Ol Man Blong Talemaot Pis Blong God Oli Save Glad
“Olgeta ya we Jeova i sevem olgeta, bambae oli kambak. Bambae oli kam long Saeon we oli singaot from we oli glad tumas. Mo bigfala glad bambae i stap long hed blong olgeta gogo i no save finis.”—AESEA 35:10.
1. ?Wanem samting nao we wol ya i nidim tumas?
Tede, i bitim bifo, ol man oli nidim wan man blong karem gudfala nyus i kam. Oli nidim tumas se wan man i talemaot trutok long saed blong God mo ol stampa tingting blong hem. Man ya i mas wan wetnes we i no fraet, i save givim woning long ol rabis man long saed blong bigfala trabol we bambae i spolem olgeta, wan man we bambae i halpem ol man we hat blong olgeta i stret, blong oli faenem pis blong God.
2, 3. Long saed blong Isrel, ?olsem wanem Jeova i mekem promes blong hem long Emos 3:7 i kamtru?
2 Long taem blong Isrel, Jeova i promes blong sanem sam man olsem, blong karem mesej. Raonabaot long yia 800 B.K.T., profet Emos i talem se: “Haefala Masta Jeova bambae i no mekem wan samting, sipos hem i no talemaot ol tok haed blong hem fastaem long ol man blong hem, ol profet.” (Emos 3:7) Long ol handred yia we oli kam afta long tok ya, Jeova i mekem plante bigbigfala wok. Eksampel, long 607 B.K.T., hem i panisim strong ol man we hem i jusumaot olgeta, from we oli mekem stronghed mo oli kilim plante tumas man i ded. Mo tu, hem i panisim ol nesen raonabaot, taem oli glad blong luk we Isrel i safa. (Jeremaea, japta 46 kasem 49) Biaen, long 539 B.K.T., Jeova i mekem strongfala politik paoa blong wol, Babilon, i foldaon. From samting ya, long 537 B.K.T., wan smol grup blong ol man Isrel oli gobak long ples blong olgeta blong bildim haos prea bakegen.—2 Kronikel 36:22, 23.
3 Hemia ol bigbigfala samting we oli bin seksekem wol. Mo, olsem Emos i talem, Jeova i talemaot olgeta samting ya fastaem long ol profet we oli olsem ol man blong karem mesej, mo oli givim woning long Isrel long ol samting we bambae oli kam. Long medel blong handred yia ya 800 kasem 700 B.K.T., hem i yusum Aesea. Long medel blong handred yia ya 700 kasem 600 B.K.T., hem i yusum Jeremaea. Mo, biaen, kolosap long 600 B.K.T., hem i yusum Esikel. Olgeta ya mo sam narafala profet we oli holemstrong long God, oli givim wan nambawan wetnes long saed blong ol stampa tingting blong Jeova.
Makemaot Ol Man Blong Karem Mesej Blong God Tede
4. ?Wanem samting i soemaot klia se ol man oli nidim ol man blong karem mesej blong pis?
4 ?Olsem wanem tede? Plante man long wol oli harem se bambae i gat wan bigfala samting i hapen i no longtaem, from we oli luksave se laef blong man i stap go nogud moa. Olgeta we oli laekem stret fasin, oli harem nogud tumas taem oli luk fasin tu fes mo ol rabis fasin blong Krisendom. Olsem Jeova i talemaot tru long Esikel, olgeta ya “oli sore mo oli krae from olgeta rabis fasin we ol man oli mekem long medel” blong hem. (Esikel 9:4) Be, plante man oli no save ol stampa tingting blong Jeova. I nidim man blong talemaot long olgeta.
5. ?Olsem wanem Jisas i soemaot se bambae i gat ol man blong karem mesej long taem blong yumi?
