‘Jeova i No Save Lego Ol Man Blong Hem’

“Man we i stret i save harem nogud long plante trabol, be Hae God i save tekemaot hem long olgeta trabol ya.”​—OL SAM 34:19.

1, 2. (a) ?Olsem wanem Jeova i stap blesem ol man blong hem naoia? (b) ?Plante Kristin oli stap kasem wanem, mo wanem sam kwestin we oli stanap?

OLSEM ol profet tok blong Baebol oli talemaot finis, ol man we oli wosip long Jeova oli stap long wan paradaes long saed blong speret. (2 Korin 12:​1-4) Ol Wetnes blong Jeova raon long wol oli olsem ol brata mo sista nomo, mo stampa fasin we i makemaot olgeta, hemia lav mo fasin joengud. (Jon 13:35) Oli gat dip save mo fulap save long ol trutok blong Baebol. (Aesea 54:13) !Oli talem tangkyu tumas long Jeova from we hem i givim jans long olgeta blong stap long haos prea blong hem long saed blong speret!​—Ol Sam 15:1.

² Evriwan insaed long ogenaesesen blong Jeova oli rij long saed blong speret. Be i luk olsem se, sam nomo oli gat pis mo kwaet laef, mo ol narafala oli kasem ol trabol mo hadtaem. Plante Kristin oli kasem trabol we i mekem olgeta oli harem nogud blong longtaem, mo i luk olsem se i no gat rod blong kam fri long trabol ya. Long ol taem olsem, tingting i save foldaon bigwan. (Proveb 13:12) ?Olsem wanem? ?Ol trabol oli soemaot se God i no glad long yumi? ?Jeova i stap mekem wan spesel samting blong lukaotgud long samfala Kristin, be i lego sam narafala Kristin?

3. (a) ?Jeova nao i stampa blong ol trabol we i kasem ol man blong hem? (b) ?From wanem ol man we oli wosip long Jeova oli safa nating se oli gat strong bilif?

³ Baebol i ansa se: “Taem ol samting oli kam blong traem yufala, bambae yufala i no talem se ‘Ol samting ya blong traem mi oli kamaot long God.’ From we i no gat samting nogud we i save kam traem God. Mo i no fasin blong God blong traem man.” (Jemes 1:​13) Jeova hem i Man blong Lukaot long ol man blong hem mo Givim Paoa long olgeta. (Ol Sam 91:​2-6) “Jeova i no save lego ol man blong hem.” (Ol Sam 94:​14, NW) Samting ya i no minim se ol man blong wosip long God wetem strong bilif bambae oli no kasem trabol. Wol blong yumi tede hem i stap long han blong ol sinman. Plante long olgeta oli kruked, mo sam long olgeta oli rabis man stret. I no gat wan long olgeta we i lukluk i go long Jeova blong kasem waes. From samting ya, ol man oli stap safa. Baebol i soemaot klia se plante taem ol man blong Jeova oli no save blokem ol nogud frut we i kamaot from sin mo rabis fasin.​—Ol Wok 14:22.

Ol Kristin We Oli Stap Tru Long God Oli Save Se Oli Mas Safa

4. ?Ol Kristin oli save sua long wanem samting taem oli stap laef long rabis wol ya, mo from wanem?

⁴ Nating se ol man blong Jisas oli no joen long wol ya, oli mas laef long medel blong ol man blong wol ya. (Jon 17:15, 16) Baebol i soemaot se Setan nao hem i bigfala paoa we i stap bos long wol ya. (1 Jon 5:​19) Taswe, ol Kristin oli save se samtaem, oli mas fesem sam bigfala trabol. Aposol Pita i stap tingbaot samting ya taem hem i talem se: “Yufala i mas lukaot gud. Yufala i mas rere. Enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigfala, i stap lukaot man blong i kakae. Yufala i mas stanap strong long bilif blong yufala, blong blokem hem. Yufala i save, long evri ples long wol, ol brata blong yumi oli stap kasem trabol from nem blong Jisas, stret olsem we yufala i stap kasem.” (1 Pita 5:​8, 9) Yes, long evri ples long wol, ol Kristin brata blong yumi oli save se bambae oli mas safa samtaem.

5. ?Olsem wanem Jisas i soemaot klia se ol Kristin we oli gat strong bilif bambae oli harem nogud long sam bigfala hadtaem long laef blong olgeta?

