“God i Laekem Yumi Tumas Olsem”

“From we God i laekem yumi tumas olsem, yumi tu i mas laeklaekem yumi.”​—1 JON 4:11.

1. Long Maj 23 afta we san i godaon, ?from wanem plante milyan man bambae oli kam long ol Haos Kingdom mo ol narafala ples blong mekem miting, raon long wol?

LONG Sande, Maj 23, 1997, afta we san i godaon, bambae i gat bitim 13 milyan man long olgeta ples blong wol, we oli joen tugeta long ol Haos Kingdom mo ol narafala ples we ol Wetnes blong Jeova oli stap yusum blong mekem miting. ?From wanem oli joen wanples olsem? From we nambawan fasin blong God blong soemaot bigfala lav long olgeta man, i gat paoa long olgeta. Jisas Kraes i pulum tingting blong yumi i go long nambawan fasin ya blong God blong soemaot lav, i se: “God i laekem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”​—Jon 3:​16.

2. ?Wanem sam kwestin we i gud blong yumi evriwan i askem long saed blong tangkyu we yumi gat from lav blong God?

² Taem yumi tingbaot lav we God i bin soemaot, i gud yumi askem se, ‘?Mi mi rili gat tangkyu from samting we God i bin mekem? ?Rod we mi stap folem long laef blong mi i soemaot se mi gat tangkyu olsem?’

‘God i Stampa Blong Lav’

3. (a) ?From wanem yumi no sapraes blong luk se God i soemaot lav? (b) ?Olsem wanem yumi luk paoa mo waes blong God long ol samting we hem i wokem?

³ Yumi no sapraes long fasin ya blong God blong soemaot lav, from we ‘God hem i stampa blong lav.’ (1 Jon 4:8) Lav hem i bigfala fasin blong God. Taem hem i stap rerem wol ya blong man i laef long hem, hem i stanemap ol bigfala hil mo i hivimap wora i kam fulumap ol lugun mo solwora. Samting ya i soemaot bigfala paoa we yumi sapraes long hem. (Jenesis 1:​9, 10) God i wokem plan ya we wora i stap go antap long klaod mo i foldaon bakegen olsem ren. Hem i mekem plan blong ol tri oli pulum rabis win mo givimaot gudfala win we ol man mo anamol oli pulum. Hem i wokem ol smosmol laef samting we ae blong yumi i no naf blong luk, wetem ol defdefren kaen gras mo tri, we oli karem ol kemikol blong graon mo tanem i kam kakae we man i save tekem blong mekem bodi blong hem i stap laef. Hem i wokem samting olsem wan klok insaed long bodi blong yumi, we i laenap wetem ol dei mo manis long Wol ya. Olgeta samting ya oli soemaot bigfala waes blong hem. (Ol Sam 104:24; Jeremaea 10:12) Be, fasin we ol samting raonabaot long yumi oli soemaot klia moa, hemia lav blong God.

4. Long ol samting we God i wokem raonabaot long yumi, ?wanem samting i soemaot lav blong God we yumi evriwan i save lukluk mo gat tangkyu from?

⁴ Taem yumi kakae wan naesfala frut we i raef mo i switgud, gudfala tes blong hem i soemaot long yumi se God i gat lav. I klia se hem i no wokem frut ya jes blong givhan long bodi blong yumi nomo, be hem i mekem blong yumi haremgud long hem tu. Ae blong yumi i save luk nambawan pruf blong lav blong God tu. Hemia taem yumi luk ol naesfala kala blong san we i stap godaon, skae we i fulap long ol sta long naet we i kliagud, ol defdefren kaen flaoa mo nambawan kala blong olgeta, ol narakaen pleplei blong ol smol anamol, mo naesfala smael blong ol fren blong yumi. Nus blong yumi i mekem yumi tingbaot lav ya, taem yumi pulum win we i fulap long gudfala smel blong ol flaoa, long ol manis jes bifo we hot taem i kam. Sora blong yumi i mekem yumi tingbaot lav ya, taem yumi lesin long noes blong wan wotafol, singsing blong ol pijin, mo voes blong olgeta we yumi laekem olgeta tumas. Yumi haremsave lav ya taem wan we yumi laekem hem tumas, i holem yumi. Samfala anamol oli naf blong lukluk, harem, mo smelem samting we man i no naf blong lukluk, harem, mo smelem. Be ol man, we God i wokem olgeta olsem stret pija blong hem, oli naf blong haremsave lav blong God. Ol anamol oli no naf blong mekem samting ya.​—Jenesis 1:​27.

