“I Gat Paoa Mo i Save Pulum Man Blong Bilif”

WAN Wetnes blong Jeova long Franis i raetem se: “Stat tumora, bambae mi yusum buk ya long wok blong prij, from we ol pruf we hem i givim i gat paoa mo i save pulum man blong bilif.” Wan narafala Wetnes long Yunaeted Stet i raetem se: “Taem mi kasem buk ya, mi ridim wantaem nomo, mo mi wantem tumas blong yusum long wok blong prij, from we mifala i mitim plante man we oli no intres mo we oli no trastem Baebol nating.” ?Oli stap tokbaot wanem buk ya? Hemia buk ya blong 32 pej, nem blong hem, A Book for All People. Watch Tower Sosaeti i soemaot nyufala buk ya long olgeta Distrik Asembli blong 1997, nem blong olgeta, “Bilif Long Tok Blong God.”

Taem Sosaeti i wokem buk ya, tingting blong hem i stap long wan kaen man​—hemia ol man we oli kasem hae edukesen be maet oli no gat fulap save long saed blong Baebol. Plante man olsem oli gat strong tingting agensem Baebol, nating se oli neva ridim Baebol. Buk ya i blong pulum ol man blong luksave se Baebol i wan gudfala buk we oli nidim blong stadi long hem. Buk ya i no fosem man blong agri long tingting ya se Baebol i kamaot long God. No gat. Be, hem i makemaot ol trufala samting long saed blong Baebol. Buk ya i no yusum ol bigfala wod, be ol tok blong hem oli kliagud mo oli go stret long mak.

Olsem ol tok long stat blong haf ya oli soemaot, ol man we oli stap long ol asembli ya oli wantem tumas blong yusum buk ya long wok blong prij. Wan eksampel, long Franis, ol Wetnes oli mekem plan blong tu spesel dei blong prij long Ogis 23 mo 24, taem ya we plante handred taosen yangfala blong olgeta ples long wol oli kam long Paris blong joen long Wol Yut Dei. Raonabaot 2,500 Wetnes (we bighaf blong olgeta oli gat 16 kasem 30 yia) oli seremaot 18,000 buk long lanwis Engglis, Franis, Jemani, Itali, Polan, mo Spen.

Yes, yumi mas tekem olgeta jans blong yusum buk ya A Book for All People, long wok blong prij. Yumi hop se bambae hem i givhan bigwan blong pulum ol man we oli waes, blong oli luksave se oli nidim blong stadi Baebol.