Yumi Mas Gat Tangkyu From Ol Kristin Miting
“I gud yumi stap tingbaot yumi, blong yumi givgivhan long yumi blong mekem yumi strong blong laekem ol man, mo blong mekem ol gudfala fasin. I nogud yumi lego ol miting blong [kongregesen].”—HIBRUS 10:24, 25.
1, 2. (a) ?From wanem fasin blong joen wanples wetem ol trufala Kristin i wan blesing? (b) ?Long wanem fasin Jisas i stap wetem ol man blong hem long ol miting?
HEM i rili wan nambawan blesing blong joen wanples wetem ol narafala Kristin man. Nating se i gat ten man nomo long miting no plante taosen man blong wosipim Jeova, yumi glad, from we Jisas i talem se: “Taem tu tri man oli joen wanples long nem blong mi, mi mi stap long medel blong olgeta.” (Matyu 18:20) I tru se, taem Jisas i mekem promes ya, hem i stap tokbaot sam impoten bisnes we ol man blong lukaot long kongregesena oli mas jajem mo stretem long gudfala fasin. (Matyu 18:15-19) Be, ?yumi save talem se ol tok ya blong Jisas oli stret long ol Kristin miting tu, we oli stat mo finis wetem wan prea long nem blong hem? Yes. Rimemba se, taem Jisas i givim wok blong mekem disaepol long ol man blong hem, hem i promes se: “Yufala i mas save, bambae mi mi stap wetem yufala oltaem, gogo wol ya i finis.”—Matyu 28:20.
2 I sua se Hed blong Kristin kongregesen, Masta Jisas Kraes, i intres bigwan long ol miting we ol trufala man blong hem oli mekem. Mo tu, yumi save sua se hem i stap wetem olgeta tru long tabu speret blong God. (Ol Wok 2:33; Revelesen 5:6) Jeova God tu, hem i intres long ol miting we yumi mekem. Bigfala risen blong mekem ol miting ya, i blong presem God ‘long kampani blong ol man blong hem.’ (Ol Sam 26:12) Taem yumi kam long ol miting blong kongregesen, hemia i soemaot lav blong yumi long God.
3. ?Wanem ol impoten risen we oli mekem se yumi gat tangkyu from ol Kristin miting?
3 I gat sam narafala gudfala risen blong gat tangkyu from ol Kristin miting. Bifo we Jisas Kraes i lego wol ya, hem i putumap ol disaepol we tabu speret i bin makemaot olgeta, blong oli wok olsem ‘slef we i stret mo waes.’ Oli mas givim kakae long saed blong speret long ol man blong hem, long stret taem. (Matyu 24:45) Wan impoten rod we oli yusum blong givimaot ol kakae ya long saed blong speret, hemia ol miting blong kongregesen mo ol asembli. Masta Jisas Kraes i lidim slef ya we i stret, blong givimaot ol impoten save long ol miting olsem, blong givhan long olgeta man we oli wantem laef tru long en blong rabis wol ya, mo go insaed long nyufala wol blong God we i fulap long stret fasin.
4. ?Baebol i tokbaot wanem ‘fasin’ we i olsem wan denja long yumi, mo wanem i save givhan long yumi blong stap longwe long fasin ya?
4 Taswe, olgeta Kristin oli mas lukaotgud blong no stat folem fasin we aposol Pol i tokbaot olsem wan denja. Pol i talem se: “I gud yumi stap tingbaot yumi, blong yumi givgivhan long yumi blong mekem yumi strong blong laekem ol man, mo blong mekem ol gudfala fasin. I nogud yumi lego ol miting blong [kongregesen], olsem we sam long yumi oli mekem finis. Oltaem yumi mas stap toktok long yumi blong mekem tingting blong yumi i kam strong moa, from we yufala i luk we Dei ya we Masta blong yumi bambae i jajem olgeta man, hem i kam kolosap finis.” (Hibrus 10:24, 25) Taem yumi tingting dip long blesing we yumi gat blong joen long ol Kristin miting mo olsem wanem oli givhan long yumi, samting ya i save halpem yumi blong stap strong oltaem blong sapotem ol miting ya wetem fulhat blong yumi.
