala bakegen, taem hem i laef bakegen long ded. Mitufala i save se soa we mitufala i gat, hem i no blong olwe, from we Jeova i promes se bambae hem i ravemaot wora blong ae blong yumi ya we yumi stap krae from ded.”​—Revelesen 21:​3, 4.

Kam Fri Long Fraet Long Saed Blong Fyuja

?Wanem bambae i hapen long fyuja? ?Bambae wol blong yumi i lus long faea long wan nyuklia faet? ?Bambae ol doti we man i sakem long win, wora, mo graon, i mekem se wol ya i kam wan ples we ol laef samting oli no moa save stap long hem? From we ol gudfala fasin oli stap lus, ?samting ya i minim se bambae i no moa gat loa mo bambae ol samting oli olbaot? Hemia ol kwestin we oli mekem plante man tede oli fraet tumas.

Be, Baebol i mekem yumi fri long ol nogud fraet ya. Hem i promes long yumi se, “wol ya i stap stanap blong olwe.” (Eklesiastis 1:4) Jeova i no wokem wol blong yumi, jes blong luk we ol rabis man oli stap spolem. (Aesea 45:18) Jeova i wokem wol ya blong i kam wan paradaes, wan ples blong olgeta man oli joengud long hem olsem wan famle. (Jenesis 1:​27, 28) Stampa tingting blong hem i no jenis. Baebol i talem se bambae God i “spolem ol man ya we oli stap spolem wol.” (Revelesen 11:18) Baebol i talem se, afta long samting ya, “ol man we tingting blong olgeta i stap daon, bambae oli tekem graon ya i blong olgeta. Bambae oli harem gud, from we oli stap long pis, mo oli gat plante samting.”​—Ol Sam 37:11.

Yumi save trastem promes ya, from we God i no stap gyaman. Jeova i yusum profet blong hem blong talem se: “Tok we i kamaot long maot blong mi bambae i no save kambak long mi sipos i no gat frut blong hem, be bambae i kamaot olsem we mi wantem, mo bambae i kamtru olsem we mi mi talem.” (Aesea 55:11; Taetas 1:2) From samting ya, yumi save lukluk i go long fyuja wetem bilif se promes blong God long Baebol, long 2 Pita 3:​13, bambae i kamtru: “God i promes finis blong putum nyufala skae mo nyufala wol, we stret fasin nomo bambae i stap long hem. Mo yumi stap wet blong ol nyufala samting ya.”

Fri Long Fraet Blong Man

Baebol i givim ol nambawan eksampel long yumi long saed blong ol man mo woman we oli soem fasin blong no fraet taem oli mekem wosip long God. Nem blong sam long olgeta ya, hemia Gideon, Barak, Debora, Daniel, Esta, Jeremaea, Abigel, mo Jael. Ol man mo woman ya we oli gat strong bilif, oli soem sem tingting we man blong raetem Ol Sam i gat. Hem i raetem se: ‘Mi mi trastem God, nao bambae mi no save fraet. ?Wanem samting we man nomo i save mekem long mi?’​—Ol Sam 56:11.

Long faswan handred yia, aposol Pita mo Jon tufala i soem strong tingting olsem, taem gavman i givim oda long tufala blong no moa prij. Tufala i ansa, se: “Mifala i no save stap kwaet. Mifala i mas gohed blong talemaot ol samting ya we mifala i luk long ae blong mifala, mo we mifala i harem long sora blong mifala.” From we Pita mo Jon, tufala i stanap strong, samtaem biaen oli putum tufala long kalabus. Afta we wan merikel i mekem tufala i fri, tufala i statem wok blong tufala bakegen. Tufala i gohed blong ‘talemaot tok blong God, we tingting blong tufala i strong.’ Smoltaem biaen, oli mekem Pita mo ol narafala aposol oli pas long kot blong ol man Jyu, Sanhedrin. Hae pris i talem long olgeta, se: “Mifala i tok strong long yufala finis, se bambae yufala i no moa yusum nem blong man ya blong tijim ol man. ?Be naoia olsem wanem? Yufala i mekem we ples ya Jerusalem i fulap finis long ol tok blong yufala.” Pita mo ol narafala aposol oli ansa se: “Mifala i mas obei long God, mifala i no save obei long ol man nomo.”​—Ol Wok 4:​16, 17, 19, 20, 31; 5:​18-​20, 27-​29.