5. ?Olsem wanem Jeova i soemaot bigfala lav long Adam mo Iv?

⁵ Taem Jeova God i wokem faswan man mo woman, Adam mo Iv, hem i putum plante samting raonabaot long tufala we oli soemaot lav blong hem. Hem i planem wan garen, we i paradaes, mo i mekem olkaen tri oli gru long hem. Hem i mekem wan reva blong givim wora long garen ya, mo i flasem garen ya wetem olkaen pijin mo anamol we tufala i save glad blong lukluk olgeta. Hem i givim olgeta samting ya long Adam mo Iv, olsem wan haos blong tufala. (Jenesis 2:​8-​10, 19) Jeova i mekem long tufala olsem we tufala i pikinini blong hem, olsem we tufala i blong bigfala famle blong hem long heven mo wol. (Luk 3:​38) Afta we Papa blong tufala ya we i stap long heven i mekem garen blong Iden olsem wan eksampel blong paradaes, hem i givim wok long faswan man mo woman ya blong mekem ful wol i kam Paradaes. Mo ful wol i mas fulap wetem ol pikinini blong tufala ya.​—Jenesis 1:​28.

6. (a) ?Wanem tingting blong yu long saed blong fasin rebel we Adam mo Iv tufala i bin mekem? (b) ?Olsem wanem yumi save soemaot se samting we i kamaot long Iden i tijim yumi long sam samting, mo se save ya i bin givhan long yumi?

⁶ Be, smoltaem biaen, Adam mo Iv tufala i kasem wan samting we i traem fasin obei blong tufala, wan traem long fasin fasgud blong tufala long God. Fastaem, wan, mo biaen narawan, i mestem blong soemaot tangkyu from lav we tufala i bin kasem. Samting we tufala i mekem i nogud tumas. !I no gat eskyus nating from fasin ya! From samting ya, tufala i lusum gudfala fasin fren we tufala i gat wetem God. Hem i sakemaot tufala long famle blong hem, mo i ronemaot tufala long garen blong Iden. Tede, yumi stap kasem yet ol frut blong sin blong tufala ya. (Jenesis 2:​16, 17; 3:​1-6, 16-​19, 24; Rom 5:​12) ?Samting ya i tijim yumi long sam samting? ?Yumi stap mekem wanem blong soemaot tangkyu from lav blong God? ?Ol disisen we yumi mekem evri dei oli soemaot se yumi gat tangkyu from lav blong hem?​—1 Jon 5:3.

7. Nating se Adam mo Iv tufala i no obei, ?olsem wanem Jeova i soemaot lav long ol pikinini blong tufala?

⁷ Faswan papa mama ya blong yumi, tufala i no soemaot tangkyu nating long God from olgeta samting we hem i mekem long tufala. Be, samting ya i no blokem God blong gohed blong soemaot lav. God i sore long olgeta man we oli no bon yet long taem ya, wetem yumi we yumi laef tede tu. Taswe, hem i letem Adam mo Iv blong gat pikinini bifo we tufala i ded. (Jenesis 5:​1-5; Matyu 5:​44, 45) Sipos God i no bin mekem olsem, bambae i no gat wan long yumi i laef tede. Mo tu, sloslou, Jeova i soemaot samting we hem i wantem mekem long fyuja. Samting ya i givim hop long olgeta pikinini blong Adam we oli bilif long hem. (Jenesis 3:​15; 22:18; Aesea 9:​6, 7) Insaed long plan blong hem, hem i mekem rod blong givim jans long ol man blong olgeta nesen, blong kasembak samting we Adam i lusum, hemia laef we i stretgud, olsem ol man we God i glad blong tekem olgeta oli kam insaed long bigfala famle blong hem long heven mo long wol. Hem i mekem olsem, taem hem i mekem rod blong wan ransom sakrifaes.