⁵ Sipos yumi laekem Jeova tumas mo yumi obeigud long ol rul blong hem, be bambae yumi fesem yet sam samting long laef we oli mekem yumi harem nogud. Jisas i soemaot samting ya long pijatok we i stap long Matyu 7:​24-​27. Long ples ya, hem i soemaot olsem wanem olgeta we oli obei long tok blong hem oli defren long olgeta we oli no mekem olsem. Hem i talem se ol disaepol blong hem we oli obei long hem, oli olsem wan waes man we i bildim haos blong hem antap long wan bigfala ston. Be, olgeta we oli no obei long ol tok blong hem, oli sem mak olsem wan man we i no gat hed, we i bildim haos blong hem long sanbij nomo. Taem bigfala ren i foldaon, haos we i stap antap long bigfala ston nomo hem i stanap i stap. Makemgud long saed blong haos blong waes man ya se, “ren i stap kam, mo ol wora oli stap ron bigfala, mo win i blu, i stap kilim haos ya, be haos ya i no foldaon.” Jisas i no promes se waes man ya bambae i gat pis mo kwaet laef oltaem. Defren olgeta, hem i soemaot se waes fasin blong man ya bambae i mekem hem i reregud blong stanap strong mo stap sef tru long bigfala ren mo win ya. Pijatok blong man blong sakem sid i givim tingting we i kolosap sem mak long hemia. Long pijatok ya, Jisas i eksplenem se ol man we oli wosip mo obei long God ‘wetem wan hat we i gud mo i tru,’ bambae oli ‘mekem tingting blong olgeta i longfala, nao oli gat frut long laef blong olgeta.’​—Luk 8:​4-​15.

6. Long pijatok blong Pol long saed blong ol samting we faea i no save kakae, ?hu ya i kasem traem we i olsem faea?

⁶ Taem aposol Pol i raet i go long ol man Korin, hem i yusum pijatok blong eksplenem sam fasin we yumi nidim blong kam strong long olgeta, blong yumi save stanap tru long ol hadtaem. Olkaen samting olsem gol, selva, mo ol sas ston we faea i no save spolem olgeta, oli minim ol fasin we God i stampa blong olgeta. (Skelem wetem Proveb 3:​13-​15; 1 Pita 1:​6, 7.) Be, ol fasin we tingting blong man nomo i wantem, oli sem mak olsem ol samting we faea i save spolem isi nomo. Pol i talem se: ‘Long dei ya we Kraes bambae i mekem kot long ol man, hem bambae i save soemaot ol wok blong ol man, wanem i gud mo wanem i nogud. From we long dei ya, bambae i gat faea, mo faea ya bambae i save traem wok blong olgeta man, i soemaot i klia we wok blong man i gud no i nogud. Sipos taem faea ya i bonem, be biaen bambae samting ya we man i wokem i stap stanap yet, man ya bambae i kasem pei blong hem.’ (1 Korin 3:​10-​14) Bakegen, long ples ya, Baebol i eksplenem se bambae yumi evriwan i mas fesem sam kaen traem we oli olsem faea.

7. Folem tok blong Rom 15:4, ?olsem wanem Baebol i save halpem yumi blong stanap strong tru long ol traem?

⁷ I gat plante store long Baebol long saed blong ol gudfala man blong God we oli pastru long hadtaem, mo samtaem ol traem ya oli gohed blong longtaem. Be, Jeova i no lego olgeta. Ating aposol Pol i stap tingbaot ol eksampel olsem, taem hem i talem se: “Olgeta tok ya we oli raetem long Baebol bifo, oli raetem blong tijim yumi. Nao tingting blong yumi i save stap strong, from we tok ya blong Baebol i stap mekem yumi harem gud, i stap mekem tingting blong yumi i longfala.” (Rom 15:4) Naoia, bambae yumi tingbaot tri man, we trifala i gat wan gudfala fasin fren wetem God, be trifala i kasem plante hadtaem.

?Yumi Lanem Wanem From Ol Store Blong Baebol?

8. ?Jeova i letem wanem samting i kasem Josef, mo samting ya i gohed blong hamas yia?

