?From Wanem Yumi Mas Talem Tangkyu?

DOKTA i katem bak blong Harley, mo from samting ya, hem i no moa save wok long ol mesin, ale hem i go wok long wan ofis. Taem oli askem long hem se hem i tingting olsem wanem long nyufala wok ya, hem i talem se: “Mi mi harem nogud we mi no moa wok long ol mesin. Be mi talem stret se, mi glad moa long nyufala wok ya i bitim wok we mi mekem bifo.”

Harley i talem wan risen blong glad ya, i se: “Fasin blong ol man we mi wok wetem olgeta i defren long ol man we mi bin wok wetem olgeta bifo. Bos mo ol narafala man we oli wok wetem mi, oli laekem wok we mi mekem mo oli presem mi from. Samting ya i mekem mi mi haremgud tumas.” Harley i harem se wok blong hem i impoten mo oli nidim hem, ale hem i hapi long wok ya.

Ol tok blong presem no talem tangkyu long wan man from gudfala wok blong hem, oli rili save mekem hem i haremgud. Fasin blong no gat tangkyu i mekem samting we i defren olgeta. Shakespeare i tokbaot fasin ya olsem wan win we i kolkol, i se: “Blu, blu, yu win blong koltaem, fasin blong yu i kaengud moa i bitim man we i no gat tangkyu.” Sore tumas, plante man oli bin mekem narafala i harem nogud tumas from fasin ya blong no soem tangkyu.

Blokem Fasin Blong No Gat Tangkyu

Long taem blong yumi, i no gat plante man we oli talem tangkyu wetem fulhat blong olgeta. Wan man blong raetem ol buk i givim wan eksampel, i se: “Sipos woman we bambae i mared i faenem taem blong raetem wan smol leta long bitim 200 man, blong singaotem olgeta oli kam long mared blong hem, ?from wanem hem i no save faenem taem blong raetem smol tok blong talem tangkyu from ol 163 presen we hem i kasem?” Plante man oli no stap talem smol tok ya “tangkyu.” Tingting ya, ‘mi fastaem,’ i stap tekem ples blong fasin tangkyu. Fasin ya we man i tingbaot hem wan fastaem i wan fasin we i makemaot ol las dei. Aposol Pol i givim woning ya se: “Yufala i mas luksave se ol las dei bambae oli fulap long denja. Bambae ol man oli tingbaot olgeta nomo . . . Bambae oli no gat tangkyu nating.”​—2 Timote 3:1, 2, Filips.

Samfala oli tok swit i bitim we oli talem tangkyu. Trufala fasin tangkyu i kamaot long hat, mo man we i soem fasin ya i no mekem olsem blong kasem wan samting blong hem wan. Be, plante taem, tok swit i no kamaot long hat mo i bitim mak. Mo maet tingting we i pusum man blong tok swit, hemia se hem i stap traem blong pulum narafala blong givim wan wok long hem we i hae moa, no blong mekem i gud long hem long wan narafala rod. (Jud 16) Ol naesfala tok olsem i blong trikim man, mo antap long samting ya, i soemaot fasin flas mo tingting we i antap tumas. ?Taswe, hu i wantem se narafala i trikim hem wetem ol swit tok we i no kamaot long hat? I no gat wan man we i wantem samting ya. Be, trufala fasin tangkyu i rili mekem man i haremgud.

Man we i soem fasin tangkyu, i mekem i gud long hem wan bakegen. Gudfala filing we hem i kasem from fasin tangkyu we i stap long hat blong hem, i mekem se hem i hapi mo i gat pis. (Lukluk Proveb 15:13, 15.) Mo tu, from we fasin tangkyu i wan gudfala fasin, hem i givhan long man blong blokem ol nogud filing olsem kros, jelas, mo fasin agens.

“Yufala i Mas Stap Talem Tangkyu”

Baebol i talem se yumi mas wokem fasin tangkyu. Pol i raetem se: “Long olgeta samting we oli stap kamtru long yufala, yufala i mas stap talem tangkyu long God. From we God i wantem we yufala ya we i stap joen long Jisas Kraes, bambae yufala i stap mekem olsem.” (1 Tesalonaeka 5:18) Mo Pol i givim advaes ya long ol man Kolosi se: “Yufala i mas letem pis ya we Kraes i stap givim long yufala i holem tingting blong yufala, i lidim yufala long rod blong Kraes . . . Mo oltaem yufala i mas stap talem tangkyu.” (Kolosi 3:15) Long plante Sam, i gat ol tok blong talem tangkyu. Samting ya i soemaot se trufala tangkyu i wan fasin blong God. (Ol Sam 27:4; 75:1) I klia se Jeova God i glad tumas taem yumi soem tangkyu long saed blong ol smosmol samting evri dei long laef blong yumi.

?Be wanem sam samting we oli mekem i had blong wokem fasin tangkyu, long wol ya we i no gat tangkyu long hem? ?Olsem wanem yumi save soem fasin tangkyu evri dei? Haf we i kam biaen bambae i tokbaot ol kwestin ya.