?Olsem Wanem Blong Stap Glad Long Wok Blong Jeova Fultaem?

OL PROFET tok blong Baebol we oli stap kamtru naoia, oli soemaot klia se yumi stap long ol las dei blong wol ya we i fulap long fasin blong no obei long God. Ol man blong Jeova God oli luksave samting ya. Taswe, oli traem makemaot plante haoa blong mekem wok blong talemaot gud nyus blong Kingdom blong God. Bitim 600,000 Wetnes blong Jeova oli bin jenisim sam samting long laef blong olgeta blong mekem se oli save joen long wok blong Jeova fultaem. Sam long olgeta ya oli kam paenia, hemia olgeta we oli talemaot Kingdom fultaem. Sam narafala oli wok long Betel long hedkwota blong Watch Tower Sosaeti, no long ol ofis blong hem long ol wanwan kantri. Sam narafala bakegen oli kam misinari, no wok olsem elda blong visitim ol wanwan kongregesen.a

Baebol i soemaot se long ol las dei, “laef long wol ya bambae i kam strong tumas.” (2 Timote 3:​1-5) Grik hanraet blong Baebol i yusum wan tok we yumi save tanem i kam “taem we i raf tumas.” Taswe, i no gat wan man long taem blong yumi, we i save tingting blong gat wan laef we i fri olgeta long trabol. Samfala Kristin man we oli kasem ol bigfala problem oli askem se: ‘?Mi mi naf blong gohed long wok blong Jeova fultaem, no i moagud we mi stop?’

?Wanem sam risen we oli save mekem se wan brata no sista i stat gat tingting blong lego wok blong paenia, Betel, elda we i visitim ol wanwan kongregesen, no misinari? Maet samfala oli gat wan bigfala sik. Maet papa no mama i olfala, no wan memba blong famle i handikap we i nidim se yumi lukaot long hem oltaem. Maet wan hasban mo waef we tufala i mekem wok blong Jeova fultaem bambae oli gat wan bebi. Wan brata no sista we i stopem wok blong Jeova fultaem from wan risen olsem, no from wan narafala impoten wok we Baebol i talem se hem i mas mekem, oli no mas sem from.

Be, ?olsem wanem sipos wan brata no sista i no moa wantem gohed long wok blong Jeova fultaem from we hem i no moa glad blong mekem wok ya? Maet wan paenia i faenem se wok blong prij blong hem i no karem plante frut, taswe hem i tingting se: ‘?From wanem mi stap gohed blong lego plante samting we mi wantem, blong prij long ol man we oli no wantem lesin?’ Maet wan man we i wok long Betel i no glad long wok we oli givim long hem. No maet wan man we i gat sam problem blong helt, mo we i gohed nomo long wok blong paenia, i faenem se glad blong hem i stap lus. ?Olsem wanem olgeta ya oli save stap glad oltaem? Bambae yumi tingbaot toktok blong samfala we oli bin gohed plante yia long wok blong prij.

Winim Tingting We i Harem Nogud

Anny, we i blong Swiselan, i go long Wajtaoa Baebol Skul blong Gilead long 1950. Hem i wantem tumas blong go mekem misinari wok long wan narafala kantri. Be, taem oli talem se bambae hem i kambak long Yurop blong wok long Betel, hem i harem nogud tumas. Nating se i olsem, hem i agri blong mekem wok ya blong translesen, mo hem i stap gohed yet long wok ya. ?Olsem wanem hem i winim tingting blong hem we i harem nogud? Anny i eksplenem se: “I bin gat fulap wok blong mekem long taem ya, mo naoia tu. Wok ya i moa impoten i bitim ol filing blong mi mo samting we mi nomo mi laekem.”

Sipos yumi harem nogud long wok we yumi kasem, maet i gud we yumi traem tingting olsem Anny. Ol samting we yumi nomo i wantem oli no impoten tumas. Faswan samting we i impoten hemia se, i gat man blong mekemgud olgeta defren kaen wok we oli joen wetem wok ya blong talemaot Kingdom. Proveb 14:23 i talem se, “long olkaen hadwok i gat gudfala frut i kamaot.” Nomata wanem wok we yumi kasem, be taem yumi holemstrong long wok ya, yumi stap givhan blong mekem wok blong Kingdom i go moa. Mo yumi save haremgud tumas​—yes, glad​—long olgeta wok ya we God i givim.​—Skelem wetem 1 Korin 12:18, 27, 28.