Ol Miting We Oli Mekem Yumi Kam Strong Moa
5. (a) ?Ol tok we yumi talem long ol miting oli mas mekem wanem? (b) ?From wanem yumi no mas slou blong singaot ol man we oli intres long trutok blong oli kam long miting?
5 From we ol Kristin oli prea blong askem se tabu speret blong Jeova i stap long ol Kristin miting, olgeta wanwan we oli joen long miting ya oli mas traehad blong wok wetem speret ya mo ‘no mekem tabu speret blong God i harem nogud.’ (Efesas 4:30) Taem aposol Pol i raetemdaon ol tok ya we i kamaot long God, hem i stap tokbaot stret fasin blong toktok. Oltaem ol tok we yumi talem i mas “mekem ol man we oli slak oli kam strong moa. Tok olsem i save givhan moa long ol man we oli harem.” (Efesas 4:29) Samting ya i impoten moa long ol Kristin miting. Long leta we Pol i raetem long ol Kristin long Korin, hem i soemaot se i impoten tumas we ol miting oli mekem yumi kam strong moa, tijim, mo leftemap tingting blong yumi. (1 Korin 14:5, 12, 19, 26, 31) Olgeta man we oli joen long ol miting ya oli save kasem gudfala samting from. Ol nyuwan tu, maet oli luksave se: “Tru, God i stap long medel blong yufala long ples ya.” (1 Korin 14:25) From samting ya, yumi no mas slou blong singaot ol man we oli intres long trutok, blong joen wetem yumi long ol miting, from we ol miting bambae oli givhan long olgeta blong gru kwik long saed blong speret.
6. ?Wanem sam samting we yumi save mekem long ol miting blong givhan long ol narafala blong kam strong moa?
6 Olgeta we oli givim ol tok long Kristin miting, ansarem sam kwestin long fored blong ol man, no mekem sam pleplei, oli mas meksua se tok we oli talem i mekem narafala i strong, mo i laenap wetem Tok blong God, Baebol. Antap long fasin blong talem ol tok we i tru, yumi mas soemaot ol dip filing we oli laenap wetem ol nambawan fasin mo lav blong God mo Kraes. Sipos olgeta man we oli givim ol tok long miting oli traehad blong soemaot ‘ol frut blong tabu speret,’ olsem glad, longfala tingting, mo bilif, ale, yumi save sua se miting bambae i mekem evriwan oli kam strong moa.—Galesia 5:22, 23.
7. ?Olsem wanem olgeta evriwan we oli joen long miting oli save givhan blong mekem ol narafala oli kam strong moa?
7 Nating se samfala nomo oli givim ol tok long miting blong kongregesen, be yumi evriwan i save givhan blong mekem se ol miting oli mekem yumi kam strong moa. Plante taem, ol man we oli stap lesin oli gat jans blong ansarem sam kwestin. Hemia ol taem we yumi save talemaot bilif blong yumi long fes blong ol narafala. (Rom 10:9) Yumi neva mas yusum taem ya olsem wan jans blong talemaot prapa tingting blong yumi, tokflas from sam wok we yumi bin mekem, no tok agensem wan narafala Kristin brata no sista. Ol fasin olsem oli save mekem tabu speret blong God i harem nogud. Sipos yumi gat wan smol problem wetem wan Kristin brata no sista, i moagud blong stretem bisnes ya yumi wan wetem hem nomo, mo yumi mekem wetem lav. Baebol i talem se: “Yufala i mas wokem i gud long yufala, yufala i mas gat gladhat long yufala. Mo yufala i mas fogivim yufala, olsem we God i fogivim yufala finis, we yufala i joen long Kraes.” (Efesas 4:32) !Ol Kristin miting oli givim nambawan jans long yumi blong mekem advaes ya i wok long laef blong yumi! Blong mekem olsem, plante brata sista oli kam eli long miting mo oli stap smoltaem biaen tu. Samting ya i halpem ol nyuwan tu, we olgeta oli rili nidim blong haremsave se oli welkam. Taswe, olgeta Kristin we oli givim laef blong olgeta i go long God finis, oli mas joen long wok ya blong mekem se ol miting oli givhan long yumi blong kam strong moa. Olgeta evriwan oli mas ‘givgivhan long olgeta mo mekem oli strong blong laekem ol man mo mekem ol gudfala wok.’
