Faelimon Mo Onesimas—Tufala i Joengud Olsem Ol Kristin Brata

WAN long ol leta we tabu speret i pusum aposol Pol blong raetem, i soemaot wan problem we i bin kamaot bitwin tu man, mo problem ya i no isi blong stretem. Wan long tufala ya hem i Faelimon, mo narawan hemia Onesimas. ?Hu ya tufala man ya? ?From wanem Pol i intres long bisnes we i hapen bitwin long tufala?

Man ya Faelimon, we leta blong Pol i go long hem, i laef long Kolosi long Esia Maena. Plante Kristin long ples ya oli no save Pol, be Faelimon i save aposol ya from we hem nao i bin talemaot gud nyus long Faelimon, mo Faelimon i bilif long gud nyus ya. (Kolosi 1:1; 2:1) Pol i singaot hem se man ‘blong wok wetem mi we mi laekem hem tumas.’ Faelimon i soemaot gudfala eksampel long saed blong bilif mo lav. Hem i karem ol man oli go long haos blong hem mo i leftemap tingting blong ol Kristin brata blong hem oltaem. Mo tu, i luk olsem se Faelimon i rij lelebet, from we haos blong hem i bigwan naf blong mekem ol miting blong kongregesena long hem. Samfala man oli talem se, Apia mo Akipas, we Pol i tokbaot long leta blong hem, maet tufala ya i waef mo pikinini boe blong Faelimon. Faelimon i gat wan slef tu, hemia Onesimas.​—Faelimon 1, 2, 5, 7, 19b, 22.

Hem i Ronwe i Go Haed Long Rom

Baebol i no talem from wanem Onesimas i stap long Rom wetem Pol, bitim 1,400 kilomita longwe long prapa ples blong hem. Be hem i stap wetem Pol long Rom, taem Pol i raetem leta i go long Faelimon raonabaot long yia 61 K.T.b Long leta ya, Pol i talem long Faelimon se: “Sipos [Onesimas] i bin mekem i no stret long yu, no i gat kaon blong hem long yu, plis yu putum nem blong mi long hem.” (Faelimon 18) Ol tok ya oli soemaot klia se Onesimas i gat trabol wetem masta blong hem, Faelimon. Taswe, Pol, i raetem leta ya blong traem mekem tufala man ya oli joengud bakegen.

Sam man oli talem se Onesimas i bin ronwe afta we i stilim mane long Faelimon blong pem rod blong hem i go long Rom. Maet hem i bin tingting se, i no gat wan man we i save faenem hem long medel blong bigfala taon ya.c Long laef blong ol man Gris mo Rom bifo, ol slef we oli ronwe oli mekem bigfala trabol long masta blong olgeta mo long gavman tu. Ol man bifo, oli save Rom olsem taon we ol slef we oli ronwe long masta blong olgeta “oli go haed long hem.”

?Olsem wanem Pol i mitim Onesimas? Baebol i no talem. Be, taem Onesimas i stat les long nyufala fasin fri we hem i gat, ating hem i luksave se hem i bin mekem wan samting we i save kasem bigfala trabol from. Long taon blong Rom, wan spesel grup blong polis oli wok blong faenem mo holem olgeta slef we oli ronwe long masta blong olgeta. Samting ya we oli mekem, i moa nogud i bitim enikaen narafala fasin we man i save mekem blong brekem loa. Man ya Gerhard Friedrich, i talem se, “taem oli faenem wan slef we i bin ronwe long masta blong hem, oli bonem wan mak long fes blong hem wetem wan aean we i hot. Plante taem, oli mekem ol slef olsem oli harem nogud tumas long bodi blong olgeta, oli sakem olgeta oli go long ol wael anamol, no oli hangem olgeta long wan pos gogo oli ded, blong mekem se ol narafala slef oli fraet blong ronwe long masta blong olgeta.” Friedrich i talem se, afta we Onesimas i yusum olgeta mane ya we hem i stilim, mo i no faenem wan ples blong haed no wan wok, ating hem i go luk Pol, we hem i bin harem Faelimon i tokbaot. Maet hem i askem long Pol blong haedem hem, mo blong toktok long Faelimon blong traem stretem trabol ya.