Joengud Wetem Ol Narafala

Long wok blong Jeova fultaem, yumi stap kampani wetem ol defdefren kaen man​—long wok blong prij, long Betel, long haos blong ol misinari, no taem yumi visitim ol defren kongregesen olsem elda we i goraon. Taswe, glad i dipen bigwan long fasin blong yumi blong joengud wetem ol narafala. Be, ‘raf taem ya’ long ol las dei we Baebol i talemaot, i mekem i hadwok blong joengud wetem ol narafala man. ?Olsem wanem wan man blong prij i save stap glad, nating sipos narafala i mekem hem i harem nogud? Ating yumi save lanem wan samting from eksampel blong Wilhelm.

Wilhelm i kam wan memba blong Betel long Yurop long 1947. Afta we hem i aot long Betel, hem i joen long wok blong paenia mo wok blong visitim ol wanwan kongregesen olsem elda we i goraon. Wilhelm i eksplenem se: “Sipos mi mo waef blong mi, mitufala i luk sam samting we mitufala i ting se oli no stret, no we oli mekem mitufala i wari, mitufala i talemaot tingting blong mitufala long Jeova nao livim i stap long han blong hem blong i stretem.”​—Ol Sam 37:5.

Ating yu tu yu bin harem nogud from fasin we wan narafala Kristin i mekem long yu. Maet hem i bin toktok long yu long fasin we i no gat respek, no maet hem i no tingtinggud fastaem. Rimemba se, yumi evriwan i stap mekem mastik samtaem long toktok blong yumi. (Jemes 3:2) Taswe, ?from wanem yu no traem luk problem ya olsem wan jans blong kam kolosap moa long ‘Man we i stap Lesin long ol Prea’? (Ol Sam 65:2) Tokbaot bisnes ya wetem Jeova, nao livim i stap long han blong hem. Sipos God i wantem jenisim sam samting, bambae hem i mekem olsem. Olgeta we oli laef wanples long wan haos blong ol misinari oli mas tingbaot samting ya, sipos i gat wan problem olsem i kamaot. Long rod ya, bambae oli save stap glad long wok blong Jeova.

Taem i Gat Trabol Long Helt

I no gat plante man we oli haremgud oltaem long saed blong helt. Ol yangfala tu, tingting blong olgeta i save foldaon no oli save kasem wan sik. Samfala oli mas lego wok blong Jeova fultaem from we helt blong olgeta i nogud. Be oli gohed blong mekem nambawan wok olsem ol pablisa blong Kingdom. Sam narafala oli naf blong gohed long wok blong Jeova fultaem, nating se helt blong olgeta i nogud. Tingbaot eksampel blong Hartmut mo Gislind.

Hartmut mo waef blong hem Gislind tufala i spenem 30 yia finis long wok blong paenia, misinari, mo visitim ol defren kongregesen. Tufala tugeta oli bin kasem sam bigfala sik we oli mekem tufala i kam slak long saed blong bodi mo filing. Nating se i olsem, tufala i bin mekem nambawan wok, mo tufala i leftemap tingting blong plante narafala we oli kasem semkaen traem olsem tufala. ?Wanem advaes we tufala i givim? “Lukluk i go long fyuja mo no tingting tumas long ol samting we oli pas finis. Traem bes blong yu blong lukluk gudfala saed blong evri samting we i kamaot. Oltaem i gat jans blong presem Jeova, nating se i wan taem nomo evri dei. Ale, yusum jans ya we yu yu gat, mo haremgud long hem.”

Tingbaot store blong Hannelore. Hem i trabol from wan sik we i stap kambak plante taem long hem. Be, blong 30 yia, hem i gohed long wok blong paenia, misinari, visitim ol kongregesen wetem hasban blong hem, mo wok blong Betel tu. Hannelore i talem se: “Mi tingbaot tok we Setan i sakem long Jeova se, olgeta man oli mekem wok blong Hem nomo taem i isi blong mekem olsem. Taem mi stanap strong tru long ol traem, mi stap givhan blong pruvum se Setan i gyaman.” Tingting olsemia i save kam wan strong paoa we i pusum yumi blong gohed. Rimemba se, Jeova i tinghae tumas long fasin blong yu blong stap tru long Hem taem yu kasem traem.​—Job 1:​8-​12; Proveb 27:11.

