I No Longtaem Bambae Ol Sikman Oli Kamgud Bakegen

“NEVA yumi luk wan samting olsem hemia.” Hemia tok blong ol man we oli luk wan merikel we Jisas i mekem taem wan man we haf bodi blong hem i ded, i kamgud wantaem nomo. (Mak 2:​12) Jisas mo ol man blong hem tu oli mekem ol blaenman, ol man we oli no save toktok, mo ol man we leg blong olgeta i nogud, oli kamgud bakegen. ?Weples Jisas i kasem paoa blong mekem samting ya? ?Olsem wanem bilif i joen wetem merikel ya? ?Ol merikel blong faswan handred yia oli givim wanem save long yumi long saed blong ol merikel tede?​—Matyu 15:30, 31.

“Bilif Blong Yu i Mekem Yu Yu Gud Bakegen”

Tede, ol man we oli mekem ol merikel blong winim sik oli laekem blong yusum ol tok we Jisas i talem long wan woman we i gat sik blong woman i stap long hem oltaem long 12 yia. Hem i talem long woman ya se: “Bilif blong yu i mekem yu yu gud bakegen.” (Luk 8:​43-​48) ?Ol tok ya blong Jisas oli soem se woman ya i kamgud bakegen from bilif blong hem? ?Hemia i sem mak long “ol merikel” we oli mekem tede?

Taem yumi ridimgud Baebol, yumi luk se plante taem, Jisas mo ol man blong hem oli no askem long ol sikman blong soemaot bilif blong olgeta bifo we oli mekem olgeta oli kamgud bakegen. Woman ya we yumi tokbaot antap, i kam kolosap long Jisas, hem i no talem wan samting nating. Hem i stap long bak blong Jisas, mo long kwaet fasin, hem i tajem klos blong Jisas, nao “wantaem nomo, sik blong hem i finis.” Long wan narafala taem, Jisas i mekem wan long olgeta we oli kam blong holem hem, i kamgud bakegen. Mo tu, hem i mekem olsem long wan man we i no save nating se Jisas hem i hu.​—Luk 22:50, 51; Jon 5:​5-9, 13; 9:​24-​34.

?Ale, olsem wanem bilif i joen wetem ol merikel ya? Taem Jisas mo ol man blong hem oli stap long Taea mo Saedon, wan woman Fonisia i kam mo i kraeaot se: “Masta, yu Laen blong Deved, plis yu sore long mi. Gel blong mi i gat wan devel i stap long hem, we i stap spolem hem tumas.” Tingbaot olsem wanem woman ya i harem nogud tumas taem hem i askem strong se: “Masta, plis yu givhan long mi.” Jisas i sore tumas long hem, nao i ansa se: “Woman, bilif blong yu i strong tumas. Bambae i kamtru long yu, stret olsem we yu yu bilif.” Mo “wantaem nomo” gel blong hem i kamgud bakegen. (Matyu 15:21-​28) I klia se bilif i joen wetem merikel ya, be ?bilif blong hu? Makem se Jisas i presem bilif blong mama, i no bilif blong pikinini we i sik. ?Mo hemia bilif long wanem samting? Taem woman ya i kolem Jisas se “Masta, yu Laen blong Deved,” hem i stap talemaot long fes blong olgeta man se Jisas hem i Mesaea we God i promes blong sanem. Hemia i no jes wan tok blong talemaot bilif long God no bilif long paoa blong man we i mekem merikel. Taem Jisas i talem se, “Bilif blong yu i mekem yu yu gud bakegen,” hem i minim se sipos olgeta ya we oli stap safa oli no bilif long hem olsem Mesaea, oli no save kam long hem blong i mekem olgeta oli kamgud bakegen.

Yumi luk long ol store ya long Baebol se ol merikel we Jisas i mekem oli defren tumas long ol merikel we yumi luk tede. Ol man we oli kamgud bakegen long taem bifo oli no soem ol strong filing​—oli no singaot bigfala, singsing, krae, oli no stap olsem we oli drim, mo sam narafala samting olsem. Jisas tu i no mekem ol wael krangke fasin blong mekem sikman i kamgud bakegen. Mo tu, Jisas i neva talem se hem i no save mekem ol sikman oli gud bakegen from we oli no gat naf bilif no from we oli no givim naf mane.

Ol Merikel From Paoa Blong God

?Olsem wanem Jisas mo ol man blong hem oli mekem ol merikel? Baebol i ansa se: ‘Paoa blong Jeova i stap long Jisas blong mekem ol sikman oli gud bakegen.’ (Luk 5:​17) Luk 9:​43 i talem se, afta long wan merikel, “olgeta man oli sapraes tumas long bigfala paoa blong God we i gud tumas.” I stret nomo we Jisas i no leftemap hem wan olsem man blong mekem merikel. Wan taem, hem i talem long wan man we hem i ronemaot rabis speret long hem, i se: ‘Yu gobak long ples blong yu. Yu go talemaot long ol manples blong yu, ol samting ya we Jeova i mekem long yu, we hem i sore tumas long yu.’​—Mak 5:​19.

