?Yu Yu Rere From Dei Blong Jeova?

“Bigfala dei blong Jeova i kolosap. Hem i kolosap, mo hem i hareap tumas.”​—SEFANAEA 1:​14.

1. ?Olsem wanem Baebol i tokbaot dei blong Jeova?

I NO longtaem, ‘bigfala dei blong Jeova we i mekem man i fraet’ bambae i kasem rabis wol ya. Baebol i tokbaot dei blong Jeova olsem wan dei blong faet, tudak, bigfala kros, trabol, harem nogud, bigfala fraet, mo dei blong spolem ol samting. Be, bambae i gat sam man we oli laef tru long taem ya, from we “olgeta we oli singaot long nem blong Jeova, bambae oli stap sef.” (Joel 2:​30-​32; Emos 5:​18-​20) Yes, long taem ya, God bambae i spolem ol enemi blong hem mo i sevem ol man blong hem.

2. ?From wanem yumi mas tingbaot dei blong Jeova olsem we i kolosap tumas mo i stap kam kwik?

² Ol profet blong God oli tokbaot dei blong Jeova olsem wan samting we i stap kam kwik mo we ol man oli mas rere from kwiktaem. Eksampel, Sefanaea i raetem se: “Bigfala dei blong Jeova i kolosap. Hem i kolosap, mo hem i hareap tumas.” (Sefanaea 1:​14) Tede, hem i moa kolosap, from we Bigfala Man we God bambae i yusum blong givim panis, hem i rere blong ‘fasem naef blong faet blong hem long bodi blong hem mo raed i go blong faet from trutok, tingting daon, mo stret fasin.’ (Ol Sam 45:​3, 4) ?Yu yu rere from dei ya?

Oli Wantem Tumas Blong Luk Dei Blong Jeova

3. ?Sam Kristin long Tesalonaeka oli stap wet long wanem samting? ?Mo wanem tufala risen we i soem se oli mekem mastik?

³ Plante man bifo, oli wantem tumas blong luk dei blong Jeova, be dei ya i no kamtru olsem we oli stap tingbaot. Sam long ol faswan Kristin long Tesalonaeka, oli talem se, ‘!Dei blong Jeova i kam finis!’ (2 Tesalonaeka 2:2) Be i gat tu bigfala risen we i soem se dei ya i longwe yet long taem blong olgeta. Aposol Pol i tokbaot wan long tufala risen ya, i se: ‘Taem ol man oli stap talem se: “!Pis mo seftaem!” bambae trabol i kasem olgeta wantaem nomo.’ (1 Tesalonaeka 5:​1-6) Long ‘taem ya blong en,’ yumi ol man blong Jeova, yumi stap wet blong luk profet tok ya i kamtru. (Daniel 12:4) I gat wan narafala samting tu we i pruvum se bigfala dei blong Jeova i no kamtru long taem blong ol man Tesalonaeka. Pol i talem long olgeta se: ‘Dei ya i no save kamtru yet, ol man blong apostasi oli mas kamtru fastaem.’ (2 Tesalonaeka 2:​3) Taem Pol i raetem ol tok ya (samwe long 51 K.T.a), ‘apostasi’b i no kamaot fulwan yet, insaed long trufala Kristin skul. Tede, yumi luk se Krisendomc i fulap long apostasi. Nating se dei ya i no kamtru olsem we ol gudfala tabu Kristin long Tesalonaeka oli stap tingbaot, oli holemstrong long wok blong God go kasem we oli ded, mo biaen oli kasem pei long heven. (Revelesen 2:​10) Yumi tu, bambae yumi kasem pei sipos yumi stap tru long Jeova, taem yumi stap wet long dei blong hem.

4. (a) ?Long 2 Tesalonaeka 2:​1, 2, dei blong Jeova i joen wetem wanem? (b) ?Olgeta we ol man oli kolem olgeta ol Papa blong Jyos, oli gat wanem tingting long saed blong Kraes i kambak mo long ol samting we oli joen long bisnes ya?

