?Yu Yu Wantem Tumas Blong Mekem Moa Wok?

WAN woman we nem blong hem Laura, i talem se: “Mi mi kros long Jeova. Mi prea bakegen mo bakegen blong hem i givhan long mifala blong winim ol problem long saed blong mane. Olsemia, bambae mi save gohed long wok blong paenia. Be hem i no mekem olsem. Ale, mi lego wok blong paenia. Mo tu, mi talem stret long yu, se long taem ya mi mi jelas long olgeta we oli naf blong gohed long wok ya.”

Tingbaot store blong Michael tu. Hem i wan man blong givhan long wan kongregesen blong ol Wetnes blong Jeova. Hem i stap traehad blong kam naf blong mekem wok blong elda. (1 Timote 3:1) Plante yia oli pas be hem i no kasem wok ya we hem i wantem, ale hem i kam kros nao i no moa wantem se oli skelem hem blong lukluk sipos hem i naf blong kasem gudfala wok ya. Hem i talem se: “Mi no wantem nating blong harem nogud tumas bakegen, taem oli talem long mi bakegen se mi no naf.”

?Yu yu fesem semkaen samting ya finis? ?I gat wan samting i bin kamaot we i mekem se yu mas lego wan tiokratik wok we yu laekem tumas? Eksampel, ?yu yu mas lego wok blong paenia, hemia wok blong talemaot Kingdom fultaem? ?Yu yu bin wantem tumas blong kasem wan wok long kongregesen, be biaen narafala i kasem? Ating yu wantem tumas blong wok long Betel no olsem wan misinari, be i gat sam samting long laef blong yu we oli mekem se yu no gat jans blong joen long wok ya.

Buk blong Proveb i talem se: “Samting we yu putum tingting blong yu i stap strong long hem, be taem hem i no kamtru, bambae i mekem hat blong yu i trabol.” (Proveb 13:12) Samting ya i save kamaot moa taem ol narafala oli kasem ol spesel wok we maet yu yu bin wantem kasem. ?Olsem wanem? ?Tok blong God i save givim waes, leftemap tingting, mo givim hop long eni man we i harem nogud from wan samting olsemia? Yes, hem i save mekem olsem. Ol Sam 84 i soemaot filing blong wan man blong Jeova, we hem tu i no kasem sam samting we hem i wantem long saed blong wok blong Jeova.

Wan Livaet We i Gat Tangkyu

Olgeta we oli raetem Ol Sam 84, oli pikinini blong Kora, ol Livaet we oli wok long haos prea blong Jeova, mo we oli tinghevi long jans we oli gat blong mekem wok ya. Wan long olgeta ya i talem se: “Hae God, yu yu Gat Olgeta Paoa. !Mi mi laekem haos blong yu tumas! !Mi mi wantem tumas blong stap long hem! Hae God, mi wantem tumas blong stap oltaem long haos blong yu. Yu yu God we yu laef. Tingting blong mi i glad tumas long yu, nao mi stap sing blong presem yu.”​—Ol Sam 84:​1, 2.

Livaet ya i gat filing we hem i wantem tumas blong wok long haos prea blong Jeova, mekem se olgeta samting we hem i luk taem hem i wokbaot long rod i go long Jerusalem, oli naes tumas long tingting blong hem. Hem i se: ‘Taem oli pastru long krik ya Baka we i drae we i drae, ples ya i kam ples blong ol springwora.’ (Ol Sam 84:6) Yes, wan ples we i drae we i drae i kam olsem wan ples we i fulapgud long wora, long tingting blong Livaet ya.

Man blong raetem Sam ya i wan Livaet be hem i no wan pris, taswe hem i save wok long haos prea blong wan wik nomo evri sikis manis. (1 Kronikel 24:​1-​19; 2 Kronikel 23:8; Luk 1:​5, 8, 9) Ol narafala taem, hem i stap long haos blong hem long wan taon blong ol Livaet. Taswe, hem i singsing se: “Hae God, yu yu Gat Olgeta Paoa. Yu yu king blong mi, yu yu God blong mi. Ol smosmol pijin ya we oli smol tumas, be oli wantem tumas blong stap kolosap long yu. Oli stap mekem nes blong olgeta long haos blong yu, mo oli stap lukaot long ol pikinini blong olgeta kolosap long olta blong yu.” (Ol Sam 84:3) !Bambae Livaet ya i glad tumas sipos hem i save stap oltaem long haos prea, olsem ol pijin we oli stap oltaem long haos ya!

I isi nomo blong Livaet ya i kam kros from we hem i no gat jans blong wok moa long haos prea. Be, hem i glad blong mekem wok blong hem, mo hem i luksave se i no blong nating nomo we man i mekem wok blong Jeova wetem fulhat blong hem. ?Wanem samting i halpem gudfala Livaet ya blong stap glad oltaem long spesel wok we hem i gat?

