Ples Blong Myusek Long Wosip Tede

SINGSING i wan presen we God i givim. Taem yumi singsing, yumi haremgud, mo Man we i wokem yumi i haremgud tu. Tru long singsing, yumi save soemaot filing blong yumi, filing blong sore mo filing blong glad. Antap long samting ya, tru long singsing, yumi save soemaot se yumi laekem, givim ona, mo presem Hemia we i Stampa blong ol singsing, Jeova.

I gat samwe long tri handred vas long Baebol we oli tokbaot myusek. Bighaf blong ol vas ya, oli tokbaot myusek we i joen wetem wosip blong Jeova. Fasin blong singsing i joen wetem glad tu​—i no glad blong ol man ya we oli singsing nomo, be glad blong Jeova tu. Man blong raetem Ol Sam i talem se: ‘Yumi mekem singsing blong presem hem. From we Jeova i stap glad long ol man blong hem.’​—Ol Sam 149:​3, 4.

?Be fasin blong singsing i impoten long wosip tede? ?Olsem wanem ol man blong Jeova tede oli save mekem Hem i glad taem oli singsing? ?Myusek i mas gat wanem ples long trufala wosip? Taem yumi faenemaot ples blong myusek long wosip long taem bifo, samting ya bambae i givhan long yumi blong ansa long ol kwestin ya.

Ples Blong Myusek Long Wosip Bifo

Faswan myusek we Baebol i tokbaot, i no joen stret wetem wosip blong Jeova. Jenesis 4:​21 i tokbaot Jubal, se hem nao i wokem ol faswan tul blong plei myusek, mo maet hem i statem wankaen bisnes long saed blong myusek. Be, bifo we God i wokem man, myusek i stap joen wetem wosip blong Jeova. Plante Baebol oli tokbaot we ol enjel oli stap singsing. Job 38:7 i tokbaot wan taem we ol enjel oli kraeaot from glad, mo oli singaot strong “from we oli haremgud tumas.” Taswe, Baebol i givim risen blong bilif se, singsing i joen wetem wosip blong Jeova longtaem bifo we Hem i wokem man.

Sam man blong raetem histri oli talem se taem ol man Hibru bifo oli plei myusek, oli plei ol wanwan not nomo, i no gat ol pat oli joen wetem ol not ya. Be, long hap, wan tul blong plei myusek we Baebol i tokbaot plante, man i save plei bitim wan not wantaem. Ating ol man we oli bin plei long hap, oli luksave se oli save mekem naesfala myusek taem oli plei ol defren not wantaem. I klia se, myusek blong olgeta i no olbaot nomo, be hem i samting we oli gat gudhan long hem. Mo taem yumi ridim ol naes vas mo store long Hibru haf blong Baebol, yumi luksave se myusek blong ol man Isrel i nambawan tumas. Yes, tingting we i pusum olgeta blong mekem myusek i hae moa, i bitim tingting we i kamaot long myusek blong ol nesen raonabaot.

Gudfala oda we oli folem insaed long haos prea bifo, i mekem se oli save gat ol nambawan man blong plei myusek, mo ol nambawan man blong singsing, we oli joen tugeta taem oli mekem wosip. (2 Kronikel 29:27, 28) Samfala “oli lidim olgeta,” samfala “oli gat gudhan blong plei myusek,” samfala oli “stap lan yet,” mo samfala “oli lidim ol man blong singsing.” (1 Kronikel 15:21; 25:​7, 8; Nehemaea 12:46) Man ya blong raetem histri, Curt Sachs, i tokbaot gudhan we oli gat long saed blong myusek. Hem i raetem se: “Ol man blong singsing mo blong plei myusek long Haos Prea long Jerusalem, oli soem se oli kasem nambawan tijing, save, mo oli gat gudhan long saed blong myusek. . . . I tru, yumi neva harem ol myusek blong bifo. Be, i gat pruf blong soem se ol myusek ya i gat paoa, i soem ona, mo oli gat gudhan long hem.” (The Rise of Music in the Ancient World: East and West, 1943, pej 48, 101, 102) Singsing blong Solomon i wan eksampel we i soem olsem wanem Hibru myusek i gat mining mo i nambawan. Hem i wan store we Solomon i talem long singsing, i sem mak olsem ol singsing long operaa tede. Oli givim nem blong singsing ya long Hibru hanraet se, “Singsing blong Ol Singsing,” i minim se, beswan singsing. Fasin blong singsing i wan impoten haf blong wosip blong ol man Isrel bifo. Mo singsing i wan gudfala rod blong soemaot strong filing blong presem Jeova.

