Stap Defren Olsem Ol Hapi Man Blong Presem God Long Ful Wol

‘!Yumi presem Ja! Yumi ol man blong wok blong Jeova, yumi presem nem blong hem.’​—OL SAM 113:1.

1, 2. (a) ?Folem tok blong Ol Sam 113:​1-3, hu ya i stret blong yumi presem hem wetem glad? (b) ?Wanem kwestin we i stret blong askem?

JEOVA GOD hem i Bigfala Man we i Wokem heven mo wol. Hem i Haefala Masta blong yumi blong olwe. I stret nomo we yumi presem hem wetem glad. Taswe, Ol Sam 113:​1-3 i givim oda ya long yumi se: ‘!Yumi presem Ja! Yumi ol man blong wok blong Jeova, yumi presem nem blong hem. Bambae yumi presem nem blong hem oltaem, i stat naoia, gogo i no save finis. Yumi evriwan, i stat long is, i go kasem long wes, yumi presem nem blong Jeova.’

² Yumi ya we yumi Wetnes blong God, yumi glad tumas blong mekem olsem. !I nambawan tumas blong save se i no longtaem, bambae Jeova God i mekem we hapi singsing ya blong presem hem, we yumi stap sing long hem tede, i fulumap olgeta ples blong wol! (Ol Sam 22:27) ?Voes blong yu i joen long bigfala singsing ya we i kavremap fulwol? !Sipos yes, ating yu yu glad tumas blong seraot long wol ya we ol man blong hem oli no joengud mo oli no glad!

3. (a) ?Wanem i mekem se ol man blong Jeova oli defren long ol narafala? (b) ?Long wanem fasin yumi stap seraot long wol ya?

³ Fasin blong yumi blong joengud blong presem Jeova, i rili mekem se yumi defren, mo i no gat narafala grup we i olsem yumi. Yumi evriwan i yusum ol semkaen toktok, tijim ol semfala samting, mo yumi evriwan i yusum semfala rod nomo blong talemaot ‘ol gudgudfala fasin blong Jeova.’ (Ol Sam 145:7) Yes, yumi defren long ol narafala man from we yumi givim laef blong yumi i go long God blong yumi, Jeova, blong mekem wok blong hem. God i talem long ol man blong hem, Isrel, we oli givim laef blong olgeta long hem, se oli mas seraot long ol nesen raonabaot long olgeta. Oli no mas kam doti from fasin blong ol nesen ya. (Eksodas 34:12-​16) Hem i givim sam loa long ol man blong hem blong halpem olgeta blong mekem olsem. Long sem fasin tede, Jeova i givim Tabu Tok blong hem, Baebol, long yumi. Ol advaes blong hem oli soem long yumi olsem wanem blong seraot long wol ya. (2 Korin 6:​17; 2 Timote 3:​16, 17) Taem yumi seraot, i no minim se yumi go stap yumi nomo long wan spesel haos no tabu ples, olsem ol pris mo sista blong Bigfala Babilon oli stap mekem. No gat. Folem eksampel blong Jisas Kraes, yumi presem Jeova long pablik ples.

Folem Eksampel Blong Nambawan Man Blong Presem Jeova

4. ?Olsem wanem Jisas i soemaot eksampel blong presem Jeova?

⁴ Jisas i neva lego stampa tingting blong hem blong presem Jeova. Mo samting ya nao i mekem hem i defren long ol man blong wol ya. Long ol haos prea mo insaed long haos blong God long Jerusalem, hem i presem tabu nem blong God. Nomata we Jisas i stap antap long hil no kolosap long solwora, long evri ples we plante man oli hivap long hem, Jisas i talemaot klia ol trutok blong Jeova. Hem i talem se: “Papa, Masta blong heven mo wol, mi presem yu long fored blong olgeta man.” (Matyu 11:​25, NW) Taem Jisas i stap kasem jajmen long fored blong Ponjes Paelet tu, hem i talemaot klia se: “Mi mi bon, mi kam long wol ya blong wan samting nomo, blong mi talemaot ol tok blong leftemap trutok.” (Jon 18:37) Jisas i luksave se wok blong hem i impoten tumas. Long weples hem i stap, hem i givim wetnes long saed blong Jeova mo i presem hem long fored blong olgeta man.