?From Wanem i Nidim Wan Ransom?

8. ?From wanem God i no save talem nomo se Adam mo Iv tufala i mas ded, be ol pikinini blong tufala bambae oli no ded?

⁸ ?I rili nidim we wan man i mas ded blong pem ransom ya? ?From wanem God i no jes talem nomo se, Adam mo Iv tufala i mas ded from fasin rebel blong tufala, be olgeta pikinini blong tufala we oli obei long God oli save laef blong olwe? Long tingting blong ol man we oli no tingting dip tumas, ating rod ya i gud. Be, Jeova i ‘laekem tumas ol gudfala fasin, mo stret fasin blong jajem man.’ (Ol Sam 33:5) Adam mo Iv tufala i karem pikinini afta we tufala i sin. Taswe, i no gat wan long ol pikinini ya we i stretgud olgeta taem hem i bon. (Ol Sam 51:5) Olgeta evriwan oli bon wetem sin, mo panis blong sin hemia ded. Sipos Jeova i no bin folem rul ya, ?hem i givim wanem kaen eksampel long famle blong hem long heven mo wol? Hem i no save lego ol stret rul blong hem. Hem i folem ol rul blong jajem man long stret fasin. I no gat wan man we i save pruvum long stret rod, se fasin we God i yusum blong stretem bisnes ya, i rong.​—Rom 3:​21-​23.

9. Folem stret fasin blong God blong jajem man, ?i nidim wanem kaen ransom?

⁹ Taswe, ?olsem wanem blong mekem wan stret rod blong sevem ol pikinini blong Adam we oli soemaot lav mo fasin obei long Jeova? Sipos wan man we i stretgud olgeta i ded olsem wan sakrifaes, folem stret fasin blong jajem man, stretfala laef ya i naf blong kavremap sin blong olgeta we oli bilif mo agri long ransom sakrifaes ya. Sin blong wan man, hemia Adam, i mekem se olgeta man oli kasem sin. Taswe, blad blong wan narafala stret man, we i sem mak olsem Adam, bambae i naf blong stretem bisnes ya long stret fasin. (1 Timote 2:​5, 6) ?Be long weples nao, bambae God i faenem wan man olsem?

?Praes Ya i Bigwan Olsem Wanem?

10. ?From wanem ol pikinini blong Adam oli no naf blong givim wan ransom olsemia?

¹⁰ I no gat wan pikinini blong sinman ya Adam, we i naf blong pembak gudfala laef ya we Adam i lusum. “I no gat man i save pemaot laef blong hem blong bambae i no go long beregraon. Man i no save pem laef blong hem long God blong bambae i stap laef olwe, from we praes blong laef blong man i bigfala tumas, olgeta samting we man i save givim, neva bambae i naf blong samting ya.” (Ol Sam 49:7-9) Be, Jeova i no livim ol man oli stap we oli no gat hop. Wetem fasin sore, hem i mekem wan rod blong sevem olgeta.

11. ?Long wanem rod Jeova i mekemrere wan laef we i stretgud olgeta olsem ransom ya we man i nidim?