Singsing Blong Ol Kristin Long Faswan Handred Yia

Ol faswan Kristin oli gohed blong joenem myusek wetem wosip blong olgeta. Oli yusum Ol Sam we oli kamaot long God. Mo tu, i luk olsem se oli wokem sam spesel myusek mo ol tok blong hem blong yusum long wosip. Oli soemaot rod olsem wanem blong wokem ol Kristin singsing tede. (Efesas 5:​19) Buk ya, The History of Music we Waldo Selden Pratt i raetem, i eksplenem se: “Singsing long wosip long pablik ples mo long haos, i wan kastom blong ol faswan Kristin. Long saed blong ol man Jyu we oli kam Kristin, oli gohed long kastom ya we oli folem long haos prea . . . Antap long Ol Sam long Hibru . . . , oltaem nyufala skul ya i wokem ol nyufala singsing. Ating fastaem, oli yusum ol rapsodi.”b

Jisas i soem se singsing i impoten. Taem hem i stanemap Lodsapa, maet hem mo ol aposol blong hem oli singim ol Halel. (Matyu 26:26-​30) Hemia ol singsing blong presem Jeova we oli stap long Ol Sam, mo we ol man oli singim long lafet blong Pasova.​—Ol Sam 113 kasem 118.

Paoa Blong Gyaman Wosip

Long taem ya we oli kolem Dak Ejes,c ol myusek long ol jyos i kam ol singsing blong soem sore. Samwe long yia 200 K.T.,d Clement blong Aleksandria i talem se: “Yumi nidim wan tul nomo: hemia voes blong man we i gat pis mo i givim ona, i no nidim ol hap, tamtam, bambu, mo ol pupu.” Oli putum rul se ol myusek blong jyos oli mas ol voes nomo. Oli kolem samting ya se, fasin blong singsing we i soem sore, no ol isi singsing. Buk ya, Our Musical Heritage, i talem se: “Kolosap fote yia afta we oli bildim Konstantinopol, Kaonsel blong Laodisia (367 K.T.) i putum tabu long fasin blong kongregesene i joen long singsing wetem ol man we oli plei myusek long jyos. Long ol faswan jyos, oli singsing nomo.” (Mifala nomo i putum italik.) Rul ya i no stanap long fasin blong faswan Kristin Skul.

Long Dak Ejes, ol man oli no save wanem ya Baebol, mo tu oli no save kasem wan Baebol. Ol Kristin we oli no fraet blong gat wan Baebol mo blong ridim, ol man oli ronem olgeta, mo oli kilim olgeta oli ded. From samting ya, yumi no sapraes se kolosap fasin ya blong singsing presem God i lus olgeta long taem ya we ol man oli stap long tudak. Tingbaot, sipos ol man oli no gat jans blong kasem wan Baebol, ?olsem wanem bambae oli save se 10 pesen blong Baebol i fulap long ol singsing? ?Hu bambae i talem long olgeta se Jeova i givim oda long ol man we oli wosip long hem, blong ‘sing wan nyufala singsing long Hem, singsing blong presem Hem long medel blong ol man we oli stap holemstrong long hem’?​—Ol Sam 149:1.

Putumbak Myusek Long Stret Ples Long Wosip

Ogenaesesen blong Jeova i mekem plante samting blong putumbak myusek mo singsing long stret ples long wosip. Eksampel, Zion’s Watch Tower blong Febuwari 1, 1896, i fulap long ol singsing nomo. Nem blong hem, “Ol Hapi Singsing Blong Saeon Long Moning.”

Long 1938, kolosap se oli stopem fasin blong singsing long ol miting blong kongregesen. Be smoltaem biaen, oli luk se i waes blong folem eksampel mo rod we ol aposol oli soemaot. Long distrik asembli long 1944, F. W. Franz i givim tok ya, “Singsing Long Saed Blong Wok Blong Kingdom.” Hem i soem se, longtaem bifo we God i wokem man, ol enjel blong God long heven oli singsing blong presem Jeova. Hem i talem se: “I stret mo i mekem God i haremgud taem ol man blong Hem long wol ya oli leftemap voes blong olgeta blong singsing.” Afta we hem i tokbaot moa from wanem i stret blong singsing long wosip, hem i talemaot se Sosaeti i wokem nyufala buk ya Kingdom Service Song Book, wan buk blong mekem singsing evri wik long miting blong kingdom wok.f Biaen, long Desemba 1944, Informant (naoia, Kingdom Wok Blong Yumi) i talemaot se bambae oli singsing long stat mo en blong ol narafala miting tu. Bakegen, singsing i kam haf blong wosip blong Jeova.