5. ?Ol Sam 22:22 i stret long hu ya, mo wanem kaen fasin nao we yumi mas gat?

⁵ Long Ol Sam 22:22, yumi faenem profet tok ya long saed blong Nambawan Man blong Presem Jeova, se: ‘Mi bambae mi talemaot long ol man blong mi ol samting ya we yu bin mekem. Bambae mi mi presem yu long fes blong kongregesen.’ Long Hibrus 2:​11, 12, aposol Pol i yusum vas ya blong tokbaot Masta Jisas mo olgeta we Jeova God i mekem oli tabu man, we bambae oli kasem paoa long heven. Olsem Jisas, olgeta ya oli no sem blong presem nem blong Jeova long medel blong kongregesen. ?Yumi gat semfala tingting olsemia taem yumi joen long ol miting blong kongregesen? Taem yumi joen long ol miting wetem fasin glad, mo lesingud mo givim ansa, yumi stap presem Jeova. ?Be, fasin blong yumi blong presem Jeova wetem glad i finis nomo long ples ya?

6. ?Jisas i givim wanem oda long ol disaepol blong hem, mo olsem wanem olgeta we oli laekem laet oli ona long God?

⁶ Folem tok blong Matyu 5:​14-​16, Masta Jisas i givim oda long ol man blong hem se oli mas letem laet blong olgeta i saenaot blong bambae ol narafala tu oli save presem Jeova. Hem i se: “Yufala i olsem laet long ol man long wol. . . . Yufala i mas letem laet blong yufala i saenaot i kasem ol man, blong oli save luk ol gudgudfala wok we yufala i stap mekem. Nao bambae ol man ya oli save leftemap nem blong Papa blong yufala, we i stap long heven.” Ol man we oli laekem laet oli givim ona i go long God. ?Olsem wanem? ?Oli mekem olsem taem oli talem ol gudfala tok no mekem wan gudfala wok blong halpem narafala man? No gat. Oli mekem olsem taem oli joengud blong presem Jeova. Yes, ol man we oli laekem laet, oli givim laef blong olgeta i go long God mo oli kam ol man blong presem hem wetem glad. ?Yu yu folem rod ya finis we i givim glad?

Glad We i Kamaot Taem Yumi Presem Jeova

7. ?From wanem ol man blong presem Jeova oli glad tumas, mo wanem glad we oli kasem long Pentekos 33 K.T.?

⁷ ?From wanem ol man we oli presem Jeova oli glad tumas? From we glad hem i wan frut blong tabu speret blong God. Long Galesia 5:​22, glad i kam biaen long lav. Ol disaepol blong Jisas long faswan handred yia oli soemaot frut ya blong speret blong Jeova. Yes, long dei blong Pentekos 33 K.T., taem God i kafsaedem speret blong hem long raonabaot 120 disaepol blong Jisas, olgeta evriwan oli stat presem Jeova long ol defdefren lanwis. Ol man Jyu we oli gat bigfala respek long God oli aot long plante defren kantri oli kam long Jerusalem, nao taem oli luk samting we i kamaot, oli ‘sapraes tumas, oli seksek.’ !Oli talem se: “Yumi harem olgeta oli stap toktok long ol lanwis blong yumi wanwan, oli stap talem ol bigbigfala wok ya we God i mekem”! (Ol Wok 2:​1-​11) ?Wanem samting i kamaot from nambawan fasin ya blong presem Jeova long ol defdefren lanwis? Raonabaot 3,000 man Jyu mo man blong ol narafala nesen we oli joen blong wosip wetem ol man Jyu, oli bilif long gud nyus blong Kingdom long saed blong Mesaea. Oli tekem baptaes, oli kasem tabu speret, mo oli no save wet blong joenem voes blong olgeta long voes blong ol hapi man blong presem Jeova. (Ol Wok 2:​37-​42) !Hemia i rili wan bigfala blesing!