⁴ Baebol i joenem “bigfala dei blong Jeova” wetem taem ya we ‘Jisas Kraes, Masta blong yumi, i stap bakegen.’ (2 Tesalonaeka 2:​1, 2) Olgeta we ol man oli kolem olgeta ol Papa blong Jyos, oli gat ol defdefren tingting long saed blong fasin ya we Kraes i kambak bakegen, hem i stap, mo hem i rul blong Wan Taosen Yia. (Revelesen 20:4) Long ol yia biaen 100 K.T., Papias blong Irapolis i gat tingting ya se long Wan Taosen Yia Rul Blong Kraes, bambae graon i givim fulap kakae. Plante taem, Justin Martyr i tokbaot se Jisas bambae i stap bakegen, mo hem i bilif se Jerusalem we i stanap bakegen bambae hem i kam stampa taon blong Kingdom blong Jisas. Irenæus blong Leon i tijim se, afta we Gavman blong Rom i lus, bambae Jisas i kamtru long fasin we ol man oli save luk hem, bambae i fasem Setan, mo bambae i rul long Jerusalem long wol ya.

5. ?Sam man blong mekem dip stadi oli talem wanem long saed blong “Kraes i Kambak Bakegen” mo Rul blong hem blong Wan Taosen Yia?

⁵ Man blong raetem histri, Philip Schaff, i talem se “tingting we i bigwan olgeta” long ol yia bifo long Kaonsel blong Naesia long 325 K.T., hemia “bilif ya se Kraes wetem ol tabu man we oli laef bakegen bambae oli rul wetem bigfala paoa blong wan taosen yia long wol ya, bifo we ol narafala dedman oli laef bakegen mo bifo long dei blong jajmen.” A Dictionary of the Bible, we James Hastings i raetem, i talem se: “Tertullian, Irenæus, mo Hippolytus, oli stap wet yet blong [Jisas Kraes] i Kambak kwik. Be ol Papa blong Jyos blong Aleksandria, oli gat wan nyufala tingting. . . . Taem Augustine i talem se Rul blong Wan Taosen Yia hemia taem ya we ol man blong Jyos oli laef i stap yet long wol ya, hem i putum Taem We Kraes i Kambak i go longwe long fyuja.

Dei Blong Jeova Mo Fasin We Jisas i Stap Bakegen

6. ?From wanem yumi no mas ting se dei blong Jeova i longwe yet?

⁶ Ol rong tingting oli bin mekem tingting blong plante man i foldaon. Be yumi no mas ting se dei blong Jeova i longwe yet. Taem ya we Jisas i stap bakegen long fasin we yumi no save luk hem, i stat finis. Baebol i joenem taem ya wetem dei blong Jeova. Plante taem, Wajtaoa mo ol narafala buk blong ol Wetnes blong Jeova oli givim ol pruf we i stanap long Baebol, se Kraes i stap bakegen long yia 1914.d Taswe, ?Jisas i talem wanem long saed blong fasin ya we hem i stap?

7. (a) ?Wanem sam haf blong saen we oli soem se Jisas i stap bakegen mo se en blong wol ya i kolosap? (b) ?Olsem wanem yumi save stap sef?

⁷ Smoltaem bifo we Jisas i ded, hem mo ol man blong hem oli storeyan long bisnes ya se bambae hem i stap bakegen long fyuja. Afta we ol aposol ya blong hem, Pita, Jemes, Jon, mo Andru, oli harem we hem i talemaot se bambae haos prea long Jerusalem i lus, oli askem long hem se: ‘Plis yu talem long mifala. ?Bambae ol samting ya oli kamtru wetaem? ?Mo wanem saen we bambae i soemaot se yu yu stap finis mo fasin blong wol ya i kasem en blong hem?’ (Matyu 24:​1-3; Mak 13:​3, 4) Blong ansa long olgeta, Jisas i talem se bambae i gat faet, kakae i sot, graon i seksek, mo ol narafala samting we oli mekemap wan “saen” blong soem se hem i stap finis mo fasin blong wol ya i kasem en blong hem. Hem i talem tu se: “Man we i stanap strong gogo olgeta samting ya i finis, bambae God i sevem hem.” (Matyu 24:13) Bambae God i sevem yumi sipos yumi stanap strong wetem bilif go kasem en blong laef blong yumi, no kasem en blong rabis fasin blong wol ya.

8. ?Bifo we fasin blong ol man Jyu i kasem en blong hem, ol man oli mas mekem wanem wok? ?Mo wanem samting i stap kamaot tede long saed blong wok ya?