Reregud
8. (a) ?Wanem bigfala fasin traehad we samfala oli mekem blong kam long ol miting? (b) ?Wanem eksampel we Jeova i soemaot olsem wan man blong lukaot long sipsip?
8 Maet i isi long samfala blong kam long ol Kristin miting. Be, long samfala, i rili hadwok blong kam evritaem long ol miting. Olsem ol Kristin mama we oli mas wok fultaem blong pem ol samting we famle blong olgeta i nidim. Oli taed taem oli kambak long haos. Antap long samting ya, oli mas kukum kakae mo mekem ol pikinini oli rere blong go long miting. Sam narafala Kristin, oli mas wokbaot longwe blong go long miting, no maet oli sik no oli olfala. I sua se, Jeova God i kasem save long hadtaem we wanwan long olgeta ya oli gat blong kam long ol miting evri wik. Jeova i olsem wan man blong lukaot long sipsip wetem lav, taswe hem i kasem save long spesel nid we ol wanwan sipsip blong hem oli gat. Baebol i talem se: “Olsem wan man blong lukaot long sipsip, [Jeova] i stap lukaot long ol man blong hem. Wetem han blong hem, hem i hivimap ol smol sipsip blong hem, mo hem i holem olgeta kolosap long hem. Bambae hem i lukaotgud long olgeta we oli gat pikinini we oli stap titi.”—Aesea 40:11.
9, 10. ?Olsem wanem yumi save kasem fulwan ol gudfala samting long ol miting?
9 Olgeta we oli hadwok oltaem blong kam long ol miting, maet oli gat smoltaem nomo blong mekemrere ol haf blong miting. Be, sipos yumi traehad blong folem program blong Baebol riding evri wik, bambae yumi kasem plante moa gudfala samting long Tiokratik Skul. Long sem fasin, sipos yumi rerem ol narafala miting, olsem Wajtaoa Stadi mo Buk Stadi, bambae yumi kasem plante moa gudfala samting from olgeta. Sipos olgeta we oli gat fulap wok long famle oli save ridim fastaem ol save we bambae oli stadi long hem long miting, mo ridim sam vas blong Baebol we oli stap insaed, bambae oli glad moa blong joen fulwan mo givim ansa long ol impoten miting ya we oli stanap long Baebol.
10 Sam narafala we oli no gat plante tumas wok long famle, maet oli save spenem moa taem blong rerem miting blong olgeta. Eksampel, maet oli save stadi moa long ol vas we ol tok blong olgeta i no stap fulwan long buk blong stadi, blong traem faenem moa save long saed ya. Long rod ya, yumi evriwan i reregud blong kasem plante gudfala samting from ol miting, mo blong givim ol gudfala tok mo ansa we oli mekem evriwan long kongregesen oli kam strong moa. Sipos ol elda mo ol man blong givhan oli reregud, oli save givim ol ansa we oli sot mo kliagud, mo long rod ya, oli soemaot gudfala eksampel long ol narafala. Sipos yumi gat respek long ol rod we Jeova i yusum blong givhan long yumi, bambae yumi no mekem noes no blokem ol man raonabaot long yumi blong lesingud long miting.—1 Pita 5:3.