⁸ Jeova i stap mekem i gud long Josef, pikinini boe blong Jekob, stat taem hem i smol nomo. Nating se i olsem, Josef i safa tru long plante hadtaem we oli no fol blong hem nating. Ol prapa brata blong hem oli holem hem mo oli mekem i nogud tumas long hem. Oli salem hem olsem wan slef i go long wan kantri farawe, mo long kantri ya, ol man oli jajem hem long sam gyaman tok mo putum hem long “kalabus.” (Jenesis 40:15) Long ples ya, “ol jen oli fasemtaet leg blong hem, mo bigfala aean i holemtaet nek blong hem.” (Ol Sam 105:17, 18) Yumi sua se taem Josef i stap slef mo i kalabus, hem i askem bakegen mo bakegen long Jeova blong mekem hem i gofri. Be, blong kolosap 13 yia, hem i wekap evri moning we i stap yet olsem wan slef mo wan presina, nating se Jeova i yusum ol defren rod blong mekem hem i strong.​—Jenesis 37:2; 41:46.

9. ?Deved i mas stanap strong blong plante yia tru long wanem samting?

⁹ Wan store we i kolosap sem mak long hemia, hem i store blong Deved. Taem Jeova i traem blong faenem wan man we i naf blong rulum Isrel, hem i talem se: “Mi mi faenem finis we Deved ya, pikinini blong Jese, fasin blong hem i stret long tingting blong mi.” (Ol Wok 13:22) Nating se Jeova i laekem hem tumas, Deved i safa bigwan. Laef blong hem i stap long denja, ale, hem i haed blong plante yia long draeples, long ol hol blong ston, ol smosmol ples bitwin long ol bigfala ston, mo long graon blong ol man blong narafala kantri. Tingting blong hem i foldaon mo hem i fraet, from we ol man oli ronem hem olsem wan wael anamol nomo. Nating se i olsem, Jeova i givim paoa long hem blong i stanap strong. From ol trabol ya we Deved i kasem, hem i save talem se: “Man we i stret i save harem nogud long plante trabol, be Hae God i save tekemaot hem long olgeta trabol ya.”​—Ol Sam 34:19.

10. ?Wanem bigfala trabol i kasem Nabot mo famle blong hem?

¹⁰ Long taem blong profet Elaeja, i gat 7,000 man nomo long Isrel we oli no bodaon long gyaman god ya Bal. (1 King 19:18; Rom 11:4) Nabot, we maet hem i wan long olgeta ya, i kasem wan trabol we i nogud tumas, taem sam man oli mekem i no stret nating long hem. Oli mekem hem i sem long fored blong ol man, taem oli talem gyaman tok ya se hem i bin tok nogud agensem God mo king. Ol man oli bilivim tok ya, nao oli jajem hem mo panisim hem folem oda blong king, se oli mas stonem hem gogo i ded. Mo ol dog oli kam dring blad blong hem. !Oli kilim ol pikinini boe blong hem tu oli ded! Be, Nabot i no gat poen nating. Ol man we oli tok agensem hem oli gyaman nomo. Kwin Jesebel nao hem i stampa blong rabis plan ya. Hem i mekem olsem blong bambae king i save karem plantesin blong Nabot we i planem rop blong mekem waen long frut blong hem.​—1 King 21:​1-​19; 2 King 9:​26.

11. ?Aposol Pol i talem wanem long saed blong ol man mo woman blong bilif we Baebol i tokbaot?

¹¹ Josef, Deved, mo Nabot, oli tri nomo blong plante man mo woman blong bilif, we Baebol i talem se oli safa from ol hadtaem. Long hanraet blong aposol Pol, hem i tokbaot plante samting we oli hapen long ol man blong Jeova, stat bifo olgeta i kam kasem taem blong hem. Hem i talem se, “ol man oli stap laf nogud long olgeta, mo oli stap wipim olgeta. Mo sam narafala man olsem, ol man oli fasem olgeta long jen, oli putum olgeta long kalabus. Sam man olsem, ol man oli stonem olgeta long ol bigfala ston gogo oli ded, mo sam narafala, sam man oli tekem so, oli katem bodi blong olgeta long tu pis, blong kilim olgeta. Mo sam narafala, ol man oli kilim olgeta long naef blong faet. Sam narafala man olsem, oli stap wokbaot, we oli no gat klos blong olgeta, oli jes putum ol skin blong sipsip mo nani nomo. Oltaem oli stap trabol gud, mo ol man oli stap ronem olgeta, oli stap mekem i nogud long olgeta. Olgeta ya oli gudfala man tumas, ol man olbaot long wol oli no naf blong kampani wetem olgeta. Be oli stap mekem ples blong olgeta olbaot nomo, long drae ples, mo long hil, mo long hol blong ston, mo long hol long graon.” (Hibrus 11:36-​38) Be Jeova i no lego olgeta ya.