From we Jisas mo ol aposol oli mekem merikel long paoa blong God, i isi blong kasem save from wanem sikman i no nidim blong gat bilif, blong hem i save kamgud bakegen. Man we i mekem merikel, hem nao i mas gat strong bilif. Taswe, taem ol man blong Jisas oli no save ronemaot wan devel we i strong tumas, Jisas i talem long olgeta from wanem i olsem, i se: “From we bilif blong yufala i no naf.”​—Matyu 17:20.

Risen Blong Ol Merikel

Nating se Jisas i mekem plante merikel taem hem i stap prij long wol ya, hemia i no faswan wok blong hem. Ol merikel we hem i mekem​—hem i neva askem mane from​—oli stap olsem namba tu samting we hem i mekem. Samting we i moa impoten, hemia ‘talemaot gud nyus blong kingdom.’ (Matyu 9:​35) Baebol i tokbaot wan taem we ‘Jisas i glad blong luk ol man, nao hem i toktok long olgeta long nyus ya we God i stap kam king blong ol man blong hem. Mo i mekem ol sikman blong olgeta oli gud bakegen.’ (Luk 9:​11) Long ol store long Gospel, plante taem ol man oli kolem Jisas se “Tija” be neva “Man we i mekem merikel.”

Ale, ?from wanem Jisas i mekem ol merikel? Faswan risen, from we hem i wantem mekem i klia se hem i Mesaea we God i promes blong sanem. Taem oli jajem Jon Baptaes long fasin we i no stret mo putum hem long kalabus, hem i wantem savegud sipos hem i bin mekem ol samting we God i sanem hem blong mekem. Ale, hem i sanem ol man blong hem oli go blong askem long Jisas se: “?Olsem wanem? ?Yu yu man ya we bifo oli bin talem se ‘Wan man bambae i kam,’ no mifala i mas stap wet long wan narafala man bakegen?” Makem ol tok we Jisas i talem long ol man blong Jon, i se: “Yufala i gobak long Jon, yufala i talemaot long hem, olgeta samting ya we yufala i stap luk mo we yufala i stap harem. Ol blaenman, naoia oli save lukluk. Ol man we leg blong olgeta i nogud, naoia oli save wokbaot gud. Ol man we oli gat leprosi, naoia bodi blong olgeta i klin. Ol man we sora blong olgeta i fas, naoia sora blong olgeta i open. Ol dedman, naoia oli laef bakegen. Mo ol puaman, naoia i gat man i stap talemaot gud nyus long olgeta.”​—Matyu 11:​2-5.

Yes, ol merikel blong tekemaot sik we Jisas i mekem mo ol narafala merikel tu we ol Gospel oli tokbaot, oli soemaot klia se Jisas i ‘man ya we bambae i kam,’ Mesaea we God i promes blong sanem. I no gat nid blong oli “wet long wan narafala man bakegen.”

?Olsem Wanem Long Ol Merikel Tede?

Oraet nao, ?yumi save bilif se tede tu bambae God i mekem ol merikel blong soemaot paoa blong hem? No gat. Taem Jisas i mekem ol merikel long paoa blong God, hem i pruvum fulwan se hem i Mesaea we God i promes blong sanem i kam. Olgeta man oli save ridim ol store long Baebol long saed blong ol bigbigfala wok blong Jisas. God i no nidim blong mekem ol wok ya bakegen mo bakegen, long fes blong olgeta man we oli kam biaen, blong pruvum paoa blong hem.

Yumi intres tumas blong save se, ol merikel mo ol narafala bigbigfala wok blong Jisas oli no pusum olgeta man evriwan blong bilif. Nating se samfala oli luk ol merikel blong Jisas, oli no bilif se hem i mekem olgeta long paoa blong Papa blong hem we i stap long heven. “Hem i mekem plante saen finis blong soemaot paoa blong God long fes blong ol man Isrel, be olgeta oli no bilif long hem.” (Jon 12:37) Hemia nao from wanem, afta we aposol Pol i tokbaot ol defren paoa we God i givim long sam memba blong Kristin kongregesena long faswan handred yia, olsem paoa blong talemaot profet tok, toktok long narafala lanwis, mekem sikman i kamgud bakegen, mo ol narafala samting olsem, God i pusum hem blong talem se: “Maet sam man oli gat paoa blong talemaot ol tok we God i givim, be fasin ya bambae i finis. Maet sam man oli gat paoa blong tok long ol narafala lanwis, be ol lanwis ya bambae oli no moa yusum. Maet sam man oli save evri samting, be save ya bambae i lus. From we save ya blong yumi i hafhaf nomo, mo paoa ya blong yumi blong talemaot ol tok we God i givim, hem tu i hafhaf nomo. Be taem ol samting ya we oli stret gud bambae oli kamtru, ol fasin ya blong yumi we oli hafhaf nomo, bambae oli lus.”​—1 Korin 12:28-​31; 13:​8-​10.