11. ?From wanem yumi nidim blong mekem i strong long yumi wan blong yumi save reregud from ol miting?
11 Ol pleplei we oli no givhan nating blong mekem yumi kam strong moa long saed blong speret, maet oli stap tekem tumas taem blong yumi. Sipos i olsem, yumi nidim blong skelem fasin blong yumi, mo “no mekem i krangke” long saed blong fasin blong yusum taem blong yumi. (Efesas 5:17) Fasin we yumi wantem kasem, hemia blong ‘pemaot taem’ we yumi stap spenem long ol samting we oli no impoten tumas, mo yusum taem ya long prapa Baebol stadi blong yumi, mo blong rerem ol miting, mo long wok blong Kingdom tu. (Efesas 5:16) I tru se, i no isi blong mekem samting ya, mo maet yumi nidim blong strong long yumi wan. Ol yangfala we oli traehad blong yusumgud taem blong olgeta, oli stap wokem wan gudfala faondesen naoia blong kam bigman long saed blong speret long fyuja. Pol i raetem leta i go long yangfala fren blong hem Timote, i se: “Yu mas putum tingting blong yu i stap strong blong mekem olgeta samting ya [ol advaes we Pol i givim long Timote], blong bambae olgeta man oli save luk we yu stap gohed moa.”—1 Timote 4:15.
Sam Eksampel Long Baebol
12. ?Wanem nambawan eksampel we famle blong Samuel i soemaot?
12 Tingbaot gudfala eksampel we famle blong Samuel i soemaot. Taem haos tapolen blong God i stap long Silo, famle ya i joen oltaem long ol miting wetem ol narafala man blong wosip. Oda ya blong go long haos tapolen long taem blong ol spesel lafet evri yia, i go long ol man nomo. Be papa blong Samuel, Elkana, i tekem ful famle blong hem i go, taem hem i “aot long taon blong hem evri yia blong go bodaon mo mekem sakrifaes long Jeova blong ol ami, long Silo.” (1 Samuel 1:3-5) Taon we Samuel i stap long hem, hemia Ramataim-sofim. Ating hem i taon we tede oli kolem Rentis, we i stap kolosap long “ol hil blong Efrem,” i no longwe long solwora. (1 Samuel 1:1) Taswe, blong mekem trep i go kasem Silo, hem i mas wokbaot 30 kilomita. Long taem bifo, hemia wan longfala trep. Hemia nao samting we famle blong Elkana i strong blong mekem “evri yia, long evritaem we [oli] go long haos blong Jeova.”—1 Samuel 1:7.
13. ?Ol man Jyu long taem blong Jisas we oli gat strong bilif, oli soemaot wanem eksampel?
13 Jisas tu i gruap long wan bigfala famle. Evri yia, famle blong hem i aot long Nasaret, i wokbaot i go 100 kilomita long saot, blong mekem lafet blong Pasova long Jerusalem. Blong go kasem ples ya, i gat tu defren rod we oli save folem. Hemia we i sot moa, i godaon long Flatples blong Megido nao i klaem i go 600 mita antap, we i pastru long ples blong ol man Sameria mo i go kasem Jerusalem. Narafala rod we plante man oli yusum, hemia rod we Jisas i bin pas long hem long laswan trep we hem i mekem long Jerusalem long 33 K.T. Hem i godaon long Flatples blong Jodan Reva we i daon moa long level blong solwora, nao i wokbaot gogo i kasem ‘ples we i makem en blong kantri blong Judia . . . long narasaed Jodan Reva i go.’ (Mak 10:1) Long ples ya, hem i wokbaot samwe 30 kilomita moa blong ‘kasem Jerusalem,’ folem rod we i pas antap long wan hil we i hae olsem 1,100 mita. (Mak 10:32) Oltaem, fulap man we oli gat strong tingting blong joen long ol impoten lafet ya, oli mekem strongfala trep ya i stat long Galili go kasem Jerusalem. (Luk 2:44) Hemia wan nambawan eksampel long ol man blong Jeova tede, we oli stap long ol rij kantri. I no hadwok long plante blong olgeta blong kam long ol Kristin miting, from we oli gat gudfala trak mo ol narafala samting we ol man oli wokem long taem blong yumi.