5 ?I gat sam man tede we oli toktok wetem fasin no fraet olsem Aesea, Jeremaea, mo Esikel? Jisas i talem se bambae i gat sam man olsem. Taem hem i stap talemaot ol samting we bambae oli kamaot long taem blong yumi, hem i talem se: “Bambae ol man oli stap talemaot gud nyus blong kingdom long olgeta ples long wol, blong oli wetnes long hem long fes blong olgeta man. Nao biaen, en i save kam.” (Matyu 24:14, NW) ?Hu tede i stap mekem profet tok ya i kamtru? ?Hu ya i stap wok olsem wan man blong karem mesej, wan man blong talemaot gud nyus? Blong ansarem kwestin ya, i gud yumi luk sam samting long taem blong Isrel bifo we oli sem mak long taem blong yumi tede.
6. (a) Tokbaot samting we i hapen long “Isrel blong God” long taem blong faswan bigfala faet blong wol. (b) ?Olsem wanem Esikel 11:17 i kamtru long Isrel bifo?
6 Long ol hadtaem blong Faswan Bigfala Faet Blong Wol, ol man blong Jeova long taem blong yumi, smol grup blong ol man “Isrel blong God” we oli stap, oli go kalabus. Hemia i sem mak olsem taem we ol man Isrel oli go kalabus long Babilon bifo. (Galesia 6:16) Smol grup ya i kalabus long saed blong speret, insaed long Bigfala Babilon, hemia kampani blong olgeta gyaman skul long wol, we Krisendom nao hem i bigfala haf blong hem mo i gat moa fol. Nating se oli go kalabus, ol tok we Jeova i givim long Esikel, oli soem se Jeova i no lego ol man blong hem olgeta. Hem i se: “Bambae mi tekemaot yufala long medel blong ol man, mo bambae mi karemaot yufala long ol kantri ya we yufala i bin go wanwan long olgeta, mo bambae mi mi givim graon blong Isrel i go long yufala.” (Esikel 11:17) Blong mekem promes ya i kamtru long Isrel bifo, Jeova i yusum Saeras, wan man Pesia. Hem nao i winim bigfala politik paoa blong wol, Babilon, mo i mekem rod i open blong wan smol grup blong ol man Isrel oli save gobak long graon blong olgeta. ?Be olsem wanem tede?
7. ?Wanem samting i kamaot long 1919 blong soemaot se Jisas i tekem aksin agensem Bigfala Babilon? Eksplenem.
7 Long stat blong ol yia 1900, i gat bigfala pruf i kamaot blong soem se Bigfala Saeras i stap wok. ?Hu ya Bigfala Saeras? Hemia Jisas Kraes, we i kam king long Kingdom blong heven long 1914. Long 1919, bigfala King ya i mekem i gud long smol grup blong ol tabu brata blong hem we oli stap yet long wol ya. Hem i mekem ol Kristin ya we tabu speret i makemaot olgeta, oli kam fri long kalabus long saed blong speret. Nao olgeta ya oli gobak long “ples” blong olgeta, olsem se oli kamgud bakegen long saed blong speret. (Aesea 66:8; Revelesen 18:4) Taswe, tok blong Esikel 11:17 i kamtru tede tu. Long taem bifo, Babilon i mas lus fastaem blong mekem rod blong ol man Isrel oli gobak long ples blong olgeta. Long taem blong yumi, taem Isrel blong God i stanap bakegen, hemia wan pruf se Bigfala Saeras i mekem Bigfala Babilon i foldaon finis. Namba tu enjel we Revelesen japta 14 i tokbaot, i talemaot samting ya, taem hem i singaot se: “Taon ya Babilon, we i hae we i hae, hem i foldaon finis, i foldaon olgeta. Hem i olsem rabis woman we i mekem ol man blong olgeta kantri oli dring waen blong hem. Waen ya blong hem, hemia we man i mekem nogud wetem woman. Mo taem ol man oli dring waen ya, oli kasem kros blong God from.” (Revelesen 14:8) !Hemia wan bigfala jenis long Bigfala Babilon, antap moa long Krisendom! !Mo, hem i wan bigfala blesing long ol trufala Kristin!
8. ?Olsem wanem buk blong Esikel i eksplenem glad blong ol man blong God afta we oli gofri long 1919?