8. Afta long Pentekos, ?ol Kristin oli mekem wanem blong bambae glad blong olgeta i kam antap moa?

⁸ Ripot ya i gohed se: “Evri dei, olgeta ya oli stap joen olsem wan kampani, insaed long haos blong God. Mo oli stap kakae insaed long ol haos blong olgeta, mo oli brekem bred olsem we Jisas i talem. Nao oltaem oli stap kakae we tingting blong olgeta i glad nomo, oli stap harem i gud tumas. Olgeta oli stap presem God mo ol man tu oli stap ona long olgeta. Mo evri dei, [Jeova] i stap sevem sam moa man, i stap joenem olgeta long kampani ya blong ol aposol.” (Ol Wok 2:​46, 47) Olgeta ya oli stap glad bigwan, ?hemia from we oli stap kampani tugeta blong tekem kakae nomo? No gat. Stampa blong glad blong olgeta, hemia se oli stap presem Jeova God evri dei. Mo glad blong olgeta i kam bigwan moa taem oli luk we plante taosen man oli stap lesin long mesej blong olgeta we i stap sevem man. Samting ya i sem mak long yumi tede.

Ol Hapi Man Blong Presem God Long Olgeta Nesen

9. (a) ?Wetaem mo olsem wanem God i stat givim jans long ol man blong olgeta nesen blong harem gud nyus blong hem? (b) ?From wanem tabu speret i kamdaon long Konilyas mo ol man we oli stap wetem hem, bifo we oli baptaes?

⁹ Jeova i no wantem se wok ya blong ol man blong hem blong karem laet, i stap long wan nesen nomo. Taswe, stat long 36 K.T., hem i givim jans long ol man blong olgeta nesen blong harem gud nyus blong hem. God i lidim Pita i go long haos blong wan kapten blong ol soldia long Sisaria. Man ya i no man Jyu. Long ples ya, hem i faenem Konilyas i stap wetem ol gudfala fren mo famle blong hem. Taem oli stap lesingud long ol tok blong Pita, oli stat bilif long Jisas long hat blong olgeta. ?Olsem wanem yumi save samting ya? From we tabu speret blong God i kamdaon long olgeta ya we oli bilif be oli no man Jyu. Plante taem, presen blong tabu speret ya blong God i kasem man afta baptaes nomo. Be long taem ya, Jeova i soemaot se hem i agri long ol man ya we oli no man Jyu, bifo we oli baptaes long wora. Sipos Jeova i no bin mekem olsem, ating Pita i no save talem se, naoia God i stap agri long olgeta we oli no man Jyu blong oli kam ol man blong Hem, mo se oli naf blong tekem baptaes long wora.​—Ol Wok 10:​34, 35, 47, 48.

10. ?Wanem tok we i kamaot bifo finis i talemaot se ol man blong olgeta nesen bambae oli presem Jeova?

¹⁰ Long taem bifo finis, Jeova i talemaot se ol man blong olgeta nesen bambae oli presem hem. Bambae hem i gat ol hapi man blong presem hem long evri kantri. Blong pruvum samting ya, aposol Pol i tokbaot sam profet tok blong Hibru haf blong Baebol. Hem i talem long kongregesen blong ol Kristin long Rom, we oli kamaot long plante defren nesen, se: ‘Yufala i mas glad blong tekem yufala, blong yufala i joengud long wan kampani, olsem we Kraes i glad blong tekem yufala blong yufala i joengud long hem. Fasin ya i stap leftemap nem blong God. Mi mi talem long yufala we Kraes, hem i kam finis olsem wan man blong wok nomo blong givhan long ol man Isrel. Hem i mekem olsem, blong soemaot we God i tru nomo, mo blong mekem ol promes blong God long ol bubu blong mifala bifo i kamtru. Mo bakegen, Kraes i mekem olsem blong mekem rod blong ol man blong narafala kantri bambae oli leftemap nem blong God, from we hem i gat sore long olgeta. Hemia i olsem we Baebol i talem [long Ol Sam 18:49], i se: ‘From samting ya, bambae mi mi talem tangkyu long yu long fes blong ol man blong narafala kantri. Bambae mi sing, mi leftemap nem blong yu.’ Mo bakegen, Baebol i talem [long Dutronome 32:43], i se: ‘Ol man blong narafala kantri, yufala i go joen long ol man we God i jusumaot olgeta finis, nao yufala i stap glad wetem olgeta.’ Mo bakegen, [Ol Sam 117:1] i talem se: ‘Ol man blong narafala kantri, yufala evriwan i leftemap nem blong Jeova. Ol man blong olgeta ples, yufala evriwan i leftemap nem blong hem i go antap.’​—Rom 15:​7-​11.