‘Singsing Long Hat Blong Yumi Blong Presem Jeova’

Blong plante yia, long Is Yurop mo Afrika, ol man oli stap agensem mo oli stap mekem nogud long ol brata blong yumi. Store blong olgeta i soem klia se fasin blong singsing wetem fulhat blong yumi i impoten tumas. Lothar Wagner i stap hem wan long wan smol rum blong kalabus blong seven yia. ?Olsem wanem hem i stanap strong tru long hadtaem ya? Hem i talem se: “Blong sam wik, mi traehad blong rimemba ol tok blong ol singsing blong Kingdom. Taem mi fogetem wan haf, mi mekemap wan no tu vas. . . . !Ol singsing blong yumi long saed blong Kingdom, oli fulap long ol tingting we oli givim paoa mo pulum yumi blong gohed!”​—1974 Yearbook of Jehovah’s Witnesses, pej 226-​228.

Harold King i stap hem wan blong faef yia, long wan smol rum long kalabus, from we hem i holemstrong long bilif blong hem. Hem i haremgud taem hem i wokem ol sing, mo i singsing blong presem Jeova. Sam singsing we hem i wokem, naoia ol Wetnes blong Jeova oli stap yusum long wosip blong olgeta. Glad we i kamaot from singsing, i givim paoa. Be yumi no nidim blong wet kasem taem we ol man oli ronem mo mekem nogud long yumi, blong bilif se fasin blong singsing blong presem God i impoten tumas.

Olgeta man blong Jeova oli save faenem glad taem oli singsing. Maet yumi sem blong talemaot filing blong yumi. Be taem yumi singsing, ol filing we yumi gat long Jeova oli save kamaot isi nomo. Aposol Pol i soem olsem wanem yumi save faenem glad taem yumi singsing blong presem God. Hem i givim advaes long ol Kristin se: ‘Taem yufala i stap toktok long yufala, i gud yufala i yusum ol tok blong Ol Sam, mo ol him, mo ol sing blong presem God. Yufala i mas sing long ol him mo sam, blong presem Jeova, long hat blong yufala.’ (Efesas 5:​19) Taem hat blong yumi i fulap long ol samting long saed blong speret, yumi save talemaot ol samting ya strong taem yumi singsing. Taswe, bigfala samting blong givhan long yumi blong kamgud moa long singsing, hemia stret filing long hat blong yumi.

Wan gudfala fasin fren wetem Jeova i givhan long yumi blong stap glad. Fasin fren ya i pusum yumi blong toktok, singsing, mo singaot blong presem Jeova. (Ol Sam 146:​2, 5) Yumi singsing wetem fulhat blong yumi long saed blong ol samting we yumi haremgud long olgeta. Mo sipos yumi laekem wan singsing no ol tok blong wan singsing, ating bambae yumi singim singsing ya wetem trufala filing.

Singsing wetem filing i no min se man i mas singsing strong tumas. Gudfala singsing i no min se man i mas singsing wetem bigfala voes. Mo tu, i no gudfala singsing taem man i singsing long voes we i daon tumas. Voes blong samfala i strong nating se oli singsing long smol voes nomo. Wan samting we i mekem i hadwok blong singsing gud insaed long wan grup, hemia se yumi mas mekem voes blong yumi i joengud wetem voes blong ol narafala long grup ya. Nating se yu stap singim wan pat, no yu stap singsing sem mak olsem ol narafala long grup, sipos voes blong yu i sem mak long ol narafala raon long yu, i no bigwan moa mo i no daon moa, bambae yufala i mekem gudfala singsing mo joengud. Kristin fasin blong gat tingting daon, mo fasin blong lesingud, i save givhan long yu blong singsing wetem filing, mo long semtaem, yu no mekem voes blong yu i go antap bitim mak. Be, olgeta we oli save singsing gud mo oli gat gudfala voes, oli no mas sem blong singsing strong. Wan naesfala voes i save givhan bigwan long wan kongregesen we i stap singsing blong presem Jeova.