8 Long Esikel 11:18-20, yumi save ridim tok blong profet ya blong eksplenem glad blong ol man blong God taem oli gobak bakegen long ples blong olgeta. Faswan taem we tok blong hem i kamtru, hemia taem we God i klinim Isrel long taem blong Esra mo Nehemaea. Long taem blong yumi, profet tok ya i kamtru long wan fasin we i kolosap sem mak. Bambae yumi luk olsem wanem. Jeova i talem se: “Bambae oli kam [long ples blong olgeta] mo oli karemaot olgeta doti samting long hem, mo olgeta samting we oli rabis olgeta bambae oli mas karemaot long hem.” Olsem profet tok ya i talem, stat long 1919, Jeova i klinim ol man blong hem mo i givim paoa long olgeta blong oli mekem wok blong hem bakegen. Oli stat karemaot ol kastom mo tijing blong Babilon we oli mekem olgeta oli doti long saed blong speret long ae blong God.
9. ?Wanem sam bigfala blesing we Jeova i givim long ol man blong hem, stat long 1919?
9 Biaen, long vas 19, Jeova i talem se: “Mo bambae mi givim wan hat nomo long olgeta, mo bambae mi putum wan nyufala speret insaed long olgeta; mo bambae mi karemaot hat we i olsem ston long bodi blong olgeta mo givim wan hat we hem i mit.” Stret folem ol tok ya, long 1919, Jeova i mekem ol tabu man blong hem oli joengud, i olsem we i givim “wan hat” long olgeta, blong bambae oli save mekem wok blong hem we “solda blong wan i joen long solda blong narawan.” (Sefanaea 3:9) Mo tu, Jeova i givim tabu speret long ol man blong hem blong oli gat paoa blong givim wetnes, mo blong oli save gat ol nambawan frut blong speret ya we Galesia 5:22, 23 i tokbaot. Jeova i givim long olgeta wan hat we i sofsof, we i rere blong jenis folem tingting blong God, wan hat we i obei mo we i rere blong mekem samting we God i wantem. Hem i no wan hat we i strong olsem ston mo i no wantem obei.
10. ?From wanem Jeova i blesem ol man blong hem afta 1919 taem oli stanap bakegen?
10 ?From wanem hem i mekem samting ya? Jeova hem wan i eksplenem. Yumi ridim long Esikel 11:20, se: “Nao bambae oli wokbaot folem ol loa blong mi mo bambae oli obei long ol stretfala disisen blong mi. Bambae oli save kam ol trufala man blong mi, mo mi mi save kam God blong olgeta.” Isrel blong God i lanem blong obei long loa blong Jeova, i bitim we oli folem prapa tingting blong olgeta nomo. Oli lanem blong mekem samting we God i wantem wetem fasin blong no fraet long man. Taswe, i klia nomo se oli defren olgeta long ol gyaman Kristin long Krisendom. Oli rili ol man blong Jeova. From samting ya, Jeova i rere blong yusum olgeta olsem man blong karem mesej blong hem, hemia ‘slef we i stret mo waes.’—Matyu 24:45-47.
Glad Blong Ol Man We Oli Karem Mesej Blong God
11. ?Olsem wanem buk blong Aesea i tokbaot glad blong ol man blong Jeova?
11 !Tingbaot glad blong olgeta ya taem oli luksave se oli kasem wan blesing blong wok olsemia! Fulwan grup blong olgeta i talemaot toktok ya we i stap long Aesea 61:10, se: “Bambae mi mi haremgud tumas long Jeova. Bambae sol blong mi i glad tumas from God blong mi.” Promes blong Aesea 35:10 hem i kamtru long olgeta, i se: “Olgeta we Jeova i sevem olgeta, bambae oli kambak, mo bambae oli kam long Saeon we oli stap singaot from glad. Bambae glad i stap long hed blong olgeta olwe. Bambae oli singaot mo oli glad, bambae oli no moa krae mo fasin blong harem nogud bambae i finis olgeta.” Hemia nao glad we ol man blong karem mesej blong Jeova long saed blong pis, oli gat long 1919, taem oli statem wok blong talemaot gud nyus long olgeta man. Stat long taem ya kam kasem tede, oli no stop blong mekem wok ya, mo glad blong olgeta i kam bigwan moa. Long Bigfala Toktok blong Jisas antap long Hil, hem i talem se: “Olgeta we oli man blong mekem pis oli save glad, from we God bambae i talem se ‘Yufala i pikinini blong mi.’ ” (Matyu 5:9, futnot) Stat long 1919 kam kasem tede, ol tabu ‘pikinini blong God’ we oli stap yet long wol, oli luksave se tok ya i tru tumas, taem i kamtru long olgeta.
