“Ona Long Jeova Wetem Ol Sas Samting Blong Yu”—?Olsem Wanem?

“ONA long Jeova wetem ol sas samting blong yu, mo wetem ol fas kakae blong garen blong yu.” Yumi save faenem stampa rod blong kasem fulap blesing blong Jeova, long ol waes tok ya blong God, we wan man i raetem samwe 2,600 yia bifo. Yes, man we i raetem tok ya i gohed blong talem se: “Nao haos we yu stap kipim ol kakae long hem bambae i fulap gud wetem plante kakae. Mo ol dram blong waen blong yu bambae oli fulap tumas wetem nyufala waen gogo i ronaot.”​—Proveb 3:​9, 10.

?Be i minim wanem se yumi mas ona long God? ?Wanem ya ol sas samting we yumi mas yusum blong ona long Jeova? Mo, ?olsem wanem yumi save mekem samting ya?

“Ona Long Jeova”

Long Baebol, stampa Hibru tok blong talem ona, ka·vohdhʹ, i rili minim se “hevi.” Taswe blong ona long wan man, i minim se man ya i gat paoa long yumi, yumi tinghevi long hem, no hem i sas long yumi. Wan narafala Hibru tok blong talem ona, yeqarʹ, i minim “sas” mo “ol samting we oli sas.” Long sem fasin, Grik tok ya ti·meʹ, we long Baebol oli tanem i kam “ona,” i karem mining ya blong samting we i hae, i gud tumas, mo i sas tumas. Taswe, wan man i save ona long narafala taem hem i soem se hem i gat respek mo i tinghae long narafala ya.

Fasin blong givim ona i gat wan narafala haf blong hem tu. Tingbaot store blong man Jyu ya Modekae, we hem i bilif long God. Wan taem, hem i talemaot klia long King Ahasuerus blong Pesia bifo, se i gat sam man oli stap mekem plan blong kilim hem i ded. Biaen, king ya i faenemaot se Modekae i no bin kasem ona nating from gudfala wok we hem i mekem. Ale, king ya i askem praem minista, Heman, se wanem nao beswan rod blong ona long wan man we king i tinghae tumas long hem. !Haeman i ting se hem nao i man ya we bambae i kasem ona, be hem i mastik bigwan! Ale, Heman i talem se wan man olsem i mas kasem “klos olsem king” mo i mas sidaon long “wan hos we i blong king nomo.” Hem i finisim tok blong hem se: “Hem i mas sidaon long hos mo pastru long taon long fored blong olgeta man. Mo ol man oli mas singaot fored blong hem se, ‘Hemia nao man ya we king i laekem hem mo i ona long hem bigwan.’” (Esta 6:​1-9) Long ples ya, yumi luk se blong givim ona long man ya, hem i presem hem long fored blong olgeta man, blong bambae olgeta man tu oli tinghae long hem.

Long sem fasin, givim ona long Jeova i gat tu haf blong hem: yumi wanwan i mas tinghae long hem, mo tu, yumi mas sapotem mo joen long wok blong talemaot nem blong hem, blong presem hem long fored blong olgeta man.

“Ol Sas Samting Blong Yu” ?I Minim Wanem?

Ol sas samting blong yumi i minim laef, taem, save, mo paoa blong yumi. ?Olsem wanem long olting blong yumi? Tingbaot tok blong Jisas taem hem i luk wan pua wido woman we i sakem tu smol mane i go insaed long bokis blong haos prea. Hem i talem se: “Kleksin we wido ya i sakem i moa long ol mane we olgeta narafala man ya oli sakem. From we ol narafala man ya, taem oli sakem kleksin blong olgeta, oli stap sakem haf mane ya nomo blong olgeta we i stap nating. Be woman ya we i pua, hem i sakem olgeta mane blong hem, we i blong pem kakae blong hem.” (Luk 21:​1-4) Jisas i toktok gud long saed blong wido ya from we hem i yusum mane blong hem blong sapotem wosip blong Jeova.