11. ?Olsem wanem God i halpem ol man blong olgeta nesen blong lanem ol trutok blong hem, mo wanem risal blong samting ya?

¹¹ Ol man oli no save joengud blong presem Jeova sipos oli no putum tingting blong olgeta i stap strong long Jisas Kraes. Hemia nao man ya we God i jusumaot blong i rulum olgeta man blong evri nesen. Blong halpem olgeta blong oli gat tangkyu long ol trutok blong God we oli lidim man long laef we i no save finis, Hem i stanemap wan wok blong tijim ol man long olgeta ples blong wol. Hem i stap lidim ol man blong hem tru long grup ya we i olsem slef we i stret. (Matyu 24:45-​47) ?Wanem risal blong samting ya? I gat bitim faef milyan hapi voes we oli stap singsing blong presem Jeova long bitim 230 kantri. Mo plante milyan narafala man oli stap soem se oli wantem mekem sem mak. Traem tingbaot hamas man oli bin kam long Memoriol long 1996: 12,921,933. !Hemia i nambawan tumas!

Profet Tok i Talemaot Wan Bigfala Kampani Blong Hapi Man Blong Presem God

12. ?Wanem nambawan vison we aposol Jon i luk, mo hu ol man ya tede we vison ya i tokbaot?

¹² Long wan vison, aposol Jon i luk “wan bigfala hif blong man” we oli kamaot long olgeta nesen. (Revelesen 7:9) ?Wanem stampa tok blong ol sing blong presem God we bigfala kampani ya i stap singsing wetem smol grup blong ol tabu man blong God? Jon i talem se: “God ya blong yumi, we i stap sidaon long bigfala jea blong hem, wetem Smol Sipsip ya, tufala ya nao i wokem rod blong sevem mifala.” (Revelesen 7:​10) Naoia, yumi stap talemaot tok ya wetem strong tingting long olgeta ples blong wol. I olsem se, yumi stap holem ol lif kokonas, nao yumi joen tugeta blong presem God we i Haefala Masta blong heven mo wol. Yumi glad blong talemaot long fored blong heven mo wol se hem mo Pikinini blong hem, Smol Sipsip ya Jisas Kraes, tufala i ‘wokem rod blong sevem yumi.’ !Ating aposol Jon i glad tumas taem hem i luk nambawan vison ya blong bigfala kampani! !Mo yumi save glad tumas tede tu, from we yumi stap luk, mo yumi stap insaed long samting ya we Jon i luk!

13. ?Wanem samting i mekem se ol man blong Jeova oli defren long ol man blong wol ya?

¹³ Olsem ol man blong Jeova, yumi glad tumas blong karem nem blong hem. (Aesea 43:​10, 12) Yumi defren long ol man blong wol ya, from we yumi ol Wetnes blong Jeova. Yumi glad tumas blong karem spesel nem blong God, mo blong mekem wok blong hem i stap olsem stampa samting long laef blong yumi. Bigfala stampa tingting blong Jeova blong mekem tabu nem blong hem i kam klin mo blong leftemap hae rul blong hem long heven mo wol tru long Kingdom, i mekem se laef blong yumi i gat mining. Mo hem i bin givim jans long yumi blong joen blong mekem stampa tingting blong hem long saed blong nem mo Kingdom blong hem i kamtru. Hem i mekem olsem long tri rod.