⁸ Bifo we en i kamtru, wan impoten samting i mas kamtru, we i makem se Jisas i stap finis. Long saed ya, hem i talem se: ‘Bambae ol man oli stap talemaot gud nyus ya se God i king blong olgeta man. Bambae oli talemaot long olgeta ples long wol, blong oli wetnes long hem long fes blong olgeta man. Nao biaen, bambae en i save kam.’ (Matyu 24:14) Bifo we ol man Rom oli spolem Jerusalem, mo fasin blong laef blong ol man Jyu i kasem en blong hem long 70 K.T., Pol i save talem se gud nyus ya, “ol man oli talemaot finis long olgeta man long wol.” (Kolosi 1:​23) Be tede, ol Wetnes blong Jeova oli kasem wan mak we i bigwan moa, oli stap prij “long olgeta ples long wol.” Long ol yia we oli jes pas, God i mekem se rod i open blong givim wan bigfala wetnes long Is Yurop. Ogenaesesen blong Jeova i gat ol ples blong prentem ol buk, mo i gat ol narafala tul long olgeta ples blong wol. From samting ya, hem i rere blong mekem moa wok, long ol ‘ples ya tu we i no gat man i prij long hem yet.’ (Rom 15:22, 23) ?Olsem wanem long yu? ?Hat blong yu i pusum yu blong traem bes blong yu blong givim wetnes bifo we en i kam? Sipos yes, God i save givim paoa long yu blong joen moa long wok ya we yu save kasem blesing from.​—Filipae 4:​13; 2 Timote 4:​17.

9. ?Jisas i tokbaot wanem poen long Matyu 24:36?

⁹ Wok blong talemaot Kingdom mo ol narafala haf blong saen blong makem taem we Jisas i stap finis, oli stap kamtru stret long taem blong yumi. Taswe, en blong ol rabis fasin blong wol ya i kolosap. I tru, Jisas i talem se: “Dei blong samting ya, mo taem blong hem, i no gat man naoia we i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save.” (Matyu 24:​4-​14, 36) Be profet tok blong Jisas i save halpem yumi blong rere from “dei blong samting ya, mo taem blong hem.”

Olgeta Oli Rere

10. ?Olsem wanem yumi save se yumi naf blong stap wekap long saed blong speret?

¹⁰ Blong laef tru long bigfala dei blong Jeova, yumi mas stap wekap long saed blong speret mo stanap strong long saed blong trufala wosip. (1 Korin 16:13) Yumi save se yumi naf blong stanap strong olsem, from we wan famle we i obeigud long God, i bin mekem olsem, mo oli pastru long Bigfala Wora we i spolem ol rabis man long 2370 B.K.T.e Jisas i talem se taem ya i sem mak long taem we bambae hem i stap bakegen. Hem i se: ‘Olsem we long taem blong Noa, ol man oli no rere, oraet, long taem we mi, mi Pikinini blong Man bambae mi kamtru, bambae i olsem. Long taem ya bifo, taem we wora i no ron bigfala yet, ol man oli stap kakae, oli stap dring, oli stap mekem mared, kam kasem taem we Noa i go insaed long bigfala sip blong hem. Mo olgeta ya, oli no wekap nating long tingting blong olgeta, kamkam we wora i ron bigfala, i tekemaot olgeta. Nao long taem ya we mi, mi Pikinini blong Man bambae mi kamtru, bambae i olsem.’​—Matyu 24:37-​39.

11. ?Noa i folem wanem rod nating se raf fasin i fulap long taem blong hem?

¹¹ Olsem yumi, Noa mo famle blong hem oli laef long wan wol we i fulap long raf fasin. Ol “enjel blong God” we oli no obei, oli tekem bodi olsem man mo oli mared wetem ol woman long wol ya. Nao, oli kam papa blong ol Nefilim​—ol dabolbun we i klia se oli mekem raf fasin i kam moa nogud. (Jenesis 6:​1, 2, 4; 1 Pita 3:​19, 20) Be, from we Noa i gat bilif, ‘hem i wokbaot wetem trufala God.’ Hem i ‘pruvum se hem i wan stret man long medel blong ol man long taem blong hem’​—ol rabis man blong taem ya. (Jenesis 6:​9-​11) Sipos yumi dipen long God tru long prea, yumi tu i save mekem olsem Noa, taem yumi stap wet long dei blong Jeova, long wol ya we i rabis mo i fulap long raf fasin.

