?Hu Bambae i Laef Tru Long ‘Dei Blong Jeova’?

“?Yufala i mas kam wanem kaen man long ol wok blong fasin tabu mo ol wok blong fasin fasgud long God? !Yufala i mas stap wet mo holem dei blong Jeova i stap oltaem long tingting blong yufala!”​—2 PITA 3:​11, 12, NW.

1. ?Hu olgeta we oli bin wok wetem tingting mo paoa olsem Elaeja?

JEOVA GOD i jusumaot sam man long wol ya we bambae oli joen wetem Pikinini blong hem, Jisas Kraes, blong rul long Kingdom blong heven. (Rom 8:​16, 17) Taem ol tabu Kristin ya oli stap yet long wol, oli wok wetem semkaen tingting mo paoa olsem Elaeja bifo. (Luk 1:​17) Long laswan stadi, yumi tokbaot sam wok we ol tabu Kristin oli stap mekem we i sem mak olsem wok we profet Elaeja i bin mekem. Be, ?olsem wanem long wok we profet Elaesa i bin mekem, taem hem i tekem ples blong Elaeja?​—1 King 19:15, 16.

2. (a) ?Wanem laswan merikel we Elaeja i mekem, mo faswan merikel we Elaesa i mekem? (b) ?Wanem i pruvum se Elaeja i no go long heven?

² Laswan merikel we Elaeja i mekem, hemia taem hem i kilim Jodan Reva wetem klos blong profet we hem i werem, blong seraotem wora long tu haf. Samting ya i mekem se Elaeja mo Elaesa, tufala i save krosem reva ya long drae graon nomo. Taem tufala i stap wokbaot long is saed blong reva, wan strongfala win i karem Elaeja i go long wan narafala ples long wol ya. (Lukluk bokis long pej 15 we stampa tok blong hem se “?Elaeja i Go Antap Long Weswan Heven?”) Taem Elaeja i aot, hem i lego klos blong profet we hem i bin werem, i stap. Ale, Elaesa i yusum klos ya blong kilim Jodan Reva, mo bakegen ol wora blong reva ya oli seraot long tu haf. Hem i save wokbaot krosem reva ya long drae graon bakegen. Merikel ya i soemaot klia se Elaesa i tekem ples blong Elaeja long wok blong leftemap trufala wosip long Isrel.​—2 King 2:​6-​15.

Fasin Olsem God i Impoten Tumas

3. ?Pol mo Pita tufala i talem wanem long saed blong taem we Jisas i kambak mo i stap mo long saed blong “dei blong Jeova”?

³ Plante handred yia afta long taem blong Elaeja mo Elaesa, tufala aposol ya, Pol mo Pita, oli tokbaot ‘dei blong Jeova’ we i stap kam. Tufala i joenem dei ya wetem taem we Jisas Kraes bambae i kambak mo i stap, mo wetem wan ‘nyufala heven mo nyufala wol’ long taem blong yumi. (2 Tesalonaeka 2:​1, 2; 2 Pita 3:​10-​13) Blong laef tru long bigfala dei blong Jeova​—taem ya we God bambae i spolem ol enemi blong hem mo sevem ol man blong hem​—yumi mas kam kolosap long Jeova, mo soemaot tingting daon mo stret fasin. (Sefanaea 2:​1-3) Be, taem yumi tingbaot sam samting we oli hapen long profet Elaesa bifo, yumi luksave se yumi nidim sam narafala fasin bakegen, antap long hemia.

4. ?From wanem yumi nidim blong wok strong long wok blong Jeova?

⁴ Sipos yumi wantem laef tru long “dei blong Jeova,” i impoten tumas blong wok strong long wok blong God. Elaeja mo Elaesa tufala i wok strong long wok blong Jeova. Tede, smol grup blong ol tabu Kristin we oli stap yet long wol, oli wok strong tu long ol tabu wok blong Jeova mo blong lidim wok blong talemaot gud nyus.a Samwe long 1935, oli stat pulum ol man we oli lesin long mesej blong Kingdom mo we oli gat hop blong laef olwe long wol ya, blong givim laef blong olgeta i go long Jeova mo tekem baptaes. (Mak 8:​34; 1 Pita 3:​21) Plante milyan man oli obei long tok ya. Fastaem, oli stap long tudak mo oli ded long saed blong speret from we sin i bos long olgeta. Be, naoia oli lanem trutok blong God, oli gat hop blong laef olwe long wan paradaes long wol, mo oli wok strong long wok blong Jeova. (Ol Sam 37:29; Revelesen 21:​3-5) From fasin blong olgeta blong wok strong, wokgud tugeta, welkamem man long haos blong olgeta, mo plante narafala gudfala wok bakegen, oli givhan bigwan long ol brata blong Kraes long saed blong speret, we oli stap yet long wol.​—Matyu 25:31-​46.