Sam man oli tingting se masta blong Onesimas i kros long hem from wan narafala samting, nao Onesimas i minim nomo blong ronwe i go long Pol we i fren blong masta blong hem, from we hem i ting se Pol i save mekem rod blong hem i gat pis wetem masta blong hem bakegen. Sam buk blong histri oli talem se, hemia wan fasin we “plante slef blong bifo oli mekem taem oli kasem trabol.” Wan man blong stadi, we nem blong hem Brian Rapske, i talem se sipos i olsem, ating Onesimas i stilim mane “blong i save mekem trep blong askem long Pol blong toktok long Faelimon, i bitim we hem i stilim mane ya from we hem i plan blong ronwe.”

Pol i Givhan

Nomata wanem risen we i mekem se Onesimas i ronwe, i klia se hem i kam luk Pol blong i givhan long hem blong frengud bakegen wetem masta blong hem we i kros. Samting ya i mekem wan problem long Pol. Slef ya we fastaem hem i no gat bilif, hem i wan man blong brekem loa we i stap haed. ?I stret we aposol Pol i traem halpem Onesimas mo pulum Kristin fren ya blong Faelimon, hem blong no givim strong panis long hem, nating se loa i givim raet long masta blong mekem olsem? ?Wanem samting i stret blong Pol i mekem?

Taem aposol ya i raetem leta i go long Faelimon, slef ya Onesimas i bin stap wetem Pol longtaem lelebet. Taem ya i naf blong Onesimas i kam wan Kristin, from we Pol i tokbaot hem olsem ‘brata blong yumi we mi laekem hem tumas.’ (Kolosi 4:9) Pol i tokbaot gudfala fasin fren we tufala i gat long saed blong speret, i se: “Mi wantem askem wan samting long yu blong Onesimas. Long taem ya we mi stap finis long kalabus, mi mi lidim hem i kam long Kraes, nao hem i olsem pikinini blong mi, we mi mi olsem papa blong hem.” Ating Faelimo i neva tingting se wan samting olsemia bambae i kamaot. Aposol Pol i talem se slef ya we fastaem hem i “no save mekem wan gudfala wok,” bambae i kambak long Faelimon olsem wan Kristin brata. Naoia, Onesimas i save “mekem plante gudfala wok,” no “givhan gud,” olsem mining blong nem blong hem i talem.​—Faelimon 1, 10-12.

Onesimas i bin givhan bigwan long aposol Pol we i kalabus. Yes, ating Pol i wantem holem hem i stap, be samting ya i agensem loa, mo fasin ya i agensem raet we Faelimon i gat tu. (Faelimon 13, 14) Kolosap long sem taem ya, Pol i raetem wan narafala leta i go long kongregesen we i mekem miting long haos blong Faelimon. Long leta ya, Pol i tokbaot Onesimas olsem ‘brata ya blong yumi, we mi mi laekem hem tumas, mo we i stap stanap strong, hem i wan man blong kampani blong yufala.’ Tok ya i soemaot se Onesimas i pruvum finis we narafala i save trastem hem.​—Kolosi 4:​7-9.d

Pol i pulum Faelimon blong welkamem Onesimas wetem kaen fasin. Be Pol i no yusum paoa we hem i gat olsem wan aposol blong givim oda long Faelimon blong mekem olsem, no blong givim oda long hem blong letem slef ya i gofri. No gat. From fasin fren blong Pol wetem Faelimon mo lav we tufala i gat long tufala, Pol i sua se Faelimon bambae i “go moa” i bitim wanem we hem i askem. (Faelimon 21) I no kliagud se ‘go moa’ i minim wanem, from we Faelimon nomo i gat raet blong mekem disisen long wanem bambae hem i mekem long Onesimas. Samfala man oli talem se tok ya blong Pol i wan rod blong askem Faelimon blong sanem slef ya we i ronwe, i ‘kambak long Pol blong i save gohed blong halpem hem olsem we i stat mekem finis.’

?Faelimon i lesin long tok blong Pol long saed blong Onesimas? Yumi save sua se hem i lesin, nating se maet ol narafala man Kolosi, we oli gat ol slef tu, oli no glad. Ating oli glad sipos Faelimon i panisim Onesimas, blong soem long ol slef blong olgeta wanem bambae i hapen sipos oli mekem semfala fasin.