Mo tu, ol miting oli gudfala ples blong singsing ol defren pat. Olgeta we oli naf blong singim ol pat, no oli save folem ol not blong ol pat long sing buk mo singim olgeta, i gud we oli mekem voes blong olgeta i joen wetem ol narafala mo mekem myusek ya i kam moa naes.g

Maet samfala oli talem se, ‘Mi no save singsing stret folem myusek,’ no, ‘Voes blong mi i nogud; mi no save kasem ol not we oli hae.’ From samting ya oli sem, taem oli stap singsing, mo i sem mak long Haos Kingdom tu. Samting we i tru se, i no gat wan man we i stap singsing blong presem Jeova, we Jeova i ting se voes blong hem i “nogud.” Wan man i save kamgud moa long fasin blong hem blong toktok, sipos hem i trenem voes blong hem mo i folem ol advaes we i kamaot long Tiokratik Skul. Long sem fasin, man i save kamgud moa long singsing. Blong mekem voes i kamgud moa, samfala oli singsing we oli no openem maot blong olgeta, taem oli stap mekem sam wok. Fasin ya i givhan blong mekem se voes i no olbaot. Mo fasin blong singim ol singsing blong Kingdom i wan nambawan rod blong trenem voes, mo blong mekem yumi haremgud mo givim spel long tingting, sipos yumi mekem long taem we i stret, maet taem yumi stap yumi wan nomo, no taem yumi stap wok long wan ples we singsing i no save spolem ol narafala.

Mo tu, yumi save singim sam singsing blong Kingdom, taem yumi joen wanples wetem ol narafala. Taem yumi singsing olsem, maet wetem wan gita, piano no ol kaset blong Sosaeti, yumi mekem ol samting long saed blong speret oli stap olsem bigfala samting long ol lafet blong yumi. Fasin ya i givhan long yumi tu blong lanem ol singsing, nao yumi save singsing gud long ol miting blong kongregesen.

Blong givhan long ol kongregesen blong singsing wetem filing long ol miting, Sosaeti i mekem ol kaset blong ol myusek. Taem brata we i lukaot long saon i mekem ol kaset ya oli wok, hem i mas lesingud se myusek ya i antap tumas no i daon tumas. Sipos i daon tumas, maet kongregesen i sem blong singsing. Taem brata ya i singsing wetem kongregesen, bambae hem i luksave sipos myusek ya i stap lidim mo sapotem kongregesen no no gat.

Mekem Singsing Long Jeova

Singsing i wan jans blong yumi soem filing we yumi gat long Man we i wokem yumi. (Ol Sam 149:​1, 3) Singsing i no jes wan rod blong soemaot ol filing olbaot nomo, be wan fasin blong presem God we i stret, i soem glad, mo we yumi bos long filing blong yumi. Taem yumi singsing long kongregesen wetem fulhat blong yumi, samting ya i save mekem se tingting mo hat blong yumi i rere blong harem ol tok we i kamaot biaen, mo i save pulum yumi blong joen moa long wosip blong Jeova. Nating se singsing i gat paoa long filing blong yumi, ol tok blong hem tu oli save tijim yumi. Taswe, taem yumi soemaot filing blong yumi long ol singsing we yumi mekem tugeta no long ol pat, yumi stap mekemrere hat blong yumi wetem tingting daon, blong kasem tijing olsem wan grup.​—Skelem wetem Ol Sam 10:17.

Singsing bambae i stap oltaem olsem haf blong wosip blong Jeova. From samting ya, yumi save tingbaot blong gohed blong olwe, blong mekem samting we man blong raetem Ol Sam i talem, se: ‘Bambae mi presem Jeova oltaem, taem mi stap laef, bambae mi sing long God blong mi oltaem long laef blong mi.’​—Ol Sam 146:2.

[Ol futnot]

[Bokis blong pija long pej 27]

Sam advaes blong mekem singsing i kamgud moa

1. Holem sing buk i stap antap taem yu singsing. Samting ya bambae i givhan long yu blong pulumgud win.

2. Pulum win bigwan long stat blong wanwan laen.

3. Fastaem, openem maot blong yu bigwan. Samting ya bambae i mekem voes i strong mo i antap moa.

4. Samting we i moa impoten, tingbaot filing we singsing ya i stap soemaot.