Ripot Long Wok Blong Kingdom

Paoa Blong Tok Blong God i Save Mekem Man i Klin

OL RIPOT oli soemaot se bighaf blong ol man we oli bin stap long ol spesel hospital blong winim fasin ya blong tekem drag, oli stat bakegen blong tekem drag taem oli aot long ol hospital ya. Be Tok blong God i save mekem wan samting we ol hospital ya oli no naf blong mekem. (Hibrus 4:​12) Tok mo speret blong God i bin halpem plante man blong winim fasin ya blong tekem drag mo blong folem advaes ya se: “Yumi mas mekem yumi klin. Yumi mas putumaot olgeta samting long bodi blong yumi mo long tingting blong yumi, we oli stap mekem yumi doti long fes blong God.”​—2 Korin 7:1.

Wan store we i kam long Mianma i pruvum samting ya. Wan man we i slef blong plante yia long fasin ya blong tekem drag, i talem se: “Mi stat tekem drag taem mi yangfala nomo. Plante taem mi bin traem blong lego fasin ya, be mi no naf blong mekem olsem. Blong pem ol drag ya we mi wantem tumas, mi stat blong stil. Samting ya i mekem se, long 1988, mi go kalabus blong wan yia.

“Taem mi kamaot long kalabus ya, mi joen bakegen wetem ol fren blong mi blong bifo. Smoltaem biaen, mi stat bakegen blong tekem drag. Fasin ya we i stap spolem mi nomo, i mekem se famle blong mi i no moa wantem save long mi. Mo tu, stronghed fasin blong mi i mekem se plante man long ples blong mi oli fraet long mi, mo oli no moa wantem kam kolosap long mi.

“Ale, wan dei wan samting i hapen long mi we i stap hapen long plante man blong tekem drag​—kolosap mi ded from mi tekem tumas drag wantaem. Mi go kalabus bakegen, be naoia i blong tri yia. Nating se laef long kalabus i strong tumas, mi stap laef tru long hadtaem ya.

“Afta we mi aot long kalabus, mi askem famle blong mi blong fogivim mi from olgeta mastik we mi bin mekem. Wetem fasin sore, oli agri blong letem mi mi stap wetem olgeta bakegen. Be, bakegen, ol fren oli pulum mi blong folem ol nogud fasin olsem bifo.

“Nao, bubu woman blong mi i askem pasta blong velej sipos mi mi save joen long wan Baebol skul. Pasta ya i agri. Be, bifo we mi stat blong joen long skul ya, anti blong mi, we i wan Wetnes blong Jeova, i talem se sipos mi mi rili wantem kasem save long Baebol, mi mas stadi wetem ol Wetnes.

“Mi go long Haos Kingdom mo mi mitim wan man we i agri blong mekem Baebol stadi wetem mi. Plante we oli stap long miting ya oli soem kaen fasin mo welkamem gud mi.

“Afta we mi stat stadi long Baebol mo kam long ol Kristin miting, mi no moa gat filing ya blong wantem tekem drag tumas. Naoia, mi wantem moa blong kam kolosap long God. Mi gohed gud, gogo wan yia biaen, mi givim laef blong mi i go long Jeova God, mo tekem baptaes long wora blong soemaot samting ya.

“I no longtaem i pas, taem mi stap prij long ol haos wanwan, mi mitim wan fren blong mi we i stap tekem drag wetem mi bifo. Hem i no kasem save olsem wanem mi naf blong mekem bigfala jenis olsemia. From samting ya, mi gat jans blong prij long hem, mo mi tokbaot hop blong Kingdom wetem hem.

“Yes, naoia mi faenem trufala mining blong laef. Mi talem tangkyu long God from we hem i halpem mi, mo from ol advaes long Tok blong hem. Naoia, mi naf blong halpem ol narafala man tu blong lego rabis fasin ya blong tekem drag, we i spolem man.”