¹¹ Jeova i no sanem wan enjel i kam long wol ya we i jenisim bodi blong hem i kam man, nao enjel ya i gyaman se hem i ded, be hem i rili gohed blong laef olsem wan speret man long heven. No gat. God i mekem wan merikel we Hem nomo, olsem Man we i Wokem Olgeta Samting, i naf blong mekem. Hem i tekem paoa blong laef mo olgeta fasin blong wan pikinini blong hem long heven, mo i putum i go long bel blong wan woman, hemia Meri, pikinini blong Heli, long laen blong Juda. Paoa blong God, hemia tabu speret blong hem, i lukaotgud long pikinini ya we i stap gru insaed long bel blong mama blong hem, nao pikinini ya i stretgud olgeta taem hem i bon. (Luk 1:​35; 1 Pita 2:​22) Nao man ya i naf blong pem praes we i stret blong wan ransom, we i save laenap fulwan wetem ol rul blong God long saed blong stret fasin blong jajem man.​—Hibrus 10:5.

12. (a) ?Long wanem fasin Jisas hem i ‘wan Pikinini nomo blong God’? (b) ?Olsem wanem fasin ya blong God blong sanem pikinini blong hem blong pem ransom, i soemaot klia lav we Hem i gat long yumi?

¹² ?God i givim wok ya long weswan long ol milyan milyan pikinini blong hem long heven? Hem i givim long wan we Baebol i talem se hem i “wan pikinini nomo blong hem.” (1 Jon 4:9) Tok ya i no makemaot man ya taem hem i bon olsem wan man long wol, be i stap tokbaot hem taem hem i laef long heven bifo. Hem wan nomo, Jeova i wokem we i no gat narafala man i givhan long hem. Hem i fasbon blong olgeta samting we God i wokem. Hem i man ya we God i yusum blong wokem olgeta narafala laef samting. Ol enjel oli pikinini blong God, olsem we Adam i pikinini blong God. Be, Baebol i tokbaot Jisas se, hem i gat ‘bigfala paoa from we hem nomo i stret pikinini blong Papa blong hem.’ Mo Baebol i talem tu se, oltaem hem i “stap wetem Papa blong hem.” (Jon 1:​14, 18) Fasin fren blong hem wetem Papa blong hem i mekem tufala i joengud, tufala i trastem tufala fulwan, mo tufala i gat strong filing long tufala. Jisas i laekem olgeta man olsem Papa blong hem i laekem ol man. Proveb 8:30, 31 i soemaot filing we Papa blong hem i gat long Pikinini ya blong hem, mo filing blong Pikinini long saed blong olgeta man: “Mi mi man ya we hem [Jeova] i laekem mi long spesel fasin evri dei, mo mi mi glad oltaem wetem hem, . . . mo ol samting we mi [Jisas, Nambawan Man blong Wok blong Jeova, stampa blong waes] mi laekem tumas, hemia long saed blong ol pikinini blong man.” Pikinini ya nao we i sas tumas, God i sanem i kam long wol olsem wan ransom sakrifaes. !Taswe, tok blong Jisas i gat bigfala mining se: “God i laekem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis”!​—Jon 3:​16.

13, 14. ?Store blong Baebol long saed blong Ebraham we i rere blong kilim Aesak i ded olsem wan sakrifaes, i mas halpem yumi blong gat tangkyu long wanem samting we Jeova i mekem? (1 Jon 4:​10)

¹³ Blong halpem yumi blong kasem save lelebet long bigfala mining blong samting ya, tingbaot samting we i hapen samwe 3,890 yia i pas finis, longtaem bifo we Jisas i kam long wol. God i givim oda long Ebraham se: “Pikinini ya blong yu Aesak, we i wan nomo we yu yu gat, mo we yu laekem hem tumas, yu tekem hem, yu go long ples ya Moria. Bambae mi soemaot wan hil long ples ya long yu, nao long hil ya, bambae yu kilim pikinini ya, yu bonem hem long faea, blong mekem sakrifaes long hem.” (Jenesis 22:​1, 2) Wetem bilif, Ebraham i obei. Traem tingbaot sipos yu nao yu Ebraham. ?Olsem wanem sipos hemia pikinini blong yu, wan pikinini nomo we yu yu gat mo we yu laekem hem tumas? ?Wanem filing blong yu taem yu stap katem faeawud blong mekem sakrifaes, taem yu stap mekem trep ya blong plante dei blong go long ples ya Moria, mo taem yu putum pikinini boe blong yu long olta?