12, 13. (a)?Hu ya i joen wetem Isrel blong God long wok blong Jeova, mo wanem wok nao oli mekem? (b) ?Wanem bigfala glad i kamtru long ol man blong Jeova we tabu speret i makemaot olgeta?
12 Go kasem ol yia 1930, namba blong Isrel blong God i stap kam antap. Ale long ol yia ya 1930, wok blong hivimap ol laswan long grup we tabu speret i makemaot olgeta, kolosap i finis. ?Samting ya i min se i no moa gat sam narafala man oli joen wetem olgeta blong talemaot gud nyus? Si, i gat. Wan bigfala kampani blong ol Kristin we oli gat hop blong laef long wol ya, oli stat hivap finis long taem ya. Mo olgeta ya oli stap joen wetem ol tabu brata blong olgeta, blong mekem wok blong prij. Aposol Jon i luk bigfala kampani ya long wan drim, mo i gud yumi makem olsem wanem hem i tokbaot olgeta ya: “Oli stap stanap long fes blong God ya we i stap sidaon long bigfala jea blong hem, mo long dei mo long naet, oli stap mekem wosip long hem insaed long haos blong hem.” (Revelesen 7:15) Yes, bigfala kampani i stap bisi long wok blong God. From samting ya, afta 1935, taem namba blong olgeta we tabu speret i makemaot olgeta i stat godaon, ol gudfala fren blong olgeta long bigfala kampani oli gohed strong moa long wok blong givim wetnes.
13 Long rod ya, Aesea 60:3, 4 i kamtru se: “Ol nesen bambae oli go long laet blong yu, mo ol king bambae oli go long laet blong yu we i saen bigwan. !Leftemap ae blong yu mo luk raonabaot long yu! Olgeta evriwan oli kam wanples, oli kam long yu. Ol pikinini boe blong yu oli aot long ol ples farawe oli kam, mo ol pikinini gel blong yu we bambae yu lukaot long olgeta long saed blong yu.” Ol nambawan tok blong Aesea 60:5 i eksplenem glad we Isrel blong God i kasem taem ol samting ya i kamaot. Yumi ridim se: “Long taem ya, bambae yu luk mo bambae fes blong yu i fulap long glad, mo hat blong yu bambae i seksek mo i solap, from we bambae yu kasem ol sas samting blong solwora. Bambae yu kasem ol rij samting blong ol nesen.”
Ogenaesesen Blong Jeova i Stap Go Fored
14. (a) ?Wanem drim blong ol samting long heven we Esikel i luk, mo hem i kasem wanem oda? (b) ?Ol man blong Jeova long taem blong yumi, oli luksave wanem samting, mo wanem wok we oli harem se oli mas mekem?
14 Long 613 B.K.T., Esikel i luk wan drim long saed blong ogenaesesen blong Jeova long heven, olsem wan kat we i stap ron. (Esikel 1:4-28) Afta long samting ya, Jeova i talem long hem se: “Pikinini blong man, yu go, go long medel blong ol man Isrel, mo yu mas talemaot ol tok blong mi long olgeta.” (Esikel 3:4) Long yia ya 1997, yumi luksave se ogenaesesen blong Jeova long heven i stap ron i go yet, we bambae i no save stop, blong mekem ol stampa tingting blong God oli kamtru. Taswe, yumi gat filing ya yet se yumi wantem talemaot ol stampa tingting ya long ol narafala man. Long taem blong Esikel, hem i talemaot ol tok we oli kamaot stret long Jeova. Tede, yumi talemaot ol tok we oli kamaot long Jeova tru long Tok blong hem, Baebol. !Buk ya i rili gat wan nambawan mesej blong givim long olgeta man! Plante man oli wari long saed blong fyuja, be Baebol i soemaot se fyuja i moa nogud bitim samting we oli stap tingbaot. Mo tu, fyuja i moa gud bitim samting we oli tingbaot.