Taswe, i klia se, taem Solomon i tokbaot ol sas samting blong yumi, hem i minim mane mo olting blong yumi tu. Mo tok ya “ol fas kakae blong garen” i mekem yumi tingbaot se yumi mas givim ol beswan sas samting blong yumi oli go long Jeova.

Be, ?olsem wanem yumi ona long God taem yumi givim mane mo olting blong yumi i go long hem? Olgeta samting we man i gat oli blong hem finis, ?i tru no? (Ol Sam 50:10; 95:​3-5) Long wan prea we King Deved i mekem i go long Jeova wetem fulhat blong hem, hem i luksave se: “Evri samting oli stap kamaot long yu.” Mo Deved i gohed blong tokbaot presen mane mo olting we hem mo ol narafala man oli karem i kam blong givhan long wok blong bildim haos prea, hem i se: “Ol samting we mifala i stap givim long yu, oli kamaot long yu nomo.” (1 Kronikel 29:14) Taswe, taem yumi givim presen i go long Jeova, yumi stap givimbak nomo samting we hem i bin givim fastaem long yumi from gud hat blong hem. (1 Korin 4:7) Olsem yumi luk finis, blong ona long Jeova i minim se yumi mas presem hem long fored blong olgeta man. Be, taem yumi givim olting mo mane blong yumi blong sapotem trufala wosip, samting ya tu i ona long God. Baebol i givim sam gudfala eksampel long saed blong rod ya blong ona long Jeova.

Sam Eksampel Blong Bifo

Samwe long 3,500 yia bifo, Jeova i wantem stanemap wan haos tapolen long draeples, olsem wan ples blong wosip blong ol man Isrel. Blong wokem haos tapolen ya folem plan we God i mekem, i nidim plante defren sas samting. Jeova i givim oda long Moses blong letem evri ‘man we i gat gladhat blong givim presen, i karem wan samting i kam long Jeova.’ (Eksodas 35:5) Baebol i gohed blong talem se: “Nao olgeta we tingting blong olgeta i glad blong givim sam samting blong wok ya i go long Hae God, oli tekem ol samting ya i kam. Olgeta oli karem ol samting blong wokem Haos Tapolen ya blong Hae God, mo blong wokem ol samting blong mekem wosip long Haos Tapolen ya, mo blong wokem ol klos blong pris.” (Eksodas 35:21) Be, olgeta presen we tingting blong olgeta i glad blong givim, oli bigwan tumas i bitim ol samting we oli nidim blong mekem wok ya, ale oli mas “blokem olgeta blong oli no moa givim ol samting ya bakegen.”​—Eksodas 36:​5, 6.

Tingbaot wan narafala eksampel. Afta we ol man Isrel oli no moa nidim haos tapolen, plan i stap blong bildim wan haos prea. Blong sapotem wok ya, Deved i mekem wan bigfala presen i go long haos prea we pikinini boe blong hem, Solomon, bambae i bildim. Mo tu, hem i pasem tok i go long olgeta man, blong olgeta tu oli save joen, blong givim ol sas samting blong olgeta i go long Jeova olsem presen. Selva mo gol we oli givim i kasem raonabaot 5,000 bilyan vatu long mane blong yumi tede. “Nao ol man oli haremgud tumas, from we oli stap givim ol presen olsem we olgeta nomo oli wantem.”​—1 Kronikel 29:​3-9; 2 Kronikel 5:1.

“Ol Presen” Long Taem Blong Yumi

?Olsem wanem yumi save kasem glad ya we i kamaot taem yumi givim presen? Wok we i impoten moa long wol tede, hemia wok blong talemaot Kingdom mo mekem disaepol. (Matyu 24:14; 28:19, 20; Ol Wok 1:8) Mo Jeova i luk se i stret blong putum olgeta wok blong Kingdom we oli stap gohed long wol ya, i stap long han blong ol Wetnes.​—Aesea 43:10.