5. ?From wanem i impoten tumas blong mekem i gud long ol “brata” blong Jisas, mo wanem eksampel long taem blong Elaesa i soemaot samting ya?

⁵ Olgeta we oli mekem i gud long ol “brata” blong Jisas from we ol brata ya oli man blong hem, oli gat hop blong laef tru long “dei blong Jeova.” Wan man mo woman blong hem we tufala i stap long velej blong Sunem, tufala i bin kasem bigfala blesing from we tufala i soemaot kaengud fasin mo tekem Elaesa mo wokman blong hem i kam long haos blong tufala. Hasban ya mo waef blong hem tufala i no gat pikinini, mo hasban i olfala finis. Be Elaesa i promes long woman Sunem ya se bambae hem i bonem wan pikinini boe, mo samting ya i kamtru. Sam yia biaen, pikinini boe ya i ded, mo Elaesa i go long Sunem blong mekem hem i laef bakegen. (2 King 4:​8-​17, 32-​37) !Hemia sam nambawan blesing we tufala ya i kasem from we tufala i bin welkamem Elaesa long haos blong tufala!

6, 7. ?Neman i soemaot wanem eksampel, mo olsem wanem fasin ya i joen wetem fasin blong stap laef tru long “dei blong Jeova”?

⁶ Yumi nidim wan tingting we i stap daon blong letem ol “brata” blong Kraes oli lidim yumi wetem Baebol, mo blong gat hop blong laef tru long dei blong Jeova. Man ya Neman, we i jif blong ami blong Siria, i gat leprosi. Blong kamgud long sik ya, hem i mas soemaot tingting daon mo obei long advaes blong wan gel blong Isrel we i slef blong hem, se hem i mas go long Isrel blong faenem Elaesa. Elaesa i no kamaot long haos blong hem blong mitim Neman, be hem i sanem wan mesej i go long hem, se: “Yu mas swim seven taem long reva Jodan, nao bambae sik blong yu i finis, mo yu kam klin.” (2 King 5:​10) Fasin ya blong Elaesa i stikim Neman we i gat flas tingting, ale, hem i kros. Be taem hem i mekem tingting blong hem i godaon mo hem i swim seven taem long reva Jodan, “skin blong hem i kam olsem skin blong wan smol boe bakegen, mo hem i kam klin.” (2 King 5:​14) Bifo we Neman i gobak long haos blong hem, hem i mekem wan longfala trep i gobak long Sameria blong talem tangkyu long profet blong Jeova. Elaesa i kamaot blong mitim Neman, be hem i no agri blong karem ol presen we Neman i wantem givim, from we hem i gat strong tingting blong no yusum paoa we God i givim long hem, blong winim mane from. Wetem tingting daon, Neman i talem long Elaesa se: “Man blong wok blong yu bambae i no moa givim presen no mekem sakrifaes i go long ol narafala god, be long Jeova nomo.”​—2 King 5:​17.

⁷ Tede, plante milyan man oli kasem nambawan blesing from we oli gat tingting daon mo folem advaes blong Baebol we ol tabu Kristin oli givim long olgeta. Mo tu, olgeta ya we oli gat stret fasin long hat blong olgeta, oli kam klin long saed blong speret from we oli bilif long ransom sakrifaes blong Jisas. Naoia oli haremgud long jans ya blong stap olsem ol fren blong Jeova God mo Jisas Kraes. (Ol Sam 15:​1, 2; Luk 16:9) Long “dei blong Jeova” we i stap kam kwik nao, ol man nogud we oli gat flas tingting mo we oli no wantem tanem tingting blong olgeta from ol sin, bambae oli kasem panis blong lus blong olwe. Be, olgeta ya we oli gohed blong ona long God mo wok strong long wok blong hem, bambae oli gat blesing ya blong laef tru long dei ya.​—Luk 13:24; 1 Jon 1:7.