15. ?From wanem ol samting oli moa nogud i bitim wanem we plante man oli tingbaot?
15 Ol samting oli moa nogud from we, olsem yumi lanem long stadi we i pas finis, Krisendom mo ol narafala gyaman skul bambae oli lus i no longtaem. Bambae oli lus olgeta, olsem Jerusalem long 607 B.K.T. Mo tu, olgeta politik gavman raon long wol, we buk blong Revelesen i talem se oli olsem wan wael anamol wetem seven hed mo ten hon, bambae i no longtaem oli lus olgeta. Hemia tu i sem mak olsem ol hiten man we oli stap raonabaot long Jerusalem bifo. (Revelesen 13:1, 2; 19:19-21) Long taem blong Esikel, Jeova i eksplenem klia bigfala fraet we i kasem ol man jes bifo we Jerusalem i lus olgeta. Be, ol tok ya blong hem bambae i gat bigfala mining moa, taem ol man oli luksave se wol ya i stap lus. Jeova i talem long Esikel se: “Long saed blong yu, O pikinini blong man, pulum win we leg blong yu i seksek from. Wetem wan tingting we i kros, yu mas pulum win long fored blong ae blong olgeta. Mo bambae i mas kamaot olsem se, sipos oli askem long yu, ‘?From wanem yu yu stap pulum win?’ ale, yu mas talem se, ‘From wan ripot.’ From we bambae hem i mas kamtru, mo evri hat bambae i lusum paoa blong hem, mo olgeta han bambae oli kam slak, mo evri tingting i mas foldaon, mo wora bambae i foldaon long olgeta ni. ‘!Luk! Bambae samting ya i sua blong hapen mo hem i mas kamaot tru nomo,’ hemia nao tok blong Haefala Masta Jeova.” (Esikel 21:6, 7; Matyu 24:30) Kolosap nomo nao, ol bigbigfala samting blong fraet bambae oli kamtru. Yumi wari bigwan long laef blong ol man raonabaot long yumi. Samting ya nao i stap pusum yumi blong givim woning long olgeta, blong talemaot “ripot” long saed blong kros we Jeova i rere blong soemaot.
16. Long saed blong olgeta we tingting blong olgeta i stap daon, ?from wanem ol samting i moa gud bitim wanem we plante man oli tingbaot?
16 Long saed blong olgeta we tingting blong olgeta i stap daon, ol samting oli moagud bitim samting we bighaf blong ol man oli tingbaot. ?Olsem wanem? Jisas Kraes i ded blong pemaot ol sin blong yumi, mo naoia hem i stap rul olsem King long Kingdom blong God. (1 Timote 1:15; Revelesen 11:15) Ol problem we ol man oli bin ting se bambae oli neva jenis samtaem, Kingdom ya bambae i mekem oli lus olgeta. Ded, sik, kruked fasin, hanggri, mo fasin blong brekem loa, bambae oli kam ol samting blong bifo nomo. Kingdom blong God bambae i rul antap long wol ya we i kam paradaes, mo i no gat wan samting we i save agensem rul ya. (Revelesen 21:3, 4) Ol man bambae oli haremgud long pis blong God—wan fasin fren wetem Jeova God mo ol narafala man we i gat pis long hem.—Ol Sam 72:7.
17. ?Wanem gudfala ripot i mekem glad i kamaot long hat blong ol man blong talemaot pis blong God?