12. (a) ?Taem Noa i stap bildim sip, hem i mekem wanem narafala wok tu? (b) ?Ol man oli soem wanem fasin taem Noa i stap prij long olgeta, mo wanem i kamaot long olgeta from?

¹² Ol man oli save se Noa i wokem wan sip blong sevem laef blong sam man, taem Bigfala Wora i ron. Hem i “wan prija blong talemaot stret fasin” tu, be ol man long taem blong hem, ‘oli no wekap nating long tingting blong olgeta’ taem hem i talemaot mesej blong God long olgeta. Oli stap kakae mo dring, oli stap mared, oli gat pikinini, oli stap gohed long ol bisnes blong evri dei laef blong olgeta, kam kasem we wora i ron bigfala, i tekemaot olgeta. (2 Pita 2:5; Jenesis 6:​14) Oli no wantem harem ol toktok long saed blong fasin mo tok we i stret. I sem mak tede, ol rabis man blong naoia oli satem sora blong olgeta, taem ol Wetnes blong Jeova oli stap talem “se oli mas tanem tingting blong olgeta from ol sin blong olgeta blong kam long God.” Mo tu, oli no wantem lesin taem ol Wetnes oli tokbaot bilif long Jisas, stret fasin, mo “dei ya we God bambae i jajem olgeta man.” (Ol Wok 20:20, 21; 24:24, 25) I no gat wan ripot we i talem hamas man i stap long wol taem Noa i stap talemaot mesej blong God. !Be yumi sua se, namba blong ol man long wol i godaon bigwan long 2370 B.K.T.! Wora i ron bigfala, i tekemaot olgeta rabis man. Olgeta nomo we oli rere from samting ya we God i mekem​—Noa mo seven memba blong famle blong hem​—oli stap sef.​—Jenesis 7:​19-​23; 2 Pita 3:​5, 6.

13. ?Wanem disisen blong jajem ol man we Noa i trastem fulwan, mo olsem wanem hem i wok folem tok ya?

¹³ God i no talemaot long Noa plante yia bifo, wanem ya stret dei mo taem blong Bigfala Wora ya. Be, taem Noa i gat 480 yia, Jeova i talem se: “I nogud mi letem laef blong mi i stap olwe long ol man ya. Olgeta oli man blong wol nomo, we oli save ded. I stat naoia, bambae oli save stap kasem wan handred twante yia nomo.” (Jenesis 6:3) Noa i trastem fulwan tok ya blong God we i jajem ol man long taem ya. Taem Noa i gat 500 yia blong hem, hem i “bonem Sem, Ham mo Jafet.” Mo folem kastom blong ol man long taem ya, 50 kasem 60 yia oli mas pas bifo we ol pikinini boe ya oli mared. Taem God i talem long Noa blong wokem wan sip blong stap laef tru long Bigfala Wora we i ron, i klia se ol pikinini boe blong Noa mo ol waef blong olgeta, oli givhan tu blong mekem wok ya. Ating Noa i stap wokem sip ya long semtaem we hem i mekem wok olsem “wan prija blong talemaot stret fasin.” Ol wok ya oli mekem se hem i stap bisi long ol 40 no 50 yia bifo we Bigfala Wora i ron. (Jenesis 5:​32; 6:​13-​22) Long olgeta yia ya, hem mo famle blong hem oli soem strong bilif long ol wok blong olgeta. I gud yumi tu, yumi soem bilif taem yumi talemaot gud nyus mo wet long dei blong Jeova.​—Hibrus 11:7.

14. ?Biaen, Jeova i talem wanem long Noa, mo from wanem?