Lanem Blong Stap Glad

Livaet ya i talem se: “Sipos mi stap wan dei nomo long haos blong yu, be hemia i gud moa, i winim we mi stap wan taosen dei long ol narafala ples. God blong mi, i nomata sipos mi stap long doa nomo blong haos blong yu, be hemia i moa gud, i winim we mi stap insaed olgeta long haos blong ol man nogud.” (Ol Sam 84:10) Hem i luksave se sipos hem i stap wan dei nomo long haos blong Jeova, samting ya i olsem wan nambawan jans we hem i gat. Be hem i wok bitim wan dei long haos prea. Glad blong hem from jans ya we hem i gat, i mekem hem i singsing.

?Olsem wanem long yumi? ?Yumi luksave ol blesing blong yumi, no yumi stap fogetem ol bigfala jans we yumi gat finis long wok blong Jeova? From we ol man blong Jeova oli fasgud long hem, hem i givim plante defren blesing mo wok long olgeta. I gat ol bigfala wok ya blong lukaot, lidim, mo tijim ol narafala, mo ol defren fultaem Kristin minista wok. Be i gat tu, sam narafala gudfala wok we oli joen wetem wosip blong Jeova.

Eksampel, tingbaot Kristin minista wok. Aposol Pol i talem se blesing ya we yumi gat blong talemaot gud nyus i olsem wan ‘gudgudfala samting we i stap insaed long ol graonpot nomo.’ (2 Korin 4:7) ?Yu yu gat tingting se wok ya i olsem wan gudgudfala samting we i sas tumas? Jisas Kraes, we i lidim wok blong talemaot Kingdom, i tingbaot wok ya long fasin ya, mo hem i soemaot wan eksampel we yumi save folem. (Matyu 4:​17) Pol i talem se: “Hem i putumap mifala long wok ya. Mo from samting ya, tingting blong mifala i no save foldaon.”​—⁠2 Korin 4:​1.

Ol Kristin miting tu oli wan tabu samting we God i givim long yumi, we yumi no mas ting nating long olgeta. Long ol miting blong yumi, yumi kasem ol impoten tijing, mo yumi haremgud tu long kampani blong ol narafala, hemia samting we yumi nidim tumas. Long ol miting yumi save soemaot tu se yumi gat bilif mo hop, taem yumi givim ansa mo joen long miting long sam narafala rod bakegen. (Hibrus 10:​23-25) !Ol miting blong yumi oli rili wan gudfala samting we yumi mas tinghae long olgeta!

Michael, we yumi tokbaot hem fastaem, i tinghae long ol blesing ya mo hem i gat bigfala tangkyu from olgeta. Be hem i harem nogud from we hem i no save mekem wok blong elda, mo blong smoltaem, samting ya i mekem se fasin tangkyu ya blong hem i no moa bigwan olsem fastaem. Taem hem i tingtinggud long ol blesing ya bakegen, hem i kasem wan gudfala tingting bakegen mo hem i wet long Jeova wetem longfala tingting.

I moagud sipos yumi mekem olsem man we i raetem Sam ya, ale yumi tingting bakegen long ol blesing we Jeova i stap givim long yumi, i bitim we yumi harem nogud from we yumi no bin kasem wan blesing blong wok.a Sipos yumi no luksave plante samting, yumi nidim blong tingting bakegen, mo askem long Jeova blong i mekem yumi luksave ol blesing we yumi gat, mo olsem wanem Hem i stap mekem i gud long yumi mo yusum yumi blong karem ona long nem blong hem.​—Proveb 10:22.

I impoten tu blong luksave se blong mekem ol spesel wok, olsem wok blong elda, wan man i mas kasem sam stret mak fastaem. (1 Timote 3:​1-7; Taetas 1:​5-9) Taswe, yumi nidim blong luklukgud long yumi wan, blong traem faenem samting we yumi mas kamgud moa long hem, mo biaen, traehad blong kamgud moa.​—1 Timote 4:​12-15.

Yu No Mas Letem Tingting Blong Yu i Foldaon

Sipos yumi no kasem wan spesel wok we yumi wantem, yumi no mas tingting se Jeova i laekem moa olgeta ya we oli kasem wok ya, no se hem i no wantem givim wan gudfala samting long yumi. Yumi no mas gat jelas tingting ya se, olgeta ya oli kasem blesing ya nomo, from we ol man we oli jusum olgeta oli laekem olgeta moa bitim yumi. No gat. Yumi mas luk samting ya olsem we hem i folem tiokratik oda nomo. Sipos yumi holemtaet ol nogud tingting, yumi save kam jelas, rao, mo yumi save kam slak olgeta.​—1 Korin 3:3; Jemes 3:​14-16.

Laura, we yumi bin tokbaot hem fastaem, hem i no kam slak. Hem i winim ol filing blong hem blong kros mo jelas. Laura i prea long God bakegen mo bakegen blong i halpem hem blong winim ol nogud tingting we hem i gat, taem hem i no moa save joen long wok blong paenia. Mo tu, hem i askem advaes long sam man long kongregesen we oli bigman long saed blong speret, nao hem i harem se God i laekem hem bakegen. Hem i talem se: “Jeova i givim pis long tingting blong mi. Nating se naoia mi mo man blong mi, mitufala i no save paenia, mitufala i tingtingbak mo haremgud long taem ya bifo, we mitufala i bin mekem wok ya. Ol samting we i bin hapen long mitufala we mitufala i tingtingbak long olgeta, oli givim paoa long mitufala. Mo tu, mitufala i halpem pikinini boe blong mitufala, we i bigwan finis, long paenia wok blong hem.” From we Laura i glad long ol blesing we hem i gat, naoia hem i save ‘haremgud wetem ol man we oli stap haremgud’ long wok blong paenia.​—Rom 12:15.