17 Long samfala ples blong wol, plante plante man we tingting blong olgeta i stap daon, oli stap lesin long mesej blong pis blong God. Hemia sam eksampel nomo blong soemaot samting ya. Las yia, long Yukren, namba blong ol man blong talemaot gud nyus i go antap 17 pesen. Long Mosambik tu, namba i go antap 17 pesen, mo long Lituania i go antap 29 pesen. Long Rasia, namba i go antap 31 pesen, mo long Albania, namba blong ol man blong talemaot gud nyus i go antap 52 pesen. Ol namba ya oli soem se, plante taosen man we hat blong olgeta i stret, oli wantem kasem pis blong God, mo oli stanap finis long saed blong stret fasin. Ol namba ya we oli stap kam antap kwik olsemia, oli mekem ful kampani blong ol Kristin brata long wol oli glad.
18. ?Nating se ol man oli lesin no nogat, yumi gat wanem tingting?
18 ?Ol man long ples blong yu oli stap lesin long gud nyus? Sipos yes, mifala i glad wetem yu. Be, long samfala ples, ol brata oli mas hadwok long plante, plante haoa bifo we oli faenem wan man we i soem intres. ?Ol brata long ol ples olsem, oli letem han blong olgeta i kam slak mo tingting i foldaon? No gat. Ol Wetnes blong Jeova oli tingbaot ol tok we God i talem long Esikel, taem Hem i jes givim wok long yangfala profet ya se i mas prij long ol manples blong hem, ol man Jyu. Hem i se: “Long saed blong olgeta, nating sipos oli harem no oli no harem—from we laen ya i fulap long ol rebel nomo—be bambae oli save se wan profet i bin kam stanap long medel blong olgeta.” (Esikel 2:5) Olsem Esikel, yumi gohed blong talemaot pis blong God long ol man, nating se oli lesin no nogat. Sipos oli lesin, yumi glad tumas. Sipos oli sakemaot yumi, jikim yumi, no maet oli kilim yumi, be yumi gohed nomo. Yumi laekem Jeova tumas, mo Baebol i talem se: ‘Lav i stanap strong tru long olgeta trabol.’ (1 Korin 13:4, 7) From we yumi prij wetem fasin blong stanap strong longtaem, ol man oli savegud ol Wetnes blong Jeova. Oli save mesej blong yumi. Taem en i kam, bambae oli save se ol Wetnes blong Jeova oli bin traem blong halpem olgeta blong haremgud long pis blong God.
19. Olsem ol man blong wok blong trufala God, ?yumi gat wanem bigfala jans we yumi tinghae tumas long hem?
19 ?I gat wan narafala wok we i moa gud i bitim wok blong Jeova? !No gat! Glad blong yumi we i bigwan moa, i kamaot from fasin fren blong yumi wetem God mo from we yumi save se yumi stap mekem samting we hem i wantem. “Olgeta we oli stap singsing, oli stap mekem wosip long yu, oli hapi tumas. Oltaem yu yu kaengud long olgeta, nao i olsem we oli stap wokbaot long delaet.” (Ol Sam 89:15) I gud yumi tinghevi oltaem long glad ya we yumi gat blong stap olsem ol man we God i yusum blong talemaot pis long ol man. Yumi mas wok strong long wok ya blong yumi gogo kasem taem we Jeova i talem se wok ya i finis.
?Yu Yu Rimemba?
◻ ?Hu ya ol man blong God we oli karem mesej blong pis tede?
◻ ?Olsem wanem yumi save se Bigfala Babilon i foldaon long 1919?
◻ ?Wanem samting we “bigfala kampani” i wari moa long hem?
◻ ?From wanem fyuja i nogud moa i bitim wanem we plante man oli tingbaot tede?
◻ ?From wanem olgeta we hat blong olgeta i stret, oli save gat wan fyuja we i moa gud bitim wanem we oli tingbaot?
[Tok blong pija long pej 21]
Plante man we oli luk se laef blong man i stap go nogud moa, oli harem se wan samting we i nogud tumas bambae i kamaot long wol
[Tok blong pija long pej 23]
Ol man blong talemaot pis blong God oli glad moa i bitim ol narafala man long wol tede