¹⁴ Taem bigfala sip ya kolosap i finis, maet Noa i ting se bambae Bigfala Wora ya i kam kwiktaem, nating se hem i no save stret taem blong hem. Biaen, Jeova i talem stret taem ya long hem, i se: “Wan wik i stap, nao bambae mi mekem bigfala ren i kam. Bambae i ren fote dei mo fote naet.” (Jenesis 7:4) Jeova i talem tok ya long Noa blong givim inaf taem long hem mo famle blong hem blong tekem ol defren kaen anamol oli go insaed long sip, mo blong olgeta tu oli go insaed, bifo we bigfala ren i foldaon. Yumi no nid blong save stret dei mo haoa we God bambae i statem trabol ya blong spolem ol fasin blong wol ya. God i no talem long yumi blong sevem ol anamol. Mo olgeta we bambae oli laef tru long trabol ya, oli stap go insaed finis long wan samting we i olsem sip ya, hemia paradaes long saed blong speret we ol man blong God oli gat.

“Yufala i Mas Lukaot Gud”

15. (a) Long prapa tok blong yu, traem eksplenem tok blong Jisas long Matyu 24:40-​44. (b) From we yumi no save stret dei we bambae Jisas i kam blong mekem jajmen blong God i kamtru, ?samting ya i save pulum yumi blong mekem wanem?

¹⁵ Jisas i tokbaot taem we bambae hem i stap bakegen, i se: “Long taem ya bambae tu man i save stap wok long wan garen, be bambae mi mi tekem wan, wan i stap. Bambae tu woman i save stap wanples blong wokem kakae [graenem sid i kam flaoa], be bambae mi mi tekem wan, wan i stap. Ale, from samting ya, yufala i mas lukaot gud. From we yufala i no save long wanem dei, mi, mi Masta blong yufala, bambae mi kamtru. Yufala i no fogetem hemia. Man blong stil i brekem haos blong masta, from we masta ya i no save wanem taem man ya bambae i kam, nao hem i no stap lukaot gud. Be sipos masta ya i save, nao i stap lukaot gud, bambae hem i rere blong man ya i kam. From samting ya, yufala i mas stap rere. From we mi, mi Pikinini blong Man, bambae mi kamtru long taem we yufala i no tingbaot.” (Matyu 24:40-​44; Luk 17:34, 35) From we yumi no save stret taem we bambae Jisas i kam blong givimbak kros blong God long ol man, samting ya i mekem se yumi stap wekapgud oltaem, mo tu, i givim jans long yumi evri dei blong pruvum se tingting we i pusum yumi blong mekem wok blong Jeova, i no se yumi wantem kasem wan gudfala samting blong yumi nomo.

16. ?Wanem bambae i hapen long ol wanwan man we oli “stap” mo long olgeta we Jisas i “tekem” olgeta?

¹⁶ Sam long ol wanwan man we bambae oli “stap” blong lus wetem ol man nogud, hemia olgeta we fastaem oli gat save long trutok, be biaen oli folem fulwan, fasin blong laef we oli tingbaot olgeta nomo. I gud tumas sipos yumi stap long medel blong olgeta we Jisas i “tekem” olgeta, hemia olgeta we oli stap ona fulwan long Jeova, mo we oli rili gat tangkyu long ol samting long saed blong speret we Hem i stap givim tru long “slef ya we i stret mo waes.” (Matyu 24:45-​47, NW) Go kasem en, yumi mas mekem wok blong God wetem ‘lav we i kamaot long hat we i klingud, mo i kamaot long tingting we i no stap jajem yumi, mo i kamaot long bilif we i no blong gyaman.’​—1 Timote 1:5.

Ol Tabu Wok Oli Impoten Tumas

17. (a) ?Seken Pita 3:​10 i tokbaot wanem samting? (b) ?Wanem sam long ol wok mo fasin we 2 Pita 3:​11 i leftemap?

¹⁷ Aposol Pita i talem se: ‘Dei blong Jeova bambae i kam, olsem wan man blong stil i kam, we i kam long taem we yumi no save. Mo long bigfala Dei ya, bambae i gat bigfala noes, nao skae bambae i lus. Bigfala faea we i hot tumas bambae i bonem ol sta gogo oli ronaot, mo wol tu, wetem evri samting blong hem bambae i stap long klia ples nomo blong God i jajem.’ (2 Pita 3:​10) Ol samting ya we skae mo wol i pija blong olgeta, bambae oli no save sef tru long kros blong God, we i hot olsem faea. Taswe, Pita i gohed moa, i se: ‘From we skae mo wol wetem olgeta samting ya bambae oli lus olsem, yufala i mas lukluk gud long laef blong yufala. Yufala i mas tabu, yufala i man blong God, mo yufala i mas mekem ol tabu wok mo fasin we hem i wantem.’ (2 Pita 3:​11) Sam long ol wok mo fasin ya, hemia se yumi mas go oltaem long ol Kristin miting, mekem i gud long ol narafala, mo joen plante long wok blong talemaot gud nyus.​—Matyu 24:14; Hibrus 10:24, 25; 13:16.

