Jeova i Mekem Ol Promes Blong Hem Oli Kamtru Long Ol Man Blong Bilif
“Yumi save bilif long God, se hem bambae i save mekem ol promes blong hem oli kamtru.”—HIBRUS 10:23.
1, 2. ?From wanem yumi save bilif fulwan long ol promes blong Jeova?
JEOVA i askem long ol man blong hem blong kasem mo holem wan strong bilif long hem mo ol promes blong hem. Man we i gat bilif olsem, bambae i trastem Jeova fulwan, se bambae i mekem ol promes blong hem oli kamtru. Tok we i kamaot long God i talem se: “Jeova blong ol ami i mekem strong promes ya se: ‘Tru ya, bambae i kamaot olsem mi talem finis. Advaes we mi givim finis, bambae i kamtru.’ ”—Aesea 14:24.
2 Tok ya, “Jeova blong ol ami i mekem strong promes ya,” i soem se promes blong hem i strong se bambae hem i mekem ol tok blong hem oli kamtru. From samting ya, Baebol i talem se: “Trastem Jeova wetem fulhat blong yu. Yu no mas stanap long prapa waes blong yu nomo. Long olgeta samting we yu yu mekem, lesin long hem, mo hem bambae i mekem ol rod blong yu oli stret.” (Proveb 3:5, 6) Taem yumi trastem Jeova God mo letem waes blong hem i lidim yumi, ol rod we yumi folem bambae oli sua blong lidim yumi i go long laef we i no save finis, from we waes blong God i “wan tri blong laef long olgeta we oli kasem.”—Proveb 3:18; Jon 17:3.
Trufala Bilif Long Taem Bifo
3. ?Olsem wanem Noa i soemaot se hem i bilif long tok blong Jeova?
3 Ol store blong bifo long saed blong ol samting we Jeova i mekem long ol man we oli gat trufala bilif, oli soemaot se yumi save trastem ol tok blong hem. Olsem nao, bitim 4,400 yia bifo, God i talem long Noa se Bigfala Wora bambae i ron blong spolem wol long taem ya. Hem i givim oda long Noa blong wokem wan bigfala sip we ol man mo anamol oli save stap sef insaed long hem. ?Noa i mekem wanem? Hibrus 11:7 i talem se: “From we Noa i stap bilif long God, taswe hem i harem tok ya blong God, taem God i talemaot ol samting ya long hem fastaem, we i no gat man i luk yet. Taswe hem i obei long God, i wokem bigfala sip ya blong sevem olgeta famle blong hem.” ?From wanem Noa i bilif strong long wan samting we i neva bin kamaot bifo, samting we “i no gat man i luk yet”? From we hem i gat naf save long saed blong ol samting we God i mekem finis long ol man, blong bilif se olgeta samting we God i talem oli mas kamtru. Taswe, Noa i sua se Bigfala Wora ya bambae i ron.—Jenesis 6:9-22.
4, 5. ?From wanem Ebraham i trastem Jeova fulwan?
4 Wan narafala man we i gat trufala bilif, hemia Ebraham. Kolosap 3,900 yia bifo, God i talem long Ebraham blong kilim Aesak, wan pikinini nomo we hem i gat wetem waef blong hem Sera, mo givim hem i go long God olsem wan sakrifaes. (Jenesis 22:1-10) ?Ebraham i mekem wanem? Hibrus 11:17 i talem se: “From we Ebraham i stap bilif long God, taswe taem God i traem hem, hem i rere blong kilim pikinini blong hem, Aesak, blong givim i go long God.” Be, long las menet, enjel blong Jeova i blokem Ebraham blong i no kilim Aesak. (Jenesis 22:11, 12) Nating se i olsem, ?weswe Ebraham i save agri blong mekem samting ya? Hibrus 11:19 i talem se: “Ebraham i stap tingbaot we God i save mekem man i laef bakegen long ded.” Be, ?olsem wanem Ebraham i save bilif long laef bakegen sipos hem i neva bin luk wan man we i laef bakegen, mo sipos i no gat wan store blong soem se samting ya i kamaot finis?