Onesimas i Jenisim Fasin Blong Hem

Nomata se i olsem wanem, Onesimas i jenisim fasin blong hem finis taem hem i gobak long Kolosi. From we paoa blong gud nyus i jenisim tingting blong hem, i klia se hem i kam wan man we i stanap strong long bilif blong hem, long Kristin kongregesen long taon ya. Baebol i no talem sipos Faelimon i letem Onesimas i gofri biaen. Be, long saed blong speret, slef ya we i bin ronwe long masta blong hem, i kam wan fri man finis. (Skelem wetem 1 Korin 7:​22.) Tede tu, i gat sam man we oli jenisim fasin blong olgeta. Taem oli mekem ol rul blong Baebol oli wok long laef blong olgeta, laef mo fasin blong olgeta i jenis. Ol man we bifo oli no save mekem wan gudfala samting nating blong givhan long ples blong olgeta, oli kasem help blong kam ol gudfala manples we oli gat gudfala fasin.e

!Fasin blong folem trufala bilif i rili mekem bigfala jenis i kamtru long Onesimas! Fastaem, hem i “no save mekem wan gudfala wok” Faelimon. blong Be, biaen hem i rili mekem laef blong hem i laenap wetem mining blong nem blong hem, olsem wan man we i “mekem plante gudfala wok.” Mo i wan blesing we Faelimon mo Onesimas i joengud olsem ol Kristin brata.

[Ol futnot]

[Bokis blong pija long pej 30]

Ol Slef Aninit Long Loa Blong Rom

Aninit long loa we ol man oli stap folem long Rom long faswan handred yia K.T., masta i save mekem eni samting we hem i wantem long slef blong hem, enikaen samting we i kam long tingting blong hem, enikaen samting blong haremgud long filing blong hem, no i save lego kros blong hem long slef ya. Man ya we i tokbaot fasin ya blong bifo, Gerhard Friedrich, i talem se, “long tingting blong ol man mo long saed blong loa tu, slef i no wan man, be hem i wan samting nomo we masta blong hem i save yusum olsem hem i wantem. Oli tingbaot [hem] long sem fasin we oli tingbaot ol anamol mo tul, mo i no gat wan loa we i givhan long ol slef.” Wan slef i no gat raet blong go long kot blong talemaot ol nogud fasin we masta i mekem long hem. Hem i mas obei nomo long ol oda blong masta blong hem. Wan masta i save givim panis bitim mak long slef we i mekem hem i kros, mo slef ya i no gat wan rod nating blong blokem hem. Sipos slef i mekem wan smol mastik nomo, be masta ya i gat raet blong mekem disisen sipos slef ya i mas ded no i save gohed blong laef.*

Plante taem, ol rijman oli gat plante handred slef, be ol man we oli no rij tumas oli gat tu no tri slef. Man we i stadi long saed ya, John Barclay, i talem se: “Ol slef we oli wok long haos oli mekem ol defdefren kaen wok. I gat sam slef we oli welkamem man long doa blong haos, sam oli kuk, oli putum kakae long tebel, oli klinim haos, oli karem mesej, oli lukaot long pikinini, givim titi long bebi we mama blong hem i no gat melek, mo oli lukaot long klos blong masta blong olgeta. Antap long olgeta ya, i gat ol narafala slef we oli tren from wan spesel wok we i hae long ol bigbigfala haos blong ol rijman. Tru tumas, laef blong wan slef, se i gud no i rabis, i dipen bigwan long fasin blong masta blong hem. Sipos masta ya i raf mo i nogud, bambae ol slef blong hem oli safa oltaem, be sipos masta i kaengud mo i glad blong givim presen wetem gladhat, ating laef blong ol slef blong hem i gud lelebet, mo tingting blong olgeta i no slak. I gat plante store buk blong bifo we oli soemaot raf fasin blong ol masta long ol slef blong olgeta. Be tu, i gat plante hanraet we oli soemaot kaengud fasin mo filing we sam masta oli gat long ol slef blong olgeta.”

*Blong save moa long saed blong fasin we ol man blong God bifo oli mekem long ol slef, lukluk Insight on the Scriptures, we Watchtower Bible and Tract Society blong Nyu Yok, Inc., i wokem, Buk 2, pej 977 kasem 979.