God i Sevem Man—?Wanem Trufala Mining Blong Tok Ya?

‘?GOD i sevem yu finis?’ Plante we oli askem kwestin ya oli bilif se God i sevem olgeta finis from we oli ‘bilif long Jisas olsem Sevya blong olgeta.’ Be sam narafala, oli ting se i gat plante rod blong kasem laef, mo se, nomata wanem samting yu bilif long hem no wanem jyos yu go long hem, impoten samting hemia we ‘Jisas i stap long hat blong yu.’

Baebol i talem se God i wantem ‘sevem olgeta kaen man.’ (1 Timote 2:​3, 4) Taswe, i gat rod blong God i sevem yu sipos yu rere blong agri long rod ya. ?Be i minim wanem se God i sevem yu? ?Hemia i kamaot olsem nomo we yu no mekem wan samting blong kasem?

Tok ya “sevem” i minim “kamfri long denja no samting we i save kilim man i ded.” Taswe, trufala mining blong God i sevem yumi, i moa bitim we yumi gat wan tingting we i stap kwaet. !I minim se bambae God i sevem yumi taem hem i spolem ol rabis fasin blong wol ya, mo bambae yumi no ded! ?Be, hu nao we God bambae i sevem olgeta? Blong ansa long kwestin ya, bambae yumi lukluk samting we Jisas Kraes i tijim long saed ya. Maet yu sapraes long samting we bambae yumi faenemaot.

?Bambae God i Sevem Ol Man Long Olgeta Skul?

Long taem bifo, Jisas i storeyan wetem wan woman Sameria. Woman ya i no wan Jyu, be hem i gat stret bilif se Mesaea, “we long lanwis blong ol man Gris oli talem se ‘Kraes,’ ” bambae i kam. (Jon 4:​25) ?Bilif ya i naf blong sevem laef blong hem? No gat. Jisas i no fraet blong talem long woman ya se: ‘Yu stap mekem wosip long God we yu no save hem.’ Jisas i save se, sipos woman ya i wantem we God i sevem hem, hem i mas jenisim fasin blong wosip blong hem. Taswe Jisas i eksplenem se: “Taem i stap kam, yes, hem i naoia, we ol man blong mekem trufala wosip, bambae oli wosipim Papa long speret mo long trutok, from we, Papa i stap lukaot ol man olsemia, blong oli mekem wosip long hem.”​—Jon 4:​22, 23, NW.

Long wan narafala taem we Jisas i talemaot tingting blong hem long saed blong rod blong God blong sevem man, ol Farisi, we oli wan bigfala grup insaed long skul blong ol man Jyu, oli stap lesin. Ol Farisi ya oli bin mekemap wan fasin blong wosip, mo oli bilif se God i agri long hem. Be, lesin long tok we Jisas i talem long olgeta: “!Yufala i gat tu fes ya! Aesea i talem tru nomo taem hem i talemaot profet tok ya long saed blong yufala: ‘Ol man ya oli ona long mi wetem maot blong olgeta, be hat blong olgeta i stap longwe long mi. I blong nating nomo we oli wosip long mi, from we ol tijing blong olgeta oli ol rul blong man nomo.’ ”​—Matyu 15:​7-9, New International Version.

?Olsem wanem long ol skul tede we oli stap talem se oli bilif long Kraes? ?Jisas i save agri long olgeta skul ya olsem ol defren rod we God i yusum blong sevem man? Yumi no nidim blong talemaot tingting blong yumi long poen ya. Jisas i talem klia se: ‘I no olgeta man evriwan we oli stap singaot mi se “Masta blong mi, Masta blong mi” we bambae oli save go insaed long nyufala wol ya we God i king long hem. Man we i stap mekem ol samting we Papa blong mi long heven i wantem, hem nomo bambae i save go insaed. Long dei ya, bambae plante man oli save singaot long mi se “Masta, Masta, long nem blong yu, mifala i talemaot ol tok we God i givim long mifala. Mo long nem blong yu, mifala i ronemaot plante devel. Mo long nem blong yu, mifala i mekem plante merikel.” Be bambae mi mi save talem stret long fes blong olgeta, se “Neva mi mi save yufala. Yufala i man blong mekem i nogud, yufala i gowe long mi.” ’​—Matyu 7:​21-​23.

Stret Save Long Saed Blong Jisas i Impoten Blong Kasem Laef

Ol tok ya blong Jisas oli mas mekem yumi tinghevi. Oli soemaot se plante man we oli stap wosip long God oli no stap ‘mekem samting we Papa blong yumi long heven i wantem.’ Oraet, ?wanem trufala rod blong God i sevem yumi? Fas Timote 2⁠:​3, 4 i ansa se: ‘God i wantem sevem olgeta man, mo i wantem se oli faenem stret save blong trutok.’​—Skelem wetem Kolosi 1:​9, 10.