Taem yu stap traem mekem wan stret disisen long saed blong helt blong yu, tingbaot tu haf blong profet tok blong Jisas Kraes long saed blong en blong wol ya. Hem i talem se bambae i gat ol strong sik long wan ples i go kasem narafala ples. Hem i talem tu se: “Bambae ol man oli mas talemaot gud nyus ya blong kingdom long olgeta ples blong wol.” (Matyu 24:​3, 14, NW; Luk 21:11) Jisas i save se long ol las dei, ol man blong hem bambae oli kasem hadtaem from sik. Mo hem i luksave se i no ol man we oli gat gud helt nomo we bambae oli mekem wok blong prij be, olgeta we oli gat bigfala sik tu. Sipos yumi naf blong gohed long wok blong Jeova fultaem nomata we yumi sik, Jeova bambae i no fogetem lav we yumi soemaot long nem blong hem.​—Hibrus 6:​10.

Stap Glad Nating Se Ol Man Oli No Lesin

Fasin we ol man oli soemaot long yumi taem yumi stap talemaot Kingdom, i save gat paoa long yumi. Wan brata we i stap longtaem long wok blong Jeova fultaem, i talem se: “Ol paenia tu oli faenem i had blong statem wan storeyan wetem ol man long haos. Yumi evriwan i mas traehad blong stap glad.” Yes, taem ol man oli no wantem lesin, samting ya i save daonem glad blong yumi long wok blong prij. Taswe, ?olsem wanem wan paenia i save stap glad nating se evri dei hem i mitim ol man we oli no wantem lesin? Sam brata mo sista we oli stap longtaem long wok blong prij, oli givim sam gudfala advaes we oli traem finis mo we i givhan long olgeta.

Taem ol man oli no wantem lesin, hemia i wan traem long yumi, be yumi save winim traem ya. Yes, from we ol man oli no wantem lesin ale, samting ya i no minim se bambae yumi no moa gohed long wok blong Jeova fultaem. Sipos yumi makemaot taem blong stadigud long Baebol, yumi save stap glad nating se ol man oli no lesin long yumi. Baebol i givim ‘evri samting we yumi nidim blong mekem ol gudfala wok,’ mo hemia i minim tu se yumi mas toktok long ol man we oli no lesin long gud nyus. (2 Timote 3:​16, 17) Nating se ol man oli no wantem lesin long profet Jeremaea, hem i no letem samting ya i stopem hem. (Jeremaea 7:​27) Taem yumi stadi Baebol wetem ol narafala Kristin buk, i gud sipos yumi makem ol poen we oli save mekem bilif blong yumi i kam strong, mo we oli save halpem yumi blong winim problem ya we man i no wantem lesin long yumi. Samting ya i save givhan long yumi bigwan.

I tru se, taem ol man oli no lesin long yumi, samting ya i save traem yumi. Taswe, bambae yumi lukluk moa long tingting we yumi gat long ol man we yumi prij long olgeta. ?From wanem oli no wantem lesin? Tingbaot Yurop. Wan risen we plante man long ples ya oli no wantem lesin, hemia from we oli luk olgeta rabis fasin we ol gyaman skul oli mekem. Ol man oli no moa luk skul olsem wan haf blong laef blong olgeta, mo oli no wantem save nating long saed blong skul. Yumi mas rere blong jenisim toktok blong yumi. Yumi mas tokbaot samting we olgeta oli stap fesem long laef blong olgeta. Maet hemia trabol blong no gat wok, trabol long helt, raf fasin, fasin blong no laekem ol man we oli defren long yumi, fasin blong spolem ol laef samting raonabaot long yumi, mo fasin blong fraet long ol faet.

Long fastok blong yumi long man blong haos, maet yumi tokbaot wan nyus we ol manples blong yumi oli intres long hem. Hemia nao wanem we Dietmar i traem mekem taem hem i prij long wan velej we ol man oli neva lesin. Wan man long velej ya i talem long hem se long dei we i jes pas, i gat wan nogud akseden i kamaot long velej ya. Nao, Dietmar i talemaot trufala sore blong hem from akseden ya, long evri man we hem i mitim long haos blong olgeta. Hem i se: “Wantaem nomo olgeta man oli stat toktok. Akseden ya i wan samting we i stap long tingting blong olgeta evriwan. Long dei ya, mi storeyan gud wetem plante man from we mi soemaot se mi intres long wan samting we i hapen long laef blong olgeta.”