Jeova i Kea Long Ol Man We Oli Safa

12. ?Wanem sam long ol trabol we oli kasem ol Wetnes blong Jeova tede?

¹² ?Olsem wanem long ol man blong Jeova tede? Olsem wan ogenaesesen, yumi save sua se God bambae i lukaot long yumi, mo bambae yumi stap sefgud tru long ol las dei ya mo tru long taem blong bigfala trabol long fyuja. (Aesea 54:17; Revelesen 7:​9-​17) Be, olsem ol man wanwan, yumi luksave se “ol taem mo ol samting we man i no save long hem” oli stap kasem yumi, olsem oli stap kasem ol narafala man long wol. (Eklesiastis 9:​11) Tede, plante Kristin we oli gat strong bilif, oli stap safa from ol bigfala trabol. Samfala oli pua bitim mak. Baebol i tokbaot sam Kristin ‘pikinini we oli no gat papa, mo sam widowoman’ we oli stap trabol tumas. (Jemes 1:​27) Sam narafala oli safa from disasta, faet, raf fasin blong kilim man i ded, sik, ded, mo from sam man we oli yusum paoa blong olgeta blong spolem olgeta.

13. ?Wanem sam hadtaem we yumi harem ripot blong olgeta i no longtaem i pas?

¹³ Wan eksampel: Long 1996, Hed kampani blong ol Wetnes blong Jeova i kasem ripot long hedkwota blong Watch Tower long sam kantri, se sam Kristin brata mo sista blong yumi oli stap safa long ol kalabus we oli doti mo nogud tumas, jes from we oli folem ol rul blong Baebol. Tri kongregesena long wan kantri blong Saot Amerika oli no moa save gohed, taem sam rebel grup oli fosem plante handred Wetnes blong aot long kantri ya. Long wan kantri long Wes Afrika, wan faet we i kamaot bitwin ol man blong semfala kantri ya nomo, i kilim i ded sam Wetnes. Long wan kantri blong Sentrol Amerika, wan strongfala hariken i mekem sam brata we oli gat hadtaem finis long saed blong mane, oli harem nogud moa. Long sam narafala ples we ol man oli no pua mo oli no sot long kakae, samfala oli lusum glad blong olgeta from we tingting blong olgeta i trabol. Sam narafala oli kam slak from we laef naoia i hevi tumas long olgeta. Sam narafala bakegen, maet tingting blong olgeta i foldaon from we ol man raonabaot long olgeta oli no wantem lesin long gud nyus blong Kingdom we oli stap talemaot.

14. (a) ?Yumi lanem wanem long eksampel blong Job? (b) ?Taem yumi kasem trabol, yumi mas mekem wanem i bitim we yumi tingting nogud oltaem?

¹⁴ Yumi no mas tingting se ol trabol ya oli soem se God i no glad long yumi. No gat. Tingbaot store blong Job mo fulap trabol we hem i kasem. Hem i wan man we i “no gat poen long hem mo i stret nomo.” (Job 1:8) !Ating Job i harem nogud tumas long hat blong hem, taem Elifas i jajem hem se hem i mekem nogud! (Job, japta 4, 5, 22) Yumi no mas kwik blong talem se yumi kasem ol trabol from we yumi mekem Jeova i harem nogud long sam fasin, no from we Jeova i karemaot blesing blong hem long yumi. Ol rong tingting olsemia oli save mekem bilif blong yumi i kam slak, taem yumi fesem wan trabol. (1 Tesalonaeka 3:​1-3, 5) Taem yumi kasem hadtaem, i moagud blong tingting dip long trutok ya se, Jeova mo Jisas tufala i stap kolosap oltaem long ol stret man, nomata wanem samting i hapen.

15. ?Olsem wanem yumi save se Jeova i rili wari long saed blong ol trabol we ol man blong hem oli kasem?