Save ya i impoten tumas blong God i sevem yumi. Wan man Rom we i lukaot long kalabus long taem bifo, i bin askem long aposol Pol mo fren blong hem Saelas, se, “?Bambae mi mi mekem olsem wanem blong God i sevem mi?” Nao tufala i ansa se: “Yu mas bilif long Jisas ya we i Masta blong mifala, nao God bambae i sevem yu, mo ol famle blong yu tu.” (Ol Wok 16:30, 31) ?Hemia i minim se man ya blong lukaot long kalabus mo famle blong hem oli nidim nomo blong gat wan stret filing long hat blong olgeta? No gat. Oli no save ‘bilif long Masta Jisas’ sipos oli no gat sam save long saed blong Jisas se hem i hu, wanem wok we hem i mekem, mo ol tijing blong hem.

Olsem nao, Jisas i tijim ol man long saed blong wan gavman long heven​—⁠‘Kingdom blong God.’ (Luk 4:​43) Mo tu, hem i makemaot ol rul long saed blong Kristin fasin mo wok. (Matyu, japta 5-7) Hem i talem wanem we ol disaepol blong hem oli mas mekem long saed blong politik. (Jon 15:19) Hem i statem wan bigfala wok blong tijim ol man we biaen i kavremap fulwol, mo hem i talem long ol man blong hem blong joen long wok ya. (Matyu 24:14; Ol Wok 1:8) !Yes, blong ‘bilif long Jisas,’ man i mas kasem save long plante samting! Taswe, yumi luksave from wanem Pol mo Saelas ‘i talemaot tok blong Jeova long [man ya blong lukaot long kalabus], mo long olgeta long haos blong hem,’ bifo we ol man ya we oli jes kasem bilif oli tekem baptaes.​—Ol Wok 16:​32, 33.

Stret Save Long Saed Blong God i Impoten Tu

Wan impoten haf blong trufala bilif long Jisas, hemia blong wosip long God ya we Jisas i stap wosip long hem. Jisas i talem long prea se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.”​—Jon 17:⁠3.

Taem Pikinini blong God i stap prij long wol ya, oltaem hem i pulum ol man oli go long Papa blong hem, i no long hem wan. Hem i neva talem se hem nao i God ya we i gat Olgeta Paoa. (Jon 12:49, 50) Plante taem, Jisas i soemaot wanem posisen we hem i gat long plan blong God, taem hem i talem se hem i daon moa long Papa blong hem. (Luk 22:41, 42; Jon 5:​19) Yes, Jisas i talem se: ‘Papa blong mi i hae moa long mi.’ (Jon 14:28) ?Jyos i tijim yu finis long trutok ya se Kraes i Pikinini blong God? ?No hem i lidim yu blong bilif se Jisas nao i God ya we i gat Olgeta Paoa? Blong God i sevem yu, yu mas gat stret save long saed ya.

Jisas i tijim ol disaepol blong hem long Prea blong Masta, we i talem se: “Mekem nem blong yu i kam tabu.” (Matyu 6:​9, NW) Bighaf blong ol Baebol oli no yusum nem blong God, oli raetem “Masta” nomo long ples blong hem. !Be long ol olfala hanraet blong “Oltesteman,” nem blong God i stap bitim sikis taosen taem! Taswe Ol Sam 83:18 (NW) i talem se: “Bambae ol man oli mas save se yu we nem blong yu Jeova, yu nomo yu Hae God long olgeta ples blong wol.” ?Jyos blong yu i tijim yu blong yusum nem blong God, Jeova? !Sipos no, maet God i no save sevem yu, from we “ol man we oli singaot long nem blong Jeova, bambae hem i sevem olgeta”!​—Ol Wok 2:​21; skelem wetem Joel 2:​32.

Wetem Speret mo Trutok

Mo tu, Jisas Kraes i pulum ol man blong lukluk long Tok blong God, Baebol. Taem hem i stap talemaot tingting blong God long sam bisnes, hem i talem se: “Baebol i talem se.” (Matyu 4:​4, 7, 10; 11:10; 21:13) Long naet bifo we Jisas i ded, hem i prea from ol disaepol blong hem, i se: “Plis yu makemaot olgeta long trutok, blong oli tabu, oli man blong yu. Tok blong yu, hemia trutok ya.”​—Jon 17:17.

Taswe, save long saed blong ol tijing long Tok blong God, Baebol, hemia wan narafala samting we yumi nidim blong God i sevem yumi. (2 Timote 3:​16) Baebol nomo i givim ansa long ol kwestin olsem: ?Wanem mining blong laef? ?From wanem God i letem rabis fasin i gohed blong longtaem? ?Wanem i hapen long wan man taem hem i ded? ?God i rili mekem ol man oli harem nogud long wan helfaea? ?Wanem stampa tingting blong God long saed blong wol ya?a Yumi no save wosip long God long stret fasin sipos yumi no kasem savegud long ol poen ya, from we Jisas i talem se: “Ol man blong mekem trufala wosip, bambae oli wosip long Papa long speret mo long trutok.”​—Jon 4:​23, NW.