5 Rimemba se, Sera i gat 89 yia taem God i mekem promes se bambae tufala i gat wan pikinini boe. Sera i no moa naf blong karem pikinini, i olsem we basket blong bebi long bodi blong hem i ded. (Jenesis 18:9-14) Be, God i mekem basket ya blong bebi i laef bakegen, nao Sera i naf blong bonem Aesak. (Jenesis 21:1-3) Ebraham i save se sipos God i naf blong mekem basket blong bebi long Sera i laef bakegen, hem i naf tu blong mekem Aesak i laef bakegen, sipos i nidim blong mekem olsem. Rom 4:20, 21 i tokbaot Ebraham, i se: “Tingting blong hem i no seksek long promes blong God, bilif blong hem i stap strong. Mo hem i kasem paoa from we i bilif. Nao hem i leftemap nem blong God, from we i savegud we bambae God i save mekem olgeta samting we hem i promes blong mekem.”
6. ?Wanem tok blong Josua i soemaot se hem i bilif long Jeova?
6 Bitim 3,400 yia i pas finis, Josua i laef, mo hem i gat bitim 100 yia blong hem. Long ful laef blong hem, hem i luk ol wok blong God we oli givim risen long hem blong trastem God. Hem i talemaot from wanem hem i trastem God, i se: “Yufala i savegud long olgeta hat blong yufala mo long olgeta laef blong yufala, se long olgeta gudfala tok we Jeova, God blong yufala i talem long yufala, i no gat wan tok we i mestem. Olgeta evriwan oli kamtru finis. I no gat wan tok nating we i no kamtru.”—Josua 23:14.
7, 8. ?Ol Kristin long faswan handred yia we oli gat bilif, oli mekem wanem blong sevem laef blong olgeta, mo from wanem?
7 Samwe long 1,900 yia i pas, plante man we oli gat tingting daon oli soemaot trufala bilif. From ol profet tok blong Baebol we i stap kamtru, oli luksave se Jisas i Mesaea, mo oli lesin long ol tijing blong hem. Ol trufala samting we i kamaot mo ol tok blong Hibru haf blong Baebol, oli olsem wan strongfala pruf we i pulum olgeta blong bilif long ol tijing blong Jisas. Taswe, taem Jisas i talem se God bambae i jajem Judia mo Jerusalem from we oli no stap tru long hem, oli bilif long tok ya. Mo taem hem i talem wanem samting we oli mas mekem blong sevem laef blong olgeta, oli obei long hem.
8 Jisas i talem long ol man blong bilif ya se, taem ol ami oli kam fulap raon long Jerusalem, oli mas ronwe. I tru, ol ami blong Rom oli agensem Jerusalem long yia 66 K.T.a Be, wantaem nomo, ol ami ya oli aot, oli gobak, we i no gat risen blong samting ya. Hemia nao saen blong soem long ol Kristin se oli mas ronwe, from we Jisas i bin talem se: “Taem we yufala i luk ol soldia oli stap kam plante raonabaot long Jerusalem, blong oli blokem ol man insaed, yufala i mas save we bambae i no longtaem oli save spolem ples ya olgeta. Taem yufala i luk samting ya, yufala we i stap long Judia, yufala i mas ronwe blong go haed long ol hil. Mo yufala we i stap insaed long taon ya, yufala i mas aot. Mo yufala we i stap long ol ples raonabaot long taon ya, yufala i no save go insaed long hem bakegen.” (Luk 21:20, 21) Ol man we oli gat trufala bilif, oli aot long Jerusalem mo ol ples raonabaot long hem, oli ronwe i go long wan sefples.
Risal Blong Fasin Blong No Gat Bilif
9, 10. (a) ?Olsem wanem ol lida blong skul blong ol man Jyu oli soem se oli no bilif long Jisas? (b) ?Wanem i kamaot long olgeta from we oli no bilif?
9 ?Olgeta we oli no gat trufala bilif, oli mekem wanem? Oli no ronwe taem oli gat jans. Oli ting se ol lida blong olgeta oli save sevem olgeta. Be, ol lida ya mo ol man we oli folem olgeta, olgeta tu oli luk ol pruf blong soem se Jisas i Mesaea. Taswe, ?from wanem oli no wantem bilif long hem? From we hat blong olgeta i nogud. Fasin ya blong olgeta i kam klia bifo finis, taem oli luk we plante man oli bilif long Jisas afta we hem i mekem Lasros i laef bakegen long ded. Jon 11:47, 48 i talem se: “Ol Farisi ya wetem ol jif pris oli mekem miting wetem Kaonsel blong ol man Isrel [Sanhedrin, hae kot blong ol man Jyu]. Nao oli talemaot long olgeta, se ‘?Bambae yumi mekem olsem wanem? From we man ya [Jisas] i stap mekem plante saen ya. Sipos yumi letem hem i stap gohed long fasin ya, bambae olgeta man oli save bilif long hem. Nao bambae ol man Rom oli save kam spolem haos blong God blong yumi, wetem ol man blong kantri blong yumi.’ ” Vas 53 i talem se: “Nao long dei ya, olgeta oli agri se oli mas kilim Jisas i ded.”