18. ?Sipos yumi luk se yumi stat blong joen long ol fasin blong wol, yumi mas mekem wanem?

¹⁸ ‘Ol tabu wok mo fasin we God i wantem,’ hemia i minim se yumi mas ‘holem laef blong yumi i klin we ol rabis fasin blong wol i no save spolem.’ (Jemes 1:​27) ?Be olsem wanem sipos yumi stap tekem fasin ya blong joen long ol samting blong wol ya? Maet yumi glad blong joen long ol pleplei we oli no klin, no lesin long ol myusek mo singsing we oli leftemap tingting blong wol ya we i no givim ona long God. Ol samting ya oli save pulum yumi i go long wan ples we i denja tumas long fes blong God. (2 Korin 6:​14-​18) Sipos i olsem, i gud yumi lukaot help blong God tru long prea. Olsem nao, bambae yumi no lus wetem wol, be bambae Pikinini blong Man i agri long yumi. (Luk 21:34-​36; 1 Jon 2:​15-​17) Sipos yumi givim laef blong yumi finis long God, i sua se bambae yumi wantem blong traem bes blong yumi blong wokem mo holemtaet wan gudfala fasin fren wetem Hem. Olsem nao, bambae yumi rere from bigfala dei blong Jeova we i mekem man i fraet.

19. ?From wanem bigfala hif blong man blong talemaot Kingdom oli save tingbaot se bambae oli laef tru long en blong rabis fasin blong wol ya?

¹⁹ Noa mo famle blong hem we oli onagud long God, oli laef tru long Bigfala Wora we i spolem wol ya bifo. Ol stret man oli no ded, taem fasin blong ol man Jyu i kasem en blong hem long 70 K.T. Eksampel, samwe long 96 kasem 98 K.T., taem aposol Jon i raetem buk blong Revelesen, mo Gospel blong hem, mo trifala leta blong hem we oli kamaot long God, hem i stap gohed strong yet long wok blong God. Mo tu, ating plante taosen man we oli akseptem trufala bilif long Pentekos long yia 33 K.T., oli laef tru long taem ya we fasin blong ol man Jyu i kasem en blong hem. (Ol Wok 1:​15; 2:​41, 47; 4:4) Tede, bigfala hif blong man we oli stap talemaot Kingdom, oli save gat hop blong laef tru long en blong rabis fasin blong wol ya.

20. ?From wanem yumi mas wok strong olsem ol ‘prija blong talemaot stret fasin’?

²⁰ I no longtaem, bambae God i sevem yumi nao yumi go insaed long nyufala wol. From samting ya, yumi mas wok strong olsem ol ‘prija blong talemaot stret fasin.’ !Hemia wan nambawan jans we yumi gat blong mekem wok blong God long ol las dei ya! !Mo yumi glad tumas blong soem rod long ol man blong oli go insaed long “sip” long taem blong yumi, hemia paradaes long saed blong speret we ol man blong God oli stap haremgud long hem! I gud sipos ol milyan man we oli stap insaed long paradaes ya oli gohed blong holemstrong long God, stap wekapgud long saed blong speret, mo rere from bigfala dei blong Jeova. ?Be wanem bambae i givhan long yumi blong stap wekap?

[Ol futnot]

?Bambae Yu Yu Ansa Olsem Wanem?

◻ ?Sam man oli bin tingting olsem wanem long saed blong dei blong Jeova mo taem we Kraes bambae i stap bakegen?

◻ ?From wanem yumi save talem se Noa mo famle blong hem, oli rere from Bigfala Wora we i ron?

◻ ?Wanem bambae i hapen long olgeta we oli “stap lukaot gud” mo long olgeta we oli no stap lukaot gud?

◻ ?From wanem ol tabu wok oli impoten tumas, antap moa taem yumi stap kam moa kolosap long bigfala dei blong Jeova?