Yumi nidim bilif long God blong haremgud. Be, sipos bilif blong yumi i stanap long ol gyaman promes blong merikel, bambae yumi harem nogud nomo. Mo tu, long saed blong taem blong en, Jisas i givim woning ya se: “Bambae plante gyaman Mesaea mo plante gyaman profet oli save girap, oli save mekem ol bigbigfala saen mo ol samting blong sapraes. Bambae oli mekem olsem blong traem gyaman long olgeta man, mo sipos oli gat rod, bambae oli save traem blong gyaman long ol man ya we God i jusumaot olgeta finis se oli man blong hem.” (Matyu 24:24) Antap long ol gyaman merikel mo trik, i gat wok blong ol rabis speret tu. From samting ya, yumi no mas sapraes sipos ol samting oli kamaot we yumi no kasem save long olgeta. I sua se trufala bilif long God i no save stanap long ol samting ya.

?From we i no gat wan man tede we i save mekem ol merikel olsem Jisas, hemia i min se yumi no gat plante samting blong givhan long yumi olsem ol man long taem bifo? No gat. Olgeta we Jisas i tekemaot sik blong olgeta, oli kam sik bakegen biaen. Oli kam olfala mo oli ded. Ol merikel oli mekem olgeta oli kamgud blong smoltaem nomo. Nating se i olsem, mining blong ol merikel ya i stap longtaem, from we oli pija blong ol blesing we bambae oli kamaot long fyuja.

Taswe, taem Alekandre mo Benedita we yumi tokbaot antap, tufala i stadi long Tok blong God, Baebol, tufala i no moa bilif long ol merikel blong naoia mo long wok blong ol rabis speret blong mekem sikman i kamgud bakegen. Nating se i olsem, tufala i sua se ol merikel oli no ol samting blong bifo nomo. ?From wanem tufala i gat tingting ya? Olsem plante milyan man long olgeta ples long wol, tufala i wet long ol gudfala merikel we bambae oli kamaot aninit long rul blong Kingdom blong God.​—Matyu 6:​10.

Bambae i No Moa Gat Sik Mo Ded

Olsem yumi luk finis, faswan wok blong Jisas taem hem i stap long wol i blong talemaot gud nyus blong Kingdom blong God, i no blong mekem ol merikel mo ol narafala bigbigfala saen. (Matyu 9:​35; Luk 4:​43; 8:1) God bambae i yusum Kingdom ya blong mekem ol sikman oli kamgud bakegen, mo finisim ol trabol we sin mo bodi we i no stretgud olgeta, oli mekem long ol man. ?Olsem wanem bambae hem i mekem samting ya mo long wanem taem?

Jisas Kraes i givim wan vison long aposol Jon long saed blong ol samting we bambae oli hapen plante handred yia biaen, i se: “Naoia God blong yumi i sevem yumi. Naoia hem i soemaot we hem i gat paoa, mo we hem i king. Naoia Mesaea blong hem i soemaot we hem i gat paoa long evri samting.” (Revelesen 12:10) Olgeta pruf oli soemaot se stat long 1914, oli sakem Setan, we i agensem God fulwan, i aot long heven i kamdaon long wol ya, mo Kingdom ya i rul. Jisas i kam King long Kingdom blong Mesaea, mo naoia hem i rere blong mekem ol bigfala jenis long wol ya.

I no longtaem nating, bambae gavman blong Jisas long heven i rul antap long wan nyufala grup blong man, yes, wan “nyufala wol.” (2 Pita 3:​13) ?Bambae wol i olsem wanem long taem ya? Ol nambawan tok ya oli soemaot wanem we bambae i hapen: “Mi luk nyufala heven wetem nyufala wol, tufala i stap. Heven mo wol we tufala i stap fastaem, tufala i lus finis . . . [God] bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”​—Revelesen 21:​1, 4.

?Yu yu save tingbaot se laef bambae i olsem wanem taem ol merikel oli kamaot blong mekem ol sikman oli gud bakegen? “Bambae i no gat wan man ples we i save talem se: ‘Mi mi sik.’ Ol man we oli stap long ples ya, bambae God i fogetem rong blong olgeta.” Yes, bambae God i mekem wan samting we ol man blong mekem merikel oli no naf blong mekem. “Bambae hem i finisim ded blong olwe.” Yes, ‘Hae God Jeova bambae i ravemaot wora blong ae blong olgeta man.’​—Aesea 25:8; 33:24.

[Futnot]

[Tok blong pija long pej 7]

Aninit long rul blong Kingdom blong God, bambae i gat ol merikel blong mekem ol sikman oli kamgud bakegen