Yumi Kasem Trutok

14, 15. (a) ?Wanem wan rod we God i yusum blong halpem yumi blong joen long stampa tingting blong hem long saed blong nem mo Kingdom blong hem? (b) ?Olsem wanem Kingdom we i stanap long 1914 K.T. i defren long hemia we i foldaon long 607 B.K.T.?

¹⁴ Fastaem, Jeova i givim trutok long ol man blong hem. Nambawan trutok ya we i kam klia hemia long saed blong Kingdom blong hem we i stat rul long 1914. (Revelesen 12:10) Gavman ya blong heven i defren long kingdom blong Jerusalem bifo, ples ya we ol king long laen blong Deved oli bin sidaon long jea blong rul. Kingdom ya i foldaon finis, mo stat long 607 B.K.T.,a Jerusalem i kam aninit long paoa blong ol narafala nesen we oli rulum wol. Nyufala Kingdom we Jeova i stanemap long 1914, hem i wan paoa long heven we bambae i neva kam aninit long paoa blong narafala man, jes aninit long paoa blong Jeova nomo, mo bambae i neva lus tu. (Daniel 2:​44) Mo tu, fasin blong hem blong rul i defren. ?Olsem wanem? Revelesen 11:15 i ansa se: “Olbaot long heven, mi harem we olgeta oli stap singaot bigfala, oli talem se ‘Ol kingdom blong wol ya oli kam aninit long paoa blong Hae God blong yumi, wetem Mesaea blong hem. Mo hem i holem nem blong king, we bambae i rul gogo i no save finis.’”

¹⁵ ‘Kingdom blong Hae God blong yumi wetem Mesaea,’ hem nao i gat paoa antap long ful wol. Nyufala rod ya we Jeova i yusum blong soemaot hae rul blong hem, i joen wetem Pikinini blong hem we i Mesaea, mo ol 144,000 brata blong Jisas, we bighaf blong olgeta oli laef bakegen finis mo kasem paoa long heven finis. Rod ya i no jes wan samting we ol man wetem bigfala save oli wantem stadi long hem​—hem i no wan tingting nomo we ol studen oli laekem blong storebaot. No gat. Kingdom ya long heven hem i wan trufala gavman. From kingdom ya, yumi gat hapi hop blong laef olwe we yumi stretgud olgeta. Hop ya i givim bigfala risen long yumi blong gohed blong stap glad oltaem. From we yumi kasem ol trutok ya long Tok blong Jeova, samting ya i pusum yumi oltaem blong toktokgud long saed blong trutok ya. (Ol Sam 56:10) ?Oltaem yu yu stap talemaot long evri man se Kingdom blong God mo Mesaea blong hem i stap rul naoia long heven?

Kasem Help Blong Tabu Speret Mo Ol Brata Raon Long Wol

16, 17. ?Wanem namba tu mo namba tri rod we God i yusum blong halpem yumi blong joen long stampa tingting blong hem?

¹⁶ Namba tu rod we God i yusum blong halpem yumi blong joen long stampa tingting blong hem, hemia tabu speret blong hem we i givhan long yumi blong wokem ol nambawan frut long laef blong yumi, mo mekem hem i agri long yumi. (Galesia 5:​22, 23) Mo tu, Pol i raet i go long ol Kristin we tabu speret i makemaot olgeta i se: ‘Nao speret ya we yumi kasem finis, . . . hemia speret blong God ya, we God i sanem i kam long yumi blong yumi save olgeta samting we hem i givim long yumi.’ (1 Korin 2:​12) Taem yumi letem speret blong Jeova i wok long yumi, yumi evriwan i luksave mo kasem save long ol gudfala samting we hem i givim long yumi naoia​—ol promes, loa, rul, mo narafala samting olsem.​—Skelem wetem Matyu 13:11.