¹⁴ ?From wanem wan papa mo mama we i gat sore i gat filing olsemia? Jenesis 1:​27 i talem se God i wokem man i olsem pija blong Hem. Ol filing blong lav mo sore we yumi gat, oli soemaot long fasin we i smol nomo, bigfala lav mo sore blong Jeova. Long saed blong Ebraham, God i blokem hem, blong mekem se hem i no kilim Aesak i ded. (Jenesis 22:12, 13; Hibrus 11:17-​19) Be, long saed blong Jeova, hem i no blokem hem wan long las menet blong givim ransom sakrifaes ya, nating se hem mo Pikinini blong hem tufala i pem wan praes we i bigwan tumas blong mekem olsem. God i no mekem samting ya jes from we hem i harem se hem i mas mekem olsem, no gat. Hem i mekem samting ya blong soemaot kaengud fasin we i bigwan bitim mak, long ol man we oli no rili gud inaf blong kasem fasin ya. ?Yumi rili gat tangkyu fulwan from samting ya?​—Hibrus 2:9.

?Ransom i Openem Rod Long Wanem Samting?

15. ?Olsem wanem ransom i gat paoa long laef blong ol man long taem blong yumi?

¹⁵ Ransom ya we God i givim from lav blong hem, i gat bigfala paoa long laef blong olgeta we oli akseptem ransom ya mo bilif long hem. Bifo, olgeta ya oli stap longwe tumas long God from sin blong olgeta. Olsem Tok blong God i talem, bifo, olgeta ya oli ‘enemi blong God, from we tingting blong olgeta i agensem hem, mo fasin blong olgeta i nogud.’ (Kolosi 1:​21-​23) Be ‘from we Pikinini blong God i ded, olgeta ya oli kam olsem ol fren blong hem.’ (Rom 5:​8-​10) Olgeta we oli gat bilif long sakrifaes blong Kraes, oli jenisim ol fasin blong laef blong olgeta mo oli glad long fasin fogif we God i soem long olgeta. From samting ya, oli kasem blesing ya blong gat wan tingting we i no jajem olgeta.​—Hibrus 9:​14; 1 Pita 3:​21.

16. ?Wanem ol blesing we smol kampani i kasem from we oli bilif long ransom sakrifaes?

¹⁶ Jeova i givim wan nambawan blesing i go long wan smol grup blong olgeta ya, hemia smol kampani. Bambae oli joen wetem Pikinini blong hem long Kingdom blong heven, blong mekem stampa tingting we God i gat fastaem long saed blong wol ya, i kamtru. (Luk 12:32) Olgeta ya oli kamaot long ‘olgeta laen, olgeta lanwis, olgeta kantri, mo long olgeta kala, blong kam pris blong God blong yumi, mo bambae oli king, oli rul long olgeta man long wol.’ (Revelesen 5:​9, 10) Aposol Pol i raet long olgeta ya, i se: “Tabu speret ya we God i givim finis long yufala . . . i blong mekem yufala i pikinini blong God. Mo long paoa blong Speret ya, yumi stap singaot God se ‘Papa blong mifala.’ Speret ya blong God i kam joen long tingting blong yumi, blong talemaot we yumi pikinini blong God. Nao from we yumi pikinini blong hem, bambae yumi save kasem ol gudgudfala samting we God i putum olgeta oli tabu, se bambae oli blong ol man blong hem. Mo bambae yumi save joen long Kraes blong kasem haf long ol gudgudfala samting we God i putum olgeta oli tabu, se bambae oli blong Kraes.” (Rom 8:​15-​17) From we God i karem olgeta olsem ol pikinini blong hem, oli gat jans blong kasem nambawan fasin fren wetem hem bakegen we Adam i bin lusum. Be ol pikinini ya bambae oli gat jans tu blong kasem wok long heven​—wan samting we Adam i no gat bifo. !Taswe yumi no sapraes we aposol Jon i talem se: “Yufala i mas luklukgud long fasin ya blong Papa blong yumi, we hem i laekem yumi tumas, nao i singaot yumi se pikinini blong hem”! (1 Jon 3:1) Long olgeta ya, God i soemaot lav we i stanap long stret fasin (a·gaʹpe). Be tu, hem i soemaot kaengud fasin mo filing (phi·liʹa), hemia fasin we i mekem ol trufala fren oli joengud.​—Jon 16:27.