10 !Jisas i mekem wan nambawan merikel—hem i mekem Lasros i laef bakegen long ded! Be ol lida blong skul oli wantem kilim Jisas i ded from samting ya. Rabis tingting mo fasin blong olgeta i kam long klia ples moa, taem “ol jif pris oli agri se oli mas kilim Lasros tu i ded, from we plante man Isrel, taem oli luk hem, oli no moa biaen long ol lida blong olgeta, oli bilif long Jisas.” (Jon 12:10, 11) !Lasros i jes girap long ded, nao ol pris ya oli wantem se hem i ded bakegen! Oli no tingbaot samting we God i wantem no samting we i gud long ol man. No gat. Oli tingbaot olgeta nomo, oli wari se bambae oli lusum haenem mo ol gudfala samting we oli haremgud long hem. “Olgeta ya oli wantem tumas blong mekem ol man oli glad long olgeta, oli no tingbaot blong mekem God i glad long olgeta.” (Jon 12:43) Be oli kasem pei blong fasin blong olgeta blong no bilif. Long yia 70 K.T., ol ami blong Rom oli kambak bakegen mo oli spolemgud ples mo nesen blong olgeta, wetem plante blong olgeta tu.
Ol Man We Oli Soemaot Bilif Long Taem Blong Yumi
11. Jes afta long yia 1900, ?olsem wanem samfala oli soemaot trufala bilif?
11 Long laswan handred yia tu, i gat plante man mo woman we oli bin soemaot trufala bilif. Eksampel, jes afta long yia 1900, ol man oli gat tingting se bambae i gat pis mo bambae oli gat plante samting. Be, olgeta we oli bilif long Jeova oli stap talemaot se wan taem we i moa nogud i bitim olgeta narafala taem bifo, bambae i kamtru. Hemia taem ya we Baebol i tokbaot long Matyu japta 24, 2 Timote japta 3, mo long sam narafala vas tu. Samting we ol man ya blong bilif oli talemaot, hem i kamtru, stat long 1914 wetem Faswan Bigfala Faet Blong Wol. Tru ya, ‘ol las dei’ oli stat, mo ‘laef long wol ya i kam strong tumas.’ (2 Timote 3:1) ?Olsem wanem ol man blong Jeova long taem ya, oli save ol trufala samting we bambae oli kamaot, be ol narafala man oli no save? Olsem Josua, oli bilif se i no gat wan tok blong Jeova we i no save kamtru.
12. Tede, ?ol man blong Jeova oli bilif fulwan long wanem promes blong Hem?
12 Tede, i gat kolosap sikis milyan man blong Jeova long wol, we oli trastem hem. From ol profet tok blong God we oli kamtru finis, oli save se i no longtaem, bambae hem i spolem ol raf mo rabis fasin blong wol ya. Taswe, oli sua se kolosap nao, bambae oli luk we 1 Jon 2:17 i kamtru, i se: “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem i stap we bambae i no save lus samtaem.” Ol man blong God oli bilif fulwan se Jeova bambae i mekem promes ya i kamtru.
13. ?Yu save trastem Jeova go kasem wanem mak?
13 ?Yu save trastem Jeova go kasem wanem mak? !Yu save trastem hem fulwan! Nating se yu lusum laef blong yu naoia long wok blong hem, bambae hem i givim wan laef we i moagud olgeta, taem hem i mekem yu yu laef bakegen long ded. Jisas i promes se: ‘I gat taem i stap kam we ol dedman we oli stap long ol gref blong rimemba [hemia se, God bambae i tingbaot olgeta], bambae oli harem voes blong hem, nao bambae oli aot long beregraon.’ (Jon 5:28, 29) ?Yu yu save wan dokta, wan lida blong politik, wan sayentis, wan bisnesman, no wan narafala man we i save mekem samting ya? Ol samting we ol man ya oli mekem finis oli soem se oli no naf blong mekem samting ya. !Be Jeova i naf, mo bambae hem i mekem ya!
Nambawan Fyuja Blong Olgeta We Oli Bilif
14. ?Baebol i promes se ol man blong bilif bambae oli kasem wanem nambawan fyuja?