“?Hu i Stap Wetem Mi? ?Hu Ya?”

8. (a) ?Olgeta we bambae oli laef tru long “dei blong Jeova” oli gat wanem tingting long saed blong wok blong God? (b) ?Jehu i kasem oda blong mekem wanem wok? (c) ?Wanem i mas hapen long Jesebel?

⁸ Olgeta we oli wantem laef tru long “dei blong Jeova” oli mas tekem strong disisen blong mekem wok blong God. Elaeja i no fraet nating blong talemaot se bambae famle blong King Ehab oli mas ded, from we oli kilim plante man i ded mo oli stap wosip long Bal. (1 King 21:17-​26) Be, bifo we panis ya i kamtru long olgeta, Elaesa, we i tekem ples blong Elaeja, i mas finisim wan wok. (1 King 19:15-​17) Long stret taem we Jeova i makemaot, Elaesa i givim oda long wan wokman blong hem, blong go luk Jehu we i jif blong ami blong Isrel, mo makemaot hem olsem nyufala king blong Isrel. Afta we wokman ya i kafsaedem oel long hed blong Jehu, hem i talem long hem se: “Hemia nao tok we Jeova, God blong Isrel, i talem, ‘Mi mi makemaot yu olsem king antap long ol man blong Jeova, hemia Isrel. Mo bambae yu yu mas kilim i ded olgeta man long haos blong Ehab, masta blong yu. Mo bambae mi mi givim panis long Jesebel we i bin kilim i ded ol man blong mi, ol profet, mo ol man blong wok blong Jeova. Mo olgeta man long haos blong Ehab oli mas lus olgeta.’” Yes, ol dog bambae oli kakae dedbodi blong rabis Kwin Jesebel mo bambae i no gat man i kam berem hem blong soem ona long hem.​—2 King 9:​1-​10.

9, 10. ?Olsem wanem tok blong Elaeja i kamtru long saed blong Jesebel?

⁹ Ol man blong Jehu oli luksave se God i makemaot hem, mo oli presem hem olsem nyufala king blong Isrel. Ale, Jehu i no wet. Hem i girap, i spid i go kasem Jisrel blong statem wok ya blong kilim i ded olgeta man we oli lidim ol narafala blong lego tru wosip mo joen long gyaman wosip blong Bal. Faswan man we Jehu i kilim i ded, hemia pikinini blong Ehab, King Joram. King ya i ron i kam long hos blong askem Jehu sipos hem i karem wan mesej blong pis i kam long hem. Jehu i ansa long hem se: “?Weswe i save gat pis taem mama blong yu, Jesebel, i gohed blong slip olbaot mo mekem ol rabis wok blong majik?” Ale, Jehu i stretem ara blong hem long hat blong Joram mo i kilim hem i ded.​—2 King 9:​22-​24.

¹⁰ Ol woman we oli fraetgud long God oli stap longwe long ol nogud fasin blong Jesebel mo ol narafala woman we oli rabis olsemia. (Revelesen 2:​18-​23) Taem Jehu i kasem Jisrel, woman ya Jesebel i bin flasemgud hem finis blong traem pulum ae blong Jehu. Hem i lukluk i kamdaon long windo blong hem, mo i sakem wan tok i go long Jehu olsem se hem i jikim hem mo givim woning long hem. Nao, Jehu i askem ol man blong wok blong Jesebel se: “?Hu i stap wetem mi? ?Hu ya?” Wantaem nomo, tu no tri man blong Jesebel oli lukluk i kamaot long windo. ?Oli stap long saed blong Jehu? Hem i talem long olgeta se: “!Sakem hem i kamdaon!” Ale, oli tekem disisen wantaem blong obei, oli sakem rabis Jesebel i goaot long windo. Nao ol man oli purumbut long hem, ating wetem hos blong olgeta. Taem ol man oli kam blong berem hem, ‘oli no faenem bodi blong hem, be ol bun blong hed mo leg mo han blong hem nomo i stap.’ Hemia i mekem tok blong Elaeja i kamtru fulwan se: “Ol dog bambae oli kakae mit blong Jesebel.”​—2 King 9:​30-​37.