Bilif i Pusum Man Blong Wok

Blong God i sevem wan man, hem i mas mekem moa i bitim we i kasem save nomo. Sipos hat blong hem i stret, ale stret save blong God bambae i mekem hem i bilif. (Rom 10:10, 17; Hibrus 11:6) Bilif ya bambae i pusum hem blong wok. Olsem nao, Baebol i givim advaes ya se: “Yufala i mas tanem tingting blong yufala from ol sin blong yufala, yufala i mas luk long God blong hem bambae i tekemaot ol sin blong yufala. Long fasin ya, Hae God bambae i save givim nyufala paoa long yufala long tingting blong yufala.”​—Ol Wok 3:​19.

Yes, blong God i sevem wan man, hem i mas mekem ol fasin mo wok blong hem oli laenap wetem ol rul blong God. From paoa blong Tok blong God, hem i save jenisim ol fasin we hem i bin folem long ful laef blong hem, olsem fasin gyaman mo fasin blong trikim narafala. Hem i save wokem stret fasin mo fasin blong tok tru oltaem. (Taetas 2:​10) Hem i save lego ol rabis fasin long saed blong seks, olsem man i slip wetem man mo woman i slip wetem woman, stilim waef no hasban blong narafala, mo fasin blong slip olbaot, nao hem i save tekem ol klin, gudfala fasin. (1 Korin 6:​9-​11) Hemia i no wan disisen blong livim rabis fasin blong smoltaem we i stanap long filing blong hem nomo, no gat. Hem i jenisim fasin blong hem blong olwe, from we hem i bin stadigud long Tok blong God mo mekem i wok long laef blong hem.​—Efesas 4:​22-​24.

Sloslou, lav mo fasin tangkyu long God bambae i pusum wan man we hat blong hem i stret, blong givim laef blong hem i go long God mo tekem baptaes. (Matyu 28:​19, 20; Rom 12:1) Ol Kristin we oli baptaes finis, God i luk olgeta olsem we hem i sevem olgeta finis. (1 Pita 3:​21) Long taem blong bigfala trabol we bambae i spolem ol rabis fasin blong wol ya i no longtaem nao, bambae God i sevem olgeta fulwan, i mekem olgeta oli stap sef.​—Revelesen 7:​9, 14.

?Fasin Blong God i Sevem Man i Save Minim Wanem Long Yu?

Yumi luksave klia from smol storeyan ya se, sipos yumi wantem we God i sevem yumi, yumi mas mekem moa i bitim we yumi ‘gat Masta Jisas i stap long hat blong yumi.’ Yumi mas kasem stret save long saed blong Jeova God mo Jisas Kraes tu, mo jenisim ol fasin we yumi nidim blong jenisim long laef blong yumi. Maet yu ting se samting ya i hadwok tumas. Be ol Wetnes blong Jeova oli rere blong givhan long yu. Oli glad blong mekem wan fri Baebol stadi wetem yu long haos blong yu, we bambae i givhan long yu blong stat wokbaot long trufala rod we God i yusum blong sevem man.b

!I moa impoten blong mekem samting ya naoia i bitim ol narafala taem bifo, from we dei blong God blong jajem ol man i kolosap tumas! Naoia i taem blong obei long profet tok ya se: “Bifo we dei blong kros blong Jeova i kamtru long yufala, yufala i mas lukaot Jeova, yufala olgeta kwaet man blong wol we tingting blong yufala i stap daon, we yufala i obei long ol jajmen blong hem. Yufala i mas lukaot stret fasin, yufala i mas lukaot tingting daon. Maet bambae yufala i haed long dei blong kros blong Jeova.”​—Sefanaea 2:​2, 3.

[Ol futnot]

[Bokis blong pija long pej 6]

God i Save Sevem Man We i . . .

◻ Kasem stret save blong God mo Jisas.​—Jon 17:3.

◻ Soemaot bilif.​—Rom 10:17; Hibrus 11:6.

◻ Tanem tingting from ol sin mo jenisim fasin blong hem.​—⁠Ol Wok 3:​19; Efesas 4:​22-​24.

◻ Givim laef long Jeova mo tekem baptaes.​—Matyu 16:24; 28:19, 20.

◻ Gohed blong talemaot bilif blong hem long olgeta man.​—Matyu 24:14; Rom 10:10.

[Tok blong pija long pej 7]

Stadi Baebol, mekem i wok long laef, givim laef i go long Jeova, mo tekem baptaes, hemia ol samting we wan man i mas mekem blong God i save sevem hem