¹⁷ Namba tri rod we God i yusum blong halpem yumi, hemia olgeta brata sista blong yumi raon long wol mo nambawan plan blong wosip we Jeova i putumap tru long ogenaesesen blong hem. Aposol Pita i tokbaot samting ya taem hem i givim advaes long yumi blong “laekem tumas olgeta Kristin man.” (1 Pita 2:​17) Famle blong ol brata sista blong yumi raon long wol we oli gat lav, i halpem yumi blong mekem wok blong Jeova wetem bigfala glad long hat blong yumi, olsem Ol Sam 100:2 i givim oda se: “!Yumi glad, yumi mekem wosip long hem! !Yumi kam long fes blong hem, yumi singsing!” Vas 4 i talem moa se: “!Yufala i kam! Yumi go insaed long haos blong hem, mo yumi wokbaot i go we yumi stap talem tangkyu long hem. Yumi go insaed long ples blong wosip, mo yumi wokbaot i go we yumi stap presem hem. Yumi talem tangkyu long hem, yumi leftemap nem blong hem.” Taswe, nomata we yumi stap prij long pablik ples no yumi stap joen long ol miting, yumi save glad. !Yumi rili gat pis mo stap sef insaed long naesfala yad ya blong haos prea blong Jeova long saed blong speret!

!Presem Jeova Wetem Glad!

18. ?From wanem yumi save glad taem yumi presem Jeova nating se yumi kasem trabol no ol narafala problem oli kasem yumi?

¹⁸ Nomata wanem hadtaem we yumi kasem, trabol we narafala i mekem long yumi, no eni narafala problem we maet i kasem yumi, yumi mas glad we yumi stap long haos wosip blong Jeova. (Aesea 2:​2, 3) Rimemba se, glad i wan fasin we i kamaot long hat. Ol faswan Kristin brata sista blong yumi oli presem Jeova wetem glad nating se oli kasem plante hadtaem mo oli lusum plante samting tu. (Hibrus 10:34) Ol narafala man blong bilif tede tu oli olsem olgeta ya.​—Matyu 5:​10-​12.

19. (a) ?Wanem tok we i kamaot bakegen mo bakegen oli pusum yumi blong presem Jeova? (b) ?Laef blong olwe i dipen long wanem, mo wanem samting we tingting blong yumi i mas strong blong mekem?

¹⁹ Yumi evriwan we i stap mekem wok blong Jeova, i glad tumas blong obei long ol tok blong Baebol we i singaotem yumi blong presem hem. Bakegen mo bakegen, buk blong Revelesen i makemaot ol tok blong presem God wetem tok ya “!Presem Ja!” (Revelesen 19:​1-6, NW) Ol sikis vas blong Ol Sam 150, oli talem 13 taem se yumi mas presem Jeova. Hemia wan tok we i goaot long olgeta laef samting long heven mo long wol, blong oli joen tugeta blong singsing presem Jeova wetem glad. !Laef blong yumi blong olwe i dipen long fasin blong yumi blong joen long bigfala sing ya blong talem Aleluia! Yes, olgeta man we bambae oli laef blong olwe, hemia ol man nomo we oli gohed blong presem Jeova oltaem. Taswe, taem en i stap kam kolosap moa, yumi gat strong tingting blong wokgud wetem kongregesen blong ol man raon long wol we oli stap tru long hem. Ale, yumi save hop blong luk lastok blong Ol Sam 150 i kamtru fulwan, se: ‘Yumi olgeta samting we yumi gat laef, yumi olgeta evriwan, yumi presem Ja. !Oltaem yumi mas presem Ja!’

[Futnot]

?Bambae Yu Yu Ansa Olsem Wanem?

◻ ?Wanem i mekem se ol man blong Jeova oli defren long ol narafala?

◻ ?From wanem ol man blong Jeova oli glad tumas?

◻ ?Wanem i mekem se yumi seraot long wol?

◻ ?Long wanem trifala rod God i halpem yumi blong joen long stampa tingting blong hem?

[Tok blong pija long pej 17]

Nomata weples Jisas i stap, hem i givim wetnes long saed blong Jeova, mo i presem hem long fored blong olgeta man