14, 15. (a) ?Ana i soemaot wanem eksampel? (b) ?Yumi save lanem wanem from gudfala fasin blong samfala we oli jes stat blong kam long ol miting?
14 Wan narafala eksampel, hemia wido woman ya Ana we i gat 84 yia. Baebol i talem se “oltaem nomo, hem i stap long haos blong God.” (Luk 2:37) Mo tu, Ana i soem intres mo lav long ol narafala. Taem hem i luk bebi Jisas mo i harem se hemia Mesaea we God i promes blong sanem i kam, ?hem i mekem wanem? Hem i talem tangkyu long God mo i stat “tokbaot pikinini ya long olgeta we oli stap wet blong Mesaea bambae i mekem Jerusalem i fri bakegen.” (Luk 2:38) !Hemia i rili wan nambawan fasin, wan gudfala eksampel long olgeta Kristin tede!
15 Yes, fasin blong kam mo joen long ol Kristin miting, i mas wan samting we yumi glad tumas blong mekem. Olsem Ana, yumi no mas wantem blong mestem olgeta. Plante nyuwan oli gat filing ya. From we oli kamaot long tudak blong wol ya mo oli kam long nambawan laet blong God, oli wantem lanem evri samting we oli save lanem, taswe plante blong olgeta oli soemaot bigfala glad blong kam long ol Kristin miting. Be, olgeta we oli stap longtaem finis long trutok, maet oli mas lukaot blong no stat blong ‘lego lav we oli gat fastaem.’ (Revelesen 2:4) Maet bigfala sik no sam narafala problem we yumi no save blokem, oli mekem se yumi mestem miting sam samtaem. Be yumi neva mas letem fasin blong ronem ol sas samting blong wol, ol pleplei, no fasin les, i mekem se yumi no reregud, yumi no lesingud mo joen fulwan long miting, no yumi mestem miting.—Luk 8:14.
Beswan Eksampel
16, 17. (a) ?Wanem tingting blong Jisas long ol miting long saed blong speret? (b) ?Wanem gudfala fasin we olgeta Kristin oli mas traem blong folem oltaem?
16 Jisas i soemaot nambawan eksampel long saed blong fasin tangkyu from ol miting long saed blong speret. Taem hem i gat 12 yia nomo, hem i soemaot se hem i laekem tumas haos blong God long Jerusalem. Papa mama blong hem i no save faenem hem, be biaen, tufala i faenem hem long haos prea. Hem i stap tokbaot Tok blong God wetem ol tija long ples ya. Wetem respek, Jisas i ansa long papa mama blong hem we tufala i wari tumas, i se: “?Yutufala i no save se mi mi mas stap long haos blong Papa blong mi?” (Luk 2:49) Wetem fasin obei, Jisas i gobak long Nasaret wetem papa mama blong hem. Long ples ya, hem i gohed blong soem se hem i laekem tumas ol miting blong wosip, taem hem i go oltaem long haos blong prea. Taswe, taem hem i statem wok blong hem blong prij, Baebol i talem se: “Jisas i kam long Nasaret, ples ya we bifo hem i bin gruap long hem. Nao long Sabat dei, hem i go insaed long haos blong prea, olsem we i stap mekem oltaem. Nao hem i stanap blong ridim Baebol.” Afta we Jisas i ridim mo i eksplenem Aesea 61:1, 2, ol man we oli stap lesin long hem oli “glad tumas long ol tok blong hem, mo oli sapraes tu from we tok blong hem i gud tumas.”—Luk 4:16, 22.