Yumi mas givim wetnes blong Kingdom long ol man long evri ples we yumi mitim olgeta. Maet yumi save karem gudfala frut taem yumi tekem evri jans blong prij. Yumi save trenem yumi long wok ya taem yumi yusum ol poen long ol buk we oli tokbaot Baebol. Glad i save kamaot from smol toktok nomo we yumi talem long narafala long kaengud fasin, no taem yumi givim Wajtaoa mo Wekap! long wan man. Sipos yumi stap visitim wan man we i soem intres mo yumi statem Baebol stadi wetem hem, maet yumi save gat gudfala frut sipos yumi askem se: “?Yu yu save wan narafala man we maet hem tu i wantem stadi Baebol?” Long rod ya, maet yu statem wan narafala Baebol stadi. Nomata se i olsem wanem, yumi mas gat positif tingting, dipen oltaem long Jeova tru long prea, mo no letem tingting blong yumi i foldaon from we ol man oli no lesin long yumi.

Ol Narafala Oli Save Leftemap Tingting

Jürgen mo Christiane tufala i mekem wok blong paenia mo visitim ol defren kongregesen blong bitim 30 yia nao. Wan taem, Sosaeti i bin sanem tufala blong prij long wan ples we bighaf blong ol man oli no wantem lesin mo oli stronghed. !Jürgen mo waef blong hem tufala i nidim tumas we narafala i leftemap tingting blong tufala! Be, ol narafala brata sista long kongregesen oli no luksave nid blong tufala.

From samting ya, Jürgen i save se, “sam paenia oli gat hadtaem. Oli nidim se ol elda mo ol narafala pablisa oli mekem moa blong leftemap tingting blong olgeta.” God i talem long Moses blong leftemap tingting blong Josua mo mekem hem i kam strong. (Dutronome 3:​26-​28) Olgeta Kristin wanwan oli mas rere oltaem blong leftemap tingting blong narafala. (Rom 1:​11, 12) Ol pablisa blong Kingdom oli save leftemap tingting blong olgeta we oli joen long wok blong Jeova fultaem, taem oli talem ol tok we i mekem olgeta oli strong, mo taem oli prij wetem olgeta.

Glad Blong Jeova​—Strong Haos Blong Yumi

Ol Kristin we oli spenem bighaf blong laef blong olgeta long wok blong paenia no misinari, long wok blong Betel, no visitim ol kongregesen olsem elda we i goraon, oli faenem se bighaf blong ol problem we oli kasem oli blong smoltaem nomo. Be, i gat sam we oli stap longtaem. Nating sipos i luk olsem se problem blong yumi bambae i neva finis, yumi no mas letem hem i karemaot glad blong yumi. Ramon i aot long kantri blong hem 45 yia finis blong go mekem wok blong prij long wan narafala kantri. Hem i talem se taem wan problem i mekem yumi harem nogud, “yumi mas tingbaot olgeta blesing we yumi gat, mo rimemba se plante taosen narafala brata mo sista oli kasem hadtaem we i moa nogud bitim yumi.” Yes, olgeta brata mo sista blong yumi raonabaot long wol oli stap safa, mo Jeova i stap tingbaot yumi evriwan.​—1 Pita 5:​6-9.

Taswe, sipos ol samting long laef blong yumi oli stret blong yumi mekem wok blong Jeova fultaem mo gohed long hem, i gud yumi dipen long Papa blong yumi long heven nao bambae yumi stap glad oltaem. Hem i stap mekem ol man blong hem oli strong, mo yumi evriwan i mas rimemba se ‘glad blong Jeova i olsem strong haos blong yumi.’​—Nehemaea 8:​10.

[Futnot]

[Tok blong pija long pej 21]

“Wok ya i moa impoten i bitim ol filing blong mi mo samting we mi nomo mi laekem”

[Tok blong pija long pej 22]

“Mitufala i talemaot tingting blong mitufala long Jeova nao livim i stap long han blong hem blong i stretem”

[Tok blong pija long pej 23]

“Traem bes blong yu blong lukluk gudfala saed blong evri samting we i kamaot. Oltaem i gat jans blong presem Jeova, nating se i wan taem nomo evri dei”

[Tok blong pija long pej 23]

“Taem mi stanap strong tru long ol traem, mi stap givhan blong pruvum se Setan i gyaman”

[Tok blong pija long pej 24]

“Sam paenia oli gat hadtaem. Oli nidim we ol elda mo ol narafala pablisa oli mekem moa blong leftemap tingting blong olgeta”

[Tok blong pija long pej 24]

“Yumi mas tingbaot olgeta blesing we yumi gat”