¹⁵ Aposol Pol i leftemap tingting blong yumi taem hem i talem se: ‘I no gat man we i save tekemaot yumi long Kraes ya we hem i stap laekem yumi tumas. Maet yumi gat trabol, no yumi gat hadtaem, no ol man oli stap ronem yumi, be nating. Maet yumi hanggri, no yumi puaman, no kolosap yumi lusum laef blong yumi, no ol man oli kilim yumi, yumi ded, be ol samting ya oli no save tekemaot yumi long Kraes. Mi mi save finis we i no gat wan samting nating we i save tekemaot yumi long Kraes we hem i stap laekem yumi tumas. Bambae yumi ded, be hemia i no save tekemaot yumi, mo laef blong yumi i no save mekem. I no gat sam enjel, no sam haeman, no sam narafala paoa long heven we i save mekem. I no gat wan samting we i stap finis, no wan samting we bambae i kam, we i save mekem. I no gat samting antap olgeta no wan samting we i stap daon olgeta we i save tekemaot yumi long hem. I no gat wan samting nating long olgeta samting we God i mekem, we i save tekemaot yumi long God, we hem i laekem yumi ya tumas, we yumi joen long Jisas Kraes, Masta blong yumi.’ (Rom 8:​35, 38, 39) Jeova i wari bigwan long yumi, mo hem i save taem yumi safa. Taem Deved i stap haed long ol enemi blong hem, hem i raetem se: ‘Jeova i stap lukluk long ol stret man, i stap lesin blong harem krae blong olgeta. Jeova i stap kolosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta.’ (Ol Sam 34:15, 18; Matyu 18:​6, 14) Papa blong yumi long heven i kea long yumi mo hem i sore long olgeta we oli safa. (1 Pita 5:​6, 7) Hem i givim samting we yumi nidim blong stanap strong, nomata wanem kaen trabol yumi kasem.

Ol Presen Blong Jeova Oli Mekem Yumi Strong

16. ?Wanem sam samting we Jeova i givim we oli halpem yumi blong stanap strong, mo olsem wanem?

¹⁶ Tru tumas, long olfala wol ya, yumi no save stap we laef blong yumi i fri long ol trabol oltaem. Be, nating se i olsem, ‘neva yumi stap we i no gat samting blong givhan long yumi.’ (2 Korin 4:​8, 9) Jisas i promes blong sanem wan samting blong givhan long ol man blong hem. Hem i se: ‘Bambae mi mi askem long Papa blong mi, mo hem bambae i givim wan narawan i kam blong givhan long yufala. Narawan ya hem i speret blong givhan, we bambae hem i save stap oltaem wetem yufala. Speret ya, hem i speret blong trutok.’ (Jon 14:16, 17) Long Pentekos 33 K.T.,b aposol Pita i talem long ol man we oli stap lesin long hem se oli save kasem ‘fri presen ya we hem i tabu speret.’ (Ol Wok 2:​38) ?Tabu speret ya i stap givhan long yumi tede? !Yes! Paoa blong Jeova we i stap wok, hem i givim ol nambawan frut ya long yumi: “Lav, glad, pis, longfala tingting, kaen fasin, gud fasin, bilif, kwaet fasin, fasin we man i save bos long tingting blong hem.” (Galesia 5:​22, 23, NW) Olgeta ya oli ol fasin we oli impoten tumas blong givhan long yumi blong stanap strong longtaem.

17. ?Wanem sam trutok blong Baebol we oli mekem bilif blong yumi i strong mo tingting blong yumi i longfala moa blong wet long Jeova?

¹⁷ Mo tu, tabu speret i halpem yumi blong kasem save se ol trabol we yumi kasem naoia oli “smol nomo, mo oli no save stap longtaem,” taem yumi skelem wetem praes ya blong laef we i no save finis samtaem. (2 Korin 4:​16-​18) Yumi sua se bambae God i no save fogetem ol wok blong yumi mo lav we yumi soemaot long hem. (Hibrus 6:​9-​12) Taem yumi ridim ol tok blong God long Baebol, yumi haremgud long eksampel blong ol man blong bilif bifo, we oli stanap strong tru long plante trabol, be oli gohed blong stap glad. Jemes i raetem se: “Ol brata mo sista. I gud yufala i stap tingbaot ol profet ya bifo we oli stap tok long nem blong Hae God. Ol man oli mekem olgeta oli harem nogud tumas, be tingting blong olgeta i no foldaon. Long fasin ya, olgeta oli soemaot wan gudfala rod long yumi. Mo from we olgeta oli stap stanap strong longtaem, yumi talem se God i mekem olgeta oli harem gud.” (Jemes 5:​10, 11) Baebol i promes se ‘paoa ya we i bigfala tumas i blong God, i no blong yumi,’ bambae i halpem yumi blong stanap strong tru long ol traem. Mo tu, Jeova i givim blesing ya long yumi we yumi gat hop blong laef bakegen long ded. (2 Korin 1:​8-​10; 4:7) Sipos yumi ridim Baebol evri dei mo tingting dip long ol promes ya, bambae yumi mekem bilif blong yumi i kam strong moa, mo bambae tingting blong yumi i longfala moa blong wet long God.​—Ol Sam 42:5.