17. (a) ?Olgeta man we oli soemaot bilif long ransom, oli kasem wanem jans? (b) ?‘Fasin fri olsem ol pikinini blong God’ bambae i minim wanem long olgeta ya?

¹⁷ Jeova i givim jans long ol narafala tu, hemia olgeta we oli soemaot bilif long rod we God i mekem from gladhat blong hem, blong sevem man tru long Jisas Kraes. Olgeta oli gat jans blong kasem nambawan fasin fren wetem hem, we Adam i bin lusum. Aposol Pol i eksplenem se: “Olgeta samting we God i mekem [olgeta man we oli kamaot long Adam] oli stap wet, we oli wantem tumas blong luk we God bambae i soemaot ol pikinini blong hem [hemia se, oli stap wet long taem ya we bambae i kam klia se ol pikinini blong God we oli stap rul wetem Kraes long Kingdom blong heven, oli stap tekem aksin blong givhan long ol man]. God i jajem finis olgeta samting ya we hem i mekem, se oli mas kam nating [oli bon long sin mo bambae oli kasem ded nomo, mo i no gat rod blong oli save kamfri]. Mo hemia i no from we olgeta samting ya oli wantem olsem, i from we God i wantem olsem, be tingting blong God i stap yet. Naoia i olsem we olgeta samting ya we God i mekem oli stap panis, from we oli stap rotin nomo. Be long dei ya we God bambae i mekem ol pikinini blong hem oli fri olgeta long sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem.” (Rom 8:​19-​21) ?Fasin fri ya bambae i minim wanem? Bambae oli kamfri we oli no moa kalabus long sin mo ded. Bambae oli kam stretgud olgeta long tingting mo bodi. Bambae oli stap long Paradaes, mo bambae oli laef blong olwe, we oli save haremgud long fasin ya we oli stretgud olgeta, mo oli save soemaot tangkyu blong olgeta long Jeova, we hem nomo i trufala God. ?Mo olsem wanem olgeta samting ya bambae oli kamtru? From ransom sakrifaes blong stret Pikinini blong God, wan nomo we hem i gat.

18. Long Maj 23 afta we san i godaon, ?bambae yumi mekem wanem, mo from wanem?

¹⁸ Long Naesan 14, 33 K.T.,a long wan rum antap long wan haos long Jerusalem, Jisas i stanemap lafet blong tingbaot ded blong hem. Lafet ya we ol trufala Kristin oli mekem wan taem evri ya blong tingbaot ded blong hem, i wan impoten samting long laef blong olgeta. Jisas hem wan i bin givim oda ya se: “Yufala i mas stap mekem samting ya blong tingbaot mi bakegen.” (Luk 22:19) Long 1997, bambae oli mekem Memoriol ya afta we san i godaon long Maj 23 (hemia taem we Naesan 14 i stat). Long dei ya, i no gat wan samting we i impoten moa i bitim we yumi joen long Memoriol ya.

[Futnot]

?Bambae Yu Ansa Olsem Wanem?

◻ ?Olsem wanem God i bin soemaot bigfala lav long ol man?

◻ ?From wanem i nidim wan laef we i stretgud olgeta blong pem ransom blong ol pikinini blong Adam?

◻ ?Jeova i pem wanem bigfala praes blong givim ransom ya?

◻ ?Ransom ya i openem rod blong wanem samting i kamtru?

[Tok blong pija long pej 10]

God i givim stret Pikinini blong hem, wan nomo we hem i gat