Putum Ol Mak We Yu Yu Naf Blong Kasem

From we yumi glad nomo long ol jans blong wok we yumi gat naoia, samting ya i no minim se yumi no moa putum sam tiokratik mak we yumi traehad blong kasem. Taem Pol i stap tokbaot hop blong laef bakegen long heven, hem i talem se hem i ‘stap traehad oltaem blong kasem ol samting we oli stap long fes blong hem.’ Mo tu, hem i talem se: “Yumi mas gohed long rod ya we yumi folem finis blong kam kasem ples ya.” (Filipae 3:​13-16) Sipos yumi gat ol mak long saed blong speret, samting ya i save halpem yumi blong traehad oltaem blong kasem ol samting ya we oli stap long fored blong yumi. Be, samting we i hadwok lelebet, hemia blong putum ol mak we oli stret long yumi.

Ol mak we oli stret long yumi, hemia ol mak we oli no hadwok tumas long yumi mo we yumi naf blong kasem. (Filipae 4:5) Samting ya i no minim se wan mak we yumi hadwok plante yia blong kasem, i no stret long yumi. No gat. Yumi save kasem wan mak we i tekem longtaem olsemia, sipos sloslou yumi putum sam narafala smosmol mak fastaem we oli save lidim yumi i go kasem bigfala mak ya. Ol smosmol mak ya we yumi traem kasem, bambae oli givhan long yumi blong kamgud moa long saed blong speret. Taem yumi kasem ol wanwan smosmol mak ya, bambae yumi haremgud, i defren olgeta long tingting we i foldaon.

Tingting We i Stret

Be, i impoten blong luksave se, from sam samting long laef blong yumi no from we yumi no naf long sam samting, maet yumi no save kasem sam spesel wok. Taswe, i nogud yumi putum ol wok ya olsem ol mak we yumi wantem kasem, from we taem yumi no kasem olgeta, bambae tingting blong yumi i foldaon mo yumi harem nogud nomo. I moagud blong livim ol mak ya oli stap fastaem, maet blong smoltaem nomo. I no hadwok blong mekem olsem sipos yumi prea long Jeova blong i halpem yumi blong stap glad long ol blesing we yumi gat, mo sipos yumi mekem wok blong hem i stap olsem faswan samting long laef blong yumi. Taem yumi traem kasem sam spesel wok, samting we i impoten moa hemia haenem blong Jeova, i no blong leftemap yumi wan from samting we yumi save mekem. (Ol Sam 16:​5, 6; Matyu 6:​33) Baebol i talem stret nomo se: “Putum olgeta wok blong yu long Jeova hem wan mo bambae olgeta plan blong yu oli stanap strong.”​—Proveb 16:3.

Taem yumi tingbaot Sam 84, yumi save luk se man we i raetem Sam ya i soemaot wan gudfala tingting, long saed blong olgeta spesel wok we hem i gat, mo Jeova i blesem hem bigwan. Mo Sam ya i stap givhan gud long olgeta man blong Jeova yet, long taem blong yumi tede.

Tru long prea mo fasin blong trastem Jeova, yu save gat stret tingting long ol spesel wok we yu wantem kasem, mo haremgud long ol wok we yu gat finis. Yu neva mas letem tingting ya blong wantem mekem moa wok i spolem tangkyu blong yu from ol blesing we yu gat naoia, mo from glad blong yu blong mekem wok blong Jeova blong olwe. Trastem Jeova, from we samting ya i save karem glad, olsem ol tok blong Livaet ya i soemaot, se: “Hae God, yu yu Gat Olgeta Paoa. Olgeta we oli stap trastem yu bambae oli save harem gud.”​—Ol Sam 84:12.

[Futnot]

[Bokis blong pija long pej 11]

Ol Mak We Yumi Save Traem Kasem

Ridim Baebol evri dei.​—⁠Josua 1⁠:8; Matyu 4⁠:4

Yusum Baebol blong trenem tingting blong yumi blong kamgud moa long fasin luksave.​—⁠Hibrus 5⁠:⁠14

Traehad blong fren moa wetem God.​—⁠Ol Sam 73⁠:⁠28

Wokem ol wanwan frut blong tabu speret.​—⁠Galesia 5⁠:​22, 23

Mekem se ol prea blong yumi oli gat moa mining mo oli dip moa.​—⁠Filipae 4⁠:​6, 7

Kamgud moa long wok blong prij mo tij.​—⁠1 Timote 4⁠:​15, 16

Ridim mo tingting dip long olgeta Wajtaoa mo Wekap!​—⁠Ol Sam 49⁠:3

[Tok blong pija long pej 9]

Taem yumi putum sam prapa mak we yumi wantem kasem, yumi mas putum samting we God i wantem i stap long fasples