17 Ol Kristin miting tede, oli folem semfala stampa fasin. Afta we miting i stat wetem wan singsing blong presem God mo wan prea, yumi ridim sam vas blong Baebol (no sam vas we oli stap long ol buk we yumi stadi long hem), mo yumi eksplenem olgeta. Ol trufala Kristin oli mas folem gudfala fasin we Jisas Kraes i stap folem oltaem. Oli haremgud tumas blong joen oltaem long ol Kristin miting, olsem we oli naf blong mekem.
Sam Eksampel Long Taem Blong Yumi
18, 19. ?Wanem gudfala eksampel we ol brata long ol pua kantri oli soemaot long saed blong ol miting mo asembli?
18 Long ol pua kantri blong wol, plante Kristin brata mo sista blong yumi oli soemaot wan gudfala eksampel long saed blong fasin tangkyu from ol Kristin miting. Blong joen long wan asembli long Mosambik, wan distrik elda, Orlando, mo waef blong hem, Amélia, oli tekem 45 haoa blong wokbaot 90 kilomita, we oli klaem antap long wan bigfala hil. Biaen, tufala i mekem semfala wokbaot ya i gobak, blong joen long wan narafala asembli. Orlando i talem wetem tingting daon se: “Mitufala i harem olsem se mitufala i no mekem wan bigfala samting nating, taem mitufala i mitim ol brata blong kongregesen blong Bawa. Blong kam long asembli ya mo gobak, olgeta ya oli wokbaot 400 kilomita long leg nomo, we i tekem sikis dei. !Wan long olgeta, hem i wan brata we i gat 60 yia finis!”
19 ?Olsem wanem samfala oli soem tangkyu from ol miting we kongregesen i gat evri wik? Kashwashwa Njamba i wan sista we i gat 70 yia mo bodi blong hem i no strong. Hem i blong smol velej ya Kaisososi, we i stap raonabaot 5 kilomita longwe long Haos Kingdom long Rundu, Namibia. Blong kam long ol miting mo gobak, hem i stap wokbaot 10 kilomita tru long bus. Nating se ol stilman oli bin kilim sam man we oli pas long rod ya, be Kashwashwa i stap kam long evri miting. Bighaf blong ol miting ya oli stap long ol lanwis we hem i no kasem save long olgeta. Taswe, ?olsem wanem ol miting ya oli givhan long hem? Kashwashwa i talem se: “Mi jekem ol vas we brata i yusum long tok blong hem, ale, mi traem faenemaot se hem i stap tokbaot wanem.” Be, sista ya i no save rid, taswe ?olsem wanem hem i save jekem ol vas ya? Hem i ansa se: “Mi lesingud blong kasem ol vas we mi mi save baehat.” Yes, long ol yia we oli pas, sista ya i lanem plante vas baehat. Blong mekem se hem i kamgud moa long fasin blong yusum Baebol, hem i joen long wan klas we kongregesen i gat blong tijim ol man blong rid. Sista ya i talem se: “Mi mi laekem tumas blong kam long ol miting. I gat nyufala samting blong lanem oltaem. Mi laekem tumas blong joen wetem ol brata mo sista. Nating se mi mi no save toktok wetem olgeta evriwan, be oltaem oli kam talem halo long mi. Mo samting we i impoten moa, hemia se, taem mi kam long olgeta miting, mi save se mi stap mekem hat blong Jeova i glad.”
20. ?From wanem yumi no mas lego ol Kristin miting?
20 I gud tumas we, plante milyan man we oli wosipim Jeova long olgeta ples blong wol, oli olsem Kashwashwa, we oli soemaot fasin tangkyu from ol Kristin miting. Wol blong Setan i stap go blong lus nao, taswe i impoten tumas we yumi no sakemaot fasin blong joen wanples. Defren olgeta, yumi mas stap wekap long saed blong speret mo soem bigfala tangkyu from ol miting mo asembli. Samting ya bambae i mekem hat blong Jeova i glad. Antap long hemia, bambae yumi kasem ol rij blesing, taem yumi gohed blong kasem tijing blong God we i save lidim yumi long laef we i no save finis.—Proveb 27:11; Aesea 48:17, 18; Mak 13:35-37.