Sapotem Trufala Wosip Wetem Fulhat Blong Yumi

11. ?Hu ya Jonadab, mo olsem wanem hem i soemaot se hem i sapotem trufala wosip?

¹¹ Ol man we oli hop blong laef tru long “dei blong Jeova” mo kasem laef we i no save finis long wol ya, oli mas sapotem trufala wosip wetem fulhat blong olgeta. Oli mas mekem olsem Jonadab, wan man we i no blong Isrel be i wosipim Jeova. Taem Jehu i stap gohed blong wok strong blong finisim wok we hem i mas mekem, Jonadab i wantem soemaot se hem tu i sapotem mo i agri wetem wok ya. Taswe, hem i goaot blong mitim nyufala king ya blong Isrel, we i stap go from Sameria blong kilim i ded ol narafala man long haos blong Ehab. Taem Jehu i luk Jonadab, hem i askem se: “?Hat blong yu i agri long mi, olsem we hat blong mi i agri wetem hat blong yu?” Gudfala ansa we Jonadab i givim i mekem se Jehu i pusum han blong hem i go blong pulum Jonadab i kam antap long kat blong hem. Hem i se: “Yu kam wetem mi mo luk olsem wanem we mi no save letem wan man i traem winim Jeova.” Wantaem nomo, Jonadab i tekem jans ya blong soemaot se hem i sapotem man ya we Jeova i jusumaot blong mekem ol jajmen blong hem oli kamtru.​—2 King 10:15-​17.

12. ?From wanem i stret we Jeova i askem long yumi blong wosip long hem nomo?

¹² I stret nomo we yumi sapotem trufala wosip wetem fulhat blong yumi. Jeova we i Wokem Olgeta Samting mo we i Haefala Masta blong Heven mo Wol, i gat raet blong talem long yumi blong wosip long hem nomo. Hem i givim oda long ol man Isrel se: “Yufala i no mekem pija blong ol samting long heven, mo long wol, mo long solwora we wol ya i stanap long hem, blong yufala i mekem wosip long hem. Bambae yufala i no bodaon long aedol olsem, blong mekem wosip long hem, from we mi mi Hae God, mi God blong yufala, mo yufala i man blong mi, nao mi mi no save letem yufala i mekem wosip long narafala god bakegen.” (Eksodas 20:​4, 5) Ol man we oli hop blong laef tru long “dei blong Jeova” oli mas wosip long hem nomo, mo oli mas mekem olsem “long speret mo long trutok.” (Jon 4:​23, 24, NW) Oli mas strong blong sapotem trufala wosip, olsem Elaeja, Elaesa, mo Jonadab.

13. ?Hu olgeta we oli bilif long Mesaea King long sem fasin we hat blong Jonadab i stap wetem Jehu, mo olsem wanem oli soemaot samting ya?

¹³ Afta we olgeta man blong haos blong Ehab oli ded, King Jehu i mekem sam narafala samting blong makemaot olgeta man we oli wosip long Bal, mo blong finisim gyaman skul ya long Isrel. (2 King 10:18-​28) Tede, God i makemaot finis King ya Jisas Kraes long heven, blong kilim i ded ol enemi blong Jeova mo blong mekem hae rul blong Hem i win. Long sem fasin we hat blong Jonadab i stap wetem Jehu, ‘bigfala kampani’ blong ol “narafala sipsip” blong Jisas tede oli agri wetem fulhat blong olgeta se Kraes i Mesaea mo King. Mo tu, oli wokgud tugeta wetem ol brata blong hem long saed blong speret long wol. (Revelesen 7:​9, 10; Jon 10:16) Oli pruvum samting ya taem oli folem trufala wosip, mo wok strong long Kristin wok blong prij, blong givim woning long ol enemi blong God se “dei blong Jeova” i stap kam kwik.​—Matyu 10:32, 33; Rom 10:​9, 10.

!Sam Bigfala Samting Bambae Oli Hapen i No Longtaem!

14. ?Wanem fyuja i stap blong olgeta gyaman skul?