14 Jisas i soem se wan nyufala wol aninit long Kingdom blong God long heven, bambae i sua blong kamtru. Hem i se: ‘Olgeta we oli kwaet man oli save haremgud, from we bambae oli tekem wol ya i blong olgeta.’ (Matyu 5:5) Hemia i laenap wetem promes blong God long Ol Sam 37:29 se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” Mo jes bifo we Jisas i ded, hem i talem long wan man blong brekem loa we i soemaot bilif long hem, i se: “Bambae yu yu stap wetem mi long paradaes.” (Luk 23:43) Yes, Jisas, we i King blong Kingdom blong God, bambae i meksua se man ya i laef bakegen long wol ya, wetem jans blong stap laef olwe long Paradaes. Tede tu, ol man we oli bilif long Kingdom blong Jeova, oli save tingbaot blong stap long wan Paradaes, we “[God] bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem.”—Revelesen 21:4.
15, 16. ?From wanem bambae i gat pis long nyufala wol?
15 Traem tingbaot nyufala wol ya. Traem tingbaot sipos yumi laef long hem naoia. Wantaem nomo, bambae yumi luksave se ol man oli hapi mo oli stap tugeta long pis. Oli haremgud long ol samting we Aesea 14:7 i tokbaot se: “Fulwol i spelgud, i no moa gat trabol long hem. Ol man oli hapi mo oli singaot from glad.” ?From wanem oli mekem olsemia? Wan samting se, i no gat lok i hang long doa blong ol haos. I no gat nid blong samting ya, from we i no moa gat wan stilman no wan man blong mekem raf fasin. Samting ya i sem mak long tok we God i talem finis se: “Bambae oli sidaon, wanwan, aninit long rop blong frut we oli wokem waen long hem mo aninit long figtri blong olgeta. Bambae i no gat wan samting we i mekem olgeta oli seksek.”—Maeka 4:4.
16 I no moa gat faet tu, from we long nyufala wol ya, i tabu blong faet. Ol man oli mekem ol tul blong faet oli kam ol tul we oli save yusum long kwaet fasin. Aesea 2:4 i kamtru fulwan, i se: “Oli tekem hama, oli tanem ol naef blong faet blong olgeta oli kam aean blong brekem graon long garen mo ol spia blong olgeta oli kam sisis blong katem han blong tri. Bambae wan nesen i no leftemap naef blong faet agens long narafala nesen, mo bambae oli no moa lanem fasin blong faet.” !Be hemia nao samting we yumi bin tingbaot se bambae i kamtru! ?From wanem yumi talem olsem? From we plante man we oli stap long nyufala wol ya oli bin lanem fasin ya bifo finis, taem oli mekem wok blong God long olfala wol.
17. ?Wanem ol samting we Kingdom blong God bambae i mekem i kamaot long wol ya?
17 Wan narafala samting we yu luk long nyufala wol ya, hemia se i no moa gat fasin pua. I no gat man we i stap long wan rabis haos, no we i putum ol klos we oli nogud, no we i no gat wan ples blong slip. Evriwan oli gat wan gudfala haos, wan graon we i klin mo i gat ol naesfala tri mo flaoa long hem. (Aesea 35:1, 2; 65:21, 22; Esikel 34:27) Mo i no gat man i hanggri tu, from we God i mekem promes blong hem i kamtru se bambae i gat fulap kakae blong olgeta man. Hem i promes se: “Yu mekem we bambae i gat plante kakae long ples ya, we ol hil oli fulapgud long ol kakae.” (Ol Sam 72:16) Yes, Kingdom blong God bambae i lidim ol man blong mekem wan ambawan paradaes long fulwol, olsem God i wantem long taem blong Iden.—Jenesis 2:8.
18. Long nyufala wol, ?wanem sam samting we bambae oli no moa spolem ol man?
18 Yu yu sapraes tu long paoa we ol man mo woman oli gat long bodi blong olgeta. Hemia from we long nyufala wol ya bodi mo tingting blong olgeta i stretgud olgeta. I no moa gat sik, soa, mo ded. I no gat wan man we i stap sidaon long wan wiljea no i stap slip long wan bed blong hospital. Olgeta samting olsem oli finis blong olwe. (Aesea 33:24; 35:5, 6) !Mo ol anamol tu, oli no save kakae man, from we paoa blong God i mekem olgeta oli kam kwaet!—Aesea 11:6-8; 65:25; Esikel 34:25.
19. ?From wanem evri dei long nyufala wol bambae i wan dei blong “harem gud”?