[Futnot]
a Wan grup blong man we oli joen wanples blong wosip.
Ol Kwestin Blong Tingtingbak
◻ ?From wanem yumi save talem se i wan blesing blong kam long ol Kristin miting?
◻ ?Olsem wanem olgeta evriwan long miting oli save joen blong mekem se miting ya i givhan long yumi blong kam strong moa?
◻ ?Wanem nambawan eksampel we Jisas Kraes i soemaot?
◻ ?Yumi save lanem wanem from ol brata we oli stap long ol pua kantri?
[Bokis blong pija long pej 17]
Oli Gat Tangkyu From Ol Miting Evri Wik
Plante milyan man oli stap long ol bigfala taon we oli fulap long fasin pua mo fasin blong brekem loa. Nating se i olsem, i gud tumas we ol trufala Kristin long ol ples ya oli soemaot fasin tangkyu from ol Kristin miting. Wan elda blong wan kongregesen long Soweto, long Gauteng, Saot Afrika, i talem se: “Long kongregesen ya we i gat 60 Wetnes mo pablisa we oli no baptaes yet, samwe 70 no 80 man, mo samtaem moa, oli kam long ol miting. Nating se ol brata mo sista oli no wokbaot longwe blong kam long ol miting ya, be laef long eria ya blong Soweto hem i rili raf. Taem wan brata i stap wokbaot i kam long miting, wan man i stikim hem long bak wetem naef. Tu sista oli kasem trabol taem sam man oli holem tufala blong stilim mane blong tufala. Be samting ya i no blokem olgeta blong kam long miting. Long Sande, afta we mifala i finisim miting wetem prea, mifala i tekem smoltaem blong lanem ol singsing blong Kingdom. Kolosap 95 pesen blong olgeta we oli kam long miting, oli stap oltaem blong singim ol singsing we bambae mifala i mekem long ol miting long wik we i kam biaen. Samting ya i halpem ol nyuwan blong lanem ol singsing mo joen wetem mifala blong singim olgeta.”
Ol man we oli stap afsaed long taon, oli gat sam narafala traem blong winim, olsem longfala wokbaot blong kam long ol miting tri taem long wan wik. Wan hasban mo woman blong hem we tufala i intres long trutok, oli stap 15 kilomita longwe long Haos Kingdom blong Lobatse, Botswana. Long yia we i pas, tufala i kam oltaem long miting wetem tu pikinini blong tufala. Hasban i mekem wok blong fiksimap sus blong winim mane blong famle blong hem. Waef i salem ol smosmol samting blong winim smol mane antap, blong pem bas blong go mo kambak long ol miting.
Wan naet long hot taem we i jes pas, afta long wan miting wetem seket elda, smol famle ya i stanap i stap long bas stop long 9 klok long naet. Ol bas oli no moa mekem sevis from rabis weta. Nao wan polis i stop wetem trak blong hem, mo i askem famle ya se oli stap mekem wanem. Taem hem i harem wanem i hapen, hem i sore long olgeta, nao i karem olgeta oli go 15 kilomita ya go kasem haos blong olgeta. Waef i wan pablisa we i no baptaes yet, ale hem i talem long hasban blong hem se: “Yu luk, sipos yumi putum ol miting fastaem, Jeova bambae i lukaot long ol samting we yumi nidim.” Naoia, hasban i talem se hem tu i wantem stat long wok blong talemaot gud nyus.
[Tok blong pija long pej 18]
Ol Wetnes olsem olgeta ya long Romania oli soemaot gudfala eksampel blong fasin tangkyu from ol Kristin miting