¹⁴ Jehu i tekem aksin blong finisim wosip blong Bal long Isrel. Long taem blong yumi, bambae God i yusum Bigfala Jehu, hemia Kraes Jisas, blong spolem Bigfala Babilon, olgeta gyaman skul blong wol. I no longtaem, bambae yumi luk olsem wanem tok we enjel i bin talem long aposol Jon, i kamtru, se: “Ol ten hon blong anamol ya, we yu luk, bambae oli no laekem woman ya blong rod [Bigfala Babilon], bambae oli agensem hem olgeta. Bambae oli tekemaot olgeta samting we hem i gat, oli livim hem i stap neked. Bambae oli kakae ol mit blong bodi blong hem, nao bambae oli bonem hem long faea blong spolem hem olgeta. Bambae oli mekem olsem from we God i putum long tingting blong olgeta blong mekem olsem we hem i wantem. Nao tingting blong olgeta bambae i kam wan nomo, nao bambae oli givim raet long anamol ya blong holem nem blong king, gogo ol tok we God i talem i kamtru.” (Revelesen 17:16, 17; 18:​2-5) “Ol ten hon” ya oli minim olgeta politik paoa wetem ami blong olgeta, we oli stap rul long wol. Nating se naoia oli stap frengud wetem Bigfala Babilon, be taem blong hem ya i sot. Ol politik blong wol ya bambae oli spolem ol gyaman skul, mo ‘wael anamol ya’​—hemia Yunaeted Nesen​—bambae i mekem bighaf blong wok ya blong ol “ten hon” taem oli spolem woman ya.b !Bambae hemia wan bigfala taem blong presem Jeova!​—Revelesen 19:​1-6.

15. ?Wanem bambae i hapen taem ol man oli traem spolem ogenaesesen blong God long wol ya?

¹⁵ Afta we King Jehu i kilim i ded olgeta man we oli wosipim Bal, hem mo olgeta man blong hem oli go agensem ol politik pati we oli enemi blong Isrel. King ya Jisas Kraes bambae i mekem semkaen wok. Afta we olgeta gyaman skul, we oli olsem skul blong Bal, oli lus, ol politik paoa nomo bambae oli stap. Nao Devel Setan bambae i pulum olgeta ya we oli enemi blong hae rul blong Jeova, blong oli faet agensem ogenaesesen blong God long wol ya blong traem spolem hem olgeta. (Esikel 38:14-​16) Be, Jeova bambae i yusum King Jisas Kraes blong kilimaot mo spolemgud olgeta ya long Amageden, “faet long bigfala Dei blong God ya we i gat olgeta paoa.” Long taem ya nao, bambae hae rul blong Jeova i jes win fulwan.​—Revelesen 16:14, 16; 19:11-​21; Esikel 38:18-​23.

Wok Strong Olsem Elaesa

16, 17. (a) ?Olsem wanem yumi save se Elaesa i wok strong gogo kasem en blong laef blong hem? (b) ?Yumi mas mekem wanem wetem ol ara blong trutok?

¹⁶ Ol man blong God bambae oli no fraet mo bambae oli wok strong olsem Elaesa, gogo kasem taem we “dei blong Jeova” i finisim fulwan rabis wol ya blong Setan. !Antap long olgeta yia we Elaesa i bin wok blong givhan long Elaeja, hem i bin mekem wok olsem profet blong Jeova hem wan blong bitim 50 yia! Mo Elaesa i wok strong gogo kasem en blong longfala laef blong hem. Jes bifo we hem i ded, smol bubu blong Jehu, King Joas, i kam luk hem. Elaesa i talem long hem blong sutum wan ara i goaot long windo. Ara ya i spid i go kasem mak blong hem, ale Elaesa i talem se: “!Ara blong Jeova bambae i win, yes, ara ya bambae i win agensem Siria! Bambae yu yu kilimdaon olgeta man Siria long Afek gogo kasem we yu finisim olgeta evriwan.” Nao, Elaesa i askem Joas blong kilim graon wetem ol ara blong hem. Be Joas i no mekem strong inaf, hem i kilkilim graon tri taem nomo. Ale, Elaesa i talem se, from samting ya, Joas bambae i winim Siria tri taem nomo. Mo hemia nao wanem we i hapen. (2 King 13:14-​19, 25) King Joas i no kilimdaon ol man Siria fulwan, ‘gogo kasem we i finisim olgeta evriwan.’