18. (a) ?Seken Korin 1⁠:​3, 4 i leftemap tingting blong yumi blong mekem wanem? (b) ?Olsem wanem ol Kristin elda oli save leftemap tingting blong ol narafala mo mekem oli haremgud?

¹⁸ Antap long ol samting ya, Jeova i givim wan paradaes long saed blong speret long yumi. Insaed long hem, yumi save haremgud long trufala lav we ol Kristin brata mo sista oli soem long yumi. Yumi evriwan i gat wan wok blong mekem blong leftemap tingting blong ol brata mo sista blong yumi. (2 Korin 1:​3, 4) Ol Kristin elda oli save mekem moa blong leftemap tingting blong ol narafala mo mekem oli haremgud. (Aesea 32:2) Oli olsem ‘ol presen we oli go long ol man.’ Taswe, oli kasem oda blong leftemap tingting blong ol man we oli safa, blong “mekem tingting blong ol man ya we oli fraet, i strong bakegen,” mo blong “givhan long olgeta we oli no gat paoa.” (Efesas 4:​8, 11, 12; 1 Tesalonaeka 5:​14) Blong mekem samting ya, i gud sipos ol elda oli yusum ol Wajtaoa mo Wekap!, mo ol narafala buk we ‘slef we i stret mo waes’ i givim. (Matyu 24:45-​47) I gat plante nambawan advaes blong Baebol long ol buk ya, we i save halpem yumi blong stretem​—mo blong blokem tu​—sam problem we oli mekem yumi wari tumas. !I gud se yumi folem fasin blong Jeova blong leftemap tingting blong narafala mo mekem oli haremgud long taem blong trabol!

19. (a) ?Wanem samting i save givhan long yumi blong blokem sam trabol? (b) Fastaem long ol narafala samting, ?yumi mas trastem hu ya, mo wanem bambae i mekem yumi naf blong stanap strong tru long ol traem?

¹⁹ Moa yumi stap kam kolosap long en blong ol las dei ya, moa wol ya bambae i kam nogud. Ol Kristin oli mekem samting we oli naf blong mekem, blong blokem ol trabol. (Proveb 22:3) Fasin blong skelemgud ol samting, waes fasin, mo save long saed blong ol rul blong Baebol, oli save halpem yumi blong mekem ol disisen we oli stret. (Proveb 3:​21, 22) Yumi lesin long Tok blong Jeova mo obei long hem, blong bambae yumi no mekem sam mastik we oli krangke nomo. (Ol Sam 38:4) Nating se i olsem, yumi luksave se nomata we yumi traehad olsem wanem, yumi no save karemaot fasin safa fulwan long laef blong yumi. Long wol blong naoia, plante stret man oli kasem hadtaem we i strong tumas. Be, yumi save fesem ol traem ya wetem strong tingting se ‘Jeova bambae i no save lego yumi ya, we yumi ol man blong hem.’ (Ol Sam 94:14) Mo tu, yumi save se i no longtaem, wol blong naoia bambae i lus wetem olgeta trabol blong hem. Taswe, i gud yumi gat strong tingting blong “no kam slak blong mekem ol gudfala fasin, from we sipos yumi no lego, bambae long stret taem blong hem, yumi save kasem kakae from ol hadwok ya blong yumi.”​—Galesia 6:9.

[Ol futnot]

?Yumi Lanem Wanem?

◻ ?Wanem sam traem we oli stap kasem fulwan kampani blong ol Kristin?

◻ ?Wanem sam eksampel blong Baebol we oli halpem yumi blong kasem save se ol trabol oli no soem se Jeova i kros long yumi?

◻ ?Wanem filing blong Jeova long saed blong ol trabol we ol man blong hem oli stap safa from?

◻ ?Wanem sam long ol presen we Jeova i givim blong halpem yumi blong stanap strong tru long ol traem?

[Tok blong pija long pej 10]

Trifala man ya Deved, Nabot, mo Josef, oli kasem ol bigfala trabol