Long wok ya blong talemaot gud nyus blong Kingdom blong God, ol Wetnes blong Jeova tede oli traehad blong wok strong olsem ol Kristin long faswan handred yia. Plante yangfala tu, we oli stap wetem olgeta, oli soem se oli no fraet, taem oli tokbaot bilif blong olgeta long ol narafala. Tingbaot sam eksampel.

Stacie i wan yangfala we i no kasem 20 yia yet. Hem i wan gel blong sem. Taswe, fastaem i strong tumas long hem blong tokbaot bilif blong hem long ol narafala. ?Hem i mekem wanem blong winim fasin ya blong sem? Hem i talem se: “Mi mi stadi long Baebol mo mi mekem sua se mi kasem save long samting we mi stap tokbaot. Samting ya i mekem i moa isi long mi, mo i mekem se tingting blong mi i kam strong moa.” Nyuspepa long ples blong hem i tokbaot gudfala fasin blong Stacie. Store long nyuspepa ya we wan tija long skul blong Stacie i raetem, i talem se: “I luk olsem se bilif [blong Stacie] i givim paoa long hem blong faet agensem plante traem we bighaf blong ol yangfala oli kasem. . . . Hem i harem se wok blong God i mas stap long fasples long tingting blong hem.”

Tommy i stat blong kasem save long Baebol taem hem i gat faef yia nomo, from we papa mama blong hem tufala i tijim hem. Nating se hem i yangfala nomo, hem i stanap strong long saed blong trufala wosip. Taem ol yangfala fren blong hem long klas oli stap dro ol pija we i makem ol holide, Tommy i dro pija blong Paradaes we God i promes long hem. Taem Tommy i gat bitim 13 yia, hem i luksave se plante studen oli stap askem kwestin long tingting blong olgeta long saed blong bilif blong ol Wetnes blong Jeova. Tommy i no satem maot blong hem from fraet, be hem i askem wan tija sipos hem i save mekem ful klas i kam wanples, blong oli askem kwestin mo hem i givim ansa long olgeta. Olsem nao, hem i save ansa long evri kwestin blong olgeta wantaem. Tija i agri, mo Tommy i givim wan nambawan wetnes.

Taem Markietta i gat 17 yia, hem i gat wan nambawan jans blong tokbaot bilif blong hem long sam narafala long klas blong hem. Hem i talem se: “Tija i askem mifala blong givim tok. Mi jusum sam poen blong tokbaot long buk ya Questions Young People Ask​—Answers That Work.b Mi tekem faef japta blong buk ya mo mi raetem nem blong ol japta ya long blakbod. Mi askem long klas blong jusum ol japta we oli ting se oli impoten bitim ol narafala.” Samting ya i statem wan storeyan wetem olgeta long klas. Markietta i talem se: “Mi soem buk ya long klas, mo plante studen oli askem wan buk olsem. Tija blong mi tu i talem se hem i wantem wan.”

Trutok i Save Mekem Yu Yu Fri

Olsem yumi luk finis, trutok blong Baebol i gat paoa blong mekem olgeta man oli fri, ol yangfala mo ol olfala, we oli stadi long hem mo folem mesej blong hem. Hem i mekem olgeta oli fri long fraet long saed blong ol dedman, fraet long saed blong fyuja, mo fraet long man. Antap long ol samting ya, ransom blong Jisas bambae i mekem ol man we oli obei oli fri long sin mo ded. !Yumi glad tumas blong laef foreva long paradaes long wol, we yumi no moa kalabus long fasin blong sin we yumi bon wetem!​—Ol Sam 37:29.

?Olsem wanem? ?Yu yu wantem lanem moa long saed blong ol blesing we God i promes blong givim? Sipos yes, ?yu mas mekem wanem? Jisas i talem se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” (Jon 17:3) Ale, sipos yu wantem kasem fasin fri ya we Jisas i bin promes long ol disaepol blong hem, yu mas kasem save long saed blong Jeova God mo Pikinini blong hem. Yu mas kasem save long samting we God i wantem yu blong mekem. Biaen, yu mas mekem ol samting ya long laef blong yu, from we Baebol i talem se: “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem i stap we bambae i no save lus samtaem.”​—1 Jon 2:​17.

[Ol futnot]

[Tok blong pija long pej 7]

Aninit long Kingdom blong God, ol man bambae oli kamfri long sin mo ded