¹⁷ Be, ol tabu Kristin oli gat strong tingting olsem Elaesa, taswe oli gohed blong faet agensem gyaman wosip. Ol fren blong olgeta we oli gat hop blong laef long wol ya, oli mekem sem mak. Mo tu, ol man we oli hop blong laef tru long “dei blong Jeova” oli no mas fogetem ol tok we Elaesa i talem long saed blong fasin blong kilim graon. Yumi mas tekem ol ara blong trutok mo wok strong wetem olgeta olsem we yumi kilkilim graon​—bakegen mo bakegen​—yes, yumi mas mekem olsem gogo kasem we Jeova i talem se wok blong yumi wetem ol ara ya i finis.

18. ?Yumi mas mekem wanem folem tok blong 2 Pita 3:​11, 12?

¹⁸ I no longtaem, “dei blong Jeova” bambae i finisim rabis wol blong naoia. Taswe, yumi mas letem ol tok blong aposol Pita we oli leftemap tingting, oli pusum yumi. Hem i se: “From we olgeta samting ya oli mas lus olsemia, ?yufala i mas kam wanem kaen man long ol wok blong fasin tabu mo ol wok blong fasin fasgud long God? !Yufala i mas stap wet mo holem dei ya blong Jeova i stap oltaem long tingting blong yufala!” (2 Pita 3:​11, 12, NW) Taem olgeta haf blong wol ya oli lus wetem faea blong kros blong God we Jisas Kraes bambae i mekem i kamtru, olgeta we oli bin mekem ol gudfala fasin mo we oli fasgud long God, olgeta ya nomo bambae oli sef. I impoten tumas blong stap klin long ol fasin blong yumi mo long saed blong speret. Lav long ol man raonabaot long yumi i impoten tu, mo yumi soemaot lav ya taem yumi givim samting we olgeta oli nidim, antap moa, ol samting long saed blong speret, we yumi givim long olgeta taem yumi mekem Kristin wok blong prij.

19. ?Yu yu mas mekem wanem blong stap laef tru long “dei blong Jeova”?

¹⁹ ?Ol tok mo wok blong yu oli makemaot yu olsem wan man we i gat strong bilif mo i wok strong long wok blong God? Sipos yes, yu save gat hop ya blong laef tru long “dei blong Jeova” mo go insaed long nyufala wol we God i promes long hem. Yes, yu save laef tru long taem ya sipos yu mekem i gud long ol brata blong Kraes long saed blong speret, from we oli man blong hem, long sem fasin we man mo woman Sunem bifo, oli bin mekem i gud long Elaesa. Blong kasem laef, yu mas mekem olsem Neman tu, we i soemaot tingting daon taem hem i obei long advaes we i kam long God, mo i kam wan man blong wosip long Jeova. Sipos yu wantem tumas blong laef blong olwe long wan paradaes long wol, yu mas soemaot se yu sapotem trufala wosip wetem fulhat blong yu, olsem Jonadab i bin mekem. Ale, maet yu yu save stap wetem olgeta man we oli holemstrong long Jeova, we i no longtaem bambae oli luk tok blong Jisas i kamtru se: “Yufala i kam. Papa blong mi i mekem i gud tumas long yufala finis. Taem hem i no mekem wol ya yet we yumi stap long hem, be hem i makemaot ol ples blong yufala long nyufala wol we naoia bambae i kam, we hem i king long hem. Yufala i kam tekem ples ya blong yufala.”​—Matyu 25:34.

[Ol futnot]

?Bambae Yu Yu Ansa Olsem Wanem?

◻ ?Wanem sam fasin we yumi nidim blong stap laef tru long “dei blong Jeova”?

◻ ?Wan man Sunem wetem woman blong hem oli soemaot wanem eksampel long taem blong Elaeja?

◻ ?Yumi save lanem wanem from store blong Neman?

◻ ?Olsem wanem yumi save folem eksampel blong Jonadab?

◻ ?Seken Pita 3:​11, 12 i mas gat paoa long yumi olsem wanem?