19 !Ol man blong bilif oli mekem wan nambawan kampani blong man long nyufala wol ya! Olgeta paoa we oli gat, gudhan blong mekem ol samting, mo ol sas samting blong wol ya, oli yusum long gudfala fasin, i no blong spolem ol narafala man. Oli wokgud tugeta, oli no traem winim narafala. Mo yu save trastem olgeta man we yu toktok wetem olgeta, from we ‘oli ol man we Jeova i tijim olgeta,’ olsem promes blong God i talem. (Aesea 54:13) From we evriwan oli obei long ol loa blong God, wol ya i ‘fulap long save blong Jeova olsem we solwora i kavremap graon.’ (Aesea 11:9) Tru ya, olsem Ol Sam 37:11 i talem, evri dei long nyufala wol ya i wan dei blong “harem gud.”
Wan Hapi Fyuja i Sua
20. ?Yumi mas mekem wanem blong gat wan fyuja we i fulap long pis?
20 ?Yumi mas mekem wanem blong kasem hapi fyuja ya? Aesea 55:6 i talem se: “Yufala i mas lukaot Jeova taem yufala i gat jans yet blong faenem hem. Yufala i mas singaot long hem taem hem i stap kolosap yet long yufala.” Mo taem yumi stap traehad blong faenem hem, yumi mas gat tingting ya we Ol Sam 143:10 i tokbaot, i se: “Yu yu God blong mi, plis yu tijim mi blong mi mekem ol samting we yu yu wantem.” Ol man we oli mekem samting ya, oli save wokbaot tru long ol las dei ya, we oli no gat poen long fored blong Jeova, mo oli save tingbaot wan nambawan fyuja. ‘Yu luklukgud long gudfala man, we laef blong hem i stret, from we hem bambae i gat pis long laef blong hem long fyuja. Be ol man nogud, bambae Jeova i spolemgud olgeta. Ol rabis man bambae oli no gat wan gudfala fyuja.’—Ol Sam 37:37, 38.
21, 22. ?God i stap hivimap hu tede, mo olsem wanem oli stap kasem trening?
21 Naoia, Jeova i stap singaot ol man blong evri kantri we oli wantem mekem wil blong hem. Hem i stap hivimap olgeta blong oli kam ol faswan man blong stap long nyufala wol ya, olsem profet tok blong Baebol i talem, i se: “Long laswan haf blong ol dei [taem we yumi laef long hem naoia] . . . plante man bambae oli go, mo oli talem se: ‘Yufala i kam, bambae yumi go antap long bigfala hil blong Jeova [trufala wosip blong hem we i hae olgeta], . . . Hem bambae i tijim yumi long ol fasin blong hem, mo bambae yumi wokbaot long ol rod blong hem.’ ”—Aesea 2:2, 3.
22 Revelesen 7:9 i tokbaot ol man ya olsem “wan bigfala hif blong man, we olgeta i plante tumas . . . oli kamaot long olgeta kala mo long olgeta laen, mo long olgeta kantri, mo long olgeta lanwis.” Vas 14 i talem se: ‘Hemia ol man ya we oli pastru long taem ya blong bigfala trabol,’ hemia i min se oli laef tru long en blong rabis fasin blong wol ya. Grup blong ol man ya we oli save kam ol faswan man blong stap long nyufala wol, i kasem sikis milyan naoia, mo evri yia i gat plante moa oli joen long hem. Olgeta man ya blong Jeova we oli gat bilif, oli stap kasem trening blong laef long nyufala wol we bambae Hem i mekem. Oli stap lanem ol save blong Baebol mo ol narafala save we bambae oli nidim blong mekem wol ya i kam wan paradaes. Mo oli bilif fulwan se Paradaes ya bambae i kamtru, from we ‘God i save mekem ol promes blong hem oli kamtru.’—Hibrus 10:23.
[Futnot]
a K.T. i minim Kristin Taem.
Tingtingbak Long Ol Poen Ya
◻ Long faswan handred yia, ?wanem i kamaot long ol man we oli no gat bilif?
◻ ?Ol man blong God oli save trastem hem go kasem wanem mak?
◻ ?Ol man blong bilif bambae oli gat wanem fyuja?
◻ ?Yumi mas mekem wanem blong gat wan hapi fyuja long nyufala wol we God bambae i mekem?
[Tok Blong Pija Long Pej 18]
Naoia Jeova i stap hivimap ol man we oli save kam ol faswan man blong laef long nyufala wol