I klia se, i nidim mane blong mekem wok blong ol Wetnes blong Jeova i gohed tede. I nidim mane blong bildim mo fiksimap ol Haos Kingdom, ol Haos Asembli, branj ofis, faktri, mo Betel. I nidim mane tu blong pem ol samting blong prentem mo seremaot ol Baebol mo ol narafala buk we oli tokbaot Baebol long ol defren lanwis. ?Olsem wanem ol Wetnes oli kasem naf mane blong sapotem wok ya? !Hemia ol presen mane nomo!

Bighaf blong ol presen mane ya oli kam long ol man we oli no gat plante samting​—olsem wido woman ya we Jisas i tokbaot. Olgeta ya oli wantem joen fulwan long rod ya we i givim ona long Jeova, taswe oli givim mane we i “stret long mak blong mane blong olgeta,” mo, samtaem, “oli bitim mak ya olgeta.”​—2 Korin 8:​3, 4.

Aposol Pol i talem long ol Kristin long Korin se: “Nao evri man oli mas givim sam samting, olsem we evri man wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem. From we God i laekem tumas man we i save givim long gladhat blong hem.” (2 Korin 9:7) Sipos yumi wantem givim wetem gladhat, yumi mas gat gudfala plan. Pol i talem long ol man Korin se: “Evri wik, long Sande, yufala evriwan i mas putumgud sam mane blong yufala i stap blong ol Kristin man ya, stret long mak blong ol mane we yufala i kasem. Nao taem we bambae mi mi kamtru long yufala, kleksin ya i rere finis.” (1 Korin 16:2) Long sem fasin, wanwan man we tingting blong hem i glad blong givim presen blong sapotem wok blong Kingdom tede, i save putum sam long ol mane we hem i kasem i stap blong mekem olsem.

Jeova i Blesem Olgeta We Oli Ona Long Hem

I tru se, mane mo olting we yumi gat oli no save mekem yumi rij long saed blong speret. Be, sipos yumi rere blong yusum olgeta sas samting blong yumi​—taem, paoa, mo olting blong yumi​—blong ona long Jeova, bambae yumi save kasem plante blesing. Yumi save sua long samting ya, from we God, we olgeta samting oli blong hem, i talem long yumi se: “Sol we i gat gladhat blong givim presen, bambae hem i kam fatfat, mo man we i givim wora fri long narafala man, bambae hem i kasem bakegen wora we i fri.”​—Proveb 11:25.

Afta we King Deved i ded, pikinini boe blong hem Solomon i yusum olgeta presen mane we papa blong hem i bin hivimap, blong bildim wan nambawan haos prea, olsem we Jeova i talem long hem blong mekem. Mo, oltaem we Solomon i stap strong long wosip blong God, “Juda mo Isrel oli stap sefgud, . . . stat long Dan go kasem Bereseba, long olgeta dei blong laef blong Solomon.” (1 King 4:25) Ol haos blong putumgud kakae i stap, oli fulapgud, ol dram blong putum waen long olgeta oli fulap gogo i ronaot​—i stap olsem taem Isrel i gohed blong ‘ona long Jeova wetem ol sas samting blong olgeta.’

Biaen, profet Malakae i talemaot tok blong Jeova, se: “‘Testem mi, plis, long samting ya,’ Jeova blong ol ami i talem, ‘mo bambae yu luk we mi openem doa blong heven blong ol blesing oli kamdaon long yufala mo bambae mi givim olgeta samting ya long yufala gogo yufala i no moa nidim.’” (Malakae 3:​10) Ol man blong Jeova tede, oli rij long saed blong speret, mo hemia i soemaot se God i holem promes ya blong hem.

I sua se, Jeova i haremgud taem hem i luk se yumi joen blong mekem wok blong Kingdom i go moa. (Hibrus 13:15, 16) Mo hem i promes blong givhan long yumi sipos yumi ‘lukaot kingdom blong hem, mo mekem ol stret fasin we hem i wantem fastaem.’ (Matyu 6:​33) Wetem bigfala glad long hat, yumi save ‘ona long Jeova wetem olgeta sas samting blong yumi.’

[Bokis blong pija long pej 28, 29]

Ol Rod We Samfala Oli Folem Blong Givim Presen Mane Blong Sapotem Wok Long Olgeta Ples Blong Wol

Plante man oli makemaot, no mekem plan, blong stret mane we bambae oli putum long bokis blong presen mane, we oli raetem long hem se: “Presen Mane Blong Sapotem Wok Blong Sosaeti Long Ful Wol​—Matyu 24:14.” Evri manis, ol kongregesen oli sanem mane ya i go long hedkwota blong wol long Bruklin, Nyu Yok, no long ofis long kantri blong olgeta.

Yu tu, yu save sanem presen mane i go long ofis blong Sosaeti we i lukaot long kantri blong yu. Ol gol jen mo sas ston mo ol narafala sas samting, yu save givim tu olsem presen. Yu mas sanem wan sotfala leta i go wetem presen ya blong talemaot se yu givim samting ya olsem wan presen nomo.

Presen Mane We Man i Save Kasembak Sipos i Nidim: Man i save givim mane long Wajtaoa Sosaeti blong oli kipim go kasem we man ya i ded, be sipos hem i nidim mane ya, bambae Sosaeti i givimbak long hem. Blong kasem moa save long saed ya, ples raet i go long branj ofis we i lukaot long kantri blong yu.

Plan We Man i Folem Blong Givim Presen

Antap long ol presen mane we man i save givim stret, mo mane we hem i save kasembak sipos i nidim, i gat sam narafala rod blong givim presen we oli save givhan long wok blong Kingdom long olgeta ples blong wol. Sam long olgeta ya hemia:

Insurens: Man i save mekem se Wajtaoa Sosaeti i kasem mane blong wan laef insurens, no mane blong pem yia blong hem taem i ritae long wok, no mane we sam kampani oli givim long ol olfala. Sipos wan man i wantem folem wan plan olsem, hem i mas talemaot long Sosaeti.

Ol Bang Kaon: Man i save mekem se bang i holem mane long kaon blong hem, mane we maet sam narafala oli putum i go stret long kaon blong hem long bang, no mane we hem i kasem taem i ritae, gogo Sosaeti i nidim. Sipos no, hem i save mekem se mane ya i go long Wajtaoa Sosaeti taem hem i ded, folem ol rul blong bang long ples blong hem. Sipos wan man i wantem folem wan plan olsem, hem i mas talemaot long Sosaeti.

Ol Stok mo Bon: Man i save givim stok mo bon oli go fulwan long Wajtaoa Sosaeti olsem presen nomo, no folem wan plan we ol profit blong ol stok mo bon ya oli stap go oltaem long man ya we i givim.

Graon no Haos: Man i save givim graon no haos blong hem i go olsem presen long Wajtaoa Sosaeti, blong oli salem biaen. Sipos no, man i save folem plan se Sosaeti i kasem haos no graon ya taem hem i ded, be man ya i save gohed blong stap long haos ya long fulwan laef blong hem. Man i mas toktok wetem Sosaeti bifo we hem i givim graon no haos blong hem long Sosaeti.

Lastok blong Man Bifo we Hem i Ded mo Plan blong Holem Mane i Stap Kasem Ded: Man i save givim graon no haos no mane blong hem long Wajtaoa Sosaeti taem hem i raetem wan pepa folem loa, we i olsem lastok blong hem bifo we hem i ded. Sipos no, bang i save holem sam mane blong man ya i stap, blong i go long Sosaeti taem man ya i ded. Mane we bang i holem blong givhan long wan skul, maet man ya i no nidim blong pem takis long hem. Man we i wantem se bang i holem mane blong hem i stap blong Sosaeti, hem i mas sanem kopi blong promes ya no lastok blong hem long Sosaeti.

Ol man we oli intres long eniwan long olgeta plan ya blong givim presen, oli mas raetem leta i go long ofis blong Sosaeti we